見工血淚史 之 3 年下篇

唔好意思，才和嬋級姐姐傾完計，轉個頭跟一位80後後輩傾完一輪，都說吾司有變故嘛，血淚史添食一篇。



是咁的，今次是位第一份工就入吾司的80後後輩，年資有「幾」，諗緊好唔好轉工。

個人生交叉點呢，因為而家份工話好唔好話差唔差，轉出去風大雨大，留喺度又唔知點咁。傳統智慧梗係話趁後生試多啲野啦，而且相比以前佢嗰組工作量是少咗好多，學野的機會係少咗。um，唔知好唔好彩呢，小的頭兩份工都有少少係逼住要轉，於是不用諗轉唔轉，係無得揀﹗如果我係佢(好會考oral啲phrase﹗)，我係會既…好老實喎，無野學(aka技能增長)咁我寫乜落resume呢？雖然小的已經唔係fresh grad，有無growth都好重要架嘛…


當然，每個人character唔同(廢話﹗)，你想有進步有挑戰，定係穩穩定定過日子，只求準時不求升職，係選擇，選咗就唔好怨囉。(即係睇人派散水餅時就恨…恨完又唔做…做完又恨過…)


然後後輩說都想轉，但唔知轉乜好…


其實呢，年年做阿披蘇老闆都問我有無5年計劃，然後我就心諗5乜鬼年丫…。我細個啲我的志願寫乜我都唔記得了，六年班我都唔會諗中四選甚麼科…呃。anyway，其實小的係好隨水飄流的，無論大學時做幾多test呀盛呀咁，卒之都係睇見到乜job ad，隨感覺而行(果然是巨蟹座)，感覺應該唔錯就send resume而已。而做了一輪野之後知道自己強弱項，喜歡甚麼討厭甚麼就避重就輕去搵，人揀你你揀人，大家都係搏搏吓架咋…


咁之後後輩說自己既job duties好像太散亂，唔知點擺落resume度

嘩﹗呢個真係多得商大關於resume和interview有不錯的教育(雖然我掌握得…呃﹗)，不是說要吹到天花龍鳳，不過跟job ad配對一番是必需的啦，有時夾硬就夾硬，有啲公司可能buy你有熱誠架嘛﹗而且後生細女說轉field也講得過，當年tutor都話頭幾年係摸索路向架嘛，又說，請人和被請的都係估估吓，唔試真係唔知。而且就算本身個人無乜自信，寫信一刻或interview一刻點都係勇字掛心口喎﹗同埋不要一份resume send十萬份工，點都要tailor made一番…次次send之前望一望，以免有啲十萬個唔啦家的野擺咗落去…hr大大睇完就滴汗…


呀，同埋如果已經有幾年經驗的話，就將工作經驗放於學歷之前吧，除非閣下係gpa爆4又勁過過勁過的人囉…而其實而家resume個trend有無改呢？(因為咁啱我有得interview的工都係要寄埋申請表的…感覺有點危…)我的認知是resume要簡潔，最好兩版就完…聽過友人說有些小朋友的resume幾版紙詳述晒佢自己既豐功偉績，但好多唔開apply既那份工時…就囧了﹗

再之後後輩說如果轉唔到，想增進吓自己技能，但唔知讀乜好…

um，呢個問題好深喎﹗我成日都話想讀番書但解唔開應該讀興趣定為升職…唉呀。咁我會說，良好表達能力是很重要的，表達在於，說話可以精準表達自己意思(aka：無廢話)，寫既話中英文都不會寫出啲令人o咀既野。好廢話呀呵？係呀﹗不過現實經驗告訴我做得到呢兩樣既人唔多囉，有啲人講野方式係鐘意兜圈(唔知佢有心定無意，永遠詞不達意，問佢yes/no佢就答你原因，聽到你火都嚟，電話都好啲，兜口兜面對談時我真係驚我會一個boxfile車埋去…

咁寫呢，唔係個個post都要出信或太多文件上既野，但email少不免吧？其實如何運用email都係一門藝術，繼我見過水蛇春(三行﹗)咁長的subject後，有人係永遠狂錯的v/n/adj不分，也有人係同音異字(英文喎我講﹗phase/phrase呀，guess/guest呀咁，其實我有時都有)，有時我都唔明究竟對方係英文差成咁定係懶得翻check…都唔覺看得一頭霧水的中式英文了…。咁唔係專業寫手，唔使吓吓妙筆生花，不過比較似樣的英文…是(很)重要的，就算而家已經回歸15年了。

這幾年的體會是…原來要搵一個正常的同事是很難的…大囧﹗

血淚史之：
見工血淚史 之 2 年上篇
見工血淚史