[港劇]最喜愛的回顧~3~古裝片(非武俠劇類)

好，繼續。古裝片唔武俠的話就係歷史和小說囉~

皇上保重/天子屠龍

無記啲清裝片係異常地hea，著嚟著去都係那幾套戲服，非宮廷戲的頭髮造型都還好，宮廷的有啲係hea拎塊疑似色卡紙擺喺個頭度咁(um，《清宮氣數錄》？點解我會記得有套咁既野﹗)

題目兩套和古天樂套《乾隆大帝》是小的比較有印象而造型是頗hea的劇，宮女妃嬪頭飾都異常卡紙的說(所以看台灣瓊瑤劇就好深印象…雖然人家都唔係套套剃頭，但衫飾和髮飾上硬係認真啲)((自從《金枝》之後好似認真番少少))…um，《皇上保重》係某年暑假重播，記得有劉嘉玲(﹗)，《天子屠龍》呢，小的幾喜歡張智霖和梁小冰呢個組合(是多於張和朱茵的《射鵰》，而呢套恐怕係90年代金庸劇重拍作入面最恐怖的一套)…係講康熙屠鰲拜(林嘉華﹗)…而我對王俊棠(或徐錦江)演的鰲拜比較有印象啦…。um，呢款疑似講歷史又撈啲情情愛愛小的係幾鐘意睇，又短(20集)，除了造型頹之外，基本上小的都係抵唔住會去睇的(所以，我是會走去看《紫禁京雷》囉﹗)

聊齋

(由於skip晒啲武俠劇，突然跳到90年代了) 是咁的，當年睇睇埋好多蔡志忠的祖國古典小說漫畫，《聊齋》是其中一本翻睇又翻睇的，故仔夠奇情而奇情背後又有啲人生哲理學到咁。雖然一路都經常有書中故仔改篇成電視電影(最出名是《倩女幽魂》乎？)，但將小故事拍成《包青天》式的幾集短篇又未睇過，幾新奇。當年播的時候就發揮小的睇一個故事就去睇番原著的精神，但…劇中改編的故事好多都無喺蔡志忠本書出現囉﹗

記得那水無記係咁改編祖國古典小說的，《聊齋》之餘仲有《西遊記》、《金瓶梅》(海朝呀﹗)、《封神榜》、《西廂記》，《洛神》算唔算係三國的代表？XD，《封》和《西》無睇(只記得胡囧降呢成葉璇妹仔的花邊…)，《聊齋》和《西遊記》都算係喺有限資源之下盡量貼近原著，啲CG又算係幾有心思的。呀，四大名著…好在初初講的《紅樓夢》(節目巡禮度講話抽王熙鳳出嚟做主角)拍唔成…唔係我會好驚…

回說《聊齋》…無翻睇之下好多單元都唔記得了，最記得是《秋月還陽》，當年覺得俞小凡好靚(但再睇佢…竟然係《煙雨斜陽》裡演陳鍵lone阿娘﹗佢其實只大陳鍵lone十多年咋﹗)，男主是羅家良，跟住有劉丹做秋月阿爸的。套劇唔知點解有好多台灣演員出現，仲有我睇得如癡如醉的《戲說慈禧》個男角翁家明喎…(search維基仲見到有楊麗菁添﹗)

係啦，彭羚首主題曲《隔世情》都好好聽。其實我覺好怕佢唱狂嗌既歌既…(仲熱愛到買咗佢隻精選碟…)

尋秦記

剛剛lai邊出文讚美過就不重複了(讚美到自己走去搵番套碟出嚟重溫了)，明明都熟知啲劇情仲可以邊睇邊笑到卡卡聲，呢套劇威力真係好大…。um，我諗我明點解我覺得《回到三國》唔夠給力了…馬明係誇啲呢演得，古黑子係好自然地攪爛gag…um，而同一個林lone，做秦始皇像樣過諸葛亮好多…又點解呢？算啦，都係唔好比啦…

洛神

個人覺得呢套喺無記拍「類」歷史劇入面比較認真的，喺故仔、人物、造型方面都有落過功夫，就是說，呢套講三國曹氏父子…沒有千軍萬馬，而且也沒有華麗佈景，但故仔和人物是make sense的(看《萬凰之王》幾creative…清朝玩和氏璧…真係睇到噴血﹗)((看我的要求幾低…只求合理咋﹗))。穿鑿附會少不免但不過火(對照《回到三國》)，蔡少芬是十分elegant，郭羨妮演奸角竟然異常入型入格(我覺得除了呢套和《尋秦記》的琴清，之後我都無覺得佢識做戲過)，陳豪演曹丕不過不失啦，萬年不變熱血清年馬小生竟然都唔悶人了 (演佢老婆疑似港女的汪琳因為著錯衫被老爺斬殺是令人頗心傷的)，我想話劉丹演曹操都好正囉~更正的是，郭嬛(郭羨妮)害死甄宓(蔡少芬)仲用草塞住佢個口先入棺，搶埋佢個仔自己做皇后，個仔大個咗之後就向郭嬛報復，演呢個大個咗既仔…係萬年不變青年人鄧一君﹗~~~~

我覺得好睇度而言呢套跟《金枝》都不相上下的說。(唔知有無人睇過，人物傳記類嚟講其實《鄭板橋》((<<<有人知道這部是甚麼嗎？))都不差，不過卡士無咁勁…)

馬小生首《水中仙》和同李彩fa合唱的插曲都好好聽，度身訂造到不行，很配合個故仔的說。

金枝慾孽

舊文寫過不重複，只說之後的《火舞黃瓜》、《胭脂水粉》、《銀樓金粉》太嚇人，不停的一堆女人在你鬧我我鬧你，係得《珠光寶氣》和《掌上明珠》睇得完咋﹗至於《金枝2》是有點擔心將舊作的美好破壞了…看倌們都知第2部通常都畫蛇添足架嘛﹗(雖然《衝上雲霄》我睇得不太投入…不過新一輯會唔會都有呢個危機呢？)

唔爭在講埋…->

鐵血保鏢/碧血鹽梟

雖然李添勝既《根葛hill雄》和《二嫂豪情》都好hit，仲令如妃終於坐上視后寶座，又令柴九哥升價十倍，不過我比較喜歡這兩部scale細啲又無咁hit的。雖然《鐵血》是很抄《雍正皇朝》(而講了咁多年我仲未睇)，又雖然有很多不合理的地方(如：有錢就可以攪漕運…囧﹗)，不過啲人腳真係演得好睇呢，難得抄得嚟又不失追看性(其實馬小生的部份我是想skip的…又係萬年熱血青年了…)，而且鏢局上下一心好熱血，好難得會有套專心講間企業，而唔係攪十萬條錯綜複雜的感情線，也難得爭產得嚟是有腦地爭身家，唔係齋一班人坐喺大廳度鬧交嘛﹗

至於《碧血》，二少死時我哭得好慘啊﹗(《鐵血》三嫂死時也讓我流了不少淚﹗)…哈哈，《碧血》是比《鐵血》更細scale的吧？又係萬年熱青馬小生，我繼續想skip佢…唔知係咪因為(據說)二少的戲份比原定多咗，弄得勝雪後來硬轉番去馬小生(唔記得佢個角色叫…呃)度好像怪怪的…。um，我可以說，其中一個鐘意呢套劇的原因是…小環個角色由奸轉忠…是比較有發揮的嗎？(其實小的好鐘意睇佢的…見佢2000年代出番嚟拍劇變成八婆類是真心灰的…而家佢唔拍劇生bb都幾好丫﹗)((《少年四大神捕》佢難得是全程正派的說))

洪武三十二(？)

使講既，一套港劇我可以post 5篇文(+一篇畫作喎﹗)，我有幾鐘意先得架﹗(我是寧願睇馬神多過馬小生…不過算啦，二人都離巢了…)
***************************************

完，下篇再續。

全集：
[港劇]最喜愛的回顧~1~《人在邊緣》 / 《今生無悔》
[港劇]最喜愛的回顧~2~古裝片(武俠片類)
[港劇]最喜愛的回顧~4~民初劇類
[港劇]最喜愛的回顧~5(完)~時裝片