2010/07/01

突然懷舊之鄭天后篇


呢水在看《壹號皇庭》第一輯加之剛loop到鄭天后啲歌度,禁不住要賦文說幾句囉~


其實我真係覺得呢首《Valentino》好好聽架﹗

唔好意思,我個年代真係比較遠古的…哈哈。我好buy鄭天后變成金毛強之前那個強裝成熟既年代(難道係因為《壹號皇庭》?﹗),啲歌幾有味道…雖然係雜亂無章一點,一時唱異國情調,一時又小調feel…之後…um,根據本人唔迷就會紅既定理,佢越紅我咪越唔鐘意囉,仲有最大原因係,04年那個乜鬼shocking pink演唱會檔期本來係安室開show架﹗我要等幾多千年先等到安室嚟香港呀?大佬…雖然呢個只係據說…但都俾我當真的了…哈哈。


小調野《不來的季節》來了…個mv都幾詭異,一時著和服一時著我國民初裝…啲歌路對當時二十出頭既鄭天后來說好似有點太成熟囉…

雖然我成日講《壹號皇庭》,但其實小的對鄭天后拍過既劇最有印象係《大頭綠衣鬥彊屍》…爽朗既飄紅和溫柔既飄雪…到最後飄紅死了,北平喺佢轉世後再搵佢(最後一幕)真係睇到好肉緊,想佢地二人可以大團圓嘛﹗啊,主題曲《癡心等待》和插曲《總算為情認真過》都好好聽的說…同埋,唔係呢套劇,我都唔知錢小豪係錢嘉樂阿哥。同埋關寶慧繼《都市的童話》(其實邊部先既呢?我都唔記得囉)後又做大反派,我無記錯既話佢個角色仲係特登著紅衣吊頸自殺成厲鬼,嘩﹗即時諗番我最驚既鬼片《鬼新娘》…其實…睇完《大》劇自殺既呢一幕後…我係有發惡夢架﹗


《chotto等等》當年我等細路心中係一等一的型,同埋,我覺得眼前呢個金毛強和之前《大頭》入面既飄紅係兩個人囉…呃…。繼黎明《我的親愛》有sayonara,劉錫明有moshi moshi moshi,聽呢首又多一句日文袋喺袋…哈哈。


究竟有無人可以解構典解《叮噹》會唱成《癲噹》呢?實在一大堆快歌都係聽得人聞歌起舞既:《大報復》、《十戒》、《冷脹熱縮》,不過數我最喜歡…梗係everlasting既《火熱動感lalala》囉~

睇番個mv又諗起梅小惠扮鄭天后,十個似﹗哈哈哈…好邪呀﹗


《愛的輓歌》曾幾何時係小的k房飲歌,一路覺得係演唱會ending歌…好grand咁落台,跟住等歌迷狂叫encore encore encore…咁囉,不過,作為non-歌迷既我好像從來都無完整地睇過鄭天后既演唱會喎?﹗anyway,仲有一樣,呢首野係鄭天后無啦啦join《刑事偵輯檔案》(也就惹來拍劇換獎之聲…)後無啦啦成為插曲,晚晚睇晚晚聽,聽到入腦想唔鐘意都唔得啦。當年我好buy大勇和義仔既…但鄭天后劇中係配邊個呢?我唔記得啦…我只記得《皇庭1》阿Joe和Michael…(唔…陶生演Michael係型過大勇好多…哈哈哈﹗)

不知何解我會買《捨不得你》隻碟,除了上面首《愛的輓歌》,另一cut飛佛係《秋冬愛的故事》,很有秋涼天遊車河既時清風送爽感覺,聽落勁舒服~果然我既品味係比較另類…問番個自命鄭天后粉既朋友佢竟然完全唔記得有過首咁既歌…囧﹗


因為有鄭伊麵,於是我睇咗《百份百感覺》,又因為呢首《不拖不欠》有喺套戲度出現過,於是我又鐘意咗。這首又係一個年代既k房之歌,鄭天后k歌大把貨嘛…再加之當年有友人係鄭天后超級粉,於是…去親k房都會鄭天后歌洗板…想不入腦都難了…


無記錯既話《親密關係》和《我們的主題曲》、《默契》係同一水既。又因為有鄭天后粉朋友既關係那幾隻碟我係dub晒碟。慢歌我獨愛sweet到漏既《親密關係》,同一水啲快歌《女人本色》、《表演時間》都相當不賴的說… 但天后喺演唱會入面啲look嘛…唔識欣賞囉…


我懷疑這首係twins出道前友儕中唱得最多既女女對唱歌囉。即係呢,幾喜歡歌詞中談到情愛雖然係困難甚至會得個桔,但正面面對或者有一日會有結果呢…幾正面呀…幾好呀,小的真係好驚啲呼天搶地喊苦喊忽歌。

另,前陣子《勁歌》度謝天后和容天后合唱這首歌…謝天后跌晒watt…這版本堪稱…最恐怖版囉…


貼番首新啲既,近期頭號飛佛呢。

umum,點講呢,遇過一些朋友係好熱誠向我們推介他們所信的,umum…點講呢,絕對相信佢地係出於善意,不過有時啲太hardsell真係…有啲驚…umum…真係點講呢,小的從幼稚園到中學接觸既係另一宗教,向對方講明已有宗教信仰後對方態度有點從熱情變冷卻了…umum… 即係呢,人世間多點包容多點愛不好嗎?﹗umum…我都唔知點講…算啦,唔講啦。

*****************************************************
yeah,數完~

另一篇:我愛舊歌之9394

8 則留言:

  1. 我同你一樣啊好深印象對拒的電視劇,大頭同埋同啊李克勤的浪族闊少爺我都好中意啊,你講個幕我都好有印象,不過個陣我覺得大頭實在令人又愛又驚啊 哈哈
    我都覺得拒有少少太過hardsell自己個信仰,開口埋口都系,我知道拒真心,但好似多左少少,不過點講呢,又好開心見到拒醒曬咁返返來咯,fans仔見到拒開心就開心了

    2nd Jul 2010 17:23 PM

    回覆刪除
    回覆
    1. 《大頭》真係好好睇的說~呢啲有少少鬼元素又唔係太驚既我先受得,洪金寶大哥那些彊屍電影我睇一次發一次惡夢架﹗
      信仰既野我覺得…點講呢…始終係自己本人先知乜野係最有用既,太hardsell只會嚇走人…又或者…人人需要不同啦…

      15th Jul 2010 14:01 PM

      刪除
  2. 懷念有肉的鄭秀文。

    2nd Jul 2010 20:47 PM

    回覆刪除
    回覆
    1. 比janice更有少女盧婉茵既風采…XDDD

      20th Jul 2010 13:36 PM

      刪除
  3. 咦~鄭天后仲有一套電視劇-親恩情未了-我就覺得好好睇啦....

    2nd Jul 2010 23:45 PM

    回覆刪除
    回覆
    1. 這套我記得呀,午間劇場播既…不過好似無睇晒…應該係仲要番學…

      20th Jul 2010 13:37 PM

      刪除
  4. 舊歌的話, 還有"娃娃看天下"都很好聽, 再聽現在的她唱, 又別有感覺...

    女女對唱的話, 還有她跟梅姐的"單身女人", 雖然不太hit, 不過melody簡單易入耳, 歌詞又有意思...

    我自己係fans, 不過就好少特別去sell, 喜好ge野始終好主觀ge...

    5th Jul 2010 15:25 PM

    回覆刪除
    回覆
    1. 《娃娃看天下》真不錯,其實仲有好多既,《SAY YOU BE MINE》、《FRIENDS》、《思念》咁…都好難會聽到佢現場唱番了…
      《單身女人》來自那隻《WITH》呢,首首都好好聽,除了和鄭天后合唱的一首,仲有和陳天后既《夏娃夏娃》,陳天后完全脫胎換骨咁,唱得頗妖野,感覺耳目一新的說﹗可一不可再呀呢隻碟﹗

      20th Jul 2010 13:39 PM

      刪除

要講幾句嗎?﹗XD