時裝店的銷售藝術

本人心腸時軟時硬，但耳仔就全天候軟，這種性子購物時十分危險，本來目標是物件甲，往往因和sales姐姐爹多兩咀就改變方向，買下物件乙丙丁。返家，發現最愛還是甲，又心思思再出動過了。中招中得多，現下會目標為本，只買需要的其他通通給滾開。

當然，偶爾見到目標以外的物品，若是看上還是會出事的。只是，出事頻率很視乎店的sales人員唷。

女生中招物品不外乎著上身和用喺塊面度的。走入美容護膚店戒心是最高的，乃因，一方面我得一塊，買咁多邊用得完？成日以為日日用好快用完，點知用上一年半載都未完，放在櫃中變成雞肋，食之無味棄之可惜。二是選購暢快，俾錢肉痛，百幾二百蚊一個item，選上幾款就成千大元…嘩…大學時就如中咒的被萬X既化妝姐姐乙水乙水吓買下千元護膚品…痴線的﹗所以，我發誓不會再中此咒，見到這些姐姐我會扮見唔到。

入時裝店，戒心相對是較低的。

個人對時裝店沒特別喜好，連鎖的會行，舖頭仔也會行，主打是行過望到櫥窗公仔上的衣飾合心水便走入去望望。 買不買，除了款和價錢(讓我覺得價廉物美，幾乎唔使點sell本人都會自動中招的說…)，還視乎sales姐姐的銷售行為。

我呢世人最怕就係採取人釘人戰術的sales姐姐，打從入店開始就mark實客人，如影隨形，greeting後，客人拿起那件衫她都馬上提供資料(邊度出品呀，新返呀，可以埋鏡拼拼呀，睇啱可以試呀，得一件呀，有減價呀…)；要不拿起一件望望，她們就馬上拿出另外幾件作配襯，之後半推半就的客人就被推入試身室，試過上身，不論是真覺得著上身好睇，還是不好意思空手而回攪到sales姐姐，總之中招率就大增就是了。

昨天本人就遇到這樣的sales姐姐，本人還在抹手(做暑期工時教我的姐姐叫啲淨係睇睇睇的客做抹手的說…)時，已有個sales姐姐拎住件衫話啱本人，之後又拎另一件，推了本人入試身室試。試完不合心意，可是本人職業病發，居然好心的作了個大話說想回家想想(幹嗎要不好意思？﹗其實係覺得價錢太貴，不值…走頭就走頭吧…)，sales姐姐A說本人不成，sales姐姐B就加入戰團，呃…真係走都走唔切。就因為在店裡頭浪費了點時間，外賣的三文魚海膽飯…的海膽放太久無咁好食了，可惡﹗

有些店是掉番轉，sales姐姐自顧自傾電話，只有你伸手求援才望你兩眼，感覺好像不太被尊重，不過總好過被人釘人吧。所以本人倒享受到連鎖店行行望望，店員打完招呼後就讓顧客自由行來行去，有需要才過去幫手。遇著小店的sales姐姐好傾，她又能提供襯衫的意見，吹吹水買買衫就真是人生樂趣。 本人可承認自己是個麻煩的客，太煩的不行，唔理我的又不行﹗哈哈…

講了半天，純粹因為天氣凍了，轉季思新衫，想shop吓囉…

12/3/13後按：不能入的時裝(連鎖)店…
**********************************************
又來煲劇報告了。

煲完《換換愛》 ，現在進軍賀生舊劇《愛情合約》，呢部野，話佢好睇又唔係，爛又唔係，總之唔知想點。一班主角每日行來行去，返返學練練劍，愛情呢？被點題作劇名應該是主打吧，但又激不出甚麼火花，總之淡如白開水。再加上劇集色調超暗的，啲人一個二個個樣又黃又濛，本來靚仔(女)的靚仔(女)度大減，睇得我奄奄欲睡…劇集煲了一半還未入肉，想點呀？但好衰唔衰就係煲了一半，唔睇埋佢又好似好可惜喎…唉

偷望了少少《我們結婚吧》劇情，嘩，十個似長瀨智也套《巨星夫婿》，不過色調又係暗暗的，究竟我頂到幾多集呢？﹗