2006/11/23

新聞有感

自從家中無訂生果報後,我反而看多了報紙。無他,朝早排隊等車時二份免費報的阿姐有理無理照塞俾你,務求做到人人有「份」永不落空(唔怪得某免費報號稱自己派發量第一,咁樣塞俾人… )。當西裝哥哥拎咗《回條日報》後,《PM730》的阿姐就會九秒九塞份過去,咁我又無蝕底,咪上車睇完一份又一份。比起以前只睇生果娛樂版,現在由頭版港聞開始煲到尾。

然而近期港聞版真係熱鬧非常,越睇越覺精彩過娛樂版了。

蛋…

祖國又一加料食品,之前洗衣粉當發粉油炸鬼之創意令本人目瞪口呆之後又一巨獻。當然,食品始終係食落肚,以非法方式令自己產品成本低啲賣得多啲,但賺番呢的錢又能否recover番東窗事發後的商譽和人命的損失?也許,和他們講良心係有少少浪費口水…

總覺得祖國商人頭腦靈活,每次甚麼假野加料野其創意真意想不到,但可惜次次都放在衰野身上。若他們將這份創意留來發明新產品用於正途上咪幾好,為少少利益就攪到而家人人見國貨都驚。唉。或者,以一貫羅湖A貨的質素製作揉合名牌特色和新派風格的手袋衣飾益吓廣大OL都好丫﹗

咱們的傳媒當然大幅報導,周局長之前話無而家話有毒蛋事件相信有排比傳媒做文章。無他,含蘇丹紅蛋已流出市面,人命關天呀。但問題呢啦,看完報紙我知蘇丹紅係有害物質,但文中只描述樣本中含量又唔講埋比我聽咁既含量會點?而家局方話啲蛋含業丹紅量輕微,咁即係點?會唔會死人?驚都要有原因地驚架,咁輕微含量即係危險定唔危險?唔好淨係話我知蛋撻銷量跌啦…

叫阿仔留班的阿爸…

政府最近有個講「身教」的宣傳片,有個哥哥問個小朋友:「咦,小朋友,點解你咁乖既?」小朋友答道:「我學我爸爸媽媽架囉﹗有樣學樣,一家人嘛﹗」之後旁述就說:「係囉,身教真係好重要架…」……

今次呢位阿爸真係一個好既身教。呢位阿爸為細仔入名校就請校長讓小六的細仔留級;最後校長無同意,而細仔已升上中學。當然,父母望子成龍係好正常,而入到間好學校就係成龍的其中一步,幾多父母為咗子女入到心儀的學校無所不用其極,但是用到自己兒子1年光陰來換弟弟入學,對細仔都好唔公平,無端端的留級,他會怎樣想?弟弟又怎樣面對哥哥?感謝他還是要背著這個人情債?還是校長英明,拒絕呢個阿爸。

同場加映:某雜誌說袁靚靚口腫面腫的封面

呢個唔關時事回歸娛樂版。話說某日行過七仔見到某本雜誌封面寫著上題標語,真係滴大汗。請問有邊個大肚婆唔肥架?BB佗到八、九個月,個人仔都成六、七磅,再加埋羊水、胎盤,個孕婦有咩理由會唔肥?又邊有人淨係肥係個肚度其餘食身保持原狀?有請話我知,我未見過﹗如果有BB得嚟仲好似平時咁瘦,個BB唔成條柴咁?我驚過你。呢啲係常識呢架咋喎…

另一篇: 免"廢"日報
***

煲完《My Boss My Hero》,將大舉進攻《夜王》,自從睇完《大奧華之亂》之後對當中做奸臣的北村一輝極深印象,不禁想睇吓佢個時裝樣…好期待呢~~~

14 則留言:

  1. 來吧...成立北村一輝後援會香港分部...

    不過在下應該沒時間去看「大奧華之亂」...

    另外要看他的時裝樣應該看「醫龍」,「夜王」的他...是不屬於時裝及古裝的奇怪國度...


    23rd Nov 2006 18:43 PM

    回覆刪除
    回覆
    1. 呢個北村一輝後援會真的很前衛~~我問好多朋友仔都唔知佢係邊個,最多都係識阿部寬咋…
      睇咗兩集「夜王」,當中的北村一輝真的很耀眼,佢一出場就搶盡並他人的鏡﹗
      要看他的古裝樣是但一套大奧都得,原來三套都有佢份,個人最喜歡第一套他做菅野美穗老公的一套,唔知係咪佢劇中整咗pat胎記係塊面度,我諗咗好耐先記得係佢﹗

      25th Nov 2006 21:48 PM

      刪除
  2. 我成日都覺得中國農民漁民個個都是化學科博士的!

    24th Nov 2006 00:49 AM

    回覆刪除
    回覆
    1. 唔止漁民,商人和農民都有好多怪招…弊在次次都用係衰野度…


      25th Nov 2006 21:56 PM

      刪除
  3. ps* 近我追緊地獄少女,看完tv版覺得唔錯,決定追返漫畫版先..


    24th Nov 2006 00:50 AM

    回覆刪除
    回覆
    1. 改編野真係一浪接一浪停不了﹗我剛剛煲完的「my boss my hero」原來都係改編漫畫架﹗

      25th Nov 2006 21:56 PM

      刪除
  4. 大陸D 野真係你估佢唔到的...

    其中最經典, 我經常和朋友說的就是假雞蛋. 除了那位中國人外世上大概不會有第二位仁兄有如此創意, 竟然做出一個有殼有蛋白有蛋黃的假雞蛋...(再想雞蛋能賣多少錢? 竟然咁有心機去做...)

    原來你也和我一樣, 在小四下學期轉校呢~ 但我的原因只是因為舊區重建, 舊校清拆而已......但這樣轉一轉校就失去了小學的朋友了...(轉校後也還可以打入新學校的學生圈子, 但只認識一年多的小學同學就在小學畢業後失去聯絡了...)


    24th Nov 2006 11:50 AM

    回覆刪除
    回覆
    1. 係呀﹗真係唔明整呢啲假野冒住被人拉的危險,賺到的錢都無得享…只怕而家被揭發既案例只係千千萬萬個case的其中之一咋﹗
      我舊小學的同學仔好多都係街坊,所以轉校後媽媽們將埋飲茶時又可以坐埋一齊玩﹗不過升中學後就無咩聯絡lu

      25th Nov 2006 21:58 PM

      刪除
  5. 我以前都覺得假雞蛋好騎呢, 不過諗諗下, 蛋o係邊度黎? 雞囉. 冇雞又想賣蛋咁點? 咪整囉.
    可能買隻雞返黎養住生蛋成本重貴, 所以索性整出黎賣
    其實如此巧手, 整其他手作仔可能更有作為, 可惜可惜...

    24th Nov 2006 13:05 PM

    回覆刪除
    回覆
    1. 還有之前的洗衣粉油炸鬼,諗極都唔明有咩理由發粉會貴過洗衣粉…
      相比呢啲假野,原來羅湖a貨可愛好多架﹗(各大名牌生產商當然反對…)起碼唔會食死人先﹗

      25th Nov 2006 22:03 PM

      刪除
  6. 新聞真係越黎越好睇
    今日有熊貓屎做紙, 竟然有人買

    24th Nov 2006 15:19 PM

    回覆刪除
    回覆
    1. 環保喎呢個…真係天下之大無奇不有
      而家報紙總係喜歡以死人"lum"樓和呢啲奇聞來吸引讀者…

      25th Nov 2006 22:08 PM

      刪除
  7. 噫, 咁講真, 啲動物節目都有話熊貓本身ge消化系統其實同人一樣唔可以消化植物纖維, 所以熊貓屎做紙理論上應該行得通, 但係熊貓得嗰百零隻, 重要遲早去世界上唔同地方和番, 唔符合經濟效益啫。
    講開又講, 聽講有種咖啡ge原材料都係某種野生動物(好似係山貓?)將咖啡果食落周後排泄出來ge咖啡豆喎, 重要賣得好貴添, 比起上來, 熊貓屎報紙都唔係好難接受啫

    25th Nov 2006 12:15 PM

    回覆刪除
    回覆
    1. 咁幾廿年前種菜都係用米田共施肥既…今日同媽媽講開呢個話題,佢話見某環保組織話而家人和動物(貓狗)的米田共已因食得太多受污染的野唔可以用呢施肥…
      熊貓淨係食竹葉…可能仲未受污染架喎…

      25th Nov 2006 22:13 PM

      刪除

要講幾句嗎?﹗XD