2008/08/01

[日劇]其實只想笑餐飽~《花ざかりの君たちへ》

年前首播時看了一集,吃不消。這一排突然熱追,回看年前和現在的觀感…180度大大大大變(都說本人五時花六時變架啦﹗)究竟是我口味轉了?還是壓力太大要搵野調劑呢?

枱面原因:工事忙,返學忙,家事忙,忙忙忙﹗不想看太沉重要用腦的戲(但偏偏入戲院睇的都不是這種…),我只想大笑一餐而已…

暗啞底原因:我中了《魔王》毒,啟動「煲劇一條龍」進攻生田斗真舊劇…(還好佢擔大旗的只有三套…)

先聲明,我沒看台灣版的…我只知main cast係Ella、吳尊和汪東城囉…

回說年前我頂不順這套劇極度誇張和卡通,但現在我又看得很開懷,三個宿舍的學生越落力參加各種比賽,小的睇得越開心。這部真係減壓良方…

故仔很《金枝玉葉》的,就是女主角為接近男主角就女扮男裝混入櫻咲學園,慢慢解開男主角冷漠的心,又讓男配角唔覺唔覺鐘意咗自己,引發出極爆笑的同性戀疑雲。同時呢間學校很神,學生最主打的活動是不停的活動和比賽,每次比賽都有極豐富(如夏威夷旅行﹗)或運桔(扮金條的古古力﹗)的禮物,三個宿舍的學生都拼盡全力比賽…。每集就係咁胡胡鬧鬧嘻嘻哈哈的混過去,故事性係無乜(或曰大路,唔使估都知女主角會情歸邊個啦?﹗),樂趣就係睇學園中性格/造型/行為極鮮明的帥哥(好些真係好帥的…卡卡)瘋瘋癲癲,夠架啦,夠令我笑餐死,超額完成,好開心。

(故事係咪講完等於無講呢?﹗XDDD)

人物極度卡通化就係看點囉,三個宿舍都各有特色,第一寮係力量肌肉型帥哥(whereas個人覺得麻麻地靚仔),吓吓行出呢打空手道,服裝就係那套白色衫囉,宿舍長天王寺恵(石垣佑磨)特色就係勁好打,簡直係李小龍上身,好爆。 第三寮是歌姬型華麗風帥哥,大熱天時都係西裝一度加披肩的,笑爆…最爆係宿舍長オスカー・M・姫島(姜暢雄)要搵野/尋根探秘時佢係會開壇作法…救命呀…面容扭曲既程度可比占基利…笑到我停唔到口。三個主角住緊既第二寮呢,叫就叫係匯集各種風格既帥哥,即係無風格啦﹗話時話,阿宿舍長難波南(水嶋 ヒロ)幾靚仔的說(XDDD),還有靈光男(唔記得名)、暗戀難波前輩男(亦唔記得名)、發明男(都係唔記得名)和永遠被人叫錯名的關目,這個宿舍都滿有特別既…

話時話,由三位宿舍長組成的「櫻花會」,那件白色長縷,很應援團…不如出個《花樣少男少女》特別版應援團丫?﹗

當然,還有吓吓幫校長傳話的訓導老師,為瑞稀做白夫人信箱的保健室老師,都係好有特色的說。
(花痴來了﹗卡卡)

其實自多年前看了《Summer Snow》,小的一直不能將演佐野的小栗先生和型扯上關係(真係sorry),今回見佢髮腳長"hill"不平,感覺有點難受…

演芦屋瑞稀既堀北真希,初頭覺得造型太女仔,慢慢看下去…佢個款都好死0靚仔吓。即係呢,我成日覺得Ella英得濟,扮番女仔略嫌唔夠可愛cutie咁…

哈,留番令我中招的中津同學(生田斗真)放尾呀吓。實在佢個角色係負責攪gag,佐野在扮cool時中津就係放笑彈。佢對瑞稀既同性戀疑雲:一幻想就有相框框住瑞稀笑個樣…又或望住變裝瑞稀流鼻血(噴水都係好爆的…)…又又或成日借故挨埋去瑞稀度…,無不令本人狂笑不已。個人最欣賞係佢知道瑞稀係女仔,坐喺廁所迷濛地喺卷廁紙度寫「女」字…同時佢個頭係出晒煙…嚇死走入廁所的同學仔…我係笑到暈﹗(發現嗎?我係無視緊佐野的﹗)當瑞稀正式回覆只當佢係朋友時,中津轉身就走說「不好了…還有5秒我就要哭…5、4、3、2…」,數到2已倒下了…oh…太令人心痛了…

愛屋及烏,和中津同房的靈光男也很攪笑,又是本人的看點囉。

這部,實在可以和《My Boss My Hero》、《交響情人夢》合為爆笑3寶,無無聊拎出呢笑一餐,一流。

花樣少年少女~イケメン♂パラダイス~ 資料
[日劇]其實只想笑餐飽2~《ヤスコとケンジ》
2007 年度煲劇回顧
***************************************************

貼相時間~

大親友~
***************************************************
一條龍之三: ハチミツとクローバー

電影版、台灣版和漫畫版都沒看,看人家後感說這部是細水長流式溫心愛情劇,oh,好了,作為一個professional既花痴,一條龍就要一條龍到底,我煲
***************************************************
攪笑了兩部,這部本季播放中的係好正經,而且唔係漫畫改編的了,看到本人晒迷

在這劇上映時先爆出大野智年前一些情色舊聞,係咪有心同呢套劇宣傳架?﹗(不過J家一貫作風,通常慢慢就不了了之,唔會點幾藝人本身形象有影響既…)

斗真同學其他花癡文:
アキハバラ@DEEP
花より男子2
魔女裁判
VOICE
人間失格 (電影)   
中招路線圖~日劇男角篇 
源氏物語~千年之謎(電影)
(2/4/13後按:唔再加了…click斗真同學的tag吧…)

12 則留言:


  1. 大野智個單,唔係博宣傳ga...
    真係幾大件事下....好似要同個間出版社畫清界線。
    不過j家好似力撐大野智..

    1st Aug 2008 14:36 PM

    回覆刪除
    回覆
    1. 睇番新聞都係咁講,話所有j系都唔上那家雜誌做訪問啊…
      不過以劇論劇,我覺得好精彩喎,呢單野唔會令我放棄唔追囉…

      4th Aug 2008 09:16 AM

      刪除
  2. (懶醒) 我都話呢套好睇同實中生田招架啦~ 睇0左呢套一定會選佢做上年的最佳男配角架.
    每個角色都有特色 (or 騎尼之處) 睇得好輕奮架. 又冇咩悶場.
    水嶋 ヒロ你大中的話 咁你快d 去睇絕對男友. 你咪堅持偶像一條龍啦. 個套佢有多d 發揮架.
    四葉草你挑戰先. 我等你劇評先決定睇唔睇.

    1st Aug 2008 15:04 PM

    回覆刪除
    回覆
    1. 我中中中中中中了…哈哈,可能係睇《魔王》在先,而家睇番上年個金毛頭有點點唔慣…
      《絕對男友》排緊隊架啦,你等我鯨吞埋套《蜂蜜與四葉草》先,睇了兩集,又唔係悶但又唔係精彩,有少少雞肋,食之無味,棄之可惜(toma都係咁靚仔嘛…扮熟中…)…咁…

      4th Aug 2008 09:22 AM

      刪除
  3. 李小球10/7/13 21:50

    我忽然記得d名?好似靈氣的叫萱島,鍾意難波師兄的叫中央!
    呢套幾好睇呀,完全係輕輕鬆鬆又一晚~

    1st Aug 2008 16:45 PM

    回覆刪除
    回覆
    1. 你說得對﹗噢…呀﹗(可見我煲時係幾咁中招人oriented…)
      係架,真係笑笑吓就一集,好開心的…

      4th Aug 2008 09:23 AM

      刪除

  4. 個人覺得...蜂蜜與四葉草最好睇都係動畫版...

    1st Aug 2008 18:27 PM

    回覆刪除
    回覆
    1. 睇了兩集電視劇版,有點唔知點,悶又唔係精彩又唔係,係為睇人而睇囉…

      4th Aug 2008 09:24 AM

      刪除
    2. 的確,睇呢套我係愈睇愈冇心機= =
      題外話,有時間既話或者試下睇「唐子與健兒」,個男主角(都係tokio既)d表情好似my boss my hero入面既長瀨=]

      4th Aug 2008 22:13 PM

      刪除
    3. 報紙之前都係咁講喎…
      (如果係長瀨做我就一定追…哈哈…不過呢套我都會睇…等一下吧,一次過追…)
      《蜂蜜》在我忍受唔到之前會繼續追既,又未悶到我想熄機唔睇,不過投入就梗係無《花樣》或《魔王》咁高而已…

      5th Aug 2008 09:30 AM

      刪除
  5. HKCM日藝組10/7/13 21:51

    以一個沒有看過漫畫的人而言,蜂蜜是好看的,感覺很揪心
    雖然說生田也是做暗戀者,但是角色很不同,他也表現得不錯,j家年輕男優中他的演技算強了

    2nd Aug 2008 03:27 AM

    回覆刪除
    回覆
    1. 因為我無睇漫畫、動畫和電影版,是第一次接觸這個故仔,感覺都幾《orange days》一類大學生愛情片(可能又係成宮寬貴…),生田繼續生鬼,攪攪笑笑,因為佢會繼續煲落去囉﹗~
      《魔王》我覺得生田演出很不俗~每一集都很期待的說

      4th Aug 2008 09:28 AM

      刪除

要講幾句嗎?﹗XD