2006/11/02

日本風情畫

曾幾何時無記很多幾分鐘的資訊節目,在早上(十點幾十一點的時間)或下午(差不多六點)或深夜時播一播。這些節目簡而精,我甚至覺得比正式節目好 看。印象中曾經有個《識多一點點》,是講廣東話別字還是常識?印象好模糊,但當年極愛看,記得是個鬍鬚叔叔做主持,益智程度直迫《成語動畫廊》;另外一種是風土人情類,有個介紹祖國的《好大的風》,每次都是祖國風景配女子在山頭唱著極有祖國風味的國語歌(所以我覺得《大江南北》好看點);另一個就是逢做必 看的《日本風情畫》。

我懷疑這節目是本人崇日情意結的源頭,小學時看電視時間多的是,早上下午卡通片劇集前前後後總會有《日本風情畫》睇,當時唔知此片來是日本政府用來作海外宣傳,只覺得片中的風土人情都極有趣,總之和身邊港人港事截然不同,節目無間斷播了十幾年,東洋文化成功植根本人小小心靈。當然啦,用來宣傳自己,講的盡是最美好一面,根據其官網所講,《日本風情畫》主旨是:

Japan Video Topics offers a comprehensive view of Japanese culture, society, nature, science and technology etc.

片子播來播去都係嗰啲,2000年仍播著90年代片,片中人的衣著停留在《東京愛的故事》的模樣,睇番都幾得意;但偶然會播啲新野,例如無啦啦介紹當紅偶像步姐,或索尼電子狗狗咁保持可觀性。本人最有興趣還是講東洋文化類,例如甚麼節日、甚麼祭,看看本人地人準備,有甚麼慶祝活動;另一款是傳統文化,記得有集講藝妓,短短幾分鐘介紹的內容比看完成套《藝妓回憶錄》還要多﹗要不就是講日本人的創意,好記得有一集係講紙的用途,小至摺紙大至弄出防地震家具,勁﹗ 片雖然舊,但真係開眼界,小時候覺得睇完好似去咗日本旅行咁,無出發但好興奮。

現在我少看無記,無記又少播風情畫(好像已安排在明殊播了),現在已好少相逢。

提到《風情畫》,不得不提無記的六點重播劇時段。有一期為追劇就算要補習都一定準時六點前飛奔返家,那時段雖然只得半小時,但播過好多令本人回味無窮的劇,因為日日劇的關係,睇埋睇埋唔少《日本風情畫》。

最「欣喜」emoticon是本人最愛的古版《神鵰》苦等(幾勁﹗係苦等)四年後終於重播,當年本人更癲到每日準時守候飛廣告錄低三十集的《神鵰》慢慢回味;不要忘記,那時段只播半小時,即係三十集 x 2 總共錄了六十次。誰叫當年無記未有VCD推出,錄下來的八餅《神鵰》被我翻煲又翻煲了好幾年(劇情我已睇到曉背~),直到VCD推出才退役。

另一套本人睇到如癡如醉的係《戲說慈禧》, 播出時正值暑假(原來套戲92年出品,我看時已是幾年後的夏天了…),歷史+清裝正中本人下懷,得閒的本人日日追。慈禧的故事本人早已睇書睇到曉背,睇劇 反而係第一次(如果唔計晶哥的《慈禧秘密生活》的話),縱然演員一個都唔識,照煲。做慈禧的女角姓甚名誰早已忘了,倒記得做咸豐的哥哥後來有拍無記的《聊 齋》(認演員係本人嗜好~),真係識的演員可能只有演肅順的馬景濤,可能被之前的《倚天》影響了,真沒想過張無忌會變咗清朝大官;後來看了《孝莊秘史》, 覺得他做多爾袞更入型入格(不知何解),總覺得肅順呢款攻於心計的唔係馬生既樣。

***
從網上找來一些風情畫內提過的題目:

藝能界潮流—濱崎步
回收的種類—紙張、鋁罐、膠樽、玻璃、輪胎、泡膠
水火箭—日本學生玩意,山間架纜的工程人員更會利用水火箭拉纜索帶
集體/多層/地下停車場—尤如碌架床的停車場
包裝的藝術—日本人事事講求精細華麗─食物要精巧,衣物要別緻,就連一塊草餅,也包裝成工藝品似的
日本皇室—一片父慈子孝、兄友弟恭的模樣,一個儒家典範。曾介紹過剛出嫁的公主清子,那時她二八年華,旁白說她喜歡觀鳥,閒時愛訓練導盲犬
花見—お花見,即賞花,主要指賞櫻。每年春季有不少人晚露宿於東京的上野公園內,只為佔得一個賞花好位置
巨蛋—位於北海道札幌市的札幌巨蛋,98年開始動工,01年完工,係特別為02年世界盃而建。為世界級足球賽事而設的地草部份有機關,可以將整個草地伸展到戶外,需要時就移入場館內(約需40分鐘)。可舉辦其他活動而不破壞草地,一舉兩得
風情畫資料:
http://web-japan.org/jvt/ch/index.html
http://web-japan.org/index.html

22 則留言:

  1. 其實我都好鍾意睇日本風情畫...
    而家都會播2000年後的片了~
    睇得最多的應該新日本銀紙同廣島個水上鳥居...

    2nd Nov 2006 16:49 PM

    回覆刪除
    回覆
    1. 而家直頭無機會朝早睇電視,所以好耐無睇過update的日本風情話…
      銀紙嗰集我都有睇過…片中的銀紙可能一早唔係新架lu…

      3rd Nov 2006 10:50 AM

      刪除
  2. 被妳喚醒我的一點點記憶。
    當年我讀書年代都十分喜愛追這齣「戲說慈禧」,沒想到這個題材,可以拍到這麼有戲味,一點也不師奶,一點也不老土。

    講開外購劇,不得不提還有超經典的「鬼馬小夫妻」...前後分了2輯。。。


    2nd Nov 2006 22:38 PM

    回覆刪除
    回覆
    1. 「戲說慈禧」節奏明快,人物造型服裝靚(唔似台劇的累贅),景靚,完全唔似祖國製作,有機會都想搵番套vcd呢翻煲…
      「鬼馬小夫妻」我無睇過呀…係邊樹出品?﹗
      係有收費台之前重播劇時段好多滄海遺珠劇睇,有啲仲好睇過黃金時段三線劇~﹗


      3rd Nov 2006 11:50 AM

      刪除
  3. 當吹懷舊風好了。

    2nd Nov 2006 22:58 PM

    回覆刪除
    回覆
    1. 懷舊風我一年到晚都吹緊﹗哈哈

      3rd Nov 2006 11:51 AM |

      刪除
  4. 哩個節目,我最記得係,新知播到變舊知...

    你果然係追星天后,咁有恆心,唔知呀古生幾時來你哩度留言呢?


    3rd Nov 2006 02:26 AM

    回覆刪除
    回覆
    1. 完全係資源運用最佳示範…00年仲有93年的睇…

      古先生,嗚嗚…我f.2時見過佢真人但唔敢問佢拎簽名呀…我後悔咗好多年…嗚嗚…

      3rd Nov 2006 11:54 AM

      刪除
  5. 我淨係記得佢講世博講到爛..
    播左好多次...
    過左好多年都重播

    3rd Nov 2006 10:56 AM

    回覆刪除
    回覆
    1. 可見無記幾環保…播到變咗懷舊風情畫…

      3rd Nov 2006 11:59 AM

      刪除
  6. 「戲說慈禧」,好似個陣6點播,播左半年有多,我幾乎睇左大半,哈哈,不過真係ok架bor。
    我last一次睇日本風情畫好似係04~05年,有時有新片的。唔知而家播多左o的咩娛樂直播、交易現場至唔係無記咋 -_-

    4th Nov 2006 02:01 AM

    回覆刪除
    回覆
    1. 「戲說」真係唔悶架,而且啲演員做型又靚,當年好仲意睇架,不過無記好似無再播過LU
      而家返工無咩睇電視,已唔知有咩節目了…

      5th Nov 2006 01:54 AM

      刪除
  7. 記得最近一次看日本風情畫系舊年既事,播既系03(定系04呢?)既片,講建築既,以家距唔系停播左咩?

    4th Nov 2006 09:33 AM

    回覆刪除
    回覆
    1. 無留意呀,返工無咩睇電視…望一望個節目表就唔覺有啦

      5th Nov 2006 01:54 AM

      刪除
  8. 大陸朋友22/5/12 09:59

    好感慨
    我系大陸朋友,日本風情畫我每次都睇,現在捂知有沒呢,好像沒留意,回憶起以前就好懷舊,時間過得好快,眨眼就快

    5th Nov 2006 11:31 AM

    回覆刪除
    回覆
    1. 而家應該無啦,看過無線的節目表,中英文台都無…
      我係懷舊精,細細個就仲意舊野~~
      而家人大咗,確係覺得時間過得快,尤其是出呢做野之後,轉眼就一個月﹗

      7th Nov 2006 11:29 AM

      刪除
  9. 除了日本風情畫, 我也很懷念無記有段時間在下午四五點期間會播日本的兒童故事短片, 畫風不統一, 基本上每個故事都不同, 真的和味十足, 不知道環保的無記什麼時候會重播呢

    7th Nov 2006 19:39 PM

    回覆刪除
    回覆
    1. 四五點呢個時間我睇唔到好多年啦,已經脫咗節,但你講的日本兒童故事好似有啲印象…
      仲有曾經有套外國卡通叫「動物運動會(或奧運會?﹗」,係攪笑動物參加運動會,好笑的,又係好耐無睇過了…

      8th Nov 2006 09:07 AM

      刪除
  10. 四五點呢個時間我睇唔到好多年啦,已經脫咗節,但你講的日本兒童故事好似有啲印象…仲有曾經有套外國卡通叫「動物運動會(或奧運會?﹗」,係攪笑動物參加運動會,好笑的,又係好耐無睇過了…

    我講嘅日本卡通確實係十幾年前嘅事, 唉, 想話扮吓細都唔得添, 動物奧運會我都有印象, 開頭睇係幾好笑嘅

    8th Nov 2006 10:54 AM

    回覆刪除
    回覆
    1. 日本風情畫都係十幾年前開始睇,哈哈,我都扮唔到細,心境細咪得囉
      嗰時無記啲短(幾分鐘)的卡通好多都好好睇,不過唔記得晒了

      10th Nov 2006 09:40 AM

      刪除
  11. 我細個時唔鐘意睇日本風情畫嫁,
    因為睇唔明。
    但依家偶爾看到時,
    又覺得幾得意,成日諗如果有日本
    風情畫外,
    有埋英國風情畫、法國風情畫…
    咁大家o既文化知識又會多好多~
    (其實我係好奇~)
    至於睇「戲說慈禧」果時,我好似係讀左小學無耐,
    唔知點解好鐘意睇。(細路睇好似好怪咁。)
    到依家都唔多記得內容、人樣、歌曲。
    淨係記得劇名。
    在網上又搵極都搵到呢套野的資料。
    終於有人話鐘意呢套野啦!

    18th Nov 2006 16:18 PM

    回覆刪除
    回覆
    1. 英國風情畫或法國風情畫我有興趣啊﹗但印象中除了日本這個外,應該只有講中國的《好大的風》…好似無其他國家的了…
      《戲說慈禧》真係幾有戲味的,無記有無cut我就唔知,不過成個故仔好流暢,講歷史野深入淺出咁,又唔覺佢作好多野落去,當時我係追少一日都唔安樂的說﹗哈哈…
      這套台灣應該有更多相關資料,香港就真係好靜,直頭零反應囉…

      5th Oct 2008 00:26 AM

      刪除

要講幾句嗎?﹗XD