[港劇]深夜熱播《獵鷹》

話說而家在吾等同事中最熱話的劇集…係呢套﹗好爆﹗

明明重播緊《學警》series，無啦啦插上劉華大帝的《獵鷹》，有理由相信係趁《桃姐》熱啦﹗唔知有記播咗《法內/中/外情》字呢﹗

又說，突然間同事們都來年齡之顯露，個個都在講細個時睇完第二日返學點點點點講講講咁…嘩哈哈哈﹗我搭不上咀﹗我年輕了﹗嘩哈哈哈哈…

如果我無記錯，我應該係95/6年時在深夜重播時份睇過，那一期夜晚播的劇卡士都好強大，包括本人睇到如癡如醉的《人在邊緣》，而家睇唔番咁古惑仔既黎天王和柴九哥架啦﹗…於是小的晚晚有覺唔瞓有書唔溫走去煲劇(所以成績…唔…)…但我有無成套《獵鷹》睇晒呢…我都唔記得啦…前段同陳敏兒拍拖的劇情是有印象咁囉…

話說二千年初無記出番經典舊劇vcd時呢套係有的，不過唔知點解我又無買，只買了和陳玉蓮合演的《神鵰》(呢套係本人萬年至愛嘛﹗)同一大堆三哥跟翁美玲的舊戲，原來我都唔係睇番好多劉uncle的電視劇…

嘩﹗雷洛跟顏同呀﹗(係…也就是說…我看劉uncle的電影是比較多的﹗)((好似無見過咁好肉地的劉uncle))

劇情我只大概記得是好仔經過嚴格的訓練後成為差人，好出色那種，有個好女友和孝順媽媽(又總是單親的…)…因為佢太出色而被看中去做臥底，過程中忍辱負重，要受友人、母親和女友誤會…但又因為佢太出色，又得到大佬的看重慢慢得成大業…最後梗係一天光晒架啦…

um，我想講啲劇情跟十幾年後(96年)喜爺套《緝私群英》係一樣架﹗不過呢啲亦正亦邪既角色小的極buy…但究竟當年點解會無煲落去既呢…(其實晚晚睇到咁夜都幾辛苦…加之於仲有其他劇想煲架嘛…)

重播之後我只係出廳時lap咗少少…友人說當中串星云云中竟然有梁朝偉﹗嘩﹗《無間道》﹗不過晚晚追好辛苦啊…係咪應該去買番餅vcd嚟煲算呢…(陳敏兒好像除了頗難受的《愛生事家庭》，都沒怎樣見佢拍劇…印象中佢都係做主持架嘛﹗)

據偉大的維基說，播完《 獵鷹》會播番《學警狙擊》，唔知到時會唔會掀起番laughing哥熱潮呢？

****************************************************

um，嚴格來說認真地成部睇番的就只有《神鵰》和《皇上保重》，《鹿鼎記》沒看過，又說因為小的先看95古版《神鵰》(仲要係著咗魔那種)，睇番83版竟然完全看不上眼(我諗我係異數吧？同事又講咗輪當年煲劉版《神鵰》點著迷法…um)…

(會唔會比人打？)唔知呢，我唔鐘意劉版加進去的情節((其實我好似唔止第一次講…))，如楊過扮王重陽整古全真教道士、Albert Au跟張德蘭客串扮師生戀人、唔知點解黃蓉要連走幾場先生郭襄呀咁，我只看到很多足囉喺條蛇度…完全扭曲咗楊過既性格…我唔知佢會咁做囉﹗um…同埋點解黃蓉會叫咗楊過做「阿過」架？其實我覺得歐陽佩珊的黃蓉聰慧之餘有點孤高和冷漠，雖然話佢由始至終都有點忌住忌住楊過，不過都無理由對住郭芙都好似唔多親近咁架…反倒是廖安麗的郭芙真係極乞人憎(即是說佢演得成功…95版的傳明憲太可愛了…)…仲有小的萬年熱愛童星馮志豐﹗哈哈哈…

同是先看9字頭版再看8字頭版，唔知點解小的係極熱愛翁美玲+黃日華的《射鵰》，但就受唔住陳玉蓮+劉德華的《神鵰》…點解呢？呀﹗我知啦﹗因為《射鵰》有三哥楊康呀﹗(笑)

另一篇：劉華最愛．經典10大
九一神鵰俠侶和神鵰俠侶