2012/07/17

[港劇]最喜愛的回顧~1~《人在邊緣》 / 《今生無悔》


是咁的,前陣子羅慧娟離世,無記就重播她跟星爺的經典之作《蓋世豪俠》,毫無疑問這是一部經典,不過小的向來都是走偏鋒路線,其實我最喜歡的娟姐作品是《人在邊緣》啊﹗又原來多年來都沒特別為呢套劇寫過文,趁勢寫一寫時就飄出好多想寫的劇集,列表一看列列吓…um,看來是可以趁勢出一個呃文系列。(有啲已寫過,有啲無嘛﹗)

(圖片刧自網路)

故事很老土地兩姊妹,阿妹嫁了俾個衰佬,想將個仔交俾家姐照顧時,個衰佬竟然上門搵家姐尋仇,攪到佢地雞毛鴨血,然後引發一個疑似家姐殺咗衰佬的假象,令到阿仔離家出走…家姐懷著不安的心去照顧3個仔女…

時日如飛,阿仔(黎老闆)流離失所成為古惑仔,喺尖東仲好出名添﹗而家姐的三個仔女,大仔(劉青雲)在懲教署做,兄兼父職養家和照顧弟妹;二仔(林文龍)是高材生,在哈佛(定唔記得史單福)讀緊書,一心想搵大錢的; 幼女(羅慧娟)孻女孻心肝,古靈精怪又聰明伶俐,跟佢個friend(黎美嫻)怕事懦弱完全相反。um,話說阿仔犯事入獄咁啱就去咗大仔守的勞刑中心(好似係咁叫的當年),故事就開始啦,阿仔(我係咪應該寫番角色名?)同大仔好多恩怨情仇,跟住細女想化解又越攪越衰,仲同阿仔產生感情鐘意咗佢咁…um,去到中間,真相大白,阿仔就改邪歸正,之後就到典型無記劇的奸人現身:二仔去搶人身家六親不認壞事做盡。最後?梗係邪不能勝正囉~

話說,我當年係好驚演阿仔老豆鄭世鳳的方剛,佢瞪大對眼又話要殺人又要要姦人個樣真係好恐怖﹗好在佢一開始出一出之後就到中段先出番嚟,因為二仔林文龍要奸嘛,佢就係搶走黎明同親生阿爸相認的機會囉~

尖東呀﹗我諗首播時我係有印象睇過的,但唔特別記得。到96年(我果然是歷史人﹗)重播時就大件事,深夜都仲晚晚追﹗仲癲到走去買黎老闆的《傾城之最》精選碟嚟聽﹗因為片頭曲《人在邊緣》和片尾曲《如果這是情》都好聽到不行﹗

而黎老闆的傾情演出梗係爆炸啦,食煙食到劇入面都煙駁煙,真係驚佢個肺穿窿,而同場的演員咁成二手煙法都好危險喎啲健康﹗跟住成日劈友攪到成身血,啲血勁假,好好笑﹗而黎老闆同柴九哥(佢演黎老闆手下的說)講粗話(孟加拉)更加讓我笑噴…想點呀?講加拿大丫笨﹗而那些高腰到不行的牛記…真是太可怕了…

龍哥(即係黎老闆)改邪歸正後去渣的士…硬係覺得好唔match兩件事…(咪話佢離家出走過既,阿姨媽問佢點維生,佢話佢去賣魚﹗我又笑了…)

睇番先知原來黎老闆和娟姐係同年架喎﹗(仲有我的all time飛佛周海味﹗)娟姐同黎美嫻一開始係中七生考alevel,佢地邊將中史野塞入《千千闕歌》邊讀邊唱,我懷疑是我的娛樂版讀書大法的根源﹗哈哈哈哈﹗ 而劇情講黎成績唔好出嚟做野,而羅就叻叻考到山頂大,題外話呢,睇《義不容情》,溫兆倫屋村仔入山頂大,俾同班同學(疑似藍血人)睇唔起佢…令當年小小年紀的我對呢所學府印象麻麻…呀…電視劇毒我毒得太深了﹗

更笑噴的是,跟黎美嫻爭劉青雲的陳法蓉姐姐…竟然演DJ…她的口齒…呃…都係阿Yan做DJ好啲呢﹗(關朝聰﹗有一水啲民初劇實見佢演歸國混血兒的﹗)

當黎老闆和娟姐談情戲份會播《如果這是情》,劉青雲和陳法蓉的戲份就會播《It might be you》,都好好聽的說﹗
(這一幕二人對立而黎老闆撕掉相片是十分型﹗佢老哥仲chok過而家林lone囉)呢套劇仲有我最愛的童星馮志豐大個後的演出,初初都唔認得係佢,後尾先確認跟《射鵰》、《神鵰》童年郭靖楊過是同一人…佢呢個角色係個因為la la地而被恰(ijime﹗)的小可憐,仲要叫Mary(姐)…囧﹗都係去讀傳理做DJ比較有發揮啦…

沒有用劇中片段的MV添…但此曲真係百聽不厭…不厭到聽番原曲安全地帶的版本反而覺得不甚了了…大驚﹗

《人在邊緣》@維基@豆瓣
*******************************************************
雖然是大讚(也因為有很多笑點),但回帶度是《今生無悔》比較高。

這一部和《人在邊緣》有很多相同之處,黎老闆個角色身世都係相當複雜,跟家人關係唔好後尾和好,一和好奸人就出現,而奸人的上位法,都係某忠角原來係某有錢佬的親生仔女而該父親不知道,差一點可以相認的時候奸角就攝位好事多磨令忠角不能相認之餘,奸角仲食埋該父親的身家(如果我無記錯,上面鄭世鳳係無死,而呢套的田生((蝦叔﹗唔記得個角色名))就死掉了…)…um,之後的家族劇好似少用呢條橢,多數係奸角娶有錢女或者向啲阿叔股東埋手收購佢地股份,然後喺股東大會(只係得那班大叔)度推門入嚟,向existing主席(奸笑)說:哈哈哈﹗而家我係大股東,我係主席﹗

anyway,比起《人在邊緣》,《今生無悔》劇本完整性高一點,感情線又複雜到攪出五角關係(《人》劇只有劉青雲、黎美嫻和陳法蓉三角戀,黎老闆和娟姐條線是沒第三者的…),連阿爸銘sir和benz雄都有個女配同佢地pair up一番,幾細心﹗雖然我麻麻地之後溫兆倫變奸的劇情,而佢老婆楊美儀跟銘sir角色的死極度煽情,黎老闆去報仇(《人》劇也有報仇的情節,不同的是…《人》劇是拎槍去殺林文龍的﹗大囧…仲要收埋喺條魚度…平時啲槍多數收埋喺公廁廁所水箱架嘛﹗)也有點兒戲…呃…

um,其實我鐘意睇前段多啲,前文都講了好多次,原來是參照王傑的故事,話男一跟老豆反目,走咗去台灣讀書,因攪大了老婆個肚就停學做特技人搵錢,老婆覺得佢無進步無前途就走咗佬,咁佢就唯有做帶子雄郎,而咁多年都無同喺香港的老豆聯絡,而阿爸又係極度口硬心軟的,掛住個仔又唔出聲,終於阿妹趁畢業禮就借故去台灣搵番阿哥返嚟,阿哥帶埋阿仔番嚟一家團聚,而奸人係佢個friend,之前話有錢佬的親生女就係阿妹個friend,同埋之後出場的越南難民(邵美琪…我係都唔講角色名…哈哈哈),4角關係(連埋阿妹是5角)就開始了…

另,演黎老闆個仔子洋的didi好可愛…只係娘爆的阿媽遇到意外失去生育能力返嚟搶番個仔係不停repeat…好老土﹗劇情話無野飲就俾啤酒個仔飲是令我震驚的…唔驚傷腸胃咩?同埋個仔日日狂食二手煙…囧

唔知呢,睇梅小青啲劇成日覺得係走溫情路線,呢套前半部(即係阿仔從台灣回來和初初同屋企和好)是覺得好型,完全唔覺係梅監製啲風格,淨係覺得完全為黎老闆度身而造囉,戲中人係咁話佢係浪子(XDDDD…完全食住王傑當時個勢,而王傑係唱主題曲的…)…而跟《人在邊緣》只相差一兩年,但人物造型是時尚很多,唔講我以為兩劇相差5,6年耶﹗
(圖片刧自土豆)UM,係咁讚黎老闆添,其實我鐘意呢部劇仲因為周海味(和那個經典的淺水灣酒店…),當年二人的緋聞傳得熱鬧非常,睇完《回到未嫁時》十萬個喜歡二人呢個組合,咁一定要睇啦…周海味是80年代花旦中小的最喜歡的一個嘛,而喺佢同邵美琪之間…我梗係BUY海味啦﹗夠溫文意雅~邵美琪個角色係越南難民,都係我對難民除了「BUG漏度NINE」個宣傳片之外另一個印象來源…嘩﹗咁危險…又打鬥又暴力仲有性病叔叔強姦犯添﹗大囧﹗

第一印象之二…我喺劇中第一次見到未有又一城(White Zone呀﹗)的商大﹗我大囧了﹗(都說,我喺交Japus form之前都仲以為商大未升格大學的…我失格了)((劇情尾段講黎老闆要繼承父親裝修工程家業,就去完成佢喺台灣未完成的學位囉))…好爆炸﹗um,之後睇《天地男兒》,都仲未起的…呀﹗又一城唔係一天建成架﹗

樓上那套綠葉有柴九,呢套有陳國邦(佢keep得勁好喎﹗)、歐陽波比、陶大宇,《今》出街時…《壹號皇庭》應該差唔多出街了吧?(91, 2年嘛)…不過初初係深夜播的,二人喺黃金時間啲劇都係繼續做配角色…而陶大宇做馮素波個仔…《掌上明珠》又係…無限親切~


(樓上《如果這是情》有陳梅馨((好似係tbb版?)),而寶記版係好爆炸的時光倒流70年《對不起我愛你》版有陳淑蘭﹗爆)…雖然講起《對不起我愛你》多數人都係諗起黎老闆絕世走音事件…但小的因為套劇係好鐘意首歌…

《今生無悔》@維基@豆瓣
在網路上看到這篇專講沈文薏這個角色的
*******************************************************
舊文:黎老闆好歌重溫
我們的周海媚…
[雜談]不敢讓人知道的(兒時)偶像…
[雜談]我最「難忘」的電視劇角色…@TBB

好野…之後再續~

全集:
[港劇]最喜愛的回顧~2~古裝片(武俠片類)
[港劇]最喜愛的回顧~3~古裝片(非武俠劇類)
[港劇]最喜愛的回顧~4~民初劇類
[港劇]最喜愛的回顧~5(完)~時裝片

14 則留言:

  1. 我淨係記得有幕講黎明同海味過了一晚後,第二朝起身成件事好曖昧咁,笑死人!

    回覆刪除
    回覆
    1. 佢兩個當時啲緋聞傳到似層層…可能戲如人生人生如戲啊…
      (年紀小小的我已經咁八掛…囧…)

      刪除
  2. 我淨係有睇過少少今生無悔,睇埋你篇文,覺得黎天王以前拍劇真係玩命,我淨係記得有一幕呀天王做stuntman拍緊場撞車戲,劉兆銘好鬼擔心佢,知道天王明知自己唔比都係要做就趕去拍攝場地,睇到黎天王係咁撞就肉緊到老淚縱橫咁款,拍得好真睇到我驚驚。

    不過,黎明講對白個tone同節奏真係好獨特

    回覆刪除
    回覆
    1. 係喎,啲飛車真係拍得幾認真,又爆炸又盛咁,又去埋台灣拍外景,都好落本。所以我先覺得呢套劇同梅小青而家啲溫情野完全連不上囉…

      黎天王講對白好得意,好似好快咁一輪咀講…跟住完。唔覺有快慢的分別…同埋有少少吊高把聲嚟講…XD

      刪除
  3. 蓋世豪俠在哪播?呃錢台?
    自從大鬧廣昌隆後海味一直是我第一位女神(後來給$12000取代了),不過她多年來在強國發展已變被同化成強國人了......報紙佬影到佢又煲煙又放飛劍......周芷若/小芙蓉的形象蕩然無存......

    回覆刪除
    回覆
    1. MYTV…唔知呃錢台有無…

      我好少睇亞記,萬二蚊套《殭屍》都係上年先睇…哈。海味就係由細睇到大有情意結,之後佢喺台灣套《倚天》同亞視的《縱橫四海》…好認真﹗

      咁真人同劇中人總有距離既…又好難永遠優雅…UM…

      刪除
    2. 靜靜告訴你,我也是09年亞視重播殭屍1時才愛上$12000的,即使之前也看過萬二蚊的戲,對她也沒多大感覺,直至看過殭屍系列就中毒了。

      煲煙都算了,放飛劍呢下就算係八兩金/黃光亮都唔應該做吧......
      話說當年大鬧廣昌之後的天地豪情,曾經因為喜愛海味所以不滿黃日華要嘉鳴唔要嘉慧。
      縱橫四海亞視早陣子重播我也有看,他媽的亞視卻不食住個勢播埋縱橫天下,6月尾重播中華英雄又不播埋2,09跟11年重播殭屍1時也不播埋2同3,抵佢冇人睇!

      刪除
    3. 唔知係咪我太後知後覺上年才看,看《殭屍》同好多人都話係經典的《衝上雲霄》一樣…我覺得不錯,但又未去到好有印象或好鐘意咁,看完,um,不錯,發個後感文,就係咁囉…

      放飛劍呢吓我真係唔得…呃,娛樂版我少睇,時運高唔覺呢段新聞…睇唔到相當無事發生過…哈哈…

      《天地豪情》一開始apple死已經慘,跟住嘉慧又要死,最後diana都要死,好慘慘慘慘…其實我ok鐘意郭藹明的,雖然我更buy海味…但劇情我都係ok既…

      《縱橫四海》好似係海味拍拍吓有病所以急急整走佢個角色,又好難得那套劇係亞記劇嚟講我有由頭追到尾的…大塊田做有錢女,應用了奸人娶有錢女上位的公式…好記得…哈哈

      刪除
    4. 你好像還沒看殭2吧?殭2是三輯裡面最多人喜歡的,最大卡屎設定又完善。

      天地豪情的女主角就死剩嘉鳴,一向討厭電視劇有多角戀的我卻很喜歡此劇。

      四海好多海味的鏡頭是後來補拍的,很易看到別人和她對話時鏡頭只看酊她背影,然後後期拍海味的大頭講對白剪接上去。

      刪除
    5. re:WINSON

      係呀,只看了1和3…之後被日劇吸走了…

      《天地豪情》是90年代啲家族片入面比較喜歡的,《天地男兒》和《創世紀》都唔鐘意啲懶複雜的感情線,而奸人嚟講甘量宏是奸得比較有智慧(我覺得),同埋佢既原因(原來自己唔係有錢佬親生仔)好似比較充份…同埋終於唔係娶有錢女上位了…哈

      《四海》我最記得竟然係阿cat和明智傑結婚,後尾被傑(?)錯手殺死了,好似仲係一屍兩命的說?之前之後的都唔太記得了…

      刪除
  4. 呢d睇返真係正,以前我睇過人在邊緣,今生無悔無點睇,係記得王杰唱主題曲,溫笑倫加邵美琪,都好多套劇既組合。

    其實睇返實會鬧,因為套野應該幾唔合邏輯,果時佢講黎生坐監好似係入男童院先抵死,其實黎生同羅慧娟佢地係咪有親戚關係?係既話其實佢地拍拖係咪亂倫?黎生係羅慧娟個阿媽既外生喎!

    不過諗真好怕睇,其實羅慧娟既事令我好傷感,佢段死前既片,我都唔想再睇,好傷心,就連佢d演出都會諗返起,真係殺人放火金腰帶,細個教d野真係無用,有人唔食煙可以有肺癌,食煙既九十幾歲都未死,有人日日嫖你見佢生愛滋未?真係好笑

    by無敵

    回覆刪除
    回覆
    1. 兩套我都翻睇過好多次呀﹗哈哈哈…

      um,《人在邊緣》劇情話龍哥(黎生)第一次入獄時未夠廿一歲,所以係入勞役中心(而家應該改咗名)唔係監獄,男童院應該係俾再細個啲既小朋友入去的啦。而佢同羅慧娟劇中係表兄妹,睇的時候我都問過阿娘得唔得咁樣結婚,理論上表親唔算近親…應該ok掛?

      時也命也既有啲野,短同長係一樣野,活得好唔好又係另一件事咁囉…

      刪除
  5. 睇完你篇野覺得好正,我覺得我地都捉到無記師奶劇d路,真係自己拍套都得,哈哈哈!

    不如拍我屋企d野,我都想有人拍,可惜我屋企d野都係師奶劇,我想佢係甄子丹殺破狼d動作片都好難,哈哈哈!

    by無敵

    回覆刪除
    回覆
    1. 我後來先知《今生無悔》係梅監製的出品,佢啲橋都repeat得幾勁,雖然《今生無悔》後半都有啲老土和不合理,但比起之後的都好好多啦…

      刪除

要講幾句嗎?﹗XD