突然懷舊之梅姐篇

不經不覺8年了，趁今天來突然懷舊一番。《一舞傾情》是小的飛佛中飛佛，甜到漏的，um，人生係要多啲正能量~

或者人生在世真係太多野要煩要諗，聽歌我真心想避開啲失戀驚天動地我好慘你做乜唔要我的歌…嘻嘻。除了《一舞傾情》(唔知點解我會將《夢幻的擁抱》和這首歌group埋的…)，02年《with》大碟入面同蘇永康合唱的《兩粒糖》都係飛佛，甜到入心，聽完好開心~(又說，《with》真係一隻好得到不得了的碟…卡卡)

唔知點解我會將《stand by me》、《封面女郎》、《夏日戀人》group埋一堆，應該唔同碟和唔同時期的吧？哈哈。《夏日戀人》我最記得係那個巴西嘉年華裝(不過音樂特輯裡著住嚟唱的歌應該係《失落嘉年華》？) 成個果盤喺頭殼頂…真係有啲不明所以的…

雖然小的小時候鐘意聽梅姐的歌，但都係聽收音機和電視，直到有親人dub了她告別舞台時出的《The Legend of Pop Queen》，小的才第一次完整聽她的專輯…當年好迷這首《touch》，仲有《教父的女人》、《列女》、《四海一心》、《回頭已是百年身》咁。直至近先有機會睇番呢啲聽到曉背的歌既live表演，搵番舊文原來都講緊5年前了…不過有得睇總好過無得睇，真係好精彩~

又是多得你管我才有機會看到這個87-88年《夏日耀光華》的演唱會…小的勁鐘意這首《緋聞中的女人》架…又真係奇怪，得支mic stand，扭扭吓咁唱…但我又睇得好enjoy喎﹗

02年小的第一次親身到紅館看她的演唱會，這首《OH NO!OH YES》第一次聽走迷上了，後來才知原來是改編明菜姐的。個人實在大愛這個live…唔講野一味唱的音樂劇…話說本來張飛係吾娘的，佢有事唔得閒去先叫我去睇…好彩咋﹗唔係就走寶了﹗

完全唔記得李中浩係乜水，也是search出嚟先知呢首《邁向新一天》係電影主題曲喎﹗講起合唱曲飛佛仲有同許志安合唱的《笑向風雲變》，無記錯應該係無記劇啲歌嚟的…

電影主題曲最入腦當然係睇了咁多次依然心up的《胭脂扣》，另一首飛佛係《川島芳子》的《路…始終告一段》，呢套戲我淨係記得有劉華同個結局阿芳子被處決是都係幾心up吓的，但劇情…呃…小的竟然係記得開首芳子十幾歲時被養父強姦…而佢著的和服是沒著底底的…um…(我竟然記埋啲咁既野﹗哈哈哈哈…)

小的真金白銀買的第一張梅姐碟是98年的《情歌》，所以對主打歌《抱緊眼前人》特別有印象(當然仲因為當年鋼條身型的陳生…um)((也因為劇集《大鬧廣昌隆》啦﹗))…同期(定前一期？)仲有《情歸何處》也是勁好聽，不過唔鐘意mv有成虫大哥啫…

又貼多個02年《極夢幻演唱會》的片，其實數快歌小的最愛這首《艷舞台》…哈。另外有《黑夜的豹》(我一度將呢首和sk姐的《黑豹》撈亂了…)、《莫問一生》(好似係《東方三俠》的歌？)，大熱的《壞女孩》、《熟女》、《烈艷紅唇》…其實我麻麻的，side track人又發作了…

兩年前入紅館睇這個show時看到這part小的可是很感動感動得差點想哭呢…所以我亦經常懷疑小的愛聽hocc是因為愛屋及烏…哈哈…看世界到處戰火正蔓延…~~~~~

以上。

我懷念的：2003年12月30日
華星同學會