2011/08/19

[港劇]其實《紫禁驚雷》是一套笑片

典解只放在圖中香爐內的炸藥,可以炸到個宮著晒火,個火仲勁過《烈火雄心》啲5級火﹗點解?點解…呢套劇真係好爆,娛樂性仲高過CHOK神的《潛行》…emotion

  • 其實呢,前一篇說過啲奇怪位已經算小事,琴日一集簡直令小的大開眼界,原來唔睇此劇真係走寶…張國強都話咗只放了炸藥在香爐內,無話過其他地方都有藥引喎,點解可以一野炸到成個宮著晒紅紅火光(仲要轉個頭就燒著晒,一個半個燒著布呀紙呀鏡頭都無的…)
  • 點解清朝已經有呢隻仲勁過現代恐怖份子用的藥炸?﹗點解?點解?
  • (估唔到繼《銀樓金粉》後有另一部令我一定要用呢個title不可的…我諗我可以開個分類叫「笑片類」…)
  • 又點解啲火大得咁交關,又有大班待衛在內喎,淨係得馬小生受重傷,皇上無事,其他待衛又無事?﹗
  • 又又點解馬小生受重傷時無啦啦會發夢,跟住太皇太后(好似無皇上份?)、福全、紫凝個個惡形惡相的搵把刀筒佢?囧﹗唔通呢個就係衍因大師激發佢生存意志的方法?
  • 明明睇《康熙大帝》和《孝莊秘史》入面的孝莊係好莊嚴、智慧和慈祥的老人家,典解呢套劇孝莊會變咗深山老妖,一味鬧鬼呢個鬧鬼那個架…好可怕呀…(高登有巴打說此劇抄《孝莊秘史》…咦…又有少少似喎﹗)
  • 馬明上一個鏡頭仲一副好有威嚴的王爺樣,下一個鏡頭就擺個可憐樣出嚟問姚子羚點解仲keep住佢送的蝴蝶手帕…好可怕呀﹗王爺變癡漢呀﹗(好在當時未有鐵路…唔係就成為第一代地車癡漢…)仲公然喺皇宮地方大大聲話自己要奪天下,又話要搶番皇貴妃做自己皇后…嘩…佢唔覺有人聽到通風報訊架﹗呢啲野寧俾人知莫俾人見喎﹗遙想當年燕王馬神幾神秘先得架做得﹗
  • (其實劇組係咪見《洪武》拍得咁過癮又來一個細胞分裂將明朝變做清朝再來多次王爺搶帝位?下次使唔使拍袁世凱呢?﹗)
  • 最爆既係癡漢返到屋企無啦啦強吻老婆唐詩詠,咀到佢咀到歪埋後就走咗去…我…想唔笑都唔得囉…
  • 講開又講,當年姚子羚喺《酒店lone人》度一句三表哥兩句三表哥聽到我毛管都棟埋,跟住《鐵血保鏢》啲驚呀喊呀表情都幾生硬的(又係馬小生…)…琴日睇佢啲宮廷戲講對白的tempo真係進步咗好多喎﹗而家到唐詩詠好生硬囉…
  • 講起《鐵血保鏢》呢,阿馬小生當年演的尚智和而家既聶多寶有乜分別呢?又係一味很有情義很有能力受人賞識跟住被人害都以德報怨咁…好悶…當馬明都開始handle到癡漢角色的時候…又當姚子羚從當年睇到我想熄機到而家覺得佢夠淡定的時候…(究竟點解tbb.com有人覺得馬生可以憑呢個角色拎視帝呢?)
  • 問題:當年睇《金枝》有一幕係阿寶禪同陳爽喺如妃個宮中傾野(定做乜…唔記得),令皇后有位話如妃私藏情人攪到一身蟻的…男子除了太監應該唔可以亂入女眷宮門架嘛?阿馬小生先去搵李詩韻,跟住到麥包拉埋一隊人去開party…真係好爆…
  • 我終於諗到點解覺得陳國邦做的康熙唔順眼…佢成日手指指同埋側身側勢坐呀…um…
  • 繼無啦啦二阿哥會搶康熙江山後,睇高登巴打說原來多寶哥係董鄂妃個仔…即係四阿哥…囧﹗實在太爆了…佢遲吓會唔會殺掉二阿哥跟住殺埋康熙自己做皇帝呀?﹗(這就是完全跟《鐵血》一樣了﹗)
  • 可唔可以唔好再嚟柔情似水的旁白呀…好得人驚…(其實也是一個笑點…)
  • 睇完呢套,完全覺得其實《洪武三十二》係好有紋有路架囉。以上。(通常我鐘意的劇先會再翻兜寫多篇架,《紫禁驚雷》實在太驚和太雷,讓我不得不賦多篇…哈哈)

無乜野,純粹覺得個郁靚咪貼吓…(不過唔知係咪《金枝》啲reused materials呢…)

************************************************************
遲吓播《九江十二坊》又有陳錦鴻(今次係主演啦…)…使唔使連續三線劇都見到佢呀﹗(雖然《紫禁》佢係客串…)…無記係咪真係咁無人用呀…

跟住中秋節播《不速之約》又有楊怡…雖然我唔討厭佢啫…但又見到佢真係…

跟跟住台慶劇《法證3》又又又又又又又有除紙山…囧﹗

22 則留言:

  1. 連一向偏心唐c詠既我都忍唔住搖頭了!其實佢同李c韻掉轉會唔會好d呢?姚子羚係"與敵同行"都做得唔錯, 但我都係覺得佢對兔仔牙太cute了, 唔似皇后囉!
    我都唔明點解呢套劇會有咁多旁白, 佢明明就唔係拍緊史實!
    陳國邦之前係"炯探"都幾好, 點解佢做呢個康熙咁昏庸既呢?點解孝莊同康熙會變左奸角咁既呢??

    19th Aug 2011 02:51 AM

    回覆刪除
    回覆
    1. 大c做開啲小妹妹或者楚楚可憐的角色,可能驚被定型所以挑戰一吓奸人路線…但呢吓真係有啲驚…其實我只係偶然睇到一兩集,見佢瞪大眼發癲鬧下人或鬧老公就…um…是有一點over咗…當然我係miss咗中間佢發現老公同表姐啲野既過程…一嚟就見佢發癲鬧人有啲odd…
      阿姚子羚個角色係呢套劇少數令我有正面感覺既呀,除了佢講對白ok造型靚,我覺得佢個角色性格行為都比較正常(重點是正常…哈)…阿皇貴妃其實都幾慘,嫁唔到俾本來的情人,就一心對皇上好啦,到終於等到皇上俾佢做皇后時舊情人又出嚟攪事,逼到佢跳井…被救但卒之癱咗…只能瞓喺度做皇后,真係睇到好心up…
      陳國邦我諗係劇本所限,佢被寫到好綁手綁腳,雖然啲人口口聲聲話康熙盛世,但康熙行出嚟就無乜明君風範,反而成日la埋口面咁…講野又唔夠氣勢喎…孝莊變咗殺人狂魔更係爆笑…我已經放棄咗對照歷史…但就咁睇啲劇情都好爆笑…真係好有娛樂性的一部劇…囧﹗

      29th Aug 2011 11:45 AM

      刪除
    2. 唐c詠個角色正如佢係劇中所講"桂倫並唔係蛇蠍婦人!"佢本來係一個以為自己好幸福既小女人, 所以開頭都唔使惡形惡相咁, 就算之後奸都係有勇無謀, 同皇麻麻甚至惠妃邊有得比?
      問題係c詠演繹得太小家, 堂堂福晉做到成個師奶咁, 點同情你呀?
      反而佢最後可以同福全永遠係埋一齊, 福全又以為自己同曼筠返左草原, 都算求仁得仁; 姚子羚只係衰在太好人, 就落得全劇最淒慘既下場!

      29th Aug 2011 18:16 PM

      刪除
    3. 我都好記得最後一場,福全對住桂倫叫佢做曼筠,桂倫一邊流淚一邊話好,那一吓好心酸的說…
      我無detail睇佢點變奸,只係覺得佢啲惡相瞪大眼誇張表情呀咁,配合本身已經唔太自然的讀對白方式就有點可怕,不過凡事總有第一次既(又或者個劇本所限…),咁馬明都唔係第一套做奸就ok…始終大c外型有局限,太妹妹仔啦…都要搵啲突破,無理由吓吓做啲俾人恰既角色既…

      2nd Sep 2011 09:56 AM

      刪除
  2. 陳國邦演康熙既造手我覺得有參照陳道明演既康熙皇朝。 陳道明0係套劇都係"成日手指指同埋側身側勢坐"。 我記得睇過話佢“側身側勢”既姿態係有歷史考究既﹐ 不過唔記得出處。 當然陳國邦模倣得好著跡﹐ 唔好睇。

    19th Aug 2011 05:24 AM

    回覆刪除
    回覆
    1. 咦,睇嚟陳道明演康熙的那套劇就係我睇了幾廿次,都只係睇到康熙初登位而已咋喎﹗咁我要睇一吓了…
      印象中係斯琴高娃演孝莊,套劇同睇開啲書既印象孝莊係個慈祥的女麻女麻,只會在背後發力幫個孫,唔會呢套野個深山老妖咁奸到出面囉…

      29th Aug 2011 11:51 AM

      刪除
  3. 最後那張姚子羚的相,很漂亮哦。還是成熟點的女人有味道:) 啊,唯一可以說的是,康熙一定很穩陣,因爲歷史是不會改變的;)

    19th Aug 2011 09:49 AM

    回覆刪除
    回覆
    1. 對,我都覺得姚個造型好靚,佢係成套劇難得令我覺得正常的演員…哈…
      康熙係柔和啲,但絕對唔係劇入面個皇帝咁俾人魚肉架…
      只能說我認真就輸了…

      29th Aug 2011 11:52 AM

      刪除
  4. 馬小生兩日唔埋三日就俾布齊拉去炳,睇睇下都覺得煩煩地,明明係大內待衛,點會成日俾人拉去監倉.劇情就係圍繞住馬小生既身世係咁轉...

    最頂唔順係馬角明貼左鬚就大過陳生同馬小生!!
    套戲真係令人好驚,驚到笑喎~

    19th Aug 2011 10:45 AM

    回覆刪除
    回覆
    1. 因為馬小生係主角囉…
      雖然馬明要搶皇位呢個情節太老作,但點都好睇過馬小生啲身世之謎(同埋我真係頂唔順佢那副十年如一日的面口和一式一樣的角色設定),如果改一改康熙的人選(我真係接受唔到馬明做陳國邦阿哥囉,雖然話邦哥都keep得ok啫…),加多一點鬥智鬥力的元素,其實都有看點既…
      而家變咗笑片囉,馬明攪咁多野,馬小生拎兩封信出嚟就推翻佢喎,我都癡線啦﹗

      31st Aug 2011 10:06 AM

      刪除
  5. 根本就係一套笑片~
    最kai係一人插一刀...完全唔知佢想表達d乜,更加冇任何意境可言~而且又唔合理,你話太皇太后插佢都算啦,而家個個都插,唔通多寶潛意識入面個個都係衰人?!
    不過尋晚多寶養父母自殺仲好笑(真係對唔住,我一d都唔感動),流出黎d血乾晒都未死得,馬仔又喊到好似笑咁,佢同襲嘉欣仲走晒音=.=
    套野最大獲唔係歷史,係劇情同演員~劇本笑料多,演員又...講真對唐詩詠好失望,罵人似背書,奸笑又假...都係李詩韻好好多,不過e個角色對佢黎講好似冇乜突破~最好係馬明^^

    19th Aug 2011 14:39 PM

    回覆刪除
    回覆
    1. 我鐘意你用kai嚟形容,實在是太貼切了,那場戲完全唔知佢想點…或者係想表達多寶幾咁大仁大義…掛?
      啲歷史我一路睇一路鬧(因為食緊飯…)…阿媽都話算把啦你,個結局我放棄咗呢個堅持,只當係一套片嚟睇…唔得,真係好好笑…兒戲到呢…我要再一次重申,雖然《洪武》個結局燕王出兵都有點hea和拖戲,但絕對比呢套劇有紋有路,唔講合唔合乎史實,起碼合理啲丫…呢套簡直係天馬行空﹗
      唐詩詠未handle又愛又恨啲感情位,表情有點浮誇,講對白又控制唔到個tempo(就如《洪武》皇后咁…好驚)…但佢又唔可以好似江若琳咁索性講晒口語…um…我諗佢要多練習囉…咁馬明初初做奸仔又何嚐唔係浮誇王…而家都叫進步咗丫…雖然最後一場大殿啲劇情真係兒戲好好笑…但馬明真係好攝場…完全搶晒陳國邦(罪不在佢…係劇本寫得康熙廢…)和馬小生鏡囉~

      31st Aug 2011 10:13 AM

      刪除
  6. 呢套野睇黎做密,洪武+金枝,d設定都抄到足,福全=燕王,個阿媽都一樣係癲,又係謀皇帝位,一見班妃嬪又係金枝果種,好悶。

    不過d女角真係好正,尤其是古裝係扮得靚d,不過我諗真正古人都無咁正,審美眼光都不同,不過我都係唔睇,d女靚都唔關我事,得個恨字,方太教煮餸,有得睇無得食……不如叫d女演員做套紫禁驚雷四仔版算啦!我會睇架,哈哈哈哈!

    正如你所講馬生真係係隔離七日情個角色最好,不過無記要佢做師奶劇,又係同一樣既模copy出黎既小生角色都無法,我地唯有做既就係唔睇。

    姚小姐做得最好都係「酒店鬆人」,可能得黑人憎係好易,之後鐵血真係做得好差,因為佢做忠,把聲就死死地,最記得佢係楝篤神棎做邪教妓女,把聲都唔係掂,不過真係做到果種儍,不過姚小姐上次有套都做人阿媽,都唔會有咩作為。

    20th Aug 2011 12:59 PM

    回覆刪除
    回覆
    1. 中間妃嬪爭寵啲野我無睇,再lap時惠妃已經打咗入冷宮,但我諗呢套野主線都係馬小生和馬明之鬥,啲女仔係附屬品啫。…
      但個設定真係好似《洪武》,都係王爺搶帝位咁,不過《紫》啲創作作到完全同歷史九唔搭8晒,睇到我眼都突都算,最爆係佢啲自圓其說極度兒戲,我想信服佢呢個新故仔都唔得…只能講一句:吓?唔係話﹗
      姚子羚那時做《酒店lone人》我勁頂唔順佢把聲,卒之無睇。《鐵血保鏢》係難得我勁熱愛的馬小生劇,佢把聲都係唔多得,不過個角色討好過《酒店》那個奸人咁解,之後再睇都講到《烈火3》,不過佢做鄭視帝個妹,無乜特別。你話佢做人阿媽那套應該係黃浩然《情越雙白線》,佢跟陳展鵬做野仲要俾佢害架嘛,那時再睇覺得佢ok咗好多,最緊要把聲唔會聽到我想熄機了~哈

      31st Aug 2011 10:20 AM

      刪除
  7. 如切好的這些有趣的話題

    23rd Aug 2011 17:36 PM

    回覆刪除
    回覆
    1. 切好的????

      31st Aug 2011 10:21 AM

      刪除
  8. 睇完個結局,真係好驚同好雷,個劇名改得好呀哈哈=_=

    歷史方面都唔計較佢咁多,不過佢搞到康熙咁廢、孝莊淨係識得嘈真係好難接受!!

    個結局D所謂真相係石頭爆出黎咁,馬俊偉自己講哂就係真相=_=佢玩哂啦

    如果講返史實,話福全會謀帝位,又同康熙兄弟不睦,真係笑大人個口XD

    26th Aug 2011 23:28 PM

    回覆刪除
    回覆
    1. 個結局笑到我痴線
      先係多寶跳崖加中劇毒都死唔去,之後太皇太后高八度講野,不過都唔係重點
      全晚高潮係口水多過茶o既大殿戲!搞左成個幾鐘=.=福全up一大輪野,又拎證物又出動人證去證明自己先係皇帝,但多寶居然求其拎把(可以係偷/執翻黎o既)金鎖同封(可以自己偽造o既)家書出黎就有人信佢係榮親王(咁之前紫凝滴血黎做乜?!),而福全為皇位做左咁野又會比佢講兩句嚇襯
      但最好笑係...馬仔似朱璇,哈哈

      27th Aug 2011 14:53 PM

      刪除
    2. Re: Jasmine

      係囉,話福全爭皇位真係爆笑,好啦,唔執著史實啦,當全新故事嚟睇…又好多野唔合理喎﹗(淨係福全日日周街同人講自己要搶帝位已經攪笑啦,邊有人謀反謀得咁揚架,就算道理喺自己度都係啦…)
      劇入面個康熙咁既款,真係唔明點做到個盛世出嚟,跟住孝莊一日到黑殺呢個鬧那個,又點會有人respect佢…(接受唔到馬小生一日到黑叫佢做「呢個老太婆」…囧﹗
      個結局都係爆笑之最,憑兩封爛鬼信就推翻晒所有野…俾我係福全都癡線囉…吓?咁我咁辛苦攪咁多野做乜呀?

      2nd Sep 2011 09:46 AM

      刪除
    3. Re: Yuki

      個結局淨係覺得:多寶哥你玩晒啦﹗無啦啦中毒加跳涯都唔死,但紫凝俾人筒一刀就死喎﹗
      那場大殿戲我覺得馬明做得好好,見佢望住馬小生拎自己身世那封爛鬼信出嚟時個look大對眼講不出聲樣真係好失望咁…只可惜佢落力演出都係俾兒戲劇情蓋過了啦…我真係笑了,個金鎖求其俾人執咗唔得架咩…起碼都好似其他古裝片咁話個身唔知邊度有啲胎記呀乜咁確認吓丫…你話我就信,俾我係福全我都整番十封八封順治親筆信出嚟啦…
      通常劇入面啲人話某某似某某…我都唔覺架囉﹗哈哈哈…

      2nd Sep 2011 09:52 AM

      刪除
  9. 唉...呢d古裝戲真係教壞細路!

    27th Aug 2011 00:54 AM

    回覆刪除
    回覆
    1. 完全不能置信劇入面個康熙點樣做到盛世出嚟…
      所以我只能說這是一套笑片…

      2nd Sep 2011 09:48 AM

      刪除

要講幾句嗎?﹗XD