2012/02/16

我最喜愛的十套日劇

寫過最喜愛的演員,又寫過喜歡的劇集歌曲,不如今次呃文講吓喜歡的劇集吧。

 (唉…寫吓寫吓有啲日文有啲中文添…好煩呀…)

ひとつ屋根の下 (同一屋簷下) 04/1993
我諗呢套係自《阿信的故事》之後第一套喺電視台睇到入腦的吧。當年唔知原來大佬曾經有個「三上頭」瘋魔少女,純粹覺得佢好攪笑。跟住二佬靚仔到爆(不過我鐘意睇佢喺《美女與野獸》同菜菜子多啲啫…)。故事而言小的比較喜歡第一輯(也真心覺得二佬跟內田有紀襯過同小雪囉…)故仔多啲,咁輕輕鬆鬆一家人吵吵鬧鬧有笑有淚咁就一集,滿溫馨的;但啲人腳我又鐘意第二輯喎,小的好喜歡三佬同松隆子的一pair,可惜後尾又要玩絕症(其實第一輯前段小梅被強姦都好慘…),老套到嘔,扣咗分。


ロングバケーション(Long Vacation) 04/1996
不要問我點解無晒啲經典如《101次求婚》、《東京愛的故事》(主題曲超好聽喎﹗)、《愛情白皮書》、《魔女之條件》、《新聞女郎》呀咁,因為除了無記會播的《同一屋簷下》、《金田一》之外,第一套我自己迷到癲咗的已經去到96年既《悠長假期》,我都唔明點解,話說那水蛇果報成日講,有一野我覺得個男主角幾令仔,就趁補習過海時去信和買了一隻VCD回家睇(係,當年信和係會逐集出的﹗仲要賣幾十蚊隻架﹗),一睇不得了…男二係令仔過男一號一萬九千幾倍喎﹗(佢喺酒吧度以拳頭亂彈琴之後再彈技術性擊到瀨名實在是太型了﹗)

又講開,咁多年小的真係無乜中過木村大神招(Smap…雖然《夜空ノムコウ》我是覺得超好聽既),反而中了竹野內豐的毒,反過來睇番佢啲舊作如《星之金貨》咁(是咁啱在亞記播的…唔係買VCD啦…不過播的原因唔係竹野內豐紅,係酒井法子呀﹗)

但豐哥好多劇都係悶到暈的,除了樓下會講的一套《できちゃった結婚  》外,另一套心水是SP流轉の王妃.最後の皇弟》,跟常盤貴子演皇弟和皇弟婦,好感動的…嗚。《Boss》本來小的寄與厚望但豐哥只係行行企企食飯兩味,《流星sell純愛但ok,係難得一套睇得晒既,呀…同埋《瑠璃の島》…

Um,題外話講完。其實我又唔係太投入故仔的愛情線,小南唔要貌似錢小豪的攝影師追番瀨名(溫柔的男配永遠係得唔到女主角架﹗)((日劇都好鐘意玩悔婚?)),跟住松隆子(唔記得角色名添…)唔要暗戀佢的瀨名而戀上野獸真二,但又欲迎還拒,成堆人都勒住勒住,睇到有啲嬲的說。

Um,此劇殺著是個主題啊﹗Don't worry, be happy嘛,個lifestyle係令當時小的好響往,希望第時能為個咁型的大人(雖然…而家…um…努力緊啦)。同埋配樂/插曲到主題曲首首都好好聽﹗當年小的明明零用錢不多,竟然可以迷到又買VCD又買OST﹗勁啊﹗同埋翻睇番呢,除了啲衫少娘外(93年第一《屋簷》,係大娘﹗仲京京過《日本風情畫》﹗)

因為呢套戲,小的好鐘意竹野內豐、松隆子和廣末涼粉,就係唔過大神的電,怪哉。


救命病棟2401/1999
都說小的鐘意睇職業劇嘛,《妙手仁心》(98)和《ER(好難得我睇外國劇的)都看得津津有味,日本的梗係唔放過。(但我無乜興趣睇無記新既《On Call 36小時》…硬覺得好似講粗口…)((另,呢張相應該係最新近的一輯既…))

如果我無記錯,我已經唔記得次序係睇一二三睇邊輯先,也撈亂晒啲人物情節,只記得好爆炸地有一場係江口洋介用電鋸截肢定唔住拎番支鐵枝出嚟,又血又痛又盛咁睇到勁驚,但又好配服佢咁勁喎,真係救到個人嘛。菜菜子姐第輯係新人嚟的,好似係第一日返工就遇到交通意外要即場做野,但就俾前輩江口鬧到死死吓咁。(講起我又想睇番添…)…咁《妙手仁心》好少出外景,成日都係喺醫院急症室入面之嘛,睇呢套咁多外景覺得好新奇好刺激囉﹗(也是我覺得《Code Blue》流fei的原因…)

如果我無記錯,第輯好似係地震定唔知乜之後講救災的。前一兩年好似出咗第輯…未睇。講到我好想翻睇添…

Um,江口洋介叔叔呢套野度好cool好型,跟《屋簷》的大佬完全唔同。菜菜子姐我無睇佢最經典的《GTO》、《魔女之條件》(反倒很喜歡主題曲《First Love》…btw…我有睇《貞子》喎﹗)、《大和撫子》呀咁…我係由呢套《救命》開始睇佢,之後順手睇埋《美女與野獸》,跟福山雅治一齊的,好好睇﹗原來新聞報導員唔可以搭lift架﹗同埋要搶收視的嗎?(也是我覺得《Top Caster》流fei的原因…)

To Heart 07/1999
呢套因為係happy ending(to certain extent唔係…因為阿男主腳裕二打唔到拳的說…),所以排名是比《Summer Snow》高,除了個好慘的結局,人腳和劇情而言我又鐘意《Summer Snow》或《前男友》多啲…不能不提睇幾千年都唔知睇晒未既《金田一》…呃…咁典算呢…

後來先知原來呢套同光一既《PS. 元氣俊平》係同季打對台,我係n年前喺亞記睇過一次,個人唔太鐘意瀨戶朝香(佢太大隻了﹗)…To Heart》係同學大推,過後幾年先有機會睇(呃…好難得那一水有正版碟買的﹗),雖然深田恭子件頭都比剛哥大件,但齋睇樣襯好多嘛﹗又說,當年睇《神呀﹗請給我多點時間》覺得深田公主啲戲還不錯,《To Heart》唔使咁慘情又愛滋又生bb又要死又盛咁,佢慘極都係阿男一走去鐘意個姐姐啫,舒服好多(其實我係唔太prefer慘情戲的…)

話說,劇中深田公主手提掛了一個籤筒電話繩…小的真係跟住去買了一個…(不過唔係劇中那個郵筒狀的啦…)XD

另,呢套劇的配樂、樂曲(我鐘意《Life》)同名主題曲都好好聽的說。


天使が消えた街 (天使消失的街角)  04/2000
我有無講過小的熱愛KinKi係呢套劇開始?應該都講過係某年無記明珠台無啦啦整咗個Johnny's Hour播劇又播J+人的綜藝節目,攪到小的從此聽聽埋埋鬼咁多J+人既歌。又說同一水除了呢套《天使》之外仲播咗長瀨大叔的《巨星夫婿》,又係讓吾等追得如癡如醉的。

Um,其實n年前亞記播《沒有家的女孩2》時阿王子的演出讓吾等友儕如癡如醉過一水,但當年小的無睇。反倒是無乜人一齊追的《沒有天使的街角》(←無記譯名,親切啲…)小的自己一個追到癲咗,又去信和進貢完一輪一晚清晒。係,當年《長假》都無咁癲,呢套係第一套小的一晚清晒的劇…超癡線。

劇情是十萬個老土的,但王子個角色有齊小的中招元素(謎之聲:甚麼是中招元素呢?),而且跟之前鄰家男孩角色相距甚遠,是很有新鮮感的。小的當年係癲到跟住去買puma tracksuit同埋搵劇中那條民族風的銀飾電話繩的說…。又據說呢套劇啲兄弟情係取材自湯告老師套《Rainman》,我可以很認真地搵咗呢套戲的VCD來看的。然後再買埋隻OST嚟聽(繼《長假》之後另一套買埋的囉…)…但原來KinKi首主題曲《もう君以外愛せない無收錄在內喎﹗(同時發現原來呢首歌就係李彩rain《你要記得我》的原曲)…於是走去搵KinKi的碟啦,唱片店內有一隻就買咗…典知收錄的是《D Album》我買錯了《E Album》…囧﹗從而發現原來KinKi啲歌都唔錯,開始了一條龍的生涯…囧﹗

唔關套劇事喎﹗哈哈哈哈。話說睇完呢套先發現戲入面做光一爸爸的蟹江敬三喺《銀狼怪奇ファイル》度都係做佢爸爸﹗(話時話,《金田一》在香港的知名度應該高過《銀狼》很多吧?但《銀狼》是很好睇的﹗雖然我依然接受唔到井之原快彥同秋山純係中學同學…呀,秋山都退咗社好耐啦喎﹗)((2/12/15後按:蟹江爸爸過咗身了…噢))

又說,n年前睇《同一屋簷下》內田有紀同福山雅治係一pair,那時佢正值當紅。到年後的劇佢都仲係女主角,不過人氣大不如前了(接住佢人氣急升的安室2000年上下都係谷底呢…囧)。跟住另一女角酒井媽媽,呢套野應該係佢產子復出之作嚟既,俏麗依然,只係之後啲毒后事件就真係…呃…估佢唔到。


できちゃった結婚  (奉子成婚?)  07/2001
Um,呢套喺無記播時係譯做《一夜夫妻要結婚》的,很騎呢但都幾貼題,劇中廣末涼粉和竹野內豐又確係一夜夫妻,之後有咗攪到要結婚的說。

其實呢套係偶然見到,咦,除了男女主角都係小的飛佛之外啲十卜停都好勁,阿部寬和妻夫木聰喎(另外好似有石田百合子同唔記得邊個),睇﹗um,是輕輕鬆鬆的,豐哥好難得唔係做啲lala面既角色嘛,雖然結局是有一點太煽情(bb的一part跟《神呀》一樣喊到我死),但都無損小的對成套劇的喜愛,睇住二人從唔相識到因為bb逼住一齊,中間出現啲問題(唔知點解喺日本令有情人要散的原因一定係有個人要到海外),分開後才發現原來同對方已有感情了…oh﹗最後懶係高潮就終於大團圓結局。都話,大團圓我會加分的。

另,如果我無記錯,千葉真一係做涼粉爸爸架﹗

另另,本身我唔多鐘意Hitomi,但佢首《is it you》確係幾好聽(唔知點解佢成日同人撞歌名,記得佢有一首歌同步姐撞名,跟住又跟安室一樣有首《love 2000》…呃…唔鐘意囉總之),另另另就係睇呢套劇首《Your eyes only ~曖昧な僕の輪郭~而識Exile,呢隊野之後一路都有留意佢地啲歌…真係滿不錯的…。

(我好似成日都話首歌好聽而鐘意套劇?哈)

大奥~第一章~  10/2004
呢套係喺無記睇的,次序係呢套先再睇菅野美穗演的那套《明治篇》,據說無記係特登跟番個時序嚟播,仲認真到搵咗如妃嚟做播之前既小簡介環節的說。04年那水播完《金枝》同《大長金》,呢啲女人鬥嚟鬥去的劇突然好hit,《大奧》無啦啦被套上日版《大長金》之名喎…噢,其實我無睇《大長金》的…

Um,先入為主嘛,咁睇先咪印象深啲。《第一章》係春日局鬥阿江與夫人,跟住將軍瓜咗就到阿萬做正室(如果我無記錯的話)。最好睇係松下由樹跟高島禮子的鬥戲,高島禮子行出嚟勁有《金枝》陳秀珠演的皇后的feel,好貴氣和霸氣(於是我再追埋睇佢另一套又係鬥嚟鬥去的《女系家族》,都不賴的);而場景、對白、服飾又好細緻認真,最緊要係適當時候會有解說(年青化咗既時代劇啊﹗),緊湊唔悶兼而有之,之後再播03年的《明治篇》反而覺得有少少失色(定係話第二套《大奧》拍得好咗?)。再跟住的《華之亂(好驚﹗藤原紀香﹗)再失色…我都受唔住之後的電影版…拍完未架其實?好煩呀﹗

講開又講,日本係咪得一個江戶城場景?睇光一某個MV係呢條橋,《大奧》又係呢條橋,睇《真夜中彌次與喜多》又係呢條橋,《虎與龍》都係呢條橋喎﹗可唔可以稱佢做日版橫店呢?(21/1/16後按:應該係呢個江戶村~)

電影版後感(唔知點解寫《大奧》多過《Hero》的):《Hero》~在戲院睇電視
21/1/16後按:好期待英龍華姐的兩集《大奧》SP耶﹗

タイガー&ドラゴン (虎與龍)   04/2005
上面講過Johnny's Hour播《巨星夫婿(←無記譯名,親切啲…)小的友儕們係熱追嘛,咁基於長瀨大叔係光一王子的大親友…於是小的係加咗啲分,暗暗去一條龍佢啲劇,我都唔記得個次序應該係睇《虎與龍》先定《My Boss My Hero》先,總之就係有一水失驚無神中長瀨大叔毒,於是狂煲佢啲劇,再發現宮藤官九郎啲劇好正點,再一條龍晒《池袋西口公園》、《Stand Up》、《木更津貓眼》、《曼克頓愛的故事》等等,最熱愛就係《虎與龍》囉~

My Boss My Hero》排名都好高的,不過《虎與龍》多多個宮藤座鎮,嬴咗囉。《巨星夫婿》第輯本來好好地的,第輯又無啦啦畫蛇添足rerun,仲要將角色弱能化(sorry,真係要咁講),將第輯留下的美好印象完全破壞了﹗囧﹗

Um,講番套劇,落語我唔知係乜來的,但睇劇中小故事,啲人時裝變古裝扮鬼扮馬咁又好好笑,但奇在古裝時空和現代虎兒的版本又夾得番,仲會睇到會心微笑添﹗跟住時裝部份虎兒無啦啦拜師到跟師父和組長的父子情滿感人的。就算知道晒啲劇情,翻睇(係…我又翻睇了)還是覺得好好笑。睇《夜王》和《一公升眼淚》時覺得北村一輝和藥師丸博子好正經的,佢地竟然都出現在《虎與龍》到攪怪一番,好新奇啊﹗點解佢地會出現既?

Last but not least,阿龍二啲設計真係好騎呢…可說是岡田准一的破格之作﹗(咦,佢係剛哥個大親友,唔通我咁鐘意睇呢套就因為呢套劇有齊KinKi二人的好友?﹗)


たったひとつの恋 (唯愛)   10/2006
我懷疑因為光一王子做《Pop jam》主持時KT係負責伴舞的,於是對呢個哥哥仔有莫名的偏好(雖然阿仁哥…um…唉…呃)((3/7/14後按:得番四個添咋﹗田中聖都無埋…))(((2/12/15:就快得番三個﹗嗚))),到佢地出道時我又會聽佢地啲歌又會睇佢地啲劇咁。

《唯愛》(嘩…乜呢張相咁唔靚既﹗)可說是娘到不行,人行元素同《愛情白皮書》、《Orange Days》一脈相承,永遠能夠apply的古怪男一深深吸引女一,同時溫柔男二又鐘意咗女一,當女一被男一傷害到時男二就張開佢雙手,當男一發現女一正投向男二時就發力追番,之後女一就回到男一懷抱,令男二黯然神傷咁。同時有個男三係攪gag的,女二就見女一情感煩惱為佢解憂咁,同《求婚大作戰》係一樣架﹗(詳見《鬥魚》一文內的bullet points﹗)

呢套又懶係悲情,男主角就有個爛賭阿媽病中小弟,女主角就大病康復咁,仲整多個千金小姐跟窮小子大對比,然後又要整多轉男主角阿媽勒索女主角家人,攪到二人返唔到轉頭…噢﹗最娘的是分開既原因又係女主角要離開去第二度呀﹗(不過今次係北海道…)…好娘呀﹗但唔知點解我又睇得好投入…可能啲人腳我OK掛?阿龜梨大哥耍帥是ok(但應該唔ok佢既人係相當多…啲收視…),而小的又好鐘意綾瀨遙,加咗分。

其實那一水的劇第一套諗起的是悲情之霸《一公升眼淚》,但實在係太慘了﹗睇戲睇到喊試過好多次,但喊到扯晒蝦倒是第一次(仲要睇睇吓結局媽媽打電話嚟,聽到把聲ware成咁嚇鬼死佢),於是,跟KinKi的《人間失格》一樣成為覺得好睇但太慘於是不翻看系列了。


魔王  07/2008
Arashi可能係繼Smap之後另一個無乜特別中過招的J+組合,呢個group除了二宮和也之外小的也無特別追睇邊個的劇(自從睇完《我們的勇氣未滿都市》之後,小的是相當ignore松本潤的…原因不明),偶然(我相信係偶然)睇咗集《魔王》之後竟然熱愛起上嚟仲開埋一條龍追斗真同學的劇,究竟點解呢?

就是說小的唔鐘意睇悲情片,不過呢套報仇故事小的又睇得出奇入神,雖然成瀨的報仇手段神得太神了,所有timing都可以夾得咁準,而且佢都要有相當財力先可以喎﹗就呢個正邪對調,睇直人可唔可以擺脫成瀨的復仇大計,二人結局如何,過程是相當緊湊,真係想快啲睇下一集的說(係,當年係逐集追的)Um,結局是悲情既,不過又未傷感到要列入永不翻看系列,偶然(係偶然)會開嚟回味吓,哈哈哈。

小的竟然仲認真到連韓版都睇埋,想話呢…熱血刑警個原版好.醜.樣﹗(um,泡菜國的東東小的還是選擇性熱愛的說…哈哈)…都係斗真同學好~哈。

舊文(以十一集寫到三篇係咪勁先﹗三十集的《烈火雄心3》我都係開三篇嚟鬧咋﹗)
********************************************************
話說09年之後小的忽然轉channel去番煲港劇,直到上年聖誕節先煲了一套《家政婦三田》引翻起睇日劇的意欲,不過又未有一套真係去到熱愛既程度(嘔的倒有個心水)

寫住咁多先,完。

6 則留言:

  1. 我淨係睇過4部。你搞到我又想寫添!

    回覆刪除
    回覆
    1. 寫啦寫啦…

      我睇劇係嗰輪鐘意邊個就一條龍佢啲新舊作,於是有啲劇無飛佛參演的話,就一世都唔會睇囉~哈哈…

      刪除
  2. 魔王我都係睇完日劇版所以就去睇韓版,但我睇了一集就放棄,sorry,我都係睇樣囉,唔理劇情比日版好,但睇完一版後就有啲睇唔落....

    同一屋簷下也是我第一套睇的日劇呢!多得無線囉,我都覺得第一輯比第二輯好,嗰時勁鍾意架,連soundtrack都買賣

    救命病棟我覺得4無之前1,2,3咁好睇囉,同嗰時話呀大佬出事,所以大佬啲戲份都少咗,同菜菜子個髮型真係唔係好掂

    回覆刪除
    回覆
    1. 韓版《魔王》除咗啲人醜樣啲同長啲之外都ok既,佢集數多描述比較細緻,日劇版有啲電影感,好多時用配樂、畫面呀構圖去做過氣氛,同韓版各有好處咁啦…

      《同一屋簷下》第一輯夠warm又夠輕鬆惹笑,除了啲人造型娘啲外真係唔錯的,可惜的是幾年後rerun就變咗灑淚的老套版…破壞晒第一輯的美好印象囉…

      《病棟》我未睇第四輯…我想睇番頭三輯先…當年好鐘意dreams come true首主題曲…覺得好型好stylish的說…

      刪除
  3. Hihi iceko,

    謝謝妳的分享。

    啊, 我和妳一樣, 對smap及arashi冇興趣, 但我很喜歡竹野內豊! 真係唔知點解佢成日拍埋d題材唔多吸引的劇, 我第一次睇佢, 應該係《星之金幣》? 套劇好悶好慘, 但佢好型!
    同時, 因我老哥嗰時好鍾意常盤貴子, 就攞咗套《理想的姞婚》嚟睇, 好好笑, 佢好可愛, 加上佢低沉磁性之聲, 咁多年嚟, 佢都係perfect man 。 (二千年出現韓星張東健與其爭寵)

    我都好like《同一屋簷下 》有親情愛情, 有靚仔有攪笑, 心中排頭位。(嗰時二佬福山雅治好紅)

    《Long Vacation》唔知點解, 我冇睇晒, 可能嗰時太細個, 對姐弟戀冇咩興趣, 加上我唔多like廣末, 竹野內潺又唔係主角, 就冇咩興趣。(但OST好聽)

    《救郚病棟24時》睇咗第二同三輯, 好睇, 三輯地震深印象d。

    妳唔講《To Heart》我完全唔記得咗呢套, 深田潺雖然樣靚身圓, 但嗰時都想睇。

    《できちゃった結婚》我都係睇無記, 對不起, 我不喜歡廣末, 但因有竹野內, 所以又睇晒。

    《大奧》勁追, 無記先播SP, 首三集春日局鬥阿江與夫人, 劇力萬均, 嗰時好多女同事追看。

    我反而冇睇《タイガー&ドラゴン》 (嗰時忙咩呢? ) 睇咗《My boss my hero》超爆笑!! 喺屋企笑到癲咗。

    《一公升的眼淚》嗰時都經典, 實有睇, 咁啱隔離組日本仔A.M.勁似男主角, 喺我想喊時候, 就會諗起佢, 覺得好滑稽, 嘿嘿。

    我自己好鍾意天海佑希, 所以都好鍾意《女王的教室》, 而《BOSS》一二輯有晒兩個飛彿加埋玉山鐵二, 我係仆到去睇的 (呢幾日好傷心, 玉山真係できちゃった結婚, 嗚嗚~)。

    等陣先, 雖然我對木村冇咩興趣, 但佢套《Change》係好睇的, 有埋阿部寬, 睇咗2次(我好勁)。

    另外, 因2010 (係得套《飛特族買個家》《新參者》好睇, 套極度期待的金在中《素直になれなくて》睇到反眼) 及 2011年的日劇好一般, 我離棄咗, 走咗去睇韓劇, 但《家政婦三田》令我對日劇重燃希望。

    喵~

    回覆刪除
    回覆
    1. re:瘋膏

      完全唔知點解呢個留言會變咗spam…今日先喺setup一版到撈番出嚟…大囧﹗

      竹野內豐:其實我終意睇佢嬉皮笑臉多過苦口苦面囉,《長假》之後都去到《できちゃった結婚》…(《boss》佢係大茄…)…或者佢覺得苦口苦面戲比較挑戰到演技掛?

      《同一屋簷下 》>>有一水我幾like 三佬…二佬多年來都like,不過未到竹野內豐咁會追劇睇囉…哈…

      《Long Vacation》>>>第一套癲咗喪追的日劇,情意結使然…仲令我中埋竹野內豐招…不過唔知點解我咁多年都無特別中過木村大神招…

      《救命病棟24時》>>>有一輪想補番睇…其實都唔記得細致的劇情了…

      《To Heart》>>>當年同而家深田公主都一樣圓潤的說…

      《大奧》>>>《大奧》唔知點解會被稱為日版《大長金》…囧﹗不過我覺得佢越拍越爛了,去到《華之亂》已經有啲難頂,之後的電影版和sp…直頭是巧京京﹗

      《タイガー&ドラゴン》 >>>要俾心機聽明啲落語gag先識笑囉…《My boss my hero》真係超癲…完全估唔到長瀨可以咁癲…

      《一公升的眼淚》>>>大結局女主角死時喊死我呀﹗嗚﹗而麻生同學其實一路我都覺得佢同套劇格格不入…好似路人咁掂行掂過…

      《boss》>>>我因為有豐哥先睇…turn out佢係二打六…卒之無睇晒了…

      《飛特族買個家》>>>爛尾…未睇完…哈哈…
      《素直になれなくて》>>>無睇…但據說很可怕喎﹗

      2011年我係聖誕時先補元睇番《家政婦三田》,其餘的…《還有第11人》囉…其餘的我都講唔出有乜劇了…

      刪除

要講幾句嗎?﹗XD