2011/08/11

[雜談]我為甚麼會睇番港劇?

從文章底下的linkwithin link番07年時寫過一篇《我為甚麼不看港劇?》,感覺不無感概,當年小的嗤之以鼻的港劇…今天竟是小的晚晚唔追唔安樂的東東喎﹗反觀07年時晚晚唔睇唔安樂的日劇,就有一大堆爛尾…於是小的又做了一個統計…。

Methodology:…也其實是沒有的…看倌們有沒有發現小的暗暗地在劇集後感文前加上港/日/國/台劇等tag,是咁的,就是讓小的容易search番文章出來…咁小的就跟著呢啲tag去數,有些撈埋一碟的雜文,有提過該類劇集的話就照數出嚟啦…於是就得出上圖乙幅。(我也許是整chart整上癮了…哈哈)

*******************************************************
港劇:
雖然咁多年嚟一直都有就無記劇寫幾筆,不過多數都係回顧舊劇、台慶節目巡禮咁,新劇後感大概不到一成…umum。真正睇番港劇應該係自09年《烈火雄心3》開始(但呢套我係一路睇一路鬧的…),突然開番一條龍喪煲喜爺的舊劇,跟住link link吓睇吓呢睇吓路就一路keep住追,反正同時日劇又出疲態,無理由明明無興趣都逼自己睇落去架…無特別追了幾年,睇番又幾有新鮮感喎﹗

對照07年時的舊文,無記通病是依然的(sorry,我仍然是主打睇無記劇…):仍然鐘意嘈吵,仍然嚟嚟去去那些人(呢個病好似仲嚴重咗…而家連唱歌都係自己人包辦囉﹗幾時先可以同四大和解呀?),不過今年又唔知做乜突然從一貫的倫理爭產好嘈劇(今年表表者應該係《團圓》囉﹗)和《金枝》式鬥爭劇(咦,唔通係《紫禁驚雷》?),突然 有一堆好破格的劇,小的至愛《洪武》不在話下,一連兩部律師劇《怒火街頭》和《真相》少談情多做事實在令人太爽了﹗雖然情節少不免是讓人覺得抄抄貢,但成品出嚟至少有讓人追看的意欲而不是熄機丫…當然,抄…總讓人感覺不良好。

再睇埋《潛行狙擊》呢,想問無記係咪諗住用重口味嚟打出新路線?性意味、暴力和粗話多不勝數,連十年難逢一潤的食煙場面都有番(仲要係主角喎﹗),啲product placement終於無咁難睇(比起當年經典既胡楓入痕身銀行,而家啲潔柔紙巾算係順眼好多了…不過我想問幾時先可以逃離索愛的魔掌呢?)…又即是說,其實娘劇係依然的,不過又夾住啲有番些少新意的劇,實在令人驚奇不已(又禁不住追看…)…你知啦,前幾年同人講睇無記劇係c9既象徵,今年呢…哼…我不知幾潮﹗

睇番,今年寫的文新劇比率高了很多,反而只有少數是回顧舊劇文呢… (雖然說是有好劇睇,不過說無記是否回春又言之尚早喎…)

台劇:
除了90年代的瓊瑤、包青天金庸劇,小的都沒怎麼迷台劇,只是前一陣子的偶像劇參了一腳煲了幾套賀小美的…不過呢…看的那幾套個單細胞自我分裂度比無記複製《金枝》更甚,好幾套都係睇一集已經受唔住(其實都係睇嚟睇去賀小美,《鬥牛要不要》我頂到一半…《呼叫大明星》一集就cut了…另博友借來的《花樣少男少女》和《放羊的星星》…雖然有靚仔…但卻到今日都未開封…大概可以放到永遠做文物的了…囧)…well…另外真係煲得入神既咪《鬥魚》(死囉…又係熱愛《古惑仔》因子發作…)…不過第二輯就有啲畫蛇添足,是可惜的。

日劇:
基於小的煲劇鐘意一條龍,於是自從02年光一王子《remote》之後就沒有特別追日劇了,直至有一日無啦啦見到竹野內豐既《瑠璃の島》(應該係05年倒掛?)又突然著迷番,反正那水無記無乜劇睇嘛,轉一轉口味又有番新鮮感(不過就被當我是初心者…不過煲劇又有分初心和達人的嘛…篤手指),一條龍了豐哥、長瀨哥斗真、二宮和龜梨兩個和也(仲有一個和也…石田壹成﹗)…(不好﹗大部份都係J家人添﹗),初初煲番時的確覺得新人事新氣象,只是覺得改編太多了(而好睇既又多數係改編喎﹗漫畫小說改的數不勝數﹗),原創的好唔掂(甚至悶﹗)((總覺得電視台好似想夾硬扯上90年代啲光輝歲月,特別係富士月9,可能《Long Vacation》太成功太深入民心,愛情劇硬係畫虎不成太類犬…),跟住因為一套《一公升眼淚》又跑出一大堆純愛劇,好些更雷聲大雨點少(《太陽之歌》電視版真係睇到我想瞓…)…不過都唔夠翻拍又翻拍的驚(《相棒》那些唔計啦吓﹗),《大奧》拍到爛,跟住在韓/台拍過後再拍的《原來是美男》、《花樣少男少女》(呢個好似係台版叫法?)、《流星蝦丸》呀咁,又咁…當然劇集是有日系獨有特色既…但喪reloop…想悶死我咩?(好在無繼續拍《金田一》了…)

唔知呢,慢慢真係無動力去追,除了個別飛佛的會努力追落去,好多都爛尾了。《Boss》到而家都仲睇番個尾,《Freeter買個家》只看了一半,近兩年煲得晒(而我又記得我睇晒的)大概只有《花癡刑警》(鬼叫佢一次過有晒我兩個飛佛咩﹗)和《流星》(豐哥﹗)…um,咁cycle既野有高有低既,高完咪低囉…低完咪又高番囉…umum(日劇真係提不起興趣,日影反而好似更精彩喎﹗)

也許會令我神心追的只有《世にも奇妙な物語》…哈哈。又咁講,鐘意睇日劇除了靚人靚景外,最緊要係貪佢集數少節奏快入正題,咁靚人(aka有星味夠charming的)唔係日劇獨家,劇本方面又唔夠人砌,自不然吸引力大減囉…

韓劇:
數嚟數去我只神心地看畢《狗與狼的時間》和《魔王》…。睇博友博文都知韓劇已不如當初一味《天國的雞批》和《藍色生死戀》那些死人絕症的《雷雨》過《雷雨》既雷野…仲有好多偶像過台灣/日本的偶像劇,而且由當紅偶像來嚟,好有生氣的感覺,但奇異地又似tbb咁同時兼顧熟齡人士的市場(這是從博友講att播的韓劇得知的…),還是有那些c9 oriented的…um…係呀呵?我無睇啊…

唔知呢…時候未到,一路唔click。(28/2/12後按:雖然今年突然有個中招對象,不過睇完佢啲劇就無特別追,唔算click韓劇啫?)

國劇:
唔計那些很serious的歷史劇如《一生為奴》、《康熙大帝》、《雍正皇朝》那些,亦都唔計唔覺意lap到少少的金庸劇(其實我只lap了少少李亞鵬的《射鵰》和黃曉明的《神鵰》),我認真地睇的國劇咪就係bobo那幾套,邊看真係邊為港劇擔心,人材人家是濟濟的,唔會一年五度除紙山囉…);財力也是濟濟的(雖然成日都喺橫店拍…但至少唔會那個假到爆的山洞…),然後戲服、劇本、道具都比無記認真(睇《紫禁驚雷》啲對白和劇情亂嚟度高到我快要打爆個電視…)…呃,除了集數是比較多,動軏三四十集是頗令本人卻步的(但煲碟就可以ff了﹗卡卡),製作方面絕對可以和無記一較高下啦(時裝劇多了些文化因素影響,始終無睇港劇咁有親切感…但古裝絕對青出於藍了…)…well…

問題可能係因為有演員配額,於是一套劇可能只有一兩個熟悉的港/台演員,搭著一些唔知乜水認唔到邊個打邊個的國內演員,不過睇得多都ok既,現時最受唔住既…係啲配音…好尖好刺耳(就如台版《流星蝦丸》杉菜個阿媽咁…)…好些配音真係想mute鬼咗佢…umum…

*******************************************************
唔知幾年後小的仲會唔會有mood再來回顧一吓呢?以上。

其他的:
[港劇]我諗tbb真係無乜人用…
(轉)TVB十大老套情節
[港劇]公仔箱…變呆滯箱 
BINGO--無記劇集版

4 則留言:

  1. 世にも奇妙な物語掂呀!有一輪沒有什麼好劇追,找回了以前的世にも奇妙な物語看,實在都好正!每季最期待的就是又有什麼新的奇妙物語呢,最緊要是夠短!

    11th Aug 2011 22:26 PM

    回覆刪除
    回覆
    1. 係呀,就係貪佢夠短,哈哈。每次有呢唔理係乜人做得都會睇,佢啲故事夠奇情,大部份都係合理(最緊要),個故仔twist得嚟係往往會令小的感嘆:嘩,乜咁都得呀﹗好多睇完仲好回味的…
      試過心思思搵番十幾廿年前的嚟睇,除咗啲人既郁比較娘外,故仔還是很吸引的~

      12th Aug 2011 10:14 AM

      刪除
  2. 基本上,我不追劇,因爲不喜歡"拖戯"。"《呼叫大明星》一集就cut了", 我也是哦!臺劇真是土氣得不得了, 連國劇也不如!

    12th Aug 2011 10:11 AM

    回覆刪除
    回覆
    1. 唔知點解台灣偶像劇總是讓我覺得人腳ok(阿sa和賀小美都係靚仔靚女丫…),但場景/戲服總係有點粗疏,記得當年睇《流星蝦丸》,道明寺間所謂屋企,點睇都似酒店大堂囉…
      呢方面唔夠日劇細緻啦…

      12th Aug 2011 10:16 AM

      刪除

要講幾句嗎?﹗XD