最受我歡迎的男歌手

書檯本來是張懶方便的書檯x電腦檯設計，左右兩邊各有三個設計得很貼心的小隔，大小剛好用來放正常size的cd盒，家中電腦另有地方安置之下，而本人的爛鬼cd機又放在小隔之上，為方便就愛將心水cd放在一起，久而久之一個熱愛list就形成了…

本人的心水，十隻有九隻入唔到勁歌總選﹗哈哈。(女歌手一格：按這裡)

從左至右...

1. 如果天空要下雨 鄭伊健 1996
熱愛歌：請你回來伴我、如果天空要下雨、奇妙旅程、我的歌

這隻碟據說是有故事的concept album，還請了漫畫家畫了個漫畫版，不過我就唔多明故事和歌曲有甚麼關係，總之歌曲啱我聽就好了。如果無記錯當年plug的應該係《情路狂奔》，貫徹本人不愛主打風格，這是本人很少聽的一cut。心水有《如果天空要下雨》--和當年信和賣相天后的譚小環合唱，那時聽得很入神，但現在…二人都唔知係合唱還是鬥和音﹗感情分之下還是很熱聽。《我的歌》和《請你回來伴我》聽得很感動的說。

ps.忽然創作的《你真係好情人》也可以得金曲，鄭先生作曲的《奇妙旅程》都應該嘉嘉許吧…真係好好聽架喎…

2. G Album Kinki Kids 2003
熱愛歌：薄荷キャンディー, 停電の夜には~On the night of a blackout~, Virtual Reality

一路我都覺得堂本剛唱歌係好聽過堂本光一，光一先生聲底較薄成日好似就呢走音咁。打從這張碟本人開始改觀，光一先生在《薄荷キャンディー》突然假音，假得呢效果又唔錯，可謂化弱點為神奇。只是…自此之後…他的solo歌都總要假一假…

《停電の夜には》和之前例牌"lum"歌有少少唔同，歌詞講和情人共患難渡過停電夜，那年美國真發生大停電，情景交融特別容易投入。題外話，詞中不停「しか...ない」，邊聽歌邊學文法，一流呢﹗

3. 我的快樂時代 陳奕迅 1998
熱愛歌：全碟

要數最愛的陳奕迅金曲一定係《今天等我來》，無他，歌曲出街時正值本人搏殺考試，乃係心靈應援歌。唱片最愛其實《我的快樂時代》和《陳奕迅》(debut那隻)也不相上下，唔同的是，買《陳》碟還有華星大眾價88蚊(華星真值得懷念﹗)，仲要被表妹白眼加一句：「咁既碟你都買？﹗」(我肯定你走寶﹗這餅帶我好像回了很多次…還是忿忿不平吧…XDDDDD)，而《我》碟就係全班唱好陳奕迅，是個happy的回憶~。碟內歌曲風格廣泛，總有一首啱你口味，有市場受落的《天下無雙》，k歌feel的《黃金時代》，wyman狂玩歌名接歌名但玩得很型的《新曲+精選》，還有後來唔知點解逢到k都要點的《反高潮》(其他必點作《現場直播》、《第五個現代化》，唱完一定斷氣)。《與我常在》一碟代表為讀書時捱生捱死的回憶，那這張《我的快樂時代》就代表中學honey moon時代，真的很快樂…

隔離的一張《反正是我》是陳生轉去英記後唯一一張幫襯的唱片，老實說不喜歡那年代的他…雖然攞獎多歌又hit…

4. SO精彩第一次LIVE 蘇永康 1997
熱愛歌：壹號皇庭系主題/插曲、秘密宣言、情來自有方

無論《越吻越傷心》前或後，本人最愛的蘇永康歌曲依然係一首《情來自有方》，哈。當年貪心見live有齊多年來《皇庭》歌曲又有這張碟買下來。聽過之後先接觸番蘇生風格的《山水有相逢》、《有人喜歡藍》、《沒有季節的火花》，不過我已被《情來自有方》洗腦了。另外很欣賞的還有當年某信用卡深夜節目主題曲《深夜宣言》，唯一不喜歡是請來雷大作曲家合唱(佢應該可能或者係這首歌的作曲人，當年佢都好似有份主持呢個節目)。

《妙手仁心》阿Gill(我好記得佢角色都係叫阿嬌的說)年代前的蘇先生歌曲真叫人懷念…

5. 03 四季 梁漢文 2004
熱愛歌：新聞女郎、信望愛、情常在

總覺得梁先生欠了點運，華星年代遇著類型相近的許先生，金牌年代唱片玩concept其實玩得不俗(起碼沒過火吧…)，但除了第一張玩數字的之外每次出碟總好像無聲無息的…

03年好不容易捱到年尾，一切黑仔事總算過去了。每聽到03大事回顧《信望愛》和《新聞女郎》都不勝唏噓，真的。好在，04年我們有歌神回歸大唱《04祝福你…》，03的一切都好像遠去了，包括對這張《四季》的注意度…

6. 秘密基地 張震嶽 1998
熱愛歌：我要錢、分手吧、勇氣、愛不要停擺

不重覆了-->過癮·張震嶽

7. Now and Forever Greatest Hits Live Air Supply 1995
熱愛歌：全碟﹗

買這張原因基本上和蘇永康的一張一樣，買live可以一次過網羅最多的經典金曲。基本上我從來只識《小風波》而唔知Air Supply係邊個，某次聽收音機節目主持人做了個Air Supply專題，連續播了好多首金曲之後本人就迷上了，轉個頭就跑到唱片店買下這張人生第一張英文碟，返家後跟住一齊《making love out of nothing at all》、《all out of love...》…首首歌都高音到死，跟住唱到斷氣…"I can't live...if living is without you...嘩"…

8. 傾城之最 黎明 1990
熱愛歌：一夜傾情、今夜你會不會來、對不起我愛你、人在黎明、OH﹗夜、如果這是情、兩心知、人在邊緣、是愛是緣…(其實即係全碟)

雖然隻碟係90年出品，但我其實96年睇完重播的《人在邊緣》才買，奇又奇在而家都仲聽到，當年Philips出品真係幾勁…

又係本人貪心之故於是買精選碟，望望歌名又好難抗拒，黎先生於寶記前天地線時代金曲都一網打盡了，本人一心儲番的電視主題曲(其實還有《都市方程式》的《傻癡癡》)差不多齊晒，奇怪快歌《我來自北京》、《我的親愛》(爭在未有《I Love You OK》和《我愛 Ichiban》)，另外一堆改編金曲(小田和正的《Oh﹗夜》，正﹗)，記得當年比咗成一百二十大洋來買，不過都抵既，聽足咁多年，而且啲歌又真係正…

9. 請把我的情感帶回家 郭富城 1992
熱愛歌：毫無疑問係全碟
 
其實都係後來才買番，我一路都係聽姨姨dub的錄音帶，逼住聽只得一半的《你是我最寶貝的寶貝》和半餅關淑怡，後來在二手CD店低價相逢終於可以聽完整的version。入手之時我已煲熟郭先生出這張回流香港頭炮精選前出的唱片，這張碟用來儲番齊個collection意義大於真係聽，其實我都唔知而家仲聽唔聽到…哈哈。

至於隔離的《AK-47》係郭先生轉會後華星無聲無息出的精選，個名好難頂，啲歌，OK咁啦，都係為咗儲齊個華星collection…

10. 笑說想 古巨基 1995
熱愛歌：全碟﹗

說到最欣賞的巨基唱片，始終都係要數《愛與夢飛行》 。但呢隻係本人咁大個女第一隻買的唱片，感情分大晒。後來不知何解和朋友交換了一隻唔多聽的李克人國語碟，為儲齊巨基collection(佢係本人唯一一個仍在儲全集的歌手﹗)又向二手店出發，卒之任務完成﹗哈哈。還記得呢隻碟當年係太古坊買了本人一百二十個大洋，還要訂貨等成個星期先有得拎(真係咁好賣？﹗)害我又驚又怕(被人呃錢)了整整一個星期﹗

當年最愛會係《你是陽光空氣》和《笑說想》，而家反而鐘意《晨曦》，真係好舒服，both唱法和歌詞，其實我都係鐘意以前的巨基多啲…尤其是唱片packing的size…

11. 三字頭 林海峰 2005
熱愛歌：流行曲

真係好鐘意《流行曲》抵死夾寸貢貢的歌詞…好難得林公子的碟可以比我不傷腦筋的放入唱片櫃…哈。