明星也出書

現在藝人除了歌影視廣四棲外，有部份更涉足文字界做「才子/女」(當然才不才就很主觀，這只是傳媒一見藝人有書出就加上去的名字而已)，今年書展更 有不少從無諗過她們可以出書的藝人也來湊熱鬧，現在好像無出過書就不是個成功的藝人般，很多人見到都懷疑：「得唔得架佢地？」個人口味問題，那幾本都不太是本人杯茶，未睇過唔識答呢個問題。

有求有供，出版商當然係睇準粉絲銀包永遠為偶像而開呢點先出手既。
然而八八掛掛的本人其實非常喜歡睇明星的出品，尤其是那些回顧自己人生路上的點點滴滴的自傳，加些小秘密和絕密相片就正中本人下懷(都說我八掛)； 基本上，我唔會介意他們文筆如何(當然，通常都係有人代筆的)，若果他們是本人心儀的偶像/人物更加係封住都甘心付款返家拜讀。

以下係幾本本人常拎出呢揭的小書：

1. 絕對係本人情意結發作。郭先生的《我需要愛》大約於91、92年在台灣出版，無網上的當年我根本就唔知有呢本書，到知的時候香港已絕版。頭一次去台灣旅行專誠到誠品朝拜，最緊要就係搵這本書；結果…唉…都係繼續睇住有心粉絲的網上版。

至於而家點解我又會有本實物係手？真係一個奇遇。話說某天手痕痕閒逛牙苦拍賣， 突然心血來潮search呢個書名，咁啱有位郭生粉拍賣她的多年珍藏(她說因為仔女大要讓出空間擺野，唯有將珍藏轉讓俾有心人)，就係咁本人就試咗bid野啦(不過都無人同我爭…)。

呢本野據序講係郭先生寫，再由老師修改(啲文筆都幾感性架)。不過無論係邊個寫邊個改對我呢講都已經唔重要，最緊要係圓咗細細個想睇呢本書既夢。哈哈

2. 本人另一偶像傑作《尋樂記》。和《我需要愛》一樣都係台灣的出被社作品。呢本書除了講吓古天樂先生 的過去現在和將來外，仲講吓他對人和事的不同看法。可能本人煲雜誌多年有功，書中好多資料其實我都知，哈哈，不過儲吓亦無妨。
 
3. 《羅志祥豬式會社》~又係台灣出品，台灣的出版商真的很喜歡替人氣偶像出書。為何會買本小豬我已忘了；但看電視上的小豬嘻嘻哈哈，原來他小時候的經歷都幾…唔唔
 
4. 《波係圓既》~其實伍晃榮係新聞從業員，唔應該計落明星度；不過由細睇佢講新聞睇到大，細個唔會理報新聞的和做戲的有咩分別，總之係電視度出現就係明星啦﹗(強詞奪理…)

未睇呢本書之前我唔知原來伍晃榮有花名叫「阿盲」，亦唔知他做無記之前又做過南華早報又做過商台，光睇書名《波係圓嘅》(其實我唔覺呢句係廢話，好有道理喎…)就已想看。我想八吓往時野麻，揭吓揭吓，看見一個又一個熟悉的人名，真係驚嘆時光飛逝，廿幾三十年轉眼就過。

5. 《我相寫我心》~ 鄭伊健的書，係家弟買了塞給我的…orz…
------------------------------------------------------------------
現在時興寫blog，好幾位藝人都有自家blog，而啲出版社又咁鐘意替作家的專欄結集成書，唔知會唔會有一日係書局會見到藝人blog結集呢？ (雖然香港藝人blog多數都係相集…)