我的東亞運傳奇時刻

 原來句口號「創造傳奇一刻」的「傳」字讀「全部」既全音而不是「傳記」的傳音。聽到「存奇一刻」感覺怪怪的。

 

• 原來大會主題曲叫《衝出世界》而不是《We are the legend》…我是開幕那天才知道。（雖則在電梯是天天都看到的…）
• 大會吉祥物東仔亞東和亞美係乜動／生物嚟架？白side side的唔行埋去都睇唔清啲眼耳口鼻。硬覺得係去年京奧「北京歡迎你」的老翻。（我很環保咁用番舊相﹗哈哈，這是長洲版既東仔亞東和亞美…）（（果然我是不留意是次東亞運既﹗哈哈…謝指正…~~~））
• 開幕禮用維港做舞台都好別開生面的，不過我係見文化中心狂開大燈先知咋。（見之前的文﹗~哈哈）
• 啲文藝表演和京奧的如出一徹得可以（據說真係找京奧公司呢做的）
• 《飛花》和《跑步機上》係表現香港動和靜的兩面吧？如是者《全日愛》同《跳舞街》係要表達香港獨有的MK風格嗎？仲表演埋八十年代和九十年代兩種情懷添﹗
• 英記歌手的那part表演令我以為自己睇緊無記平時啲大騷。和祖國的歌手代表未免太風馬牛不相及了。
• 代表不同參賽地方的花船伴住運動員入場又幾有心思，但人有人行，船有船的，同平時的花車巡遊有乜分別？
• 阿主席、局長個個成大張A4紙拎上台照讀，而且係flat tone咁照讀…咁樣去考A-Level CLC會考肥硬啦﹗
• 比賽其實我冇乜睇，一開始見生果報狂插安排亂都有啲擔心，日本足球隊去籃球場練波係咪搞GAG呀！
• 後來我明啦，係等遠道而來的貴賓感受香港地小人多的生活呀！
• 睇埋足球決賽，我確信這是策略呀！高招呀港足﹗
• 係啦，成個東亞運我真係坐定定睇的就只有這場比賽，其實我都諗住香港輸，怎料會落後追平仲贏埋！超驚喜！射十二碼時我隔離左右一齊嗌，肉緊之情可比英超世界盃呀﹗
• 足球果然能團結人們呀﹗哈。雖然日本有強項遠射，但港隊有屎球（無記個講波佬真係咁讀架﹗）…雖然說人家東洋隊沒派出大國腳來，但意義大於一切啦，金牌呀﹗含金量（也是無記講波佬既講法…）極高呀﹗
• 之但係…熱情過後會唔會一切就打回原型呢？大家熱心支持完港隊，過得一陣…唔記得啦…囧﹗但無論如何，呢面金牌都係一個強心針，只要有夢想，凡事可成真呀﹗
• 琴日睇《哼昌閘》講到好多運動員既辛酸，不是沒正式場地練習就係沒資助連生活都成問題。今次拎咁多牌就證明香港係有好多有潛質既運動員，佢地欠既係一個舞台表現自己啫…
• 連場地唔夠，跟住又要分精英項目，點攪得起呢又…
• 據說今次係將啲場地改裝吓，反而無乜起新設施喎…
• 如果真係攪亞運…得唔得架？唔通又要日本足球隊去藍球場練波？﹗囧﹗跟住啲交通又亂晒大龍點算？﹗囧﹗﹗
• 個閉幕禮俾人剪到一忽忽，攪到無心機睇。想講既係…個台咁細既？唔講都唔知係紅館…仲以為係伊館呀﹗

睇完港足拎金牌，諗起出就係世界盃啦﹗好期待~(1/1/12後按：唉…世界盃真係無乜好期待，上屆冠軍攪到小組賽一pat屎咁…真係醜死人耶…)