2006/08/11

鄭E面(+我最喜愛的十首)

常光臨本博的博友一定發現本人迷偶像極之花心,常出現的名字包括郭先生、舊楊過古先生、近畿堂本先生和生果日報指被台灣蔡天后抄襲的安室,另外還有極欣賞的周星星王喜、另一位古先生等…以本人聽歌睇戲口味之雜,欣賞的歌星藝人(同時頂唔順的都係)多如繁星。返家時mp3剛好播到他的歌,想來我一直都好欣賞他,歌曲一首一首的播,我邊聽邊感動…他是鄭E面。

可能又是《四三零》情意結發作,縱然他的歌藝不算出眾(其實都幾…哼哼),戲又不算好(其實都…無咩表情);常聽到有人說他之所以紅起來是有運(這都是我欣賞的藝人共通點…),不過我就是喜歡聽他的歌,看他的戲。

周星星一樣,我完全唔記得他做過的兒童節目,這些節目的記憶都來自閃電傳真機。劇集,記得的都是和松松姐姐拍檔的,本人至愛乃係《蜀山奇俠之仙侶奇緣》,一來本人愛看古裝劇,二來石生這角色變化轉變極為戲劇化…血魔轉世的他倒真是從可頭爆出來所以受盡人歧視欺凌,後來魔性大發因緣際會下血魔後來上了第二個人的身。前段做被人恰的水魚,中段做恰人的血魔,後來又做番好人,都夠挑戰性吧﹗當然都要有松松姐姐的余英男的情深和包容襯托(這劇的結局很悲的說)。

不知何解,無記在80年代尾90年代頭的古裝片造型玩破格,這套《仙侶奇緣》之前還有一套由李婉華和楊寶玲(呢個cast真係可一不可再,而男主腳係型到震的關禮傑演既警我師兄,那兩條公仔面的水真係殺死人,不能不說當然是演小師弟的郭先生…)的《紫青雙劍》,其造型設計可說終極突破,女腳的鞋似芭蕾舞鞋,衣衫單薄得似現代的晚裝,頭頂的髮髻又一枝二枝珊瑚般篤出呢;好奇怪。到《仙侶奇緣》造型終於回歸正常,比較奇特只有歐瑞偉(即係《尋秦記》的陶總管)的短褲…真係好唔match其他人的造型;另外就是無啦啦參演的曾航生,真沒想過他會拍劇;最後當然係羅樂林做的奸佬(腳色名好像是甚麼王之類),重點是他的怪雞海龍王造型可比之後《西遊記》的海龍王,真係好鬼似。

之後的劇集都沒怎麼留意,再追看的應該是《婚姻物語》, 不過看是為了睇無咩戲的古先生;另外就是《笑看風雲》,他和郭晉安的腳色一忠一奸設定都非常粵語殘片,不過個人覺得呢套比之後的長劇《天地男兒》好看, 《天地》之後拖拉得緊要,那些三角關係看得人把幾火;但最難受都是無記現在仍用這兩劇的奸仔、三角戀、 豪門鬥爭元素做劇集大橋,真嘔血。整套《笑看風雲》印象最深是松松姐姐腳色死後包文龍(即係E面)帶埋貞貞(松松姐姐的狗)一家人到醫院和林貞烈(即係松松姐姐)結婚,看得我眼濕濕…

至於電影本人最欣賞的不是最為人所記得的《古惑仔》(其實最初王大導係想搵古先生拍的,但無記唔想令人有無謂的聯想就推咗,但後來古生先還是拍了大堆加惑片…)、《風雲》(那把比洗頭水廣告還飄逸的長髮…)或《中華英雄》(我命犯天剎獨星…),反而是後古惑仔時期的《九龍冰室》(另見呢篇) 雖然他拍這片時被人批評他出爾反爾說不拍古惑片又拍。不過看完後就知這是套反英雄主義的片子,說出人在江湖身不由己的悲哀。另外一套玩時空穿梭的《無限復活》也很不賴,那首主題曲《昨天的我戀上明天的你》可算是第一首我覺得不俗的張柏芝歌曲。不過,兩套片都好像無咩人睇過,次次講起都無人和應…唉

唱歌而言,他很多歌都曲詞上乘,而且很耐聽,為他選曲的應記一功。配上那三上頭和那深情宣言成功營做一個不羈又情深的形象,殺盡不少少女--除了我,因為我頂唔順當年型的指標--柔順長髮和緊身皮褲。

封面頂唔順,但當中有的歌很多都非常不賴:
不要哭了
匆匆天已涼 你彷似受了傷 在瞬息間摔開我的手
一生的去留 我竟製造藉口 但你別過的身軀是正在顫抖
不要哭了 你轉身那一刻 已告訴我說世上誰重要 方知珍惜身邊的你
決定不來去或留傷害了對方,對方要離去方知誰對自己最重要,下定決心珍惜對方。情深到死…
夜還未深
有一刻真的想 不管一切去找你 卻又明白 再不應出錯
妳這一刻定是歡欣興奮開心不過 共聚又是如何
夜還未深 愛還未可 難過亦要經過 已是離別 我很清楚
未眠如我 不止一個 誰沒有癡過夢過
聖誕一個人感懷身世之歌,適合單身人士在此普世歡騰日子邊聽邊自傷自憐。
愛難留
像那風難停 風難留 匆匆而來 匆匆而完
但思憶仍在觸痛我 又似是飄不遠
像那水難停 水難留 匆匆而來 勿勿而完
但思憶仍未肯妥協 願再共你相見 
再到從前一起到訪過的萊茵河畔,當地的一樹一木、動的風流的水都使男主腳想起以前和女主腳一起的日子。簡簡單單的句子寫出對對方的思念,喜歡歌詞的詩意。
愛情盛放的季節
這片紙張 寄下濃情熱燙 快樂或痛傷一些一點 只想我可以 共你講
再次感激 有緣同路遇上 愛念在每天堆積心底 等這一季 為你可 終於盛放
不知何解覺得這首是說得較白的《愛難留》,都是講一個傻佬等愛情的回來,又是SELL情深款款的。
吻感
曾和誰吻著 那記憶真太深 似是某些舊戲 震撼至今
仿似身歷其境 場面重溫 唇上那些味覺溫度多迫真

黃偉文痛愛》之前的食字之作,歌如其名就是講「吻」的感覺。
請你回來伴我
I only dream of you 每次看你心裏喜歡你越更多
I only dream of you 無論怎麼錯 總有你諒解我
明天開始編寫 溫馨那首歌 從來無求甚麼 共你重新渡過
要數家中最愛專輯,這張如果天空要下雨一定榜上有名。當年budget有限只能二擇其一,另一張唱片是甚麼已忘了,買了這張我一直都覺得是英明選擇。這隻《請你回來伴我》碟中至愛之一。
奇妙旅程
作詞:方家煌 作曲:鄭伊健 編曲:陳光榮
當日互相欣賞 然後這個浪人再度細想
讓今天多少片段 延續美麗她的關心眼光 了解一切 彼此的笑是安慰 也是徹底
當天今天愛在奇妙旅程 相知相處 每日仍是愛情 不須天與地保證
身邊的工作仍未停 今天須加一把勁 彼此信心無形帶領
由於本人不通音律,我係好欣賞會創作的歌手。而走非創作路線的歌手失驚無神來一首我更會豎起耳仔留意。選這首的原因,不用說了吧。另一原來,這首歌同是來自《如》專輯。
我的歌
要是聲線 亦耗損 就以五指 奏下去
指尖一旦 亦擦穿 就以記憶 唱下去
思緒仿似行雲 讓感受像流水 能繼續唱 都必須唱下去
一首自傳式的歌。又是來自《如》碟。最後,是很難得這首歌最後有個假音位,難度高咗﹗哈哈
Together
Every little thing every little baby,
Every time when I miss you baby,
Everyday everyday everyday I wanna be together
Every little thing every little baby,
Every time when I miss you baby,
Everyday everyday everyday I'm always looking for
這首歌我最愛是這段英文(如同古巨基的《友共情》我亦是最喜歡中間的一段英文)。輕快調子真聽得人豁然開朗。
爸爸的汽水
哪管爸爸幾多歲 同樣猜出我心裏 在哪裏挫折過 陪著我唏噓
我很開心遇著煩惱想淌淚 總會 送給我 半杯汽水
講父子情,感動程度和劉華十年》、陳醫生單車》有得揮。不過注目程度就相距甚遠。

奇怪之選:
極速
頭搖又尾擺 飄移境界 想一世只想一秒被放大
看後鏡中 便能愉快 漸變小我強大 誰敢來表態
從這首歌學識飄移這個term,唔睇動漫的我好後期先知呢個term來自《頭文字D》。當中一句「誰敢來表態」勁有霸氣﹗雖然我覺得Sky這個名極難頂。每次我玩過山車時都會諗起呢首歌…
天煞孤星
我命犯天煞孤星 無伴終老 孤獨一生
句獨白都殺晒…淨係聽呢句都夠。
22098 全城效應
全城效應 全城唱 全城高溫作出呼應
一同回響 人人也在和唱 感覺愈高興 高溫效應 
…企喺度唱勁歌其實唔只黎明…這首都係…全程歌者都係行來行來,最大動作的舞姿就係「全城效應 全城唱…」那段的一個火車捐山lone的動作…其餘的時間…哼哼…(9/3/12後按:我竟然去看了兩次風師弟演唱會喎:rerun的馬交版…又睇了2011年的演唱會…好癲啊﹗ )
-------------------------------------------------------------------------------------
奇怪的發現還未完,原來E面和本人另一至愛巴治奧係同年出生﹗(無記錯巴治奧應該係二月生日,而E面就係十月),我講比十個人聽有九個人都唔信﹗應該話E面keep得好還是治奧成熟呢…可能前者貪玩大細路形象太深入民心…

某天收到人家forward的醫貓…哈哈…咁都得? 還有個極攪笑的title: 美琪瘦身了,伊麵都忍唔住要望下…

20 則留言:

  1. 你真係博愛(笑)~~~

    鄭生我都曾經支持過佢一陣,"感激我遇見","我的歌"跟"仍感情深愛上",今時今日我都成日聽架....

    不過,自從支支單野之後就再無支持


    12th Aug 2006 01:03 AM

    回覆刪除
    回覆
    1. 所以聽呢聽去都係舊歌law~~~~


      12th Aug 2006 10:40 AM

      刪除
  2. 「無限復活」真係幾好睇..
    我以前都很喜歡E麵的..上幾個月才看到他在鯉景灣飲野...我仲坐係佢隔離張枱@o@


    12th Aug 2006 14:11 PM

    回覆刪除
    回覆
    1. 好野呢架「無限復活」嗰期好多戲係張柏g和鄭e面做的…
      哈哈,我次次撞見的都係奇奇怪怪的明星,無人個係我欣賞的…

      12th Aug 2006 22:47 PM

      刪除
    2. 到現時為止,我都認為"Best Show 1"同"Best Show 2"是最正的..這兩張CD係我長期擺在車度聽的CD..

      13th Aug 2006 00:27 AM

      刪除
    3. 這兩張碟我都是後來在二手cd店買番,確真有很多滄海遺珠…
      再加上自己一路以來的感情分,是現在新歌所不能及,舊歌真是越聽越正的…

      13th Aug 2006 11:41 AM

      刪除
  3. 想當年鄭生開 concert 我都睇左 2 場,至今仍然未有人 (artist) 打破到呢個紀錄 ... 佢既 "愛難留",實是情歌排行榜第一位 ...

    12th Aug 2006 16:22 PM

    回覆刪除
    回覆
    1. 不得不提當年某位大哥的感激我遇見…不過都係舊事啦

      12th Aug 2006 22:47 PM |

      刪除
  4. 你提起來才回憶起.....
    仙侶奇綠大結局時,松松姐姐攪住佢跳崖自盡,仲要一邊跳一邊深情款款咁望住他,回想返呢幕真是幾悲,其實去到呢到完就最好,之後硬是要加返佢地投胎轉生真是有點畫蛇添足

    12th Aug 2006 20:24 PM

    回覆刪除
    回覆
    1. 佢留咗個伏線話緣定三生,不滅不續,所以英男先抱埋石生跳涯(0岩0岩搵隻套碟出呢望咗一望個大結局~)
      拍親改編小說都要加啲野先開心乃係一貫無記傳統,呢套比起近年改到甩皮甩骨的大唐已好好…

      講開又講,英男抱住死咗既石生搵人救番佢嗰度,個假人真係好假,嗰個位我係笑咗一笑…

      12th Aug 2006 22:56 PM

      刪除
  5. 我個舅仔個樣幾似E面,要唔要我介紹?:)

    12th Aug 2006 22:34 PM

    回覆刪除
    回覆
    1. 係?邊個造型最似?華英雄定聶風?

      12th Aug 2006 22:52 PM

      刪除
    2. 氣質有九成。
      24th Aug 2006 22:11 PM

      刪除
    3. 有無相可以睇呀?有無網上周杰倫B咁似?哈哈

      25th Aug 2006 11:08 AM

      刪除
  6. 鄭生以前同我住埋同一座屋村,佢出道冇耐時,有一次搭電梯時,仲見到佢同阿美琪喺電梯的一角裡,應該是帶她回家見父母(我娘親也認識他父母)~~~
    不過佢既歌喉,就唔係太欣賞了~~

    12th Aug 2006 22:48 PM

    回覆刪除
    回覆
    1. ohhh…我真係無咩撞過明星…
      佢既歌喉我都唔欣賞,不過他的歌曲詞確係唔錯,掩蓋了他的弱點…揀歌的人應記一功…

      12th Aug 2006 22:55 PM

      刪除
  7. 我很少看他的戲,記得是一套暗戰,但真係拍不出他的演技。

    13th Aug 2006 16:40 PM

    回覆刪除
    回覆
    1. 他的演技是比較低調而深沉,確係幾難捕捉到…哈哈哈

      13th Aug 2006 22:07 PM

      刪除
  8. 夜還未深呢首真係年年都有人聖誕節拿出來翻炒啊. 佢老哥唱歌真係好唔掂, 係幕後救左佢咋

    當年我實在太討厭鄭生, 奪麵事件後更加頂佢唔順, 更難得係佢多年都冇進步, 所以都冇理佢了


    31st Jan 2007 11:49 AM

    回覆刪除
    回覆
    1. 幕後揀歌一流絕對幫咗佢,佢啲歌真係首首都好鬼易唱,只係難唱過古天樂的少少架咋﹗
      哈,今次我和你打對台,我幾欣賞佢架~呵呵,但不能否認,佢演戲真係麻麻,唱歌又麻麻…

      1st Feb 2007 09:30 AM

      刪除

要講幾句嗎?﹗XD