敗家實錄vol.1 古巨基

昨天遊blog時看到有博友細列千fa唱片，心血來潮之下，也來回顧一下多年來的心頭好，簡稱為「敗家實錄」…曾幾何時，本人買cd是買得極狼死的說…

話說我第一張買既cd就係古巨基既，Vol.1就俾佢啦﹗

<--合照啊師姐﹗~

穩打穩紮期

愛的解釋 28/7/94
飛佛：愛的解釋，藍天與白雲(係識呢兩首咋…)

呢隻無買。兩首debut主打《藍天與白雲》(巨基作詞﹗)和《愛的解釋》一快一慢屬穩陣之選，前者極陽光(奇異在台灣改編者竟然係張震嶽…)，後者則一新耳目，原來新聞眼入面的古怪基唱歌有板有眼喎…係唱得有啲似李克勤…震晒音咁…

封面個公仔…勁得意﹗呵，但個封面…eeeeeeeee (27/2/12後按：呢張碟我只dub了帶，前陣子終於入番貨了﹗)

笑說想 23/1/95
飛佛： 妳是陽光空氣, 笑說想, 晨曦

呢隻就係我人生買既第一隻碟啦﹗和debut碟一樣都係一快一慢主打《你是陽光空氣》和《笑說想》，後者係《笑看風雲》片尾曲，劇播時碟還未出，但已極喜愛~。另外仲有《刑事偵緝檔案》片頭片尾歌兩首，電視劇洗腦下成功幫歌者建立歌手形象。不過，我的心頭好是side cut《晨曦》，舒服的好像柔和的晨光~ohhh…

btw，《笑說想》係巨基作曲的說…會創作的歌手我會加分的說﹗

親親我好嗎(EP) 28/4/95

為母親節而出的單曲(？)，因為同學仔借我dub帶關係沒買，一直想知封面公仔是小朋友還是出自巨基手筆？﹗



 



其實我...我...我.... 18/11/95
飛佛： 其實我...我...我...., 我和你的未來

曲風很多樣化但說不上特別的一張碟，不特別喜歡又不特別討厭…見佢出就買…。主打《想說笑》食《笑說想》gag，然而續集只是首普普通通的苦情歌；《其實… 我…我…我…》是巨基初出道「真音」年代初試假音啼聲，當年在友儕中評價麻麻卻深得本人心~呵。另外有快歌《順風車》、《愛情馬戲班》，情歌《每個日出》 和《不是偶然》，聽完印象不深(到而家我仲要諗吓先記得係邊首…)。個人心水《我和你的未來》…其實都是大路慢歌，但鐘意起上來好難解釋的說…。另外《驕 陽》，當年被本人稱為《紅日》加《壯志驕陽》更新版，應援之選，不過無咩人識之嘛…。

假音王子期
第2最愛新曲+精選 31/8/96
我對新曲《第二最愛》和《有心》感覺麻麻，雖然《第》令大眾發現歌者假音技能…。我買，應該係為儲番《親親我好嗎》、《愛的解釋》、《藍天與白雲》幾首無買碟的歌而已…



心願 31/1/97
飛佛：Santa Claus, 完美的一天, 我對門匙說, 阿當夏娃, 黃昏

總覺《我生》大碟的《我生》和《往生》源自此碟的《日出》和《黃昏》，我梗係先入為主喜歡《心願》碟中的intro和結尾曲啦﹗《完美的一天》、 《Santa Claus》和《我對門匙說》都很有節日感又和碟名極貼題，若是聖誕出就perfect，雖然後兩首係傷感的，《我對門匙說》很有《重慶森林》梁朝偉對住啲毛巾牙刷講野感覺，自閉得來頹廢，是本人多年飛佛之一。《失常》…唔記得係咩歌囉…

11/3/13後按：大發現呀﹗原來陳醫生在02、03年左右的國語碟將《阿當夏娃》改編成國語歌《男人的錯》﹗好強大﹗


歡樂今宵 30/7/97
飛佛：Can We Try, 最後一舞, 好人

這張是後來二手檔入貨，當時點解無買？唔知喎… 《歡樂今宵》可能係歌者第一首大hit和假音登峰造極之作，不過一貫本人愛sidecut作風，我麻麻地而已。

對這張碟另外一個回憶，就是當中的《友共情》和《你是我信心》後來畢業時被拿來做「班歌」(勁呢﹗)，last day時一班喊到豬頭咁既人嗚咽地唱，從此，提起呢隻碟我只會諗起當日對眼有幾腫…

忘了時間的鐘 20/11/97
飛佛：小指，換日線，我不睡

都是後來從二手檔入的。話說這是歌者第一張國語碟，為隆重其事特意請來楊采妮設計封套上的帶帽形象，然而…我唔太識欣賞…。主打歌《忘了時間的鐘》將歌者假音絕技帶到台灣，不過本人心頭好卻是另外幾首(見上)，真聲演出仲要難度幾高的說…

後歡樂今宵期

愛與夢飛行 14/5/98
飛佛：來年來日,所謂愛情, 愛與夢飛行, 苦浪漫, 顛覆, 永遠永遠

本人之all time飛佛， 煲了一整個暑假。碟內的歌，要假音，有；要甜蜜情歌，有；要苦情歌，有；要嘈的rock野，又有；死未﹗眾多封套中，本人特別熱愛這個綠悠悠的色調襯紙飛 機，配上清新既點題作《愛與夢飛行》真係一絕~封套操刀人係林狗，多年後，二人整了個相類近但遠遠不及的封面，大碟叫《我生》…

唯一唔滿意既，係內附自製紙飛機乙隻…要剪爛個紙cover先整到，我邊捨得呀﹗

路邊攤 11/9/98
飛佛：冬天, 放下, 幸福號列車

在香港接近零宣傳的第二張國語碟，唔係唱片舖放在當眼位置都唔知出咗。歌曲嘛…個人最愛堪稱歌者慘情歌第一號的《放下》和張震嶽操刀的《幸福號列車》，歌者的歌聲從來未試過咁型呀﹗其他的，聽過就算，印象不深…

有你這一天新曲+精選 16/12/98
飛佛：原來的你

新曲當中幾首是由國語改成廣東，不過新不如舊。至於其他舊歌早就於專輯發行時煲熟了，碟其實沒怎樣聽，要不是為了那隻mtv碟，九成九唔會買。





EEI期
Be My Valentine 29/12/98
飛佛：Be My Valentine, 有你一天, 「倒影」先生, 重捨舊歡

轉會EEI第一張碟，上面那隻精選之所以叫《有你這一天》就因為呢隻碟其中一隻主打叫《有你一天》…。雖然碟內的歌頗不俗，封套上新幹線和車票令當年未去過日本的本人響往不已，但這些都抵不上華而不實的包裝(究竟後來有無出番平裝版呢？)，每次拎隻碟出來都要兜兜轉打瓣開，硬皮紙又易殘，為保它萬全唯有每次 開完都放回膠套去…這是第一次回家後還保留唱片店的膠袋呢…

btw，《「倒影」先生》是巨基作詞的說…(3/2/2017後按：怎麼我而家先發現原來封面張車飛係可以換紅翼手帶？)

許願 Wish 3/2/99

古巨基 31/3/99

《許願》應該係三月出的國語碟的先行single？﹗然而，成隻碟我又真係只記得《許願》一首…其餘的…EEEE

幸福號列車 29/4/99
古巨基Greatest Hits精選 01/00

兩隻都無新歌，舊歌我又齊晒，唔買。左邊一隻封面既單眼有啲恐怖…右邊那隻…又幾有型喎…

天氣會變 10/99
飛佛：預感, Believe, 光天化日, Do Mo A Li Ga To, 羅馬假期.

史上最大件packing，麻煩度100%﹗(雖然後來金牌的碟更大件)又係要留番原來個膠袋，唔係轉個頭就散﹗不過因為內裡送Red Wings頸繩乙條所以忍佢…歌書係本記事簿，仲有攪笑自畫像…

以上全部都唔關啲歌事呀呵？﹗哈哈



尋寶 28/1/00

又係一隻接近零宣傳的國語碟，又係見唱片舖放喺當眼位置而買咗，然而…無咩點聽…有周杰倫份作曲都係咁話…
成隻碟，係欣賞一首《Someday》…

跳飛機 28/7/00

無買呢隻碟，只識全碟最hit的一首《至net小人類》…個封面影得幾型…囉…

叱吒萬人幫勝利誓師音樂會 25/10/00

啲歌幾係本人口味…但我無買…又無睇…又無見過…
(27/2/12後按：後尾在圖書館見到呢餅碟﹗唱是ok的，只是歌與歌之間每次都係講：送俾你地…下一首歌係…有啲緊張feel…不過都好過亂咁講爛gag既…)

New Pattern 18/1/2001
飛佛：神蹟, Love Don't Hurt, 毫不保留

封面非常驚嚇，轉吓轉吓包裝亦非常有趣，但好易散…極唔好keep的包裝…。歌，我最愛就是真係好new pattern的《神蹟》和《Love Don't Hurt》，其餘的…唔太記得了…





情深小生期

 戀戀情深 7/5/01

其實我唔覺《情深深雨濛濛》好睇，又唔覺片頭片尾啲歌好聽，但唔知癡咗邊條線買原聲大碟又買呢隻精選…但最後欣賞的唔係套劇的歌，反而是首娘娘地既《結束我們抱著哭》…





基情年代 9/5/01

又係一隻無新歌的精選，無買。

All The Best 新曲+精選 5/9/01

EEI年代最後一張碟，說實在新曲只有一首《幸運鈴聲》較吸引，每次聽都會記起曾經有個年代手提鈴聲係入數字，唔係blue tooth mp3的說。至於其餘新歌…唔吸引…

還珠格格III-天上人間音樂全紀錄 11/7/03

一套睇了五分鐘已熄機閃人的劇…碟當然唔會買…

最多古巨基精選 4/4/03
古巨基-2003精選19首 28/11/03

無新歌，舊歌我又齊晒，唔買。

高峰但唔係我杯茶期
遊戲-基 5/12/03

基本上，聽過主打歌《任天堂流淚》後對此碟係有點期待，話晒歌者終於一洗我一路都覺唔啱佢既情深男主角形象…我唔理咩打機concept，亦唔介意佢個packing麻煩又大件，一出就仆去買的說。

然而聽落去卻沒一首特別搶耳…比較喜歡的有《愛神》和《悟空》，其餘沒印象…

古巨基拉闊音樂會 18/6/04

買咗但提唔起勁聽…點解呢？我知啦﹗一定係copy control令我唔可以在mp3機度聽…返屋企又唔會開cd機聽…唔怪得我無印象啦…

大雄 9/8/04

打完機到漫畫，個人對大熱的《愛與誠》全無興趣，乃係必飛之選。心水有《Touch》、《傷追人》，不過可聽可不聽，首選的…是《加菲貓》大電影主題曲《我是貓》，可能係全碟最貼題最唔夾硬的一首。





勁歌金曲新曲+精選 4/2/05

好浮誇的造型和好凌厲的眼神﹗雖然我有買呢隻碟，但我一次《勁歌金曲》都無聽過﹗我為既係隨碟附送既mtv和未出碟的《Monica》…








古巨基05勁歌金曲演唱會 6/5/05

我有入紅館睇的說﹗因為感動歌者等了十一年終於圓夢，咩都唔記得了﹗之後再看影碟感覺很不一樣，沒了感動的包容，總覺無論新歌舊歌唱法…都有點…umum…歲月不留人，經歷過風霜的人，始終都係唱唔番以前的清新自然不造作的感覺…



星戰 20/10/05

只鐘意一首《Monica》，其餘的…唔鐘意唔鐘意唔鐘意…嗚

聽後感詳見：Thank You My Dear 古巨基 (碟評《星戰》)


最終幻想 11/11/05

較喜歡《睡美人》和《春天》，其餘改編廣東大熱的…都係唔鐘意…

《星戰》和《最終幻想》，盒依然很大，但歌…唉…最終幻想

Human 我生 25/8/06

終於到最新近一張大碟，也是經過《星戰》驚嚇後對歌者重建信心(講到好似好嚴重咁？﹗)的一張。唔太受大hit作的本人很怕聽到《愛得太遲》，我反而喜歡《花灑》陰啲陰啲灌輸放鬆啲唔好執著，總覺《愛》講得太白，連思考空間也不給我就要我認自己真係愛得太遲了…Ohhhh…

封套到風曲到唱法都好像要回歸舊碟風格，到底唔同咗就係唔同咗…要從現在的歌者身上搵舊日歌者帶給我的感覺…我都係聽舊碟算啦…聽後感：巨基．我生

08後按： 07年新碟《Moments》和《Guitar Fever》後感詳見下面連結，怎麼都在改英文碟名…orz
2/7/14後後按：英記年代的《時代》聽係有聽，不過沒有太留意了…
****************************************
其他巨基：
忽然懷舊之~那些年，陪我長大的古怪基

一碗爛的魚生飯~《勁歌金曲3~party king》
古sir《Strings Fever》…fever喎真係…

古巨基《Guitar Fever》    15/9/08

一刻永恆@古巨基《Moments》

巨基．我生 27/8/06 (一洗之前頹風的全新大碟，當然比之《愛與夢飛行》年代仍差很遠)
買唱片 26/8/06
我的巨基年代 12/2/06
最終幻想 23/11/05 (國語炒雜錦，不過恐怖度絕不及上述的《星戰》)
Thank You My Dear 古巨基 (碟評《星戰》)  24/10/05