2013/09/05

我要成為偽文青﹗哈哈哈﹗

回首前塵,原來我很少看「文藝」小說,少女時代(我扮千FA話佢無喂人奶之後身材就回復「少女時代」了…笑死我…)SUPPOSED會好鐘意睇的亦舒、張小嫻我無睇過,其實認真的說除了電視播的(即係金庸、少量瓊瑤包青天?﹗XD)之外,我懷疑我是很少拎起小說來看,比起小說當年小的更愛看散文,小的總係走偏鋒路線嘛,全世界去看梁望峰時我走去睇畢華流喎,死未﹗

呃,無呀,最近突然對村上春樹很有興趣,想扮文藝一吓啫。

我有無講過對村上大作《挪威的森林》的第一印象係來自張智霖的《如此這般想你》首歌呀?歌詞有MENTION呢部小說名的,雖然我鐘意呢首歌但又無特別令我想看呢本小說喎。就算若干年前看了改編的電影,其實你而家問我劇情我都係零印象…我記得小林綠係水原希子囉…故事係唔記得了…

呃,睇睇埋新井一二三湯禎兆健吾等人啲書,久不久都會講吓村上春樹,究竟點解佢會LEGEND如此呢?望望吓,早稻田﹗哈哈哈﹗我有講過呢家係紅磚大學之後另一所我最愛的大學嗎?原因其實不明的。就算去到實地我也說不出有乜特別野令我鐘意如此…呃,有很多就係無得解釋架嘛,氣氛囉,覺得文人雅士之地囉…哈哈,其實我無特別研究係咪好多作者都係早大畢業架喎。

ANY肥,我成日都話我走偏鋒路線,人家勁歌熱舞我就走去聽慢歌,村上明明係有名的小說家,但我第一本拜讀的竟然係散文集﹗哈哈哈﹗番屋企睇番書櫃原來我幾年前係買過本《村上朝日堂反擊》,從書上面的摺角我相信我係睇過的…但內容我竟然又是一個零印象…大囧﹗睇健吾本《識字頭上》話佢啲散文有本係講跑步的,竟然由跑步跑到出本書(我估是這本),有夠勁的。雖然我的目標是《再襲麵包店》,看序係話村上老婆講笑咁話無野食就去打刧麵包店引發的…咦﹗原來係短篇小說嚟架喎﹗

唔,雖然《挪威的森林》(其實看完電影版後我仲係唔明點解本小說咁紅於是我買了小說來看,但未睇﹗)、《舞舞舞》、《國境以南太陽以西》、《聽風的歌》都成日聽,但我…對郭富城的《聽風的歌》熟啲﹗(嘩﹗洪杰有首歌就係《國境以南太陽以西》喎﹗)即係未睇過啦…呃,唔知呢,小時候有啲抗拒名著,除了金庸之外(電視劇的魔力我實在不能抵擋啦﹗),唔知係咪英文被逼睇埋啲《小婦人》、《理智與感情》呀咁,有啲討厭睇好有名的作品,就算係《紅樓夢》,明明上中國文化時覺得都很有趣呀,但卒之都係的唔起心肝去睇。喺無電視劇SUPPORT之下,小的當年雖然都有同學睇村上春樹,卒之小的都係無去睇就是了…

又係喎,張小嫻有幾本書改了成廣播劇,但亦舒好似無乜喎﹗唔怪得我又係無乜心機睇了…

就說有改編就特別吸到我睇,又因為想練習吓睇日文,咁去搵番啲睇過既劇/戲既原著小說版就係上乘之選啦,以前我好少睇小說的,但買日文書時就掉轉,幾乎都係小說為主。因為電影,於是走去讀了湊佳苗的《告白》、太宰治的《人間失格》仲有一堆東野圭吾的推理小說,加埋而家怒煲緊的山崎豐子酒井順子,當中應該只有酒井順子唔係寫小說而係寫散文。

湊佳苗SO FAR我只讀了《告白》,可以說,這是我覺得改得最好看的一部,支節有改動之餘保留了原著的氣氛,不過其他的劇/戲就改得不甚了了的,噢﹗東野圭吾呢,SO FAR睇的都係《伽俚略》RELATED的,但以戲論戲我最喜歡是N年前廣末涼子的《秘密》和遙妹的《白夜行》,也有點興趣睇番本小說的,東野的小說我覺得支節太多,經常扭橋(有時會覺得…吓?你講晒啦咁的…XD),放進十一集劇集又嫌素材太少,放進兩小時電影又嫌要CUT太多…典好呢?

對上的都好似唔太文藝呀呵?仲未講新近很喜歡的三浦紫苑和池井戶潤(即係《半澤直樹》原著作者)…

呀,AROUSE到我的是這本《東京.村上春樹.旅》,多數都係見到去奈良、京都搵《源氏物語》(呀﹗又是一本買了未睇的呀﹗)架咋嘛,呢本野係喺東京一帶搵番村上本人或書入面情節發生過的地方…咦…我有興趣喎,係咪要喺下次去東京之前拜讀晒村上啲大作了?

嘩﹗其實我想話松浦彌太郎舒國治我都未睇完架﹗點算呢?仲村唔村上春樹(但向西村上春樹我倒是看了…哈哈哈)呀﹗我要做文藝青年呀﹗

31/12/13後按:so far我睇了《聽風的歌》,有點不明所以…係咪我太眼瞓地睇呢…囧

6 則留言:

  1. 我其實都有個acc,用黎留言,但人地回覆左我佢都無email通知,係要我去返果度睇。
    佢係咪無呢個功能?而家用blogspot都頭大
    by無敵

    回覆刪除
    回覆
    1. RE:無敵
      我好似DISABLE咗EMAIL通知呢個功能…

      刪除
  2. 睇咁多書都唔係偽啦,而且你係文科架嘛,又咁好歷史,非常文青下架喇…

    講開村上,本1Q84睇左一半之後就停左,暫時我都未明點解佢咁legend,我看了挪威的森林電影版之後仍然不明白…小學的時候我在圖書館都借過一埋外國名著翻譯來看,茶花女,雙城記,傲慢與偏見嗰d呢…但我覺得係有d cultural difference,所以沒有很喜歡…亦舒有睇過下少部份,只係因為圖書館有得借,細個邊有錢買小說…梁望峰我都無睇過,又反而真係有睇過畢華流,雖然我唔係鐵粉啦…

    回覆刪除
    回覆
    1. RE:まこと

      哈哈哈﹗我係文科人…不過就好少睇名著咁囉

      我決定從村上的散文開始睇…我N年前買過本《村上朝日堂反擊》,就從那本開始啦,其他的小說我再慢慢睇吓有無心機睇…
      我睇金庸啲評論話佢既小說有啲係BASED ON《基度山恩仇記》那些名著,我是有興趣的2不過就等機緣吧,到某一日有興趣時自自然然會拎起上嚟睇,就如我放了足足5年的《村上朝日堂反擊》咁啦…

      刪除
  3. 你...其實係真文青黎 XDD
    中學時代我都有睇畢華流架~ 最記得佢果句「偉大的畢華流話, 愛的反面不是恨, 而是莫不關心」...

    回覆刪除
    回覆
    1. RE:火女

      我感動了﹗我只係一個迷吓偶像,睇完戲再睇番書的無聊友咋…
      畢華流講起上嚟我都好來無睇過了…哈

      刪除

要講幾句嗎?﹗XD