2009/04/01

[日劇]黑暗雙打:《白夜行》vs《守財奴》

看呢類黑暗劇真係要做足心理準備,那一水心情本來就不好的話看完就沉上加沉…。說主打係因為睇《守財奴》時即諗起《白夜行》,如果有人請松山研一vs瀨遙+齊藤隆成vs福田麻由子開一部戲的話一定超好睇…

當年,我的萬年no.1恐怖之選,還是kinki兩位大神主演的《人間失格》…看完久久不能釋懷呀﹗

先說一吓《白夜行》…

(注意有大量劇透﹗)

話說本人是看完《唯愛》和《世中》, 覺得遙妹呢個女仔做戲唔錯,貪得意就一條龍吓佢既舊作…喂…有套喎…東野圭吾喎…又睇吓先。見個卡士係再拍住山田電車男的《世中》組合,睇排面係預咗較寫 實,但睇咗先出事…完全黑暗… 那一水碰巧自己心情不太好,看完整套劇時剛好係年三十晚,down咗整個新年的說…

故事一開始童年亮司巧遇童年雪穗,我還是為係純純初戀故事,但不久就急轉直下,原來雪穗媽媽為錢將女兒賣給亮司爸爸做不道德交易,偶然給亮司撞破,小孩慌張之下錯手殺死了親父。這就是悲劇的開始,二人就開始長達十五年的逃罪行動(過了十五年都破不到案的話案件就會消案的了…),目的就是等時效過了後二人可以在耀眼太陽下再次光明正大的共行。為了掩飾第一件錯事他們做第二件,掩飾第二件他們又做了第三件,就像滾雪球一樣,直至永不翻身…

亮司絕對是悲劇人物,因為他的人生在遇到雪穗以為就以她為中心,被她牽著走。她說她會幫亮司收拾殘局,亮司在她「溫暖」的笑容之下信了她就順她意了。雪穗又係點收拾殘局呢?就係將殺人罪嫁禍俾自己媽媽,跟住開煤氣製造其母畏罪自殺假像,雪穗還只是個小學五年生咋喎﹗居然可以諗出個咁殘忍的瞞天過海大法,真係相當恐怖。但又不能全怪她,因為佢媽媽早就將佢視為搵錢工具,小朋友心理被扭曲了,行為自然不能和普通小朋友亮司相比…重點是,望著麻由子妹妹向亮司笑時…真係覺得好恐怖…

雪穗本意是保護亮司,出發點是好不過佢既手段的很恐怖,可以叫亮司找人強姦同學,也可以叫亮司姦屍,甚至連養母的喉也可拔掉讓她慢性死去…看著看著真係毛骨悚然…。亮司中途都有懷疑過自己究竟做乜,為了保護雪穗,他甚至放棄了自己本來的身份,改名換姓守 在她身邊,到最後自己都迷失了。但雪穗真的懂玩心理,亮司想自首是她是帶他到教堂,根本就是逼亮司心軟吧…

睇完真係覺得遙妹演得出神入化(我是先看了她在《唯愛》入面演天真有錢女喎﹗真係覺得佢演技極度不賴,有前途),雪穗是天使與魔鬼化身,本著讓自己和亮司脫罪,要清除所有障礙連殺人也在所不惜…很恐怖﹗面不改容係重點…又真覺被他牽著走的亮司很可憐…根本來絕路吧…又點會等得到時效過既一刻呢…

結局亮司係自我了結,心入有點暗暗高興佢終於可以自由了。雪穗就有點像《終極無間》的劉sir,活在世上根本就係無間地獄,有排佢受囉…

劇情相當踩界,又說了,看劇之前真係要望望故事大綱打定底,錯expectation又無心理準備…完全係敗給套劇囉。又或者咁講,係劇本描寫得太細膩吧…

(12/1/12後按:說漏了亮點是久違的柏原崇,雖然佢只是配角之一…)
**************************************************
 
也是小時吃盡苦頭,人也鑽牛角尖了,雪穗出發點是不讓案件穿煲,《守財奴》的風太郎就係錢。雪穗有衰阿媽,風太郎有衰格老豆,同樣都有個死咬唔放係都要捉佢地歸案的警察,所以說兩劇感覺很像,最像的是善人不多(甚至無…),每人都是不懷好意…

其實我只看了頭三集,劇情係時空交錯,偶爾講一吓風太郎童年,偶然又講吓而家既佢,風太郎童年(齊藤隆成)還未成魔的,佢同媽媽住喺小市鎮度,雖然生活清貧又遭人白眼,酗酒阿爸又成日走番嚟要錢,不過母子二人還是知足常樂。小小風太郎仲係個上進乖小孩,但自從佢媽媽因為太窮無錢去醫院睇病在家病死,風太郎就深深覺得無錢萬萬不能,開始走上不歸路…為錢可以不擇手段(偷野太小兒科了…人都可以殺囉﹗)…想說,怎麼齊藤小弟總是演破碎家庭成長的慘小孩呢?﹗不過佢演得很到位就是了,尤其是阿爸搶走佢諗住用嚟買禮物俾媽媽錢的一幕…自己撞到枱角眼睛血流成河時都仲叫住「俾番啲錢我…」…真令人極心痛啊…

(我是有點諗起《流星之絆》的…哈)

長大的風太郎個髮型、走路有點寒背的步姿,其實我覺得很像L的…哈。又說呢啲騎騎呢呢的角色去到松山手上係完全無問題…。今次我醒了,專登走訪日劇網看看個故仔,都係啲無翻身直至人類滅亡的故事模式,基於我只開了個頭,還未入到戲肉,後感都係等睇番再補了…

冬季的《voice》太爛,《rescue》我只看了一半倒,《triangle》沒有時間看,《神之水滴》看了一集就受不住…暫時感覺最良好係這部《守財奴》了…

(還是我太喜歡看黑暗劇呢?哈哈)

8 則留言:

  1. 守財奴 ...話說我睇到第五集,已經停低,我自己唔中意e類黑暗劇目,好怕啊,所以或者等我邊日心情天真爛漫個陣再繼續 ... 我睇得多過你少少,雖然冇睇過白夜行,不過可以話你聽頭5集來講,應該系小毛同白夜比的話 嘻嘻

    1st Apr 2009 17:45 PM

    回覆刪除
    回覆
    1. 我覺得應該等DMC出咗碟,睇一集《守》就煲一陣DMC…黑暗完就笑番,咁就夠BALANCE啦﹗哈…
      (看來我真係好BUY呢啲劇種…哈)
      我覺得《白夜行》啲心理描寫多啲,雪穗個情況同風太朗有點似,都係自甘墜落的,但見到亮司被逼上邪道個心就好UP,同埋山田先生個頹樣…邊睇邊替佢陰公的…睇完個心好沉…
      睇《守》時我又無乜野,可能經過《白夜行》訓練掛…
      6th Apr 2009 13:56 PM

      刪除
  2. 我對「白夜行」印象非常深刻,看了兩次,流了一桶水,尤其最後一集。看了這部劇,我便喜歡上綾瀨遙和福田麻由子。(演技很不錯!!)其實對於「白夜行」中某些情節,代入角色後是可理解的。記得最後雪穗跟亮司的兒子牽手那一幕,看著看著心裡真難受。
    「人間失格」是另一部印象深刻而又流了我很多淚水的劇。不,其實我一開始是看小說的。小說分上下冊,上冊堂本剛主演的誠已經死了,看完久久無法悉懷,心裡很難受,到現在我都仍記得他叫「誠」。(唉...)
    其實我覺得「守財奴」沒上兩部編得好。或者說「人間失格」和「白夜行」主角的心理比較易理解些,而風太郎則去到瘋狂狀態了。不過「守財奴」大結局風太郎所想像的那些幸福的片段那幕,我比較有感受。確實大家(至少我)想要的幸福就是那種簡單平凡的生活,但現實就是這麼無奈,對有些人來說是遙不可及的事,就好像風太郎。
    以前野島有很多劇都像以上的描述人性的,雖然有點沉有時,但我是喜歡看的。(笑)
    今季我比較喜歡「Love shuffle」、「歌のお兄さん」和「守財奴」那幸福的片段。

    1st Apr 2009 23:21 PM

    回覆刪除
    回覆

    1. 看完《白夜行》心裡真的好難受,雪穗的行徑雖然差透,但背後又原因,只能說她很可憐,活著對她來說已經是最大的懲罰…所以說看後我諗起《終極無間》…
      看《唯愛》和《世中》後再看這套,我真是拜服綾瀨的演技,正邪角色都handle得絲絲入扣,厲害﹗(我成了她粉絲呢﹗),福田小妹妹也不得了,小小年紀啲表情自然不造作,只係唔知佢過唔過到童星轉型一關,要不就真係前途無可限量了…
      《人間失格》我沒看小說,淨係睇套劇已經好難受,好似除了誠人家之外個個人都有問題,留加固之然,連老師都變變地態的,睇住誠俾凌虐到不能反抗,最終只有死路一條,真係好心up…這套劇感染力太強,那一水心情如果比較不穩的話睇完會更低落的說…
      《守財奴》可能事前我睇了很多關於套劇的資料,同埋松山的角色我預咗係好極端,睇完心情又無乜野。風太郎的悲劇多多少少係佢自找,媽媽病死當然慘,但佢唔知足誤殺了關心自己的哥哥;本來當上大集團女婿好地地,又要害死外父,感覺佢好像要推自己上絕路先安心。
      《歌のお兄さん》我都想睇啊…其他就睇吓會唔會心血來潮想看囉…(沒時間追劇就是了…嗚…)
      11th Apr 2009 17:05 PM

      刪除
  3. 《白夜行》我睇咗頭一集(即還是小孩的部分)已經受不了,看完心口很鬱悶,完全不敢看下去。
    甶而《守財奴》就看完了,但暫時不便透露啦

    2nd Apr 2009 01:26 AM

    回覆刪除
    回覆
    1. 可能松山健一做親啲角色都怪怪雞雞,看的時候我沒有當風太郎係正常人…感覺無《白夜行》咁投入,情緒都沒被抽進去就是了…
      咁遲先覆留言…喺呢個期間我煲完整套劇了﹗哈…
      11th Apr 2009 17:07 PM

      刪除

  4. Sorry,我忘了你未看完「守財奴」...

    2nd Apr 2009 21:46 PM

    回覆刪除
    回覆
    1. 不要緊,因為我想知呢套劇的街坊評價,看之前已經睇了很多劇透blog~哈
      11th Apr 2009 17:08 PM

      刪除

要講幾句嗎?﹗XD