2006/11/15

[港劇]《射鵰》馬拉松

話說仍未有修肺台的年代,早午晚重播時段不時有經典好野重播,令本人有幸一睹電視界(或曰無記)黃金年代的出品。當年未有internet又無vcd,想睇舊劇只有等無記重播,在《香港電視》和《K-100》薰陶下本人對此等經典一直引頸以待,記得有段時間兩點幾時段不斷重播舊金庸劇集,中正本人至愛古裝劇死穴,焉能不看。90年代無記重播之餘自己又落力重拍,一時間金庸小說比課本更熟。

舊版當中,本人最愛的是83版《射鵰》,五十九集,要煲晒是一項壯舉。(雖然一路以來在本博出鏡率最多的是《神鵰》)

和《神鵰》一樣,本人係睇了新版《射鵰》(94年)在先,95年無記重播才看舊版,不知無記當年係咪想紀念翁美玲,剛好在她離世十年時重播她的名作,同時夜晚的《城市pig leg》又有翁的回顧,加埋《香港電視》的介紹,令本人追看意慾高漲。

重播之初還未到學校夏令時間,每日唯有錄低再睇(後來CD店偶遇國版VCD,二話不說買返屋企煲~);本來,我覺得94年版都幾好睇,看了舊版才知新版是 「豬肉」唔係「珠玉」。一看之下不能自己,每日神心地準時坐低收看,如是者五十九日,所以話,睇晒成套劇係個壯舉。今次沒有《神鵰》的掉轉先入為主,一看翁出場就迷上了,覺得她活脫脫就是書中走出來的蓉兒;只是現實中蓉兒沒有書中蓉兒的幸福,不過,這是後話。

套劇成六十集分三部份:分別是《鐵血丹心》、《東邪西毒》和《華山論劍》,三部都有自己的主題曲,基本上可以當係三部劇來看。個人最喜歡看中間的《東邪西毒》,前後兩部氣氛比較沉重(或嚴肅),中間就輕鬆點,主打講靖蓉二人到處遊歷,當中分別遇到東邪西毒南帝北丐仲有死鬼咗既中神通個師弟老頑童(好長呀個list),感覺好像睇緊旅遊特輯;同時本人好欣賞的曾江黃藥師呢part最多戲,當真有個咁型咁古怪的阿爸先可以生個咁古靈精怪的女,他演來情深款款(包括對住個女和死了的老婆)又蠻不講理(要不怎稱得上係邪),新版駱應鈞本人雖然都好欣賞,但就覺得佢唔夠邪。

不得不提就係本人極欣賞的楊康—即係苗僑偉,呢位楊生完全體現了何謂:「男人不壞女人不愛」,相比靖蓉二人,楊康和穆念慈的感情發展苦澀得多,最終更是悲劇收場;唔知係咪編劇都係咁諗,無啦啦加咗場梅超風主持二人成親的戲,雖然感覺怪怪,但總算比番少少美好回憶穆念慈。本人太欣賞苗生亦正亦邪的演出(其實楊康係奸角的說…),無記新版的羅家良我覺得ok,幾年前播的李亞鵰版楊康變成了少年包青天,頓時接受唔到…有咁靚仔的阿爸先生到個楊過咁靚仔既仔架嘛…

武打方面當年好硬橋硬馬,個個打到"ha ha"聲的好有功架,和90年代飛來飛去的古裝劇又是另一番風景,不知當年是budget問題還是藝人都prefer親身上陣,舊版劇好少見有替身的場面,好勁。然而成套劇最令本人難忘的是靖哥哥使出「降龍十八掌」前的一套馬步,他發功就好似美少女變身咁有咋動作要打,劇中就整了個黑色景,back住靖哥哥打打打之後就有個龍頭飛出嚟,轟轟轟的就打到敵方一仆一碌;基本上唔係問題,不過靖哥哥耐不耐就轉第二套戲服,然而發功片中的打仍是上幾轉穿的戲服,極不連戲,係個笑位。

睇番十幾年前的戲(以95年計),除了古裝街因為電視城搬了而唔同咗樣之外,佈景場地其實差 唔多。山和石頭依然係噴得唔勻稱的發泡膠(拎住舊咁既石扮重極考演技而且幾好笑),山洞廠景依然係一塊野上面舖啲沙,只係新版背脊個天空畫得真啲,無咁礙眼。港劇就是如此,取景唔係郊野公園就係自家廠景,真係好難和國版劇那些一望無際大草原匹敵。好在,近年無記肯出外景了…

這一排煲得日劇多,忽然想轉轉口味煲煲古裝劇,順便迎接下星期苗uncle新劇。不過,五十九集,好長呀…
**************************************
舊文N篇:
轉:香港古裝片造型30年的變化
[港劇]射鵰英雄傳(83翁美玲+黃日華版) 23/09/05
[雜談]我最「難忘」的電視劇角色…@TBB
我看金庸小說1~電視劇篇

18 則留言:

  1. 59集, 真係會煲到嘔架喎...

    15th Nov 2006 20:07 PM

    回覆刪除
    回覆
    1. 而家我個pat pat好似有針咁,坐唔定去煲,19集都未必得﹗

      16th Nov 2006 09:01 AM

      刪除
  2. 我好耐之前買左一套,成5舊幾水,不過個人覺得物有所值,始終83版既射鵰係我睇過最好睇既射鵰,有珍藏價值,當年既翁美玲真係演活左黃容既角色,正!

    15th Nov 2006 22:54 PM

    回覆刪除
    回覆
    1. 呢個投資係值既,套劇入面主角配角都咁一流,淨係睇人已經抵番
      翁美玲拍射鵰時仲係新人,出來效果竟然挑戰到前人米雪,又後無來者,真係勁

      16th Nov 2006 09:04 AM

      刪除
  3. 『轟轟轟的就打到敵方一仆一碌』哈!哈!形容得很抵死喎!

    15th Nov 2006 23:18 PM

    回覆刪除
    回覆
    1. 當年的武打無而家飛呢飛去咁悅目,但就好有中國功夫嗰種硬橋硬馬feel,好多時仲係演員親自打,真係好勁架﹗

      16th Nov 2006 09:05 AM

      刪除
  4. 我前排(幾年前)一次過煲晒三套射鵰,我覺得,做得最好既係老頑童啵!

    15th Nov 2006 23:30 PM

    回覆刪除
    回覆
    1. ohhh…我捧黃藥師~~
      肥舅父真係好入型入格,佢個樣夠卡通,真係好似成日掛住玩的細路~

      16th Nov 2006 09:06 AM

      刪除
  5. 最吸引同最有型的,我覺得是曾江的黃藥師。他真的演活了這個角色,後來再拍的,暫時未見有人比得上!

    16th Nov 2006 00:29 AM

    回覆刪除
    回覆
    1. 我意佢係蓉兒發脾氣亂掉野時同個女一齊亂掉野,反而唔係勸或鬧佢,果然係邪,掉完一輪又同個女一齊大笑,錫個女都鍚得型過人﹗哈哈

      16th Nov 2006 09:09 AM

      刪除
  6. 那套舊版真的是經典...

    今時今日,我知道,要我睇59集,根本頂唔往

    16th Nov 2006 01:03 AM

    回覆刪除
    回覆
    1. 我都係,當年就得,而家睇兩三集就坐唔定,睇日劇都係頂多三集要做吓第二啲野郁吓

      16th Nov 2006 09:10 AM

      刪除
  7. kakakakakakaka
    哇, 真係好神奇呀~~
    我又係超級舊射鵰fans喎~~~
    雖然佢有59集, 但係大大話話我都翻煲左十次以上
    當然頭果幾集講佢喺大漠練功就無乜點翻煲嘞~~~~
    kakakakkaka

    你形容靖哥哥果個亢龍十八掌實在太搞笑~~~我忍唔住對住個mon爆笑!!!!!kakakakaaka

    呢呢呢, 仲有一度呀, 舊射鵰好多大明星做架其實~~~~有周星馳、吳鎮宇、歐陽波比、劉嘉玲、劉青雲....等等等等
    吳鎮宇好似最多野做, 佢死完又番生~~好好笑~kakakakaa


    16th Nov 2006 12:03 PM

    回覆刪除
    回覆
    1. 無計啦,呢套野真係好睇,睇一集就明﹗
      一見郭靖打我就笑,呢個笑位埋藏係我心底好耐架啦~~有人有共嗚實在係太美好了~~
      好多forum都有講明星做二打六,吳鎮宇係先做丐幫弟子再做唔知官兵定咩鬼架嘛,嘉玲係做華箏個妹仔~不過可以係套重頭劇度做二打六我都爭住去做lu

      17th Nov 2006 09:14 AM

      刪除
  8. domotoiceko : 然而成套劇最令本人難忘的是靖哥哥使出「降龍十八掌」前的一套馬步,他發功就好似美少女變身咁有咋動作要打,劇中就整了個黑色景,back住靖哥哥打打打之後就有個龍頭飛出呢,轟轟轟的就打到敵方一仆一碌;基本上唔係問題,不過靖哥哥耐不耐就轉第二套戲服,然而發功片中的打仍是上幾轉穿的戲服,極不連戲,係個笑位。

    我都記得呀,真係勁搞笑,唔知無記編導咁拍係咪受我係小忌廉變身啟發既呢?XDDDDDD

    16th Nov 2006 12:26 PM

    回覆刪除
    回覆
    1. 哈哈,都可能係呀﹗爭咗首變身主題音樂喎…

      17th Nov 2006 09:16 AM

      刪除
  9. 舊版「射鵰」都係本人最愛無記老劇。

    「降龍十八掌」個畫面好有日本特攝片feel,但係好搞笑。

    一個好的劇本就是有一種令人不眠不休追看的魔力,這是近年的港劇都經常缺乏的。


    19th Nov 2006 09:54 AM

    回覆刪除
    回覆
    1. 十八掌最攪笑就係套衫唔連戲,日本動畫變身時通常有啲光包住個人,著咩衫都唔知架嘛﹗
      港劇真係好少追,低了兩集已頂唔順。尤其是沉迷外劇,有對比之下好難返轉頭…

      19th Nov 2006 17:50 PM

      刪除

要講幾句嗎?﹗XD