嚴選十大畸歌~90年代篇

當今樂壇人人愛K歌，上至天王天后下至二打六，無人不來至少一兩首K歌看門口。不幸地，很多時製作單位和歌手本意是炮製轟動樂壇的流行經典，但一不小心，眼高手低，就會變成畸歌。不要以為畸歌是暗星和騎呢星的專利，由天王巨星主理的畸歌，認真中帶騎呢的個性，為其演藝事業添上幾分傳奇，令人津津樂道。

唔信？即管去一去片啦。

1. 李美鳳--熱愛Can't Let You Go (91)

我很記李美人曾進軍歌壇(因為李美人曾在某節目唱了兩句本人偶像的《愛你》，效果出奇地…)，亦很記得這首第一張大碟的主打，招牌飛碟頭換上很麥當娜的短髮，襯上火紅行政套裝大唱"can't let you gogo, can't let you go~"…此時我明白天生我材必有用，一個人必有其長處，同時亦有其短處…

2. 鄒靜--我愛夏日長(92,3？﹗)

以歌論歌，歌詞算唔上好畸，叫做有紋有路，這類青春歌手讚頌夏日既歌年年夏天都有架啦(松松姐姐的《夏季sha la la》到王菲的《Summer of Love》)。個問題係舞姿…覺唔覺有啲似機器人？﹗有時我會覺得，黎生企定定唱快歌既選擇係明智的說…

據說，某常被人追問幾時和男友結婚的天后初出道時因被記者指她和鄒靜外型相似而不悅，但我覺得二人極似…直頭係餅印啊﹗

3. 譚又銘--終於找到love (92,3？﹗)

片源從缺(失色呀﹗)

消失了的玉女歌手，好記得佢呢首歌，那個又中又英的歌名，更為老師上堂時拿在做教材，叫我們千萬不要寫文時學，必扣分無疑﹗當然，我而家唔止寫字中英夾雜，連講野都係，我認，我係有口話人無口話自己…

而家在細聽，唔只歌名，歌詞都不停中英夾雜，而且行文唔多順暢…當年我係邊聽邊笑架….

4. 甄楚倩--今天天氣呵呵呵 (92？)

一首瘋魔當年學生仔女既歌，只有要有問起今天天氣點，自不然有人扮「今天天氣呵呵呵﹗」，唔知點解，我一直接受唔到呢首歌…

5. 黎姿--白恤衫 (93)

黎視后唱歌氣柔若絲，唱慢歌都仲叫ok，一唱快歌就…於是她的快歌係…旋律起伏不大，若唔係歌詞「白恤衫，因你變耀眼」這句太騎呢的話真係唔會記得…。另一個看點是，TBB版mtv男主角係古巨基，古怪基年代的他扮型…粉絲都係咁話…幾難受的說…

可惜搵唔到TBB版，上面的是華納天碟啲卡拉ok版而已…失望…(27/2/12後按：有心人已upload)

同埋加映：不是娃娃

黎視后處女大碟點題作，樓上的《白恤衫》亦是來自這張大碟。一首完全暴露視后聲線弱點的歌，旋律的起伏…真係少到呢…聽吓聽吓會瞓著的說…

6. 汪明荃--凍咖啡(94)

搵唔到《凍咖啡》 既片，飲住《迷人pink lady》沖既《熱咖啡》先啦。自94年台慶阿姐石破天驚的表演後，阿姐忽然由嚴肅既人大代表變成突破連連既歌手，更強到整兩朵向日葵喺心口開演唱會。 《凍咖啡》係台慶後出既《熱咖啡》下集，騷又唔夠騷，一味不停「sha la la la 真的多謝」…十萬個新不如舊﹗

講番條片，阿姐表演那part號稱由廿八個俊男伴舞，有捧緊上位既雙古、當紮小生何寶生、鄭伊健等，同時又撈啲歌手如蘇永康、許志安，係連張氏兄弟、CD Voice都有，很有拉雜成軍的感覺…

7. 李莉莉--我要你每夜陪住我 (9...4,5掛…)

曾幾何時，艷星上位後唱番一句兩句係潮流，帶頭的玉卿嫂，到之後的邱淑貞、陳雅倫(她的《隨便坐》都係經典…)人人有份永不落空，歌喉就…不過sex appeal少不了，至少帶給男仕們視覺的享受。唯獨Lily Li很獨特，她走的性感但攪笑又騎呢路線委實只此一門，別無分號，一首《我要你每夜陪住我》我呢世都記得﹗她的造型和歌喉…和國內原來係叫「空調」唔係叫 冷氣…

一直覺得，羅家英的《我向你求婚》可以係下集﹗

8. 譚小環--我要自主 (97)

(27/2/12後按：反而有另一首主打《被愛》喎﹗)((11/3/14後後按：嘩﹗這是陳豪嗎？))呢首之所以畸，不在於歌者唔多掂的歌喉，亦不在於k都唔k的旋律曲式，係在於個造型﹗個雀籠…真係唔知想點…最奇的是，當年很喜歡譚小環的本人竟然有買這張碟…

我永遠都會記得，有一個年代香港的唱片業好景得係人都可以出碟的說…

上面的假髮look超…恐怖…右下的look比較正常…

據說左下的雀籠look是呼應歌曲「自主」的主題，寓意打破框框重獲自由，不過我feel唔到，以上concept是看雜誌得知的說…

平心而論，港姐歌手中歌喉最「驚為天人」的有排都未數到譚小環，點都要數數大熱合唱歌《再見亦是朋友》的女主唱者…

9. 陳百祥--運財至叻星 (97, 8？﹗)

當初我覺得呢個節目幾好笑，和獎門人一樣係非集集睇不可的(尤記得古天樂當年一頭嚇死我的長髮上去…仲要輸得好慘…)，最初呢首歌只係得兩句，就係 「yeah…我至叻…yeah…我至叻…」，配合那個舉手投降的舞姿，一句半句我都仲接受到。隨著呢個節目越來越受歡迎，呢首歌無啦啦成為金曲，air time越來越長，勁歌又見到佢，慈善show又見到佢，連台慶都見到佢…前一水開電影台都見到呢套同名電影﹗撞鬼咩…

唔好話我專揀女仔歌，有首係男人架﹗

10. 活希兒--與Hello Kitty成為朋友 (98)

我個人對呢位小妹妹(當年既)沒太大反感，自她和陳曉東拍了個廣告而人氣急升，狂上雜誌封面，都仲抱平常態度，咪幾靚既女仔一個囉﹗但自這首歌出籠後…我好驚…咁既歌詞都得？﹗這首歌，惹得我身邊一眾HK粉極反感，斷送了歌者本來好地地的眾觀緣，相信亦嚇死唔少少男…
**************************************************
無聲無畫組：

1. 姚琇齡--狡辯
首歌本身係正正常常K歌一首，作為新人DEBUT本來無事，衰就衰在歌者用二萬分菲腔來唱，唱出來的尾音極扭擰，聽得好唔舒服，而那個年代，似王菲係一個賣點，但扮王菲就係一個OUT的理由，歌者不幸係後者…本來，歌者唱流行曲前以「姚安娜」一名行走兒童節目江湖唱腔係好正常的說…何必呢…何必呢…

2. 陳浩民--完全自我手冊

又係一首當年常被我等細路拎呢唱和笑的歌，應該係食《完全自殺手冊》水而出的快歌，而家睇番啲歌詞「完全自我　誰願被鎖　明明是有性格　但願每刻突破」其實幾有紋有路架喎…有咩好笑呢…

3. 張智霖、吳倩蓮--絕世絕招

呢首係張生主演既TBB版《射鵰》主題曲，其實幾有氣勢，一句「射鵰射獅射虎」更引為經典，被友儕研究又研究，究竟小說中有無講郭靖射獅射虎呢？﹗起碼我唔覺喎…

Btw，片尾曲《難得胡塗》很不錯，真心推介…
---------------------------------------------------------------------------------
延伸閱讀：
island blue：嚴選十大畸歌 (撞得topic絕不是偶然…我地係夾埋架﹗嘻嘻)
娜姐：也來十大畸歌

舊文：蝦里波特之消失的新人們
千禧第1個10年選~奇/畸歌 
卡拉永遠ok之我的唱k之道… 
 
come back to love (很強的舊歌資訊﹗)
fun (又係很強的娛樂/音樂資訊﹗)