千禧第1個10年選~奇/畸歌

舊文數過90年代既心水，不如襯千禧第一個十年快要過去，數吓近十年有乜奇歌﹗

Seriously，我覺得尹光呢首《少理阿爸》真係當之無愧，記住一定要睇埋個mv﹗當年你管仲未興起，大家係喺icq度成個mv咁send架﹗好野真係要大家分享~爸爸high high high﹗~~~~

尹光叔叔寶刀未老，奧運有奧運超人，今年東亞運又有東亞運超人(5/12/11後按：仲有334添呀﹗)，真係堅架﹗

EO2、SiSi、E-Kids 魅力移動

有無人知Sisi而家去咗邊？東魅而家仲係咪運作緊？呢首當年喺學界好hit，因為…後面啲佈景dancer係各院校dance soc人…於是…我們被逼聽「將魅力左右左移動…」好多次…真係「一分鐘…贈我一分鐘…」…

據說E-Kids會繼原版Boyz之後重組出擊…errrrr…

馬浚偉、陳健穎 新世胞時代

聾髮製藥「排毒美顏佬」突然間於夜間不停打廣告，聽到嘔…其實首歌本身係正常既(仲有呢篇﹗)，但當每晚睇電視喺《宣傳易》聽一百幾十次，你就好想跟住歌詞唱「煩悶踢開跟我跨障礙…」…

後來美顏佬仲出咗個輕盈版target少女，有位少女手上有一盒…唔敢試…她娘親勇敢嘗試…卒之…嘔到七彩…真係唔方唔排毒…errrrrr

容祖兒 你說得對

嘩…點解呢首歌都有KTV﹗個人覺得呢首野好有夏金城啲「揸架十四座」feel…真係一聽難忘…呢次搵MV我先正經聽番一次…還是忍不住停咗佢了…雖然…我是很喜歡用這首歌詞「你說得對…UH…AR」來我口唱我心…

BTW，容天后早期另一首《扮了解》都OK難頂的…

傅穎 身體語言

少不了這個近年最得我留意既姐姐吧﹗不能不提T姐啲舊姊妹既大作《中華冷麵》和《Control》(其實我是一個dj﹗~~~~~)一樣爆，雖說佢地幾人不和，但歌曲卻如影隨形的…爆﹗「雙眼…記得緊貼我﹗」

VRF 寒冰掌

唔使講咁多，淨係第一句「寒冰掌，又推開兩件」已經係爆﹗仲有丁生狂歌熱舞喎﹗勁爆爆﹗

其實唔關事既，不過順手推埋B2既《Shoot you down》，都係一時選(rave到呢啲節拍﹗)，時代既見證呀﹗呢隊野曾幾何時head住Twins架﹗Shoot you down用我狠狠眼光~~~

裕美 搭錯車

唉呀，而家得番official既18秒版本…囧﹗失色呀，yamete啊﹗另外仲有首「青春最勇敢」和「青春最性感」既《少女大帝》，推介。

白花油王子 愛多80年

唔，點講呢，總之就係有啲野明明係好正經，曲詞正經唱又正經，但出嚟就係好唔…唔…得意囉…

郭富城 絕對美麗

啲「法國、美國與英國」…我真以為係長途電話廣告囉。我諗郭生係好鐘意呢啲懷舊曲風…加埋啲rap又怪怪雞雞咁…，其實…十幾年前《純真傳說》年代玩緊，玩到千禧年代仲繼續…

群星 始終有你

賀特區成立十周年既歌，本來好正常既，但唔知點解表現香港係一個中西華洋共處社會係要喺一班流行歌手度攝歌劇界既莫華倫同粵劇界既尹飛燕，勁唔match囉﹗尤如《同步過冬》喺一班正常唱既歌手堆裡有個驚呼狂叫既阿Paul，你話驚唔驚﹗

又真係講開又講，球記最新首《人人英雄》，倫伯既一句「天天向上…yeahyeahyeah﹗~…不需要認同…」配合隻手狂fing(唔係博友點出呢個point，我一定走寶…倫伯隻手都有power既﹗)，和阿Paul既驚呼狂叫一樣有畫龍點晴既作用﹗

古天樂 今期流行

真係…作為最後一首梗係要搵首爆啲既，呢首…由第一粒音笑到尾，對唔住…古生…我真係你忠粉嚟架…今期流行…流行追命林琴…我覺得能和開首尹光大叔那首匹敵的只有這首﹗﹗﹗

***************************************************

選完啲唔正常既，看來要聽番啲正常既平衝吓…

25/9/12後按：呢個動作3年後終於做了﹗
突然懷舊之2000s心水選