2006/11/13

[雜談]萬千蒸瓜賀台慶

身為一隻professional電視精,又飲無記奶水大,我點能夠唔為無記最近一分為二的賀台慶活動寫番一言半語呢,最緊要,舉行了三份之二的台慶壯舉我竟然都看了…

想當年(又要想當年了﹗), 港姐、新秀和台慶是頭等大件事,節目播出當中懷著興奮心情早早完食晚飯、沖好涼,以最佳狀態迎戰,睇完九秒九爬上床瞓,待明天和同學仔分享箇中值得回味的細節。記得80年代台慶節目叫《龍鳳呈祥賀台慶》,多得無記好幾年前在星期六下午時份重播,讓我重拾對呢個早已遺忘節目的回憶;節目紅白味極濃,不外乎男女子組鬥嚟鬥去,呢條方程式而家都仲用緊,無記真「進步」啊﹗最堪回味的是當年藝員的瞓身演出,每年五虎/楊昐昐雜技式表演、盧海鵬(好似係?廖啟智?) 行鋼線等,看得目瞪口呆之餘又目不暇給,男女子邊隊嬴?管他,看得開心就行了。

80年代尾90年代節目改名叫《萬千蒸瓜賀台慶》專俾藝員賀壽,另外分拆一個歌星獨享的《濕碎歌星賀台慶》。《萬千蒸瓜》不再男女子大鬥發,主打係一個個表演項目娛賓,個節目好唔好睇就睇呢啲表演項目的質素。最令人難忘的當然是阿姐忘我演出的《熱咖啡》歌舞,想當年看得我we嘩鬼叫,印象中阿姐係斯文大方,高高在上兼不苟言笑,竟然可以咁既打份大跳歌舞?﹗話說回來我之所以看是因為為阿姐伴舞的廿八個美男當中有本人飛佛古黑子古眼神先生,我可是錄是了回味再回味,不過最回味都係完結後羅家英為阿姐披上外套乙件,woooo,好sweet啊﹗呢個表演太成功,後來阿姐再忘我演出(有一次係同搽到成個少林十八銅人咁既男子跳舞)都不能超越之前的珠玉。另一 難忘是食蟲(應該係95年),真係撞鬼,打份工打到要食蟲,食的難受睇的想嘔,難為啲司儀仲要係隔雜不停嘈叫食的藝員快啲食(食的當然是二、三線啦),真係陰功。呢幾年,環節不外乎重演當年經典環節或扮熱門劇集(尤記得那個終極恐怖版《金枝》),睇唔睇也罷,若不是有頒獎環節吊命,真係坐低睇都嫌廢事。

歌星賀台慶90年代初都非常熱鬧,有幾可見天王天后癲晒咁玩雜技遊戲架?﹗難得度仲勁過《軟硬製造》。同時當年度的環節真係幾有心思,本人最記得係郭先生林憶蓮鬥跳舞,《燒》crossover《第四晚心情》,型﹗還記得某年劉華的「X加X」顏色事件嘛?(是台慶還是歌星賀台慶,請指正﹗),他和周Vivian合演的趣劇除了呢句唔出得街的野外,其實幾好笑,因為劇中道具和家具都係由不同歌星扮的,頗有(抄)日本扮野大賽的味道。另外最愛就係出廣告前後群星合唱經典金曲,啲金曲其實唔重要,最重要係唱嗰個,睇佢有無甩咀、唱錯歌詞、自創歌詞和唱埋人地 嗰份,已極具娛樂性;同時會有好多意外收獲:咩呢位人兄係歌手?呢位人兄出過唱片?呢個係邊個?之聲此起彼落,認識到的「新人」絕對比年頭的《勁火羅金曲》為多。不過,又係公式的男子鬥女子,隨著好多大牌阿哥阿姐唔去,呢個節目成為二三線歌手的天堂,最後仲摺埋,上年先復生。

往事只能回味,做人都係向前看。

今年的《歌星賀台慶》,女子隊的陳天后容天后一貫的抵擋唔住劉華克人兩把伶牙俐齒,如上年一樣要靠Dodo姐頂住,好衰唔衰今年男子組多咗個呂方,Dodo姐回應非常就住就住,好攪笑。啲環節,我無睇到傳說中比Twins版好少少的楊版《帝女花》,看完Blog友回應,雖然我係千嬅粉都要慶幸自己無睇。那個真孖鬥假孖和甚麼肚皮加hip hop dance,如果排練多啲會好啲囉…都係有啲後悔睇咗。最後阿B的幾首和女歌手合唱、倫永亮、呂方的一首《沙沙的雨》(不知何解我想佢地兩個唱《總有你鼓勵》,雖然係倫和李國祥合唱的),以歌會友睇得最舒服。至於男子嬴定女子嬴?唔使講啦嘩。

今年新加的《萬千蒸瓜頒獎典禮》,我真係有心坐低睇的說(雖然拎埋個notebook邊睇邊煲《太陽之歌》)。一開始見又係Dodo姐做MC(今次得佢一個),仲以為睇緊金像獎… 又叫埋啲藝員奏樂伴住其他盛裝打份的藝員進場,噢,其實我係睇緊《勁火羅金曲》總選而已。數數手指今年我有坐低由頭追到尾的劇集數埋都唔夠五套(唔計食飯時被迫睇的…),所以重點唔係睇邊個得獎(反正我係明燈,我支持的實無獎…對唔住鄧萃雯),重點係睇啲人拎獎的反應—誰叫我太難忘上年某女藝人喊極都喊唔出的一幕,哈哈。全晚又真係有好多一上台就喊到阿媽都唔認得的,可能汲取咗上年的教訓,演技真係上咗好多層樓。

全晚我替得獎者高興的獎係得3個咁大把:第一個係馬國明得「飛躍男演員」,其實他今年的劇我只看過《女人唔易做》(其中一套我有特登追的劇),劇中大男人遇著大女人(徐子珊)新思想遇著舊思想,幾得意;加埋佢上台的緊張但幽默的謝辭(我最欣賞一句是:前輩塞錢入我袋又唔使我找錢﹗),本人對其欣賞度登時直線上升~第二個係《女人唔易做》得「最佳劇集」(還是最佳劇本?﹗),一因為劇中有如妃(自動加一萬分),二是看完這再看《男人之苦》(傳說是《女人唔易做》男人版…),有比較下即時覺得《女》劇好得多﹗第三個是馬小生憑鐵血保鏢(第二套我真係有追的劇集)得「我最喜愛的男主腳」,我知,唔係另一個馬德bell小生得變一定激死好多粉絲,其實我都唔知馬小生最佳在那,他在劇中的演繹和 《洛神》的三公子基本上一樣,佳係佳在他身邊的一眾無敵綠葉:郭鋒做的心水清爸爸,劉江的奸佬大伯,黎耀祥做的無鬼用二世祖,蔣志光和惠英紅的情深夫妻, 甚至是already tried her best的祥鳳姚子羚;呢部野一貫無記粗枝大葉風格(尤其是漕運一段,真係兒戲到…),係得一班演員演得好,睇得我回味再回味,而家有個人得獎好過無啦; 其實我最想黎耀祥拎男配腳,可惜佢敵唔過黃德ben的六舊腹肌。

看到女主腳和男主腳,真係估唔到無記咁有膽…。女腳嘛,為劇增肥咁大奉獻係會加分,但唔代表攞滿分(套野我睇咗少少架﹗),反觀阿蛇演出四平八穩(我食飯時被迫睇了…),無記自然…不過係估唔到無記夠膽兩個女主腳獎比同一個人,咁第時《勁火羅金曲》總選《最受歡迎男/女歌手》和《亞太區最受歡迎男/女歌手》會唔會係同一人?除咗劉華之外好似無咩人(尤其是女歌手)試過一人拎晒兩個獎架喎?﹗好期待。男主腳嘛,祝鄭先生好運了。

睇吓睇吓,點解無最佳主題曲既呢?怕且都係收錄係《男人味》或《女兒雄》兩集碟中是但一隻歌。諗諗吓如果得獎的是《火舞涼瓜》、《胭脂碎粉》嗰啲歌,又要請得獎者即席演唱…算啦都係…。最後不得不提, 《最佳外購節目》點解無一公升眼淚架?《女王的教室》都係剛剛做完之嘛…雖然我無睇過得獎的一套片,但無記配音組為《女王》、《神鵰》和那套得獎的阿 咩與阿咩(對不起真係唔記得個名)台慶特別版配得好攪鬼,配音組係得既﹗

賀壽節目做咗三入之二,最後的《萬千蒸瓜賀台慶》睇吓會唔會有mood睇電視啦。我反而有興趣就快播的《賭城風雲》,有本人熱愛的三哥啊﹗你頒獎都可以咁型地邊頒邊賣套劇廣告,唔睇都唔得啦﹗

07年報告:無乜歌星賀台慶
[港劇](誤)tbb萬千蒸雞頒獎典禮2011
[港劇](事後篇)tbb萬千蒸雞頒獎典禮2011

22 則留言:

  1. 馬浚偉其實的確是半爆冷,之前的風聲都吹是鄭家穎同馬德鍾的.

    不過高層見馬仔在無線服務左咁多年,個地位成日好似上上落落咁未曾穩定,所以今次送個獎俾佢正式肯定佢的地位.

    13th Nov 2006 14:30 PM

    回覆刪除
    回覆
    1. 可見另一個高大的馬小生唔夠高層歡心…
      不過見鐵血保鏢一係無獎拎,一拎就係最喜愛男角都開心既,雖然我真係想黎耀祥拎男配角多啲

      14th Nov 2006 09:11 AM

      刪除
  2. 哈哈!真是形容得幽默抵死.

    13th Nov 2006 16:42 PM

    回覆刪除
    回覆
    1. 學無記je,佢整咗壇咁有娛樂性的節目出呢…我唔睇咪好唔俾面,睇完又無理唔寫番兩隻字…

      14th Nov 2006 09:13 AM

      刪除
  3. 阿鄭生竟然攞男主腳獎,想唔信佢係無記既親生仔都唔得喇!

    13th Nov 2006 17:23 PM

    回覆刪除
    回覆
    1. 仲親過李克人﹗但係咁快就比個獎佢恐怕害咗佢,想當年玉螢小主拎完女主腳之後套套劇都死喎…

      14th Nov 2006 09:14 AM

      刪除
  4. 女主腳呢..我覺得肯增肥就唔係大哂囉,佢個把聲同浮誇既演技真係令我想打爆個電影機..反而阿蛇真係好d,至少把聲冇咁癲,火舞黃瓜佢都算做得唔錯喇

    13th Nov 2006 17:47 PM

    回覆刪除
    回覆
    1. 其實兩個我都唔幫,我最想鄧萃雯得獎
      而家九點半我就熄細電視把聲,唔係我平靜唔到個心情。阿蛇係穩陣,肥田街坊評價唔得咁咪比阿蛇跑出
      相比鳳凰或火舞黃瓜,我覺得阿蛇係金枝的爾淳做得更好,不過輸咗比玉螢小主

      14th Nov 2006 09:19 AM

      刪除
  5. 題外話,個獎座設計真係不敢恭維

    13th Nov 2006 19:53 PM

    回覆刪除
    回覆
    1. 無記出品,必屬佳品嘛,同佢啲劇一樣
      都好過幾年前勁歌嗰個人頭獎座,嚇親王菲架﹗

      14th Nov 2006 09:20 AM

      刪除
  6. 係呢~以前既頒獎禮真係超好睇GA~
    個年黎天王第一次攞最受歡迎男歌手獎,真係令我都開心到喊出尼呀~

    *不過我覺得呀余做戲真係唔錯WOR~又靚女~好過肥田好多~


    14th Nov 2006 10:55 AM

    回覆刪除
    回覆
    1. 哈哈,我感受到黎天王得獎你的喜悅,因為我都等郭天王得獎等咗好耐…不過佢當年X記天地線氣勢真係一時無兩
      阿蛇係OK,但一時間見得佢太多好想嘔,鳳凰之後隔咗一套戲又見佢有一套東方之珠,無記唔係無人得咁交關掛,播呢播去都係嗰幾個花旦…

      15th Nov 2006 09:19 AM

      刪除
  7. 我睇日劇, 台劇, 同韓劇, 唯獨無劇, 我近呢幾年真係冇一套正正經經睇. 我對上一套有追0既, 已經係金枝. 個年, 我真係覺得應該係鄧萃雯拎最佳女主角. 其他女角如黎姿同佘詩曼同唔錯, 但始終都係未夠班. 但係黎姿拎0左, 我明白到呢個獎無記對最佳女主角的定義, 唔係演技最好, 而係最想捧的人. 不過都好搞笑, 事與願違, 邊個拎個個獎, 邊個的星途就會唔多掂. 所以鄧萃雯冇得拎, 係呢個角度睇, 係可喜可賀的事.

    14th Nov 2006 11:03 AM

    回覆刪除
    回覆
    1. 可惜鄧經理人唔係無記,即係唔係親生女,親疏有別呀﹗我諗無記係比都係得我最喜愛啲,最佳就好難…
      我而家都係狂煲日劇,港劇通常翻睇舊劇,近排的就算有興趣睇得兩集都係頂唔順放迷,睇吓賭城風雲我頂得幾多集啦…

      15th Nov 2006 09:22 AM

      刪除
  8. 雖然拎埋個NOTEBOOK邊睇邊煲「太陽之歌」 <=== 洗唔洗呀... 哈哈哈!! 果然係精!

    台慶依家男星同女星實力唔太balance, 無以前咁好睇啦.

    "賭城風雲"呢... 唔知係唔係又係大時代澳門版, 不過如果Bobby要比劉青雲... 唔... Good luck!



    14th Nov 2006 11:48 AM

    回覆刪除
    回覆
    1. 把握時間嘛,而且煲到最後兩集,想快啲睇埋個大結局…
      女人多是非,勾心鬥角好睇啲,好難整個金枝男人版出呢架嘛,啲是非咪煲晒去女角度囉
      據說無記版賭城係抄美版賭城…ANYWAY,我係為咗睇苗僑偉而已,嘻嘻

      15th Nov 2006 09:24 AM

      刪除
  9. 我睇唔哂個頒奬禮, 覺得最精彩係外購節目奬之前幾段配音同埋Dodo問胡杏兒果段對話囉(真係冇佢咁嘅地位都唔夠膽講啲咁嘅嘢)。可惜睇唔到馬國明講嘢啦~~

    噫, 我都想睇黎耀祥攞奬喎, 話說保鏢播戈陣, 凡佢一出場, 我就唔知佢同馬小生邊個先係主腳



    14th Nov 2006 20:15 PM

    回覆刪除
    回覆
    1. 嗰段配音真係正,不過日劇我始終喜歡聽日文,一升中文版硬係怪怪地…
      黎耀祥真係做得好正﹗我成日話投佢票,不過唔記得咗…哎…
      鐵血入面大伯都好正,尤其是最後聽遺書時發癲個樣,真既一樣呀﹗

      15th Nov 2006 09:25 AM

      刪除
  10. 我都好鍾意三哥,佢當年的楚留香和天師執位都好呀!細細個的我都有印象。

    而家都鍾意馬國明,好少會好似佢咁真情流露。

    21st Nov 2006 15:47 PM

    回覆刪除
    回覆
    1. 天師執位和楚留香我都係大個先睇番…
      最愛係射鵰的楊康囉~最早翻煲的三哥片~印象最深…
      其實我幾欣賞馬國明的說…

      5th Oct 2008 23:25 PM

      刪除
  11. 你起啲朶又幾抵死喎。我都覺得馬國明唔錯,雖然係流水作業,但做每個角色,佢都會有啲變化,都算係落力喇!

    21st Nov 2006 17:45 PM

    回覆刪除
    回覆
    1. 同人改花名係我嗜好呀…
      馬國明我幾欣賞架,佢啲劇我又咁啱有睇喎,不過同期小生中佢機會無咁多就是了。

      5th Oct 2008 23:26 PM

      刪除

要講幾句嗎?﹗XD