我和我的醫貓

繼世界盃後又來一個series先…嘻嘻

Account，如果是銀行的話，多餘的我以九秒九到銀行取消，反正我都無咁多銀擺咁多個戶口，廢事又要俾甚麼手續費。如果是免費的我當然有理無理開咗先，就算用唔著都唔理，或許有天會用得著，於是多年以來我有很多免費的 Account，叫做 Email Account。

HongKong.com

人生的第一個醫貓唔係我開，係同學仔幫我開的。話說預科修Computer Application有一part係internet應用，功課就係開一個醫貓a/c之後send個貓俾阿sir。但屋企部機唔聽話由中六開學攪到考試都上唔到網，於是就搵個同學仔替我開。當時同學仔問我想開個咩username，我諗唔到時佢就同我諗咗個話會聯想到我的中文名的名；雖然呢個a/c我從 來都無用過(交完功課後我唔記得個password…)，不過個username一直沿用到而家，都幾有紀念價值。

Hotmail.com

又係功課，當年阿sir劃一人人都要開個hotmail交功課，username規定為: 名/姓/班別/號數@hotmail.com 。此乃本人第一個正式的醫貓，開了之後有如中六合彩般開心不停無聊send貓知會各方好友，當然無咩人理我，因為我係同儕中唯一一個屋企無網上，一有得上就好似發現新大陸咁。後來因為考A-Level荒廢了，再開時a/c已因太耐無開而delete了。

近年因為迷上msn先再開番個hotmail，不過甚少check。如果可以復生番那個就好啦﹗

大學.com

第一個正式的醫貓。入u初期家中電腦未駁好，仍要在學校搶express terminal來check貓。大鄉里的本人每次見到inbox中的郵件都不禁驚嘆電腦之神奇，仲不停寫「信」比舊同學，無啦啦屈佢地同我「通信」等個 貓「信」如輪轉。但這個可惡的a/c容量由Yr. 1到畢業那天依然係一個「低」字，屋企個米缸貼「常滿」，我個貓就「常爆」。現在身份由student轉做alumni容量仍然係一個「低」字，已十年都無check了。

ISP.com

雖然中六網上痕了好耐都痕唔成，仍無損我對它的鍾愛。大一時終於成功上網，就多了一個貓用。不過當時正宮娘娘係大學的醫貓，呢個a/c從來都無被使喚過，而我一直唔發 覺它的存在，直至郵件存量超出限額要收多二十蚊，才「驚覺」它的存在和啦啦聲改setting，這已是開a/c之後兩年的事。

Sina.com

大一時Sina在香港大展拳腳，當時Tutor請了他們的代表來講talk，講咩早已忘記，印象最深就係talk完結時送的tee(貪小便宜的大學生…不過確係幾精美…嘻嘻)和那個號稱有50mb的郵箱。之前說過，我那可愛的大學郵箱是常爆，無宿舍住的我們做project總得以走佬的形式打游擊搶電腦用， 有個網上空間放著未完成的功課就一流。於是我們和鮮奶一拍即合，人人都開番個鮮奶貓。我當時開了個甚麼醫貓…我都唔記得。後來因為某tutor極乞人憎， 我們將交俾佢的功課都存到一個以佢花名命名的醫貓中，這個醫貓到今天仔存活，我開blog時用上這個醫貓免了電話確認…不過這用戶名倒真不雅…哈哈

Yahoo.com

這是無意中開的。因為想join某個安室奈美惠家族就在開了個".tw"的醫貓，當時的主貓係大學那個，所以呢個扮台灣人的貓甚少用，到搵暑期工時才上場。 可能因為個username改得玩味太重，搵工搵來搵去都係得個桔，於是開了個正經名的".hk"醫貓，一直沿用至今。其實50mb我都用唔晒，而家1gb就更加用唔晒，而且甚少正經醫貓send的我就用來forward無聊野，僅此而已。

Gmail.com

跟風開的，其實都無咩必要，我yahoo都有兩個a/c時都唔知點解仲開多個。於是呢個a/c就用呢backup吓重要的貓，當咗係database咁用。

現在，咪就係本博專用聯絡電郵了。

公司.com

硬係覺得公司的a/c係 員工名@公司名.com 係pro啲，如果係info呀、enquiry 呀硬覺得間公司好慳家。除了send正經貓外，呢個a/c仲比我當icq咁同人chat和forward無聊野，keep住和朋友仔聯絡。好多時一排無見 的朋友仔都係睇佢轉咗公司醫貓先知原來佢轉咗工…
------------------------------------------------------------------------
數吓數吓，我一個人一對手但就有十幾個醫貓a/c，其實我都無咁多醫貓可以send，都唔知開咁多呢做咩…

最GB帝國    15/12/06