萬X路Red Hot Hits

本人不是煙民，非常認同吸煙危害健康(雖然我覺得靚仔…幾有型…嘻嘻)，街上見到有食煙的阿叔阿嬸本人都避之則吉。但自從香煙廣告全面被禁後，本人耐不耐都會懷念一下以前他們大灑金錢的年代，新年萬X路的萬馬奔騰賀年廣告是必看項目，重要性更甚放煙花，現在就算在長城取境幾廿人打鼓都總覺比唔上以前嗰種氣勢；另外就是，曾幾何時每年夏天大件事的萬X路Red Hot Hits，活像夏天的主題曲，好energetic﹗Yo﹗

當年覺得好型，現在每去唱K都忍不住點點來增加自己活力指數﹗

據說Red Hot Hits是華星想出來的點子：和煙草商合作攪個夏天大合唱project，對方出雞(宣傳budget)我出豉油(歌手)云云。呢隻雞頭兩年都在華星，後來就去了被寶麗金發揚光大。無論在那間唱片公司，形式都是一首大合唱的跳舞快歌，再配唔同歌手獨唱作品，攪掂，得咗﹗最初唱Red Hot Hits的歌手都有一定知名度，後來品牌形象慢慢建立咗，寶記直頭用來捧自家新人，情況尤如多年前的少女日記，都work架。

《火熱動感la la la》 郭富城/梁漢文/鄭秀文/許志安 (火熱動感)

第一首「石破天驚」的合唱project就是這首《火熱動感la la la》。打響這頭炮的有剛從台灣回流的郭先生帶領同公司三位掘起中的新秀，齊來勁歌熱舞一番。基本上本人留意呢首歌全因為當中有本人偶像郭先生，當年一出就叫人dub比我，個MV有無睇過已唔記得。後來在唱K時再看先發現…Ohhhhh…當年Sammi還在走「冷艷派」的路線，整個MV都在撥弄那件黑皮褸， 加上就三個man而升高十萬倍的key…整體效果都幾驚…她後來的金毛強形象就順眼得多了…

至於首歌，「要開夠六千場」咁咪要開好多年？呢個問題我疑惑咗好耐，不過首歌開開心心襯番夏天氣氛就算啦；至於碟內其他solo歌好唔好聽已唔重要…主打唔滿意郭先生的《I'm on fire》係Re-cut，之前的大碟已出過了，而且個remix不停重覆"I'm on fire"…好煩。

《愛情傻戀La La La》 許志安/鄭秀文/梁漢文/陳浩民/李美琳/車婉婉 (火熱動感勁秋版大碟/華星火熱一夏大碟)

由於郭先生已蟬過別枝，這隻《愛情傻戀》變成許志安和鄭秀文領軍，雖然如此出街時都有聽吓。最記得係女聲高音依然，只不過人選由鄭秀文變成李美琳， 邊個？咪家陣國際天后李玟。而家睇番個MV真係幾攪笑，一班人喺條街度(好似係尖沙咀)走嚟走去，幾唔知想點。奇怪點二係有陳浩民，佢拍好多卡拉OK MV我就知，佢有係華星唱過歌就真係唔知…奇怪。奇怪三係呢隻《傻戀》仲有隻國語版…基本上，呢個MV係睇多過唱的，睇番當年的樣都夠回味夠本。

可惜係youtube搵唔到個MV…好奇怪只係得EO2的版本…

《熱力節拍Wou Bom Ba》  草蜢/關淑怡/湯寶如/劉小慧 (熱力節拍SUMMER PARTY)
雖然我是華星粉，但個人覺得最成功的Red Hot Hits是這首《熱力節拍Wou Bom Ba》，Wou Bom Ba的熱帶動感比la la la來得更夏日更熱情(個人感覺而已)，MV內亦貫徹呢種動感，同個封面一樣係咁打籃球﹗(比癲屎的《愛情當入樽》行得更前﹗)

呢隻碟除了收錄有份唱主打歌歌手的歌外，仲有成公司大大小小歌手新舊歌成隻精選碟既格局，唔只快歌連慢歌如《願你今夜別離去》都有，唔使買真開心都好開心。


Summer Party

●熱力節拍wou bom ba／草蜢、關淑怡、劉小慧、湯寶如
●緣份／合唱：蔡一傑、鄭嘉穎、王馨平
●夏日燒著了（remix）／黎明
●自作多情／周慧敏
●First love／湯寶如
●還是覺得你最好／張學友
●世界會變得很美／草蜢
●Dela／關淑怡
●急色鬼．愛出位／劉小慧
●多情／黎瑞恩
●在你走的一天（remix）(？係邊個的？)
●迷失的女孩／鄭嘉穎
●願你今夜別離去／黎明

《非常夏日》   張學友/王菲 (餓狼傳說大碟)
王菲和張學友世紀合唱，相信呢首歌係王菲除咗汽水廣告歌之外郁得最勁的一個MV，雖然，成個MV都係學友同啲dancer跳餐飽，跟住王菲先耐唔耐一兩個鏡頭un吓un吓。

搵搵資料，Red Hot Hits個人大碟除了張學友呢張碟和另一隻《愛火花》(本人學友勁歌favourite…)，還有黎明的《I love u ok》，呢隻歌感覺好唔型，點解唔出《我愛Ichiban》或《夏日燒著了》呢？

《打開天空》 陳慧琳 陳曉東 陳建穎 邱穎欣

因為當年一個同學買咗呢隻碟仲向本人熱烈推介，本人才有機會見識。聽過《打開天空》感覺不甚了了，還有少少頂唔順那句「似飛奔的天馬…怒放心花也不怕…」 (當然唔及後來的「男人心一字馬」恐怖…)。聽過之後，幾位新人的歌都不俗，本人尤欣賞邱穎欣的《風微涼》、《有你以後》和《再渡艷陽天》，欣賞程度更勝陳慧琳的《醉迷情人》，只是出過呢張唱片就無再唱了。而兩個男仔，陳健穎的歌太sell友情，陳曉東(《一次真愛追尋一百次》？﹗)震音好勁，幾驚。最後那首《某天某地某一些人》幾娘的說。

本人當年dub落的帶還在，不過機死了已不能再欣賞。(17/5/12後按：某日在kt商場度搵得番二手碟﹗巧開心的說﹗)當年的新人唱得比現在的試正得多，幾唔錯。

《全世界歌唱》   寶麗金25週年歌

又係同學借，話說該同學是周Vivian粉，買了之後發現周Vivian無咩發聲，借給本人後索性塞埋比我。呢隻歌個feel好grand，見證著寶記最輝煌的年代--一個校長，兩個天王，幾位有份量女歌手，三小花，草蜢，偶像實力新人都齊，任君選擇應有盡有。最驚的是，吳君如都有﹗只是出完呢隻碟之後開始星散。