2006/06/09

舊時啲雜誌

在未有互聯網(我到千禧年才接通網上世界,失禮晒)的年代,我等八掛精要睇八娛樂野一是看報紙、二是看電視(如《K-100》、《勁歌金曲》、《週末任你點》等),三是看雜誌;而雜誌在三者當中最為重要,充裕的篇幅和時間容許記者編輯搜索更多資料、圖片、專訪。

8、 90年代坊間雜誌大家路線分明,百花齊放,電視書(其實是講娛樂動態)一堆,音樂的一堆(本地、西洋甚至東洋都有專門雜誌),電影又有自家出品;讀者要吸收最專門的資訊悉隨尊便。那年代的雜誌沒有如今的大貪,現今的只試圖將十萬樣東西塞進小書中大包圍--歌影視消費美容一網打盡,每個topic都只作蜻蜓點水式報導,全書多而不精,淪為shopping guide一本而已。看往時的雜誌好比吃畢一頓豐富的晚餐,好滿足﹗最重要,他們的文字比現時的雜誌「乾淨」,不會以創意無限但不堪入目的形容詞描述一個人或一件事。

或許,是我outdated追不上雜誌的潮流,越看越火光,索性不看。曾幾何時,本人可是每日都購入不同雜誌update娛圈資訊;努力的奉獻銀兩給心愛的電視書﹗這些小書亦追不上大眾的口味,一本一本的摺了。這些小書可是我的娛樂知識的泉源~(暫時只談一些已摺了的)


大眾電視/玉郎電視/新電視

(註:本文的圖小部份是本人自己的收藏,另外相片都是網上抓回來的…)

呢三本週刊當年唔係媽媽買就係我買,總之期期睇。三本風格基本上相當接近:前段係一週搜畫,以照片形式簡報一週發生過的事件,配以小小的一句caption,那些「半紅不黑」、「風韻猶存」、「大紅大紫」的四字詞就是看雜誌學回來的。其後就係封面專訪(頁數較多,起碼三、四頁),配幾個不同專訪(通常一頁起兩頁止,中外藝人都有,開始不是全彩的單色印刷),再加大小專欄(視評、樂評、影評)。中間必定係拉頁大poster附以藝人簽名(雖然是印的,但都足以叫我開心得要死﹗)。中後頁內容有電視、電影劇情、藝人資料、歌詞等。尾部再來一些藝人或活動圖片。印象中這些電視書的廣告不多,幾蚊一本都夠看上幾個鐘,內容真係好豐富呢﹗偶然還會請藝人大時大節寫下祝福語, 一看字體見真章,好些藝人手字…真係打風咁肉酸…又有些藝人的畫功…確係勁﹗

玉郎電視以熱熔印刷,是此等電視小書中少有有書脊,年紀小小已有儲書癮的我最愛跟期數排好,再滿心歡喜的欣賞自己的「收藏」。除印刷精美外內容也相當廣泛:中外趣聞、小說、XX夫人信箱等等;我就係睇呢啲欄位才見識到「長頸族人」﹗

大眾電視至勁就係封底的過膠(雜誌稱,其實係硬底)簽名書簽。大眾的封底都係拉頁,一本有兩張幾面poster確係正~封底拉頁其中一邊會係三張簽名書簽。喺廿's咭 興起的年代我就不時剪大眾書簽出呢換人地的卡,計落我有著數﹗(另:94年的YES雜誌)

(95年的鄭嘉穎……ok驚的說…)

新電視,沒太大印象;在3本小書中它的壽命最短,我也買得最少。
----------------------------------------------------------------------------------

金電視 金電視堪稱電視書的奇葩—文字、排版多年來保持同一簡約(陋)風格(且看兩圖),除非留意人物造型,兩本相隔幾年的期數是分唔到邊期先邊期後的。封面永還係斜斜一行寫著封面專訪標題,封面人物永還係大頭一張。到新年唔係拎住張大揮春毫係揖手作拜年狀,永遠的紅噹噹。第二他們的藝人專訪很多時不配以新相或近照,反而係搵番舊相,最經典係00年的郭富城訪問配上90年代初中間分界頭的相,非常攪笑﹗不過在攪笑的背後字裡行間是很認真的,藝人專訪集中藝人工作、展望、回顧,對於時下雜誌非常關心的感情世界非常克制,適當時候就行人止步。看得出,當時的藝人較「樂意」暢所欲言,談工作談感受談心路歷程無所不談。當然,那時候沒狗仔隊,雜誌也不會作新聞叫藝人回應。

金電視一直出版到2000年初,曾經不知不覺的停刊,後來又無啦啦復刊,再無神神摺埋。還未夠奇,此書在同行不停加價減價時依然企硬五蚊,多年無改。此等平價嘆到一大堆娛樂快訊我當然大力支持,打從初中此書成為我上堂悶時在櫃桶底細閱的小書,風雨不改﹗

再一個神奇就係每次我寄信抽獎都沒回音的,這金電視每期都有寄信抽明信片。當然我不會抱厚望,有次他們真的回了一張給我﹗除了寄信去甘小文《至Goal無敵》拎蛋治奧和奧華馬桶畫真有回信外,只有金電視寄信真有反應﹗﹗﹗

前些日子見到Dosss Corner 一篇文對金電視作出非常深入的剖釋,很厲害﹗勾起我不少兒時回憶…
--------------------------------------------------------------------------------------------------
香港電視

<-巨基斗蓬上的是…super kee~

無記前官方刊物,小時候出的size和《玉郎》等一樣,後來時變大了價錢亦隨著size提高,不過,我等電視精又怎會錯過無記的刊物呢。其實內容相比其他小書可謂不相百仲,它還是有它少少的賣點的。和電視台相連,劇情介紹當然可以詳細點;其他小書只寫XXX演XXX,還會將角色名由"陳小明"簡化做"明",如果沒看過劇集只看劇情一定看得一頭霧水。香港電視就會詳細介紹新劇人物性格,故事大綱;到每集劇情又會配以不同劇照,其他小書由於篇幅所限都未必會登出來;耐不耐還會為重點劇集出特刊,當年95《神鵰》的特刊真係靚到"dup"一聲﹗唔買都唔得啦﹗除劇集,雜誌每年都會於準決賽後隨書附送港姐特刊,睇完真係會熟晒二十個佳麗﹗(我由譚小環1994的一屆開始儲,直到00年為止…都幾癲)

香港電視的封面只限無記藝人,但不會只侷限當紅藝人;港姐競選時最上鏡小姐會做一期封面,之後冠亞季又會做一期;嗰期的新紮姐仔哥仔上位又會做封面,我深愛的兩位古先生早於95年就做過封面男郎了(曾幾何時,他兩是新五虎之虎…)

後來官方地位變了TVB週刊,無咗無記的香港電視變法圖強過一會,亞記藝人楊恭如還做過封面女郎(前無古人啊﹗),但無咗無記節目參加表格呢個最大selling point,香港電視還是無聲無息的消失了。
----------------------------------------------------------------------------------
螢幕偶像 其實我只買過95年時為古先生《神鵰》做封面的一期;之前和之後都不太留意有這本書,後來才知此書在80年代已出版。一看內容,全都是電視劇﹗十幾 廿版的《神鵰》彩頁、主角訪問和海報真看得我目瞪口呆﹗其形式有點像日本偶像雜誌—彩頁、相、彩頁。講完《神鵰》仲講埋古先生當時拍攝中的新作《圓月彎刀》,兩劇都被編輯來個新舊對照,資料詳盡到不得了,看完一期實如上了一大堂電視歷史課。

除了大篇幅的專題,還有不少歌影藝人訪問。最後是劇照一大堆,我曾懷疑過是他們自己cap的相片,以我看香港電視多年經驗都沒看過他們刊登的劇照。不過,算吧,此書已摺了。
-------------------------------------------------------------------------------------------
(以上咁多本雜誌我收埋唔少,而家仲尚在人間,等我搵番佢地出呢回味吓先~)

另一篇:
忽然大隻男之狂貼剪報…

24 則留言:

  1. 嘩!童年回憶呀!
    除了《螢幕偶像》,其餘都看過!剪存下來的都給丟棄得八八九九了~
    《玉郎》、《大眾》、《新電視》各有千秋。
    最初看《新電視》,因為姑姐拿舊雜誌給我們。有岑凱倫專欄(比小說好看百倍)、加國動態、電視評論、吳桐仁講時事……
    《玉郎》有李紅、蕭笙、梁材遠專欄、名人家居,又有講電視幕後的欄目。唐安麒那時已開始寫專欄。
    《大眾》的書籤也有剪存,黎明的簽名肯定是假的,只看明星背後的圖畫漂亮不漂亮,現在只剩少量。
    《金電視》的甫士卡,每次寄信去必有回信,還要在想要的明星之外夾著不知甚麼星的卡。那股油墨味很難聞。
    九十年代初這些雜誌在國內有市場,有時在廣州的書攤找到舊雜誌。
    《香港電視》最好的是劇集開播前的詳盡人物介紹!連大配角也有造型照!後來也沒有了。
    《玉郎》(其後應該轉了名字)曾做過《壹周刊》的開度,卻捱不了多久。
    《青春》很好看啊!在<文化特區>認識一些超現實畫家,不過停刊了。
    現在的雜誌普遍都是《壹周刊》的開度,比以前大一倍,大家都喜歡大幅圖片嗎?

    10th Jun 2006 01:48 AM |

    回覆刪除
    回覆
    1. 當年唔知點解無回到…呃﹗

      《螢幕偶像》我是到95《神鵰》播時第一次買來看,之前完全唔知有本咁既野﹗

      屋企通常係睇《大眾》和《玉郎》,《玉郎》我最記得係愛情信箱和講啲世界奇聞,長頸族人同頸圈人都係喺《玉郎》度睇番嚟的,《大眾》有乜column就唔記得了…

      《新電視》阿娘比較少買,後來係見偶像做封面先買,後面column都無乜印象…哈﹗

      《香港電視》最可惜係後來被《tbb周刊》取代了,《tbb周刊》介紹劇情雖然都詳盡,但啲特刊就無以前《香港電視》咁靚囉﹗

      《壹周刊》和《忽然一周》我淨係鐘意睇中間個人物專訪最好睇…同埋啲相都影得好有心機…

      刪除
  2. 好珍貴的藏品呢,我以前最愛看大眾電視,還寫過信去編輯室,又投稿畫素描呢!^^


    12th Jun 2006 13:41 PM

    回覆刪除
    回覆
    1. 我只係有記過信去《金電視》度拎postcard咋﹗

      刪除
  3. 那時的神鵰俠侶,李若彤是我的偶像!

    12th Jun 2006 14:19 PM

    回覆刪除
    回覆
    1. 那正好,那時的古天樂是我偶像﹗

      刪除
  4. 真唔知係我地落伍,定係依家d雜誌淪落,我就好早已罷買.

    12th Jun 2006 17:55 PM

    回覆刪除
    回覆
    1. 其實我要求唔高,但求有本文字、相片乾淨少少嘅煲吓過吓日晨,不過原來都好難

      以前煲的電視書摺晒後,而家無聊想買雜誌揭就睇日本fashion書


      12th Jun 2006 18:13 PM

      刪除
  5. 我鐘意睇大本的,例如城市周刊,香港周刊.

    還記得慕容公子嗎?都好多料爆的.


    12th Jun 2006 18:56 PM

    回覆刪除
    回覆
    1. 媽媽無買所以無咩睇過,都係細個飛髮時先有得睇...

      13th Jun 2006 11:36 AM

      刪除
  6. 資料非常之詳盡,可花了不少功夫呀!

    謝謝妳讓我們重拾一些童年的回憶。


    13th Jun 2006 16:26 PM

    回覆刪除
    回覆
    1. 都係分享一吓以前睇落的小書啫…

      刪除
  7. 嘩!歷史大講堂,謝謝!

    14th Jun 2006 08:43 AM

    回覆刪除
    回覆
    1. 比起很多專家我還差很遠…

      刪除
  8. 我以前也好鐘意睇金電視, 平兼細本方便攜帶, 依家唔知仲有冇?

    14th Jun 2006 14:32 PM

    回覆刪除
    回覆
    1. 摺咗啦....前兩三年摺的...而家無晒呢啲細細本的書仔賣lu

      14th Jun 2006 14:51 PM

      刪除
  9. 嘩, 你真係收埋唔少舊雜誌喎emoticon

    15th Jun 2006 01:31 AM

    回覆刪除
    回覆
    1. 我好有潛質做塞到一屋都係野的儲物婆婆...哈
      不過掉咗好多啦...

      16th Jun 2006 12:42 PM

      刪除
  10. wa, 好有心機喎!
    我其實一本都無買過,只係買yes....

    1st Jul 2006 09:59 AM

    回覆刪除
    回覆
    1. 我仲收埋好幾本yes,yes和yes idol都係狂買item(我入u都仲有睇…好低能…哈),一見有自己喜歡的藝人就買架啦,不過太"牙"訂,都掉晒了,只將自己喜歡的內頁全meet出來儲

      講開yes,最記得就係毒_明事件和出賣朋友,都幾教壞細路架﹗


      2nd Jul 2006 21:37 PM

      刪除
    2. 係呀,個毒*明真係....成班無知的讀者就比yes誤導左,幫人迫走情敵溝女。

      5th Jul 2006 01:07 AM

      刪除
    3. 我咪就係被誤導的傻仔其中之一1 law...當年細路的我真係幾on居~

      5th Jul 2006 06:29 AM

      刪除
  11. 嘩!!好多珍貴的雜誌啊~真是厲害的!
    看看現在的雜誌,多是商業氣息濃厚,少了真正應用的質感及內容.:(

    28th Jan 2007 08:53 AM

    回覆刪除
    回覆
    1. 其實呢…八十年代的係我從網上找回來的,九十年代的就係我手頭上有的,我無STATE到呢個添…
      以前睇一本雜誌可以煲好耐架,但而家的真係揭多過睇,已好少睇/買了﹗

      29th Jan 2007 00:43 AM

      刪除

要講幾句嗎?﹗XD