2007/01/31

人言可畏

這兩天uncle ray談及梁詠琪如何由玉女變成狐狸精再變成人民(或女士)公敵的事,足見傳媒的影響力,也令我想到看《阮伶玉》時令我心寒的四個字--人言可畏,一個說法只要被不停重覆,最初不信的人也會慢慢動搖,最後加入信者行列…

頓時,我想起90年代的中招者--劉錫明。

如果親愛的大大們不知他是誰,那就證明你很年青了。若說「毒瘤明」,大大們可會有印象?

本人可說是《no》雜誌元祖級讀者,在還未推出「 廿's咭 」 已長期熱捧,我不在意它是不是年青人雜誌(因為當年我還是兒童~),只是覺得幾得意。這本書是傳統娛樂雜誌以外一股新勢力,記得《no》成行成市之後曾有不少copycat,不過都沒存活下來。從某期開始,書中不斷出現「毒瘤明」的相、改編歌詞,不斷的挖苦嘲笑;當年對劉周倪之間關係一無所知的本人看得一 頭霧水,初時連矛頭指向誰都不知道,卻跟住笑埋一份…恐怖嗎?﹗

當年應該有不少如我唔知頭唔知路但跟住笑/罵埋一份的無知小兒,對於劉先生,其實心存歉意。

其實他的戲演得不錯,歌又幾好聽…

《no》雜誌以外的劉先生,80年代尾90年代頭在無記屬多產小生,當羅家良還當配角時,劉先生己當上第一男主角。當中較有印象的,包括出事導致「毒瘤」事件的《烏金血劍》, 對劇名有點印象,身為超級古裝片粉的本人一定有睇過呢套,只是劇情完全忘了,連女主角是周小姐都忘了,倒記得劇集主題曲--劉德華的《天從人願》(還有 《奇幻人間世》主題曲和吳婉芳合唱的《秋意中等我》,當中有少見唔使做師奶的靚靚陳美琪,歌和劇都極正﹗);另外一套是萬子的《大家族》, 當中劉先生演萬子的忠直細叔,是另一個忠的二叔朱江死後會幫萬子對抗奸鬼曾江(但曾江又係萬子阿爸喎﹗),記得劉先生之前應該演過奸角,但這個有心臟病文弱忠直小叔又演得入型入格,他的角色後來好似都係要死(又係娘爆病發跌晒啲藥丸落地痛苦而死的樣…)當萬子成功報仇,實在看得本人極舒暢﹗不得不提,林子祥首主題曲《改變常改變》,好好聽的說﹗光陰真快像一枝箭 留下記憶一片 留下痛苦一臉…

看資料說劉生先於94年上下轉攻台灣,94年?﹗Ohhh…正是無記預備捧新五虎的年代(還記得是邊五個嘛?有兩位古先生,何遠恆,劉愷威和吳家樂)

歌嘛,原來他和郭先生一樣都是91年得獎的(之前錯寫野…改改改…嗚…)

不得不提,是那首繼《少女心事》後另一首教曉我日文的《Moshi Moshi Moshi》,攪怪程度和黎天王的《我愛ichiban》、《我的親愛》如出一徹,當黎天王的兩首大作和《少女心事》都係東洋改編作時,原來劉的《Moshi》卻是本地創作,真係估佢唔到。《Moshi》是當年我等小學仔聽電話時常講,可說是《我的親愛》的「Sayonara OHHH」之外最愛無聊口頭禪。
Moshi Moshi Moshi 怎麼不說話 請你請你請你說愛我吧
Moshi Moshi Moshi 期待你一聲 點起火花將愛爆炸
另一首不得不提的大作就是入選「1991 年度十大勁歌金曲」的《是緣是債是場夢》, 怕且都係無記力谷,對這首歌的印象甚至比本人偶像郭先生原曲《難道你現在還不知道》來得深。廣東版《是》的歌詞內容感覺上成熟點,副歌一段更係澎湃激情, 《難》就有點少男撒女生嬌--做咩你而家仲唔明呀?﹗唔唔…配上郭先生當年純過精溜水的歌藝,實在不太是本人杯茶。原來,作曲的人是《你知道我在等你嗎》 的張洪量,總覺得原曲少男情懷是為歌者度身而造。不過個人喜歡廣東版多啲。
是緣是債是場夢 夢迷夢醒都心痛
纏纏綿綿愛過 迷迷糊糊痛過 冷冷暖暖多少春與冬
如果說梁小姐衰在太高調公開和鄭先生的戀情,也許,欣宜衰在她媽媽太高調的力捧,那劉先生嘛?就衰在他在電台表示過他對同劇女對手的欣賞?對同劇對手唔係話欣賞唔通鬧咩。總覺,劉先生成為「公敵」的原因比前兩者更無辜。更可怕的是,當有人透過傳媒發表對某人的「偉論」,原來真可動員眾生去信去宣揚(最恐怖係本人當年都有份…)…也許是本人長大了,也許是看多了對事件始末了解多了,難怪,我對某被稱才子的出山電台節目完全無興趣,聽完黃Y文和謝昭仁的《八十大壽》就轉台去也。

被老點過,從此面對報導一定一定一定記住記住記住要獨立思考;其實人家又沒殺我全家,何以要像罵殺父仇人的罵個狗血淋頭呢?都係嗰句,唔鐘意就唔好睇,邊睇邊鬧,何必呢﹗何必呢﹗

其他閱讀:
作品 (P.S.劉先生剛於過去的12月發了新專輯…)
近況
絕情谷 (資料極豐富的說)
******************************
同場加映:

本來想搵劉先生的MV…卻…竟然搵到巨基在 《壹號皇庭》 (他應該是演二打六路人甲乙丙丁的說)中唱《是緣是債是場夢》,嘩…我完全唔知囉…佢個樣唱得好認真…(2/3/12後按:片源已刪…囧)

世事真奇妙的下集:
人言可畏續集

44 則留言:

  1. 講開no,我以前都有看的,不過自己較喜歡no另外出版的鬼故事,記得當時看完真的很驚的。有些連載故事,現在都依然記得情節,可想而知我當時是幾甘驚嚇的..

    31st Jan 2007 12:59 PM

    回覆刪除
    回覆
    1. 我完全無印象喎呢個?﹗有鬼故架咩?﹗
      返去搵番珍藏的幾本NO出呢驗證吓先…

      1st Feb 2007 15:26 PM

      刪除
  2. 當年傳媒冇而家咁多作料, 佢地講乜大家都信架啦
    亦可見當時大家都比較單純

    而家? 人人醜聞當宣傳囉

    大作家個仔都唔係好人黎啦, 除左用d卑鄙手段打擊情敵, 聽聞都因為錢銀同雜誌partner反面, 人地提都唔想提佢呀

    31st Jan 2007 13:30 PM

    回覆刪除
    回覆
    1. 可見當年的小學仔幾單純…唔唔
      而家已慣咗傳媒作野,佢地寫既野已慣咗未見官先打五十大板,信住10%先~
      大作家個仔賣咗本書再吞埋舊錢過楓葉國嘆世界單野我係近期睇網頁先知,well,我對呢個人無咩意見啦,係希望佢好好對玉女啦

      2nd Feb 2007 09:33 AM

      刪除
  3. 我都係0個個年代睇no 0既人, 當然都知毒瘤明啦, 0個時佢真係幾紅架, 不過喜歡上了no雜誌的心儀女仕, 難逃一劫啦, 前陣子記者問倪生呢件毒瘤事件, 倪生都唔識答, 只是笑笑罷了, 一個人的命運就衰0係個醋字上面, 真悲衰, 雖然我都好鐘意倪生...

    31st Jan 2007 14:20 PM

    回覆刪除
    回覆
    1. 我鐘意佢阿爸寫的書多啲,個仔的真係不太有與趣,同埋我唔鐘意佢拎咗我最深愛的「神鵰俠侶」中地方名呢做節目名囉
      當年睇no時最初唔知邊個係毒瘤明,初初係得啲相,後來連劉先生的歌都被改歌詞先知,嗰時唔知背後的恩怨,係覺得幾好笑,你知啦,小學仔見到邊個同學有野笑都係咁同佢改花名跟住笑佢啲火羅野,其實大作家個仔呢個行為都幾幼稚

      2nd Feb 2007 09:38 AM

      刪除
  4. wa...好勁呀~你講開心臟病細叔我又有d印象~
    不過呢d八掛新聞是非都係得啖笑,
    無乜點留意~

    31st Jan 2007 14:26 PM

    回覆刪除
    回覆
    1. 嘻嘻,其實我一路都係萬子戲迷,佢套套我都有追架,「大家族」我係首播重播次次汁都撈埋~劇中蝦叔一家都對萬子好衰,只有朱江和劉先生兩個阿叔係好人,所以勁記得~
      死啦…我係八掛精,呢啲是是非非我係勁記得的說…

      2nd Feb 2007 09:44 AM

      刪除
  5. 啊? 原來毒瘤明係佢咩? 我成日以為得一個神童輝, 仲想邊度黎個叫阿明...

    下? 乜原來當初有咁既原因架? 咁呀倪生份人都幾....咩架喎...唔駛做到咁呀下? 咁當初大小小果d人唔知佢既私心既咩?...

    真係幾可怕啊呵...

    31st Jan 2007 14:44 PM

    回覆刪除
    回覆
    1. 有時人年輕,很多野都不是想得那麼清楚去做。不過換個角度,可能他是十分之喜歡周小姐才會為佢做那麼多野。

      31st Jan 2007 19:12 PM

      刪除
    2. re:Cherrie

      神童輝單野係多年之後架啦,唔係唔係…
      醋罈呢啲野,男男女女都有既,問題只係有膽做啲咩出呢對付情敵je
      well,所以我真係唔多欣賞佢,連帶佢個節目都唔聽~

      2nd Feb 2007 09:46 AM

      刪除
    3. re:delpiero

      都係嗰句啦,希望佢珍惜周小姐

      2nd Feb 2007 12:05 PM

      刪除
  6. no初初出果時都ok,但係都係買左頭十期,對當時0既我黎講,呢本簡直就同依家0既數字周刊無分別;自從醋罈子事件之後,更加覺得無買呢本野係啱0既
    唔好話,依家d八卦雜誌咁強,都係因為呢本開山老祖宗咋~

    31st Jan 2007 14:52 PM

    回覆刪除
    回覆
    1. 我睇no的年代仲未睇數字周刊…應該連一本大便都未睇…係睇開啲電視書,所以先覺得佢新奇有趣…
      而家的雜誌完全青出於藍勝於藍,成本書跟本係廣告跟小說,有圖又有字的故仔書,已戒咗好耐了…得閒上吓網好過…

      2nd Feb 2007 09:48 AM

      刪除
  7. 我當時年紀比你大一點喇,所以那刻已極憎倪震,那本雜誌更是一期沒買(耐何校內很多氣質麻麻不會獨立思想加上屋企有米的同學期期追捧,不情願下是有看過就對了)。

    其實,呢個大作家仔,咪又係由呀凹凸氏手上搶來這位千年玉女人魔... 為乜呢?

    31st Jan 2007 15:13 PM

    回覆刪除
    回覆
    1. 大作家個仔當年一度同玉女分手, 同港姐冠軍夢妮卡一齊.
      後來同返玉女復合, 飛左港姐冠軍, 人地欲哭無淚, 亦無數臭任何人
      所以話, 有人係雙重標準之餘, 同時令人見識到衰衰格o既男人唔知點解會有好女人包容佢

      31st Jan 2007 15:48 PM

      刪除
    2. re:Aulina

      我係幾死忠架當年,毒瘤事件都賣盤之後我都仲有睇,嗰啲城市驚喜、校花我全部汁都撈埋…
      到我升上高中無興趣睇時就到我細佬接力,所以我睇到入u都仲有睇~哈哈
      兩個當事人的感情路線圖當年都好複雜吓…

      2nd Feb 2007 09:51 AM

      刪除
    3. re:blue

      我成日覺得,呢位人兄追的女生係滿足佢「我女朋友好正架」既晒命慾望…
      佢係咪仲追過the one港姐?

      2nd Feb 2007 09:53 AM

      刪除
    4. 係呀, the one冠軍係佢初戀情人呀. 仲有佢同某名媛單野又係搞到滿城風雨

      果陣d細叔伯叫佢唔好俾女朋友去參加, 結人地選左冠軍就冇左囉

      其實阿大作家個仔都算好樣架, 但係心地唔好呢度衰呢

      你果句o岩囉, 希望佢好好對玉女, 唔好成日俾人影到佢同第二d女仔一齊啦

      2nd Feb 2007 09:58 AM

      刪除
    5. ohhh…唔怪得我記得有雜誌說佢係港姐殺手…
      個心唔好,個樣好極都係無用架啦…唉…

      2nd Feb 2007 12:14 PM

      刪除
  8. 在下對於那兩位男士,沒什麼支持或反對。

    倒是周小姐是在下讀書時代的完美對象。她的寫真集是在下至今唯一激到要訂購送上門的書藉。

    不過這件事當年也讓在下深深體會到傳媒的力量,得傳媒真的可得天下,所以之後也去傳媒打工,做Freelance也要做寫稿,霸書的一角。

    就算不是用來打擊情敵,也可以有很多其他用途的,手執武器,就算不打人都起碼可以避免被人打。

    31st Jan 2007 15:50 PM

    回覆刪除
    回覆
    1. 周小姐係當年我一個同學(註意我係讀女校的說)的偶像,佢都係狂儲玉女剪報/唱片/no card,於是,每天返校第一件事就係佢將手頭上見到的古先生物品交給我,我就將周小姐資料交給她…
      掌傳媒得天下又係真架喎,唔係咁多大亨明明無掂過都要走去攪傳媒,好多政治家都靠傳媒build up自己image…
      劍心兄你有咁多lone路,有無娛記好路數介紹吓細妹?﹗嘻嘻

      2nd Feb 2007 09:57 AM

      刪除
  9. 其實我都覺得劉錫明好無辜,先至聲明,我本來都唔鍾意倪震,但聽過絕情谷後,又覺得佢OK,但好明顯,佢係年少氣盛,有人同佢爭周小姐,即刻無所不用其極,要打擊劉錫明。不過俾著係我,可能...我後生時...都會。不過劉錫明就真係寃枉,佢當時真係OK架,仲幾紅添!

    31st Jan 2007 19:05 PM

    回覆刪除
    回覆
    1. 大作家個仔事後handle就嘛嘛啦,才氣有無我就唔評論啦,風度就輸晒,反而劉先生仲有風度…

      2nd Feb 2007 12:04 PM

      刪除
  10. 劉錫明真係好慘,被倪震玩剛反轉了。

    Vivian是盲了去愛一個偽文化流泯。

    31st Jan 2007 19:28 PM

    回覆刪除
    回覆
    1. 鬼叫人家手上剛好有半青少年熱愛的雜誌…證明了傳媒人真係要小心相處…
      玉女咁包容,證明了愛係無私和盲目的說…

      2nd Feb 2007 12:06 PM

      刪除
  11. 到依家倪生都5肯道歉,呢一點,真係倪生架烏點。。。係呢件事到,更看出傳媒架可怕~~~~
    不過話時話,我同aulina一樣,5睇no 架~XD
    (新來的,請多指教!)

    31st Jan 2007 20:50 PM

    回覆刪除
    回覆
    1. 你好啊~多多指教呢
      佢可能為面子啦,不過以佢啲架勢呢講都唔會道歉架啦,唔係仲有才子風範既~

      2nd Feb 2007 12:08 PM

      刪除
  12. 當年我都覺得他歌唱幾ok,個人又幾正面.
    初初的卡拉ok的mtv,好多都是他來的.
    不過你唔講我都唔知道他花名的由來~~~
    你話雜誌的考量幾勁呀.

    1st Feb 2007 00:38 Am

    回覆刪除
    回覆
    1. 佢最hit嗰幾首歌我到而家都記得點唱﹗可見當年呢講真係hit
      初初興卡啦ok既年代我屋企無ld機…我覺得我走咗好多寶…嗚嗚…
      呢個花名既由來,自從玉女回流之後不停有人講,亦勾起番呢段童年回憶~

      2nd Feb 2007 12:09 PM

      刪除
  13. 其實佢有好多歌都唔錯
    但真係俾人唱衰左做唔返起
    真係可憐

    1st Feb 2007 01:24 AM

    回覆刪除
    回覆
    1. 本雜誌既讀者層係青少年,但睇電視的應該主打係主婦,其實我想探究吓係咪真係呢件事令劉先生離開tbb…如果電視台出手的話,無理由鬥唔嬴一本雜誌囉

      2nd Feb 2007 12:12 PM

      刪除
  14. 我果時都有睇,但一直唔知「毒瘤明」係邊個,覺得點會有人咁黑人憎,最後至知原來佢係俾倪x抹黑,揸筆揾食d人真係唔得罪得;「是緣是債是場夢」我都好中意聽..

    1st Feb 2007 16:47 PM

    回覆刪除
    回覆
    1. 「是緣是債是場夢」我直頭覺得好聽過原曲~
      我係好後來先知件事始末,知的時候no已轉手,倪生又遠走楓葉國…太遲了﹗

      2nd Feb 2007 12:13 PM

      刪除
  15. 呢個賤才子,以前我中學時都有睇"yes"個時年紀細,人講乜都會信,今期東方新地有提返呢件事,我上網睇返以前既野,覺得賤才子真係正人渣,讀咁多書識咁多字黎傷害別人,而且重唔覺得自己有錯,點解劉鍚明唔出聲比人咁講,其實點解佢唔返黎香港發展,根本佢就冇錯,點解要佢同家人分離,反而個賤才子就大搖大擺返黎香港,覺得好無奈,呢d二世joe因為有家底有錢玩死人可以咁容易,我想睇佢幾時有報應

    24th Jul 2007 18:26 PM

    回覆刪除
    回覆
    1. 咁都好難怪,當年既雜誌仲有公信力,而且點會估得到有人會公器私用先得架,加上…我係好好好好好後期先知毒瘤所指何人…知道之後就無份笑啦,笑唔出。

      學董伯伯話齋,離開需要勇氣,留下來需要更多勇氣…可能當事人對某「才」子、該雜誌和人們反應感到心灰意冷,所以才轉移陣地去台灣掛…

      劉先生最近又出番呢講呢單野,適逢又有傳聞話「才」子和玉女分手,timing又會夾得咁緊要…

      26th Jul 2007 18:10 PM

      刪除
  16. 仲有冇可能有人「珍藏」左毒瘤明閃卡?

    26th Jul 2007 17:20 PM

    回覆刪除
    回覆
    1. 我無留到當年的雜誌…掉晒了…

      26th Jul 2007 18:10 PM

      刪除
  17. hellomimi7/6/12 10:15

    呢亶所謂才子應該要改名, 偽君子, 我不嬲都好憎佢, 佢咁鍾意界港姐, 呢期果個咁正, 界得唔好曬, 掉左件老玉女, 大把新女撲埋去呀偽君子度呀, 個人同個樣一樣得個"賤"字

    28th Jul 2007 15:22 PM

    回覆刪除
    回覆
    1. 實在呢,佢既人品和口味我無興趣評論啦
      總之我唔多(曉)欣賞佢,也對佢既新聞作品無興趣就是了…

      12th Oct 2008 01:30 AM

      刪除
  18. 哈哈~ 偽君子偷食斷正俾人影左, D人又搵阿劉生出來講兩句了...

    睇黎劉生無做過乜都好, 呢對"神仙眷侶"有咩事都會搵佢出來評論架啦...阿偽君子, 如你所願啦, 你話人地追你女友, 咁你地2個成世都會有劉生夾係中間架啦.

    11th Dec 2008 16:45 PM

    回覆刪除
    回覆
    1. 你唔喺度留言我都唔記得呢篇文,也不會記得上年差唔多時候偽才子又「偷食」…
      回帶…我一路都唔識欣賞呢位才知…不太知佢才在那方…

      11th Dec 2008 20:13 PM

      刪除
    2. 佢才華正是搵到D肯包容佢o既人, 難度好高的... partner又好, 疑似情敵又好, 分手女友(x N個), 佢搵過人著數, 害又害過, 辜負過都有, 有邊個出過黎講佢壞話同追究?

      若然不是才華, 咁佢都真係未免太好彩lu

      13th Dec 2008 00:43 AM

      刪除
    3. 佢把口識講野係絕對無庸置疑啦…
      但相由心生…佢個樣…越望越…將才華放在不好的地方樹太多了…看來…

      13th Dec 2008 22:16 PM

      刪除

要講幾句嗎?﹗XD