立會選邊個？

揭開報紙只看娛樂版的本人談政治以像風馬牛不相及呀呵？我都覺，小的對政治確無乜認識，特別係特區的…認識/興趣俱乏。只係選舉時係咁二去投吓票咁大把…

和某港島友人談起九月七日投票日，佢話…覺得某banner三人組幾好，細看之下才知是叫人去投票的代言人阿旺、紅姨和倫伯﹗佢地唔係候選人來的﹗天呀…

走在街上看到大堆鼓舞飛揚的banner，一句二句「真心為香港」、「香港新希望」、「共創好未來」的，仲vague過奧巴馬句"change"，即係點？選了你就能有好未來嗎？﹗再看，又說利民舒困，又說監控政府，還有甚麼政制改革的，都說我不熟悉議會制度，不過我很懷疑這些真係個別議員可以做得到？﹗

偶然聽到官台一個節目(二台的，不是電視台那個鬧交節目，嘩，我真係睇到好驚，成班尊貴議員在罵街似的對罵…天呀…)，請了各區的候選人現身拉票，政綱還不是上面的陳腔濫調(我偏見了﹗哈哈…)，最驚既係無啦啦有個天才表演時間，各候選人不是慷慨激昂的表明自己可比日月的心跡，就是落力的為特區民眾高歌一曲…聽得小的毛管直棟…點解而家拉票玩呢啲？﹗以前拎個大聲公叫正常好多囉。頂唔順，我寧願睇一百次《家好月圓》。

可能是我政治冷感，又或者是悲觀…投了又點？…看議員們鬧交和瞓覺？記得讀歷時讀到1905年俄國革命，題目是「麵包和選票」…兩樣小市民選那樣？仲使講。

(會有人覺得這種冷感是殖民地教育導致的衰野嗎？哈…)

難怪咁多人buy奧巴馬。我覺得我想要個可以改變現狀的人，眼前的…好像不能給我這個感覺…

(同埋，我可以向當局申請唔好promotion material嗎？記得好似有的…好煩，一日幾封信咁…)
**********************************************
食飯時咁啱睇到啲候選人互插辯論大會，不禁在諗「包拗頸」係咪成為尊貴議員的重要條件呢？ 要是這樣，看來我尊貴不起了。

睇見人家死都要嗌一餐，有的沒的總之chur到對方無聲出才心息，我會笑﹗有時大眾主流意見成形，好些人硬係反其道而行，一副「我就是真理」的樣子，我又會笑﹗遇著伸張自己想法又要care人家點諗，得不到人家認同就一副被逼害樣子，出言反咬人搶先機的人，我只能再笑…

或者我比較鐘意心底暗笑人家無知，再咀角浮起一個微微向上戚的偷笑，這樣就夠了。好心想去點醒人家既話，可能好心做壞事，人家也許有/無意沉醉在自己=真理的世界裡。不會傷到人的話，何苦要「包拗頸」篤爆人家呢？反正，人家在自己圈內，我站在局外，各有各樂趣呢。

講咁耐，就是說我不喜歡鬧交…

(5/4/13後按：誰是「包拗頸」議員了？)