2006/11/01

慢…萬聖節

昨天是萬聖節,新聞報導說老蘭滿是慶祝的人群,擠得警方要封路云云。昨晨同事問我夜晚會到那兒慶祝,登時一大個問號浮起…慶祝…慶祝甚麼?完全沒頭緒。放工最緊要當然係煲還未煲完的日劇啦…

某天行過某餅店外面見到的,左右兩邊的Sanrio變種餅creative吧﹗未夠,睇吓中間的哈老喂手指幾得人驚﹗呢間野有生意頭腦啊﹗

對節日的概念本人還停留在幼稚園介紹的新年聖誕清明復活(小妹幼稚園到中學讀的全是天主教學校嘛),再加上有假放的(小時候以為英女皇和孫中山生辰都係節日)日子就係節日。本人到中學才接觸萬聖節,說實在對這節日感覺不深,雖然知知地源由,總覺事不關己,對走上街扮鬼扮馬攞糖食興趣不大。

由於本人怕逼,節日反而少出街,多數留在家中或預先慶祝(或曰做節)。除新年正日走唔甩之外,清明重陽近年都提早個幾兩個星期拜山,聖誕元旦基本上都唔會出街倒數,最好是約埋三五知已匿埋一邊打牌扒地燒野食;甚麼煙花大會當然都唔會見到我(27/1/14後按:呀,寫文的時候仲未到會年年去看的日子?﹗),迫到滿街都係鬼的萬聖節梗係唔會有我份。

香港的節日商品化亦使本人怕過節,過節咩?買呢樣嗰樣啦,無買呢樣嗰樣算不上過節架﹗買完就要去玩,玩之前當然要裝身,於是又係買。彷彿每個節日都變成我們向各大商戶奉獻的日子。

怕迫怕買的本人一年最期待的就係新年,年初一到三好多舖頭都唔開,難得耳根清靜,走在街上唔會見到十幾廿檔電話上網追住sell你,條路都好行點。最緊要,新年一家人難得聚頭坐埋一齊,吹吹水打打牌聚聚舊,算是保持到最多節日的原意吧。當然,逗吓利是開心吓都係好重要啦。

說回鬼節,基於屋企唔會慶祝西洋版反而著重我國版的鬼節,年年趕及七月十四前燒衣極其重要,幾唔得閒都要買齊一大堆野落街燒衣。小時候樓下的街坊福利會仲會擺啲比例差唔多一比一大的紙紮貢品,印象中見過有車(Benz嗰隻),好大的屋(高過個細路,不過都係唔啱比例的…),橋(奈河橋?﹗唔知有咩名堂),還有男男女女公仔(好恐怖…)一大堆紙紮品放喺會址旁一排先拎去燒(應該用呢搵法師作法咁,不過我未見過)。每日放學行過見到又人又車又屋,日光日白都驚驚地。想來,西洋的鬼恐怖極來來去去都係吸血鬼、木乃伊呀咁,反觀中國人的鬼一個紙紮公仔都夠令人打冷震。

雖然我唔會特別慶祝萬聖節(其實應該點慶?﹗),睇人家設計的恐嚇死人手蛋糕、核突玩具、扮野costume都好開心(又係買野啦…),不禁佩服他們的想像力。有一年公司訂過個萬聖節蛋糕,上面有滿佈鮮血斷手和眼球幾個,雖然是朱古力、cream造成,味道仲好好好添…不過…諗起自己吞緊粒眼球落肚…真係想嘔…(20/05/2016:咁多年來我係去過一次海浪公園哈老喂咁大把…之後…就來沒有然後囉﹗~~~)

8 則留言:

  1. 根本沒所謂慶祝不慶祝,只是人們找個機會讓自己癲番晚罷了!
    另:「耐河橋」應是「奈何橋」吧!
    中國的紙紮公仔雖然簡陋,但驚嚇度絕對爆燈~~

    1st Nov 2006 18:44 PM

    回覆刪除
    回覆
    1. 同意啊,萬聖節只不過系一個狂歡既節日,相反七月十四果日就真系好恐怖emoticon

      2nd Nov 2006 11:23 AM

      刪除
    2. re:文風

      真係有人問我點慶…都唔知點答…
      細個見到樓下啲紙紮公仔真係好驚…仲要鬼咁大舊…
      奈河橋我只知個音唔知個字,謝指正~~

      2nd Nov 2006 12:16 PM

      刪除
    3. re:田中小百合

      狂歡唔啱我,除非第二日唔使返工啦…
      睇睇埋埋啲鬼片(十幾年前套鬼新娘嗰啲…)我勁驚啲著紅衫的中國鬼…

      2nd Nov 2006 12:19 PM

      刪除
  2. 萬聖節大餐,好鐘意架...
    核突野同低級趣味一向都係我杯茶(大笑)

    1st Nov 2006 23:20 PM

    回覆刪除
    回覆
    1. 咁你有無去嘆嗰啲血湯呀…手指大餐…眼球牛扒…
      整出呢真係幾像正架﹗

      2nd Nov 2006 12:17 PM

      刪除
  3. 重來都冇慶祝過這種鬼佬鬼節啦...

    2nd Nov 2006 01:20 AM

    回覆刪除
    回覆
    1. 我屋企都係…係中國鬼節時燒吓衣咁…

      2nd Nov 2006 12:18 PM

      刪除

要講幾句嗎?﹗XD