熱煲系列3~：古天樂先生

讓我發一吓癲吧﹗原來我都好耐無重溫古生的劇集了﹗呵呵呵…
又讓我發一吓癲，我翻煲又翻煲的《神鵰俠侶》一晃眼已是13年前產物了…好驚呀…

^桃花依舊人面全非之x年前《神鵰》試造型某2人合照，which當年佢地係幾friend的…而家唔知了…

1994年：《婚姻物語》 飾 華青浩

呢套野我最記得就係「鹹豬手」事件，其餘就是松松姐姐和伊麵哥哥第x次合作。古生係演暗戀松松姐姐的同事乙件。劇情完全無印象，古生好似無乜戲份的，表現極度生硬…(佢自己後來的訪問都話猶如彊屍…)，只記得那件白色裇衫和皮繩頸帶…當年覺得好有型…

1994年：《阿SIR早晨》 飾 陸建材

呢套野係黎天王最後一部TBB劇，劇情係教師手記+愛情物語+溫情小品，教學部份唔熱血，愛情唔感人，家庭亦唔親情，無啦啦穿插的羅文客串亦都…好無聊吓…呢套野，黎天王還是黎天王，黃james也是黃james，睇時係完全唔覺佢地在演戲，總之都在演自己…劇情相當爛。

話說古生演的角色係周旋喺李綺虹和簡佩筠中間。不過這不是重點(整套劇的劇情都不是重點)，只係話佢地三個和演學生的何潔珊都有演《神鵰俠侶》囉…(看得出當年我是如何地連骨到lun埋地煲電視嗎？呵)

1994年：《餐餐有宋家》 飾 宋貴

古生和黃小姐擦出愛火花之作啊﹗~其實劇情沒兩樣，主角四兄妹名字串成「金銀富貴」…和而家《家好月圓》的「家好月圓慶中秋」亦沒有兩樣。即係無乜野講啦。想講的是無論實際年紀和樣子都無理由黃小姐做古生家姐囉，Objection呀法官大人﹗

古生拍拍吓調咗去拍《神鵰》，只在結局一集最後一個鏡頭以KTV方法撥一撥刀片陰(注意當年佢仲係留杜拉格斯頭架吓﹗)，好型…呵。

1995年：《神鵰俠侶》 飾 楊過

噢，到小的最沉迷的一套了。熱愛度爆燈之作(不要問為何不熱愛劉UNCLE版本，小的是先看9字版再回看8字版的說…我好型，呵~)~

即係呢，睇一睇前3套劇古生都是演配角(甚至更配的閒角)，一下子走去擔30集劇的男主角，雖然粉絲如我舉手(再要大聲)叫好，其實TBB好大整蠱，一來套劇前人版本太深入民心，二來當時古生往事被爆，形象大跌watt，普遍(身邊的同學)都唔buy佢做楊過呢個角色；三來就是那張白到尤如用完SKIII的「俏臉」，呢款史大奧好像在香港一路沒有太大市場…。如果呢套劇遲一兩年先拍/播，效果一定差好遠。

又即係呢，喺當時既壓力和無乜經驗之下，古生既演出其實我覺得合格有餘啦。又或者，楊生呢個角色和佢本人性格有多多咁少少相似，對照後來的《尋秦記》，會睇得出兩個角色其實古生都在演自己。又即係咁，楊生係16年後先做(一陣)大俠，廿幾歲既佢根本就係個市井死0靚仔，係劉uncle將佢演得太正經了…

[港劇]好野重溫2~古版95《神鵰俠侶》
[雜談]歷代神鵰大雜薈

1995年：《圓月彎刀》 飾 丁鵬

呢套好灰，接住《神鵰》開不過兩劇下場各異。《神》又黃金時間播又有《香港電視》特刊又去酒店做宣傳，《圓》劇除了開拍試造型和中途《香港電視》有啲零星既探班採訪外，一路都無乜報導/聲氣，拍完又成了倉底貨…攤咗成年終於在96年暑假播…天呀﹗仲要朝早11點呀﹗邊有人(即係我…)會暑假流流咁早起身架？﹗結局那集仲要學校有事要回校…又無較預錄…我到而家都仲未睇到呀﹗﹗﹗怒吼…(其實…好似係出咗VCD的…想翻煲係可以隨時煲)

話實，梁小冰古裝造型真係好得，阿海潮就係本色演技，演乜都覺得係溫小姐本人…

最喜愛的回顧~2~古裝片(武俠片類)

1996年：《天地男兒》 飾 葉承康

呢套野本來promotion係話古生搭住Adam鄭+羅家良+張智霖一齊做主角的，仲安排咗條搭住松松姐姐+張智霖的感情線俾古生(無記啲長劇例牌要有勁複雜的感情線…)，佢演蝦叔個孫，會承繼劇中葉家開的銀行，好似好多戲咁…但turn out古生個角色係勁無存在感，主角係上面那三個哥哥，演佢阿爸的李子雄仲多囉。據說當年古生為了這套劇入了很多私伙名牌西裝的說…

又話說呢套野在《K100》做宣傳時好落力話個銀行景搭得很像真，又有車立，又有真係用得的電腦云云；不過呢…根據無記劇的定律，主軸(某行業/紀律部隊)只會於頭和尾例牌的出現一吓，之後主角們都忙著去談情說愛…話實，《天地男兒》羅生奸得幾流吓，《天地豪情》就好睇得多…最鐘意張家輝對住郭藹明講：「家咩姐JE，我姓甘架嘛﹗」，勁有台型﹗

噢，離題了…

1996年：《大刺客之煙花殺手》 飾 煙花

呢套野係類似《包青天》咁幾集一個單元，講既就係唔同朝代「剌客」故事，古生這個話佢本身係個髮型師，實際上聯同彭子晴一齊係殺手咁，劇情…我都唔係好記得…

有個好睇啲既係鄭則士和傅明憲做既《荊軻剌秦王》(sth like that，exactly既名好似唔係呢個…我係咪應該返去check吓儲起的《香港電視》呢？)((7/2/12後按：係《魚腸劍》…應該…))，最後一場講獻畫俾秦王時開卷畫差唔多現出把刀，好緊張…

呢兩三年古生的劇都係無聊聊的，好似仲有個海運大廈唔知幾多周年特輯，著晒70年代大關刀西裝同李珊珊拍了個單元咁，得閒又拍電影咁(我仲未睇過《龍虎砵蘭街》和《男燒衣》﹗有葉芳華的，佢而家去咗邊？)，嘩，諗起啲名都好驚…

1996年：《乾隆大帝》 飾 四皇子弘曆

呢套又係倉底ized拍完一水才在6點半新聞前播了。話實…我都唔記得有乜劇情？﹗好似唔知翁虹(佢拍無記劇本身已經詭異…)定麥家琪演呂四娘(有乾隆就一定有呂四娘吧？)…睇呢兩個角色…不如睇張可頤拎女主腳獎的《九五至尊》…江華那套真係好好笑…

btw，當年麥小姐演這套劇前剛在《龍虎砵蘭街》(我鐘意台灣譯做《光頭艷姬VS少年大兄》，唔知仲以為係艷情片+功夫片…)為角色剃頭了，演古裝劇就一大個假髮笠落去(咁劇組又無順手到叫佢演尼姑…)，個頭髮係極核突…

都說，變身黑面神前的古生劇係好頹的…

講開又講，陳小春套《鹿鼎記》試造型時演康熙的是古生來的說﹗(當年小的極懷疑劇組係咪唔想諗，求其劉uncle做的都搵古生演，陳玉蓮的就搵李若彤演？)我唔滿意後來變了馬生﹗嗚﹗

1997年：《廉政追緝令》 飾 方卓文

曾幾何時我mixed up咗郭富城套《廉政行動組》(其實係96年的…)，呢套野又係零印象，睇係有睇…我記得有何寶生囉…話時話，我好欣賞佢喺《笑傲江湖》度做林平之(whereas我又好欣賞任版既林平之喎，呢個角色太無奈和唏噓了…我留意佢多過阿主角沖哥囉)…何生而家出了家，久不久被雜誌影吓佢打電腦坐*$，唔知應該唔應該咁講…真係好潮囉…(是我看古裝片太多嗎？總覺出家人和呢啲現代/亞美利堅文化好似格格不入的…)

又講埋啲唔關古生事的野了…哈哈。

1998年：《美味天王》 飾 喬柏高

由於小的不是太喜歡看肥姐和荷姐(這就是本人小眾視迷品味的罪證…家母係追到津津有味的說)，所以這套係skip住來追的。唔記得古生同邊個一pair了，係記得中間有千fa客串…

後來呢款懶係攪笑煮食劇收得，無記食髓知味整多套《美味情緣》，詭異地又有千fa份的…佢個image太食了嗎？

個人比較鐘意《闔府統請》，劉家輝(我最欣賞的金輪法王~熱愛度和艾威、羅莽不相上下…哈)和陳秀珠鬥氣太攪笑了…

1998年：《烈火雄心》 飾 劉海柏

對此劇我有疑問：南山3虎的南山是商大隔離的南山村嗎？呵(20/2/13後按：呢個謎09年時破解了…)

其實呢套野我無特別追(despite本人係王喜視迷)，點解呢？﹗oh我都唔知啊。反倒是本人很迷第二輯，翻睇又翻睇了很多次，結局紀德死了，遙遙係咁問阿怡老豆去咗邊…我喊到收唔到聲呀…不論睇幾多次…嗚…。又有疑問，都唔明點解蝴蝶灣水面有火，要叫鰂漁涌局和火炭(關乜事？咁遠水路…)既人一齊去幫手救火…除了主角散佈在呢三個局，我真係諗唔到location有乜關係囉…

btw，第3輯來了…我要睇啊…(雖然我對《珠光寶氣》有興趣啲…呵…)

講番第一輯，李珊珊小姐演日本人勁唔掂，講親日文都令人不安，後來的《刑偵4》佢正常好多…

.

1999年：《寵物情緣》 飾 戴展碩

其實小的一路都不太喜歡鄭天后，特別好幾年前…據說…安室本來想在香港開show，檔期卻被天后搶了來shocking pink﹗許せないでしょう﹗でしょう﹗

唔關這套劇事的。其實呢套小品野幾清新又幾浪漫的，有點《離島特警》+《當狗愛上貓》feel的，輕輕鬆鬆咪幾好。

又講開又講，古生隻狗狗阿lo就係呢套劇既狗明星。

1999年：《刑事偵緝檔案IV》 飾 徐飛

呢套野係嚴重9唔搭8，明明同前3輯《刑偵》無關係又要用同一個名，極度9唔搭8…

1. 徐飛…我初初以為同除非有關係…

2. 蛇視后和陳錦鴻，尤記得當年看《雪山飛狐》我係被蛇視后的表現嚇親…一度令本人不想再見到呢個配搭…(呢水無記重播《十月初五的月光》…蛇視后初出道套套劇都係哥哥前哥哥後的叫男主角的說…山哥~~~…，又btw，《十》結尾又係喊餐死的…)

3. 向海嵐和郭晉安結尾出來一段懶係高潮逸起，勁odd…

4. 最記得吳美珩係演變性人的…唔知點解…

5. 套野一開始時宣萱係短頭髮，結局時佢差唔多到膊頭…拍咗了很長時間似的…

1999/2000年：《創世紀》/《創世紀II天地有情》  飾 張自力

嘩，呢套野我真係頂唔順，無論係首播定重播我都無追，張自力和田寧一個癲咗咁奸，一個成鬼日失憶係咁鐘意人…好難受…我寧願睇一萬次《天地豪情》囉…

我又小眾了…明明前一陣子重播好多人(包括我弟)熱追…點解我零反應既呢？﹗XDDDDD

2001年：《尋秦記》飾 項少龍

這套真係超級好睇，為古生在無記年代收咗個靚尾啦。睇番古生本《尋樂記》(係呀，佢係有出過書的﹗)知原來呢套野佢好有自由度，好多gag位係佢自度，項生和楊過性格係勁似，所以咪話佢演自己囉。

呢套又係本人無限翻煲系列，睇親都笑…真係救命…

又話說呢，拍最後幾套野時阿古生體力虛耗很厲害，有次發燒發到40度…嘩，大人流流發到咁好驚架嘛…有次小的發到39.5度…幾驚係咁大呀…啋大吉利是…

離題了﹗哈哈。

點解咁多套我都講其他人既？﹗哈哈…

以上。再續…

無啦啦好想睇之：秦始皇帝的永恆國度．尋秦記．秦俑
[港劇]最喜愛的回顧~3~古裝片(非武俠劇類)
************************************************************
「讀書又唔見咁叻一日到黑睇電視」歲月總集：

熱煲小生巡禮之1：古巨基先生
今期熱煲：長瀨智也~
熱煲系列2~光一王子  (7/2/12後按：原來我無視咗堂本剛那一篇喎﹗)
《十月初五的月光》+張生雜談 (理論上是第4集…哈哈…)
熱煲系列5~：王喜篇