久違的九龍城一日遊

托某人的鴻福，本人昨日有機會重遊幾年沒到的九龍城…數數手指…成三年幾四年沒到過了﹗(只是對面海…何以講到好似好遠？﹗)

<--比賽的紀念品…

此行目的表面上是支持某大大的比賽，實際上…當然是飲飲食食~哈哈

由於太耐無去九龍城，而以前去都是從商大出發，從家中出發次數是零，一直不知從商大以外的地點如何到達，一路以來都不將九龍城列入玩樂地點之列，要轉車的關係總覺很隔涉。誰不知，事前和博友相討相逢時間地點時才發現…原來經我家樓下的一架過海巴會到九龍城的說﹗天呀，我只知搭巴士去油尖旺卻不知有如此一架到九龍城的巴士…我太娘了…

Anyway，雖然樣衰的過了一個站下車，總算無驚無險(那一個站只是一條街…若是一條橋我就死得…這樣熱死人的天氣…)到步。

到場第一件事是到現場搵某大大…當然我們的心意…嘻嘻…是目標地點一--Oldway。不知這間店是否因為座落比較隔涉地區還是其他原因，歌曲好像不及其他店號齊全…而我們一大目標日文歌數目極不齊全，比競爭對手加州藍咩顏色的店號提供的數目實在望塵莫及，雖說去這些大眾k box不能要求太多…但好些人氣歌手如中島美嘉竟然無﹗好像有點那個…看著不停滴汗。歌…罷了…食物…質素只能說是夠飽肚而已。當本人上個星期才幫襯完Blue Box，這星期幫襯的這間，無論食物、歌曲質素實在相差太遠了﹗最後還準時三點鐘還房…實在感到掃興至極…下次會幫襯那間，唔使問啦﹗

身處九龍城卻吃下難吃的食物…實在係匪夷所思…好在之後坐了一水的仙X林質素無跌watt。不過都係那句，天氣太熱了，要不出走九龍城中心，美食選擇多的是…

轉個頭又入場睇番比賽…話說本人係唔識是次比賽的遊戲…望了很久才有點頭緒，不過望著全場人兄(女的加埋應該不過十個吧？﹗)跟參賽者進了個好攻(是這樣形容嗎？﹗…)就全場歡呼，本人不其然幼想在睇大電視直播足球比賽中…咁多人一齊睇…氣氛真夠一流﹗

比賽完畢，經過又一次證明本人無抽獎運的大抽獎後，最重要的節目到了--又係食﹗

第一站係泰國野：

右上：蝦頭炸到好脆，極香口，正﹗刺身鮮甜，這樣的一雞兩味倒夠新鮮(平時吃泰國野叫這個菜通常只得刺身而沒有炸蝦頭的說﹗)係個汁好鬼死辣，而本人係十個唔食得辣的說…

中：鴨肉金邊針粉(是這樣叫的嗎？﹗)個湯很不錯的說…

左上：飽肚霸糯米釀雞翼，雞翼炸到極脆，內裡的料極豐富，糯米之外還有蝦、腸、菜等等…食了兩件已極飽肚。其實我想八吓用咩來腌糯米飯？個味酸酸地的說…

第二站係糖水：


本人飛佛之一--腐竹糖水加蛋(下圖)，仲要有蓮子和薏米，貪得意之下試吓冰花…點知原來係一粒粒碎冰？﹗Orz…奇在個嬸嬸仲問我熱定凍…冰花喎…唔係燉蛋喎？有冰仲可以熱？

同埋，店中人一定係懷舊金曲支持者，仲要係電視劇嗰集，坐低到食完聽的歌都係80年代電視歌曲…如細契首《兩忘煙水裡》、《誰可改變》等，一下子成件事好似好懷舊咁…

可惜飲飲食食人數太少…點的食物也不能太多，希望有機會一大班人再到九龍城飲飲食食過啦﹗
******************************************
同場加映：

戰利品乙件，之前在Uniqlo已看中一件外套，不過一直猶豫不決--那是長袖啊﹗出街時真係熱死…終於恨下心腸唔買走人。今次就俾我行行吓見到呢件，完全合符本人要求，價錢仲平一半﹗一流﹗呵呵~