三點三，嘆茶餐

一星期七日，感覺最幸福的日子就是星期六日，因為有機會奢侈地在下午三點三嘆茶餐。

週一至週五都在返工，懶床的本人永遠在最後一分鐘才起身，之後就是以九秒九速度執返個人樣返工，十日有九日都唔可以係屋企嘆個好早餐(即係麥皮~)，唯有到公司樓下超市求其買個包填肚。

午餐就不用說了，以食店而言樓下的商場完全不合格：高檔得我完全唔打算幫襯的茶樓(老細請除外)乙間，食物ok但價錢唔ok(日日食的話都幾重皮，耐不耐一 餐半餐都可以既)的日本野，據聞外賣飯盒爭個橙就夠和皇家飯決一風雲的「監獄風雲餐」的茶樓(同事說，我未食過，好彩)，和冬天食好暖胃夏天日日食好反胃的中式餐廳乙間，不消說那個令我嚐到畢生最難食的日式拉面的food court；最正常只有一間史打北，可恨它size迷你，未到一點鐘三文治已所剩無幾，這大而無當的商場反正吉舖多的是，何不讓史打北擴充營業﹗在這荒涼的環境渡日，又不想山長水遠出外食，唯有激發自己煮食小宇宙，煮些唔會食死自己的飯盒帶返去叮。快手食完仲可以打吓blog~

晚餐，因為一整日太勞累，基本上我都唔想出街食；通常求其買些渣槍雞或麥當當，但求食飽之後快快沐浴更衣會周公去也。

自升讀預科，由於無得外出食飯(和現在情況極似﹗)，漸漸養成只在學校食點點，放學就落山(間學校真係喺個山度…)到銅鑼灣或灣仔食餐飽，光是一條春園街一日食一間都夠食一個星期。嘆tea癮已成，入u更一發不可收拾，有堂都要打包個tea入課室嘆一嘆。現在只有星期六日下午有空檔可以享受呢個人生樂趣，淨係諗去邊度tea已夠傷腦筋。

近呢幾個星期，我都將個寶貴的quota比咗史打北和大家獲。在史打北要份finger sandwich，食晒就一路睇書一路嘆個莫卡"升冰樂"，悠悠閒閒的就一個下午，真係人生一大樂事。要不然就到大家獲嘆個日式蟹皇翅下午茶，$23有野飲有雞翼咬有碗仔翅，而且仲要係好足料嗰隻，想返屋企早抖的日子，嘆完個餐沖個涼就瞓到第二日，呢種日子真係乎復何求。

^影碗仔翅時原來較咗閃光燈，出呢光燦燦咁好恐怖，不過足以顯示佢係tea界的重要地位﹗

辛苦搵呢自在食，食得唔貴但食得招積又滿足，儲夠energy第二個星期又返公司殺過。

另一篇：一刻偷閒