TBB經典台

之前我最常看既係有記電影台，自從娘被人半乙水半送咁開咗個TBB收費電視後，經典台就是我既飛佛了~

真係相逢恨晚，開戶無幾耐就俾我睇到小時候因為考試老豆唔准睇，因而追到一忽忽既《風之刀》﹗雖然再睇我十分頂唔順郭先生順應角色設定而滿載童真既演譯(嗚…我老了…明明細個時睇到津津有味架﹗點解呀﹗)

撞正前陣子上《風雲2》，經典台就播了一堆郭先生既劇，除了《風之刀》，仲有《午夜太陽》(嘩﹗有吳鎮宇和黃秋生﹗﹗﹗)、《蜀山奇俠》(之後就梗係順手播埋由風師弟主演既《仙履奇緣》﹗)，嘩，我親愛既童年時光呀﹗

之前有我們的周海媚和劉華三哥系列我都MISS了…嗚﹗

其實RUN呢個台真係慳皮爆，只係將啲舊劇集不停播，中間攝些飲食節目和寰宇風情(梁婉靜和朱建鈞呀﹗)，星期六日再加一點特別篇，將啲綜藝、音樂、大SHOW等剪剪埋埋就成事了，但係我又睇得好開心喎﹗呀，THOSE GOOD OLD DAYS...

更有趣係唔覺意睇到啲未睇過既劇，如《香港八X》(SORRY，唔係我扮細，我真無無印象喎﹗)、《小夫妻》、《落難天使》咁，呢啲劇娘竟然部部都UP得出個名(所以才會生得出個電視精既女？﹗)，跟住會狂講劇中人邊個打邊個(勁﹗)，套劇出街時佢做緊乜乜物物(﹗﹗﹗)，嘩，真係唔講都唔知(親子活動乎？)…呀，點都好過娘睇睇埋《富貴門》那些…悶到我要摺埋自己入房…要塞埋耳筒避啲電視聲…險些因為電視機釀成家庭血案呀…

又講，睇番當年啲人既造型…咦，好些而家都興番喎…睇屋企佈景，啲椰林樹影牆紙我見屋企舊相都有喎﹗真係想問點解當年會興椰林樹影既呢？等屋企望落闊落啲嘛？《小夫妻》個屋企大廳直頭有埋種咗植物既屏風﹗好大呀間屋﹗再睇OFFICE景，啊，只有文件文件文件和文件既辦公枱(都仲有電話和文具既…)，邊睇我就邊諗，如果而家時光倒流要我去七十年代辦公室返工…我諗我九成九俾人炒都似…字我又寫得少，串字又成日串錯，打字機又唔識用…都是電腦之過啦﹗我諗我舞得掂既只有那個撥號既電話，細個屋企用過﹗哈。睇番啲舊人舊事真係好得意(好了，我是老餅…)

人說七十年代是電視台戰國時代，競爭之下造就很多精彩出品， 雖然呢個台只睇到TBB既出品，不過都好丫，可以開吓眼界。始終唔係套套都有出過碟，而套套碟我都有閒情去買來看嘛…

啊，幾時先播番我超想睇番既《緝私群英》呢？﹗嗚~~~~~

邊寫邊想，唔知有無一日睇到我嗌救命想死既《宮X計》和《富X門》放到經典台，我會看得津津有味之餘仲大呼新劇新不如舊呢？(咁就死囉…)