[港劇]補追的《飛女正傳》

哈哈哈，我是跟風的，仔細一點嚟講應該係一條龍效應又啟動，之前一條龍喜爺就煲番《CIB刑事情報科》和《珠光寶氣》，而家被《天與地》trigger咗，就去補元番未煲的戚劇，睇個list其實好多都煲咗…數吓數吓﹗係佢啦…當年我覺得精甩邊個造型好浮誇所以無睇《飛女正傳》的說…

如果《天與地》係用一個文藝電影式方法包裝去講人性，咁《飛女》就係用黑色喜劇去講；如果《天》係偏向靜態沉默，咁《飛》就一定係癲癲地和癡癡地，好多位都笑到我收唔到聲(之後就被娘問做乜笑到咁大聲…哈哈哈)，越誇張越睇得有幾諷刺嘛。唔怪得套劇當年風評兩極，有人說爛有人說正喎﹗um，呢個時候突然諗起我睇睇埋的宮藤官九郎，佢啲劇成日都唔依常規出奇不意嚇你一餐的(個人最愛《虎與龍》，不過前陣子有啲跌watt，蠻其待最新一套《還有第11人》的說…)…扯遠了，就是說…可能久經訓練了…我睇得好過癮喎﹗哈哈哈

um，說抄呢，無疑梁巧芝個造型係幾似ugly betty，而janet bin又幾似《東方三俠》張曼玉個郁，而佢成日自己同自己對鏡講野又幾似蛛蛛俠阿綠魔的，啲超能力又確係幾美式英雄片啲英英雄人物的力量，而失控迷失自己又幾有《spiderman 3》阿peter仔變黑色那一野。點子是似的，於是就看女超人放在劇中點樣玩個故仔囉。

梁巧芝變janet bin既心路歷程真係幾似蛛蛛俠3的，一開始自己有超能力以為可以隨心所欲，又因為自己肥頭dup耳難得變索女就鬆毛鬆翼，順手去幫吓人咁點之就出名紅咗。但慢慢自己內心深處平時唔覺眼的部份如野心呀好勝呀咁就浮出嚟出現喺janet bin度，令度梁巧芝變身後就控制唔到janet bin，好多失控的事出現咗…如跟幾個男角有情愛瓜葛咁啦…攪完一輪janet bin以為可以完全控制個肉身時又良心發現，係啦，重點就係人有慈悲之心，咁樣你就唔係人，係人妖…呀…周星星對白咗添…哈哈哈。anyway，janet bin條線都幾正路的說…

um，蔡少芬當然是做得精彩，梁巧芝好嘈…(笑)，佢幾乎場場戲都要聲嘶力竭的大叫大嚷，變janet bin後又要吊高飛嚟飛去又要打餐死…(噢)…。睇睇吓又我有少少覺得演janet變太辛苦不如睇多啲阿芝的場口…哈哈。同時也想去睇吓《棟篤神探》(係呢咁既呢個名？)，李慧慧同莫作棟都好有火花架喎據說？阿楚兒媽喺《珠光寶氣》又係成日要扯行地講野講到訪晒大氣的…辛苦了…(雖然說梁巧芝係港女又多缺點，但係佢幾可愛丫…就如janet bin自己所說，做人有時要有吓缺點先好既…)

幾個男角個人最鐘意曹永廉演的徐永暉，佢個角色本來係懦弱怕事，因為被奸人所害加上家人離世，攪到出嚟之後走上復仇之路性情大變。佢啲場口好似係要暗串港劇啲常見劇情咁，例如有錢會gel頭無錢唔gel頭(連大容生阿陳鴻烈叔叔都話鐘意佢唔gel頭多啲…XDDDD)；阿芝話佢講野好浮誇，仲要佢一路講野一路推跌啲櫈，跟住俾阿芝話完後自己執番啲櫈；又如佢一日內俾幾個人打佢一巴，佢就話使唔使吓吓都打人…佢好慘呀﹗不過又會忍唔住一路睇一路笑﹗呀，仲有每次佢在山上跟大容生邊行邊傾計，行行吓唔出聲…唔係佢唔想講野而係凍…哈哈哈…最後一次佢變奸之後一時被大容生問到口啞啞唔知點答時，大容生說你梗係好凍啦…上車先講…呀﹗好有愛呀﹗而次次佢要講對白之前總係有啲《雷雨》式登登登既配樂…好爆笑…呢套劇阿廉哥仔又忠做到奸又再忠番…實在太出色了﹗

哈，未講，我最鐘意的一場係一開始透過賣電話的阿暉賣唔同年代的電話，每次佢試機都打俾阿芝，而阿芝就唔同郁做唔同事，1999年時打俾阿芝佢竟然唔係做緊野而係被癡漢強哥纏住喎﹗笑死我了﹗而呢個開場又真係幾有心思幾搶的說…(阿暉一路都對阿芝一心一意…讓我想起《天地豪情》的家雄(*唔係家明﹗*)對diana…又或者《珠光寶氣》禾仔對阿思…咦…都係楚兒媽﹗)

而陳豪…佢做得好笑過《阿sir》好多啦…見相…golden billy(黃金比例﹗wallance成日講的﹗)…笑死我了﹗不過角色上就比較弱啦…一開始以為佢係癡情醫生，之後無啦啦迷戀janet bin，被佢飛之後為咗搵錢變咗補習天王式天王巨星咁…um…我鐘意睇佢媽媽陳曼娜姐姐多啲…佢係一個artist喎﹗

um，而黃德ben，佢繼《珠光寶氣》後又同周家怡part(都真係太熟口面啦啲人腳…少不了簡慕華﹗)…我想問做乜《飛女》的楊sir(黃德ben)叫Edmond，《天與地》何sir(鄭子誠)又係Edmond既？其實佢都幾慘，明明係警隊明日之星因為想揭穿janet bin秘密而攪到工都無埋…um…不過又真係好笑見唔係木木獨獨的黃德ben(扮女人呴﹗真係無幾可囉﹗)…原來佢都攪到笑架喎﹗

不得不提二舅父鼎爺啦，點估到佢平時同阿芝喺醫院小賣部講吓人生道理哲學呀咁啫，典知佢真係律師，仲上庭打官司添，爆笑笑點是佢同檢察官係咁objection，object到我反對你反對我反對你…哈哈哈﹗我笑了﹗好似在玩緊啲律師劇咁，就如容太出事入醫院之後，醫生說醫生個樣唔一定似吳啟華﹗哈哈哈﹗笑鬼死我…仲有阿爸子明哥，佢無時無刻都在想當年，想想吓的內容跟劇情現實的事件可能無關係架喎…哈﹗um，想說套劇的人物角色設計真係幾出，卡通得嚟有紋有路喎﹗佢地有時會無啦啦講啲人生道理(如二舅父成日自己坐喺飯枱度講哲學，巴士司機又會同你講道理…)…odd得嚟又唔係好odd…(就如阿芝成日講我即係我…但我又唔係我喎…)

久不久攝埋啲時事野如活塞男和街邊bbq煲煙人超好笑…(我太無聊了…？)仲有警察內部調查科的警察竟然叫周旭明？我笑了﹗

讚又唔係全讚既，有啲位都幾長幾chup(如阿芝毀容之後一段)，不過整體確係睇得我好開心…咁咪得囉﹗yeah!~

維基 / 大典