給三十三年前的你

嗨嗨…

你好，我從三十三年後的2007年寫封信給三十三年前，即係1974年的你﹗咁大個人除了你生日和請你替我到銀行甚麼的紙仔之外好像沒寫過甚麼信給你…哈哈，誰叫你生成我口水多過茶，喜歡口講多於手寫，哈哈。這幾天望著三十三年後的你，忽然很有興致寫封信給三十三年前的你…

哎…我還未介紹自己，我是你好些年之後生下來的女…

話說，最近，i mean 2007年1月--有隊叫溫拿的東東將舉行三十三週年演唱會，近日見你不停和姨姨們商討看那天看那場坐那位，平日慳家的你雖然不大願意，但也心郁郁為那五個佬付出四百大元買演唱會飛，哈哈，你知道嘛，06年你請我看李克勤--即係溫拿入面叫阿倫既接班人--唔唔，佢到80年代先出道，你唔識佢架而家--演唱會都係坐一百蚊，你知道嘛，十幾年之後先建成的演唱會熱門舉行地點紅館--一百蚊的票離舞台十萬九千里遠，坐在那位置根本看不清歌手的樣貌﹗諗諗吓我又記起， 溫拿十五週年時你也帶過我入場看演唱會，看來你對他們的欣賞真係有如黃河江水滔滔不絕喎…

看著你高興的讚美他們的歌，讚頌阿B俊俏…套用你常對我說的冷笑話：我兩真係親生架﹗自小我就愛迷偶像，小學時的我迷著一個郭姓歌手--佢而家只係個小學生…，你知道嘛，你未來的老公--呀，你現在還未認識他--根據我對你們情史的有限認知--經常踩低我心愛的偶像，我倒奇怪你為何沒特別反應，你知啦，長輩常說：「讀書又唔見你咁叻，迷偶像你就叻﹗」原來暗地裡我們有同一個嗜好﹗ 哈哈，估唔到你的喜好收得那麼密，我還以為你最愛的歌手只有鄧麗君呢﹗

唔知你最欣賞他們那首歌呢？﹗我識幾首咋，最廣為人知當然係《Sha la la》、《L.O.V.E》等，個人最欣賞係《Reflection of my life》，有時聽聽吓忍唔住跟住唱"All my sorrow, sad tomorrow...wooooo"，啊，三十三年前以上的歌應該未出架呵…，只是到我有記憶曉聽歌時溫拿已解散了，不要失望啊，你欣賞的阿B和阿倫在80年代轉為獨立歌手，而且發展得相當唔錯，阿倫仲成為樂壇校長，但對不起，我比較喜歡和他鬥生鬥死的張國榮，話時話，過多幾年佢有套叫《浮生六劫》的戲在麗的做，好好睇架，記得留意喎。還有一個叫張學友的，細個時常見你邊做家務邊聽他的歌，那些《太陽星辰》、《Smile again瑪莉亞》、《月半彎》聽到我由尾曉背番上頭，姨姨們也經常錄帶給你聽--呀，錄音帶呢家野80年代先出，即係你手頭上的黑膠唱片進化版…

其實我好羨慕你可以三十三年後還有機會欣賞偶像的演出，難怪報紙雜誌都說現時演唱會市道靠懷舊粉絲撐住，看你和姨姨是如何樂此不疲看演唱會，上年外婆還遠道而來看徐小鳳啊。不知我十幾二十年後會唔會有這個閒情？﹗而且十幾二十年後還有多少歌星會仍然長青？﹗最慘本人好些兒時偶像，如之前講的張國榮和梅艷芳相繼離世了…幸好，梅姐在02年的演唱會你偉大的讓出門票給我去朝聖，總算看過梅姐真人演出了﹗呵呵。我想如果安室奈美惠--呀…她一個我極欣賞的日本歌手，真如傳聞說會來港開演唱會我諗我會撲飛睇﹗唔駛飛去日本睇喎﹗哈

食飯時間差唔多了，大家打工仔都知食飯時間有限架啦﹗寫住咁多先，btw，琴晚的蛋白炒豆苗好正﹗

ps…唔聽的黑膠千祈唔好掉呀，留番呢益我﹗

三十三年後的呀女上
************************************
05/08/2016：我喺香港睇安室的願望成真啦…哈哈哈