2007/12/05

自找新歌下集:李卓庭

唔計二手市場執回來的《純真傳說》,近日最得我心的大碟就是上集主人翁蕭賀碩《碩一碩的流浪地圖》,和這張《Eunix 09.18》。

李卓庭被指「翻版鄭融」(確係幾似…),個名似我的小學同學(這也是原因嗎?哈哈),引得我留意吓…一聽就不可收拾…

看網友碟評,不約而同將她和初出道的謝安琪比較。因為二人都不唱大路情歌?還是因為難度高於一般K歌丁丁呢?點都好,有唱片公司讓新人唱非K歌係件好事。當一年到晚聽著呼天搶地你唔要我失戀好慘第三者我很不爽求你回來的歌,我做樂迷無選擇都好慘的說﹗不是說K歌就不好,其實,K歌「清唱 一開口用喉嚨聲清唱」、「去到chorus chorus要易記易唱」、「仲要repeat又repeat 這旋律先算最強」、「和音 要大量和住咪我走音」、「再上再上 呢段會越唱越娘」(《流行曲》實在是一首太美妙的樂曲了﹗)不一定差,另類也不一定就是好,始終聽歌口味很個人,能感動自己聽得有共鳴就是好歌一首了。只是市場上大部份樂曲都側向一類…這是不健康的徵兆吧?一有人唱有別一般「大路K歌」的,大眾便剎有介事的標籤做「另類」…我想,這代表歌迷希望有選擇。然而相比人家台灣市場,香港樂壇的選擇還是不太多…

我沒聽太多張太的樂曲,不知二人有何異同。只是聽李卓庭這張EP,歌詞很生活化,沒K歌那些老掉牙情愛悶人歌詞,很爽。要學劉心悠個廣告:我想(聽的),我找到了。

講吓隻碟。EP有五首歌加一隻remix,第一版加送一個MV,第二版整多隻…

01 Morning娘

碟入面少點搖滾的一首。OL一天疲於奔命生活誌,打工族聽後必有共嗚,感覺有點像X年前李克人的《一日》(克人舊作有不少呢類抵死有趣的怪歌…本人飛佛…)。每日唔願起身,逼無位坐的地鐵,恨去玩,無奈無錢去吃喝玩樂,要玩就要返工搵銀…不就是打工仔的心情…李生那首黑仔officeman有點戲劇化,李卓庭這首就生活化啲。

全首歌最熱愛「只盼何時我 升得快些 一天我可 飛得遠些」呢句…簡直係心聲…歌曲以sharp cut完結,很型…諗起張敬hins的《迷失表參道》…

睇呢個歌名仲以為食爛gag講日本隊早安女孩…orz。同埋,某次於TBB睇到呢首歌既MV,全程在中環行行企企的拍,幾慳皮架喎﹗李卓庭個樣,真係好似鄭融﹗

02 撇低你

第一首派台歌,但派台時我無聽過(XDDDD)。將工作比喻成戀愛,當事情變得枯燥時就一狠唔撈走人,「重設我工作 志向有生之年未被殺死」是也,想又是很多人的心聲,尤其是而家市道好,轉工走人之聲此起彼落,周不時就被人請走人西餅…orz…

這首比之前的搖滾,不過歌者聲音壓得住bandsound編曲,很好。蓋因我最怕弱聲人唱搖滾,歌者是嗌歌多於唱歌,唱既辛苦聽既又辛苦,唔該晒。

03 手鎗與紅玫瑰

第二首主打,一次偶爾從收音機度聽到,正喎﹗齋睇歌名唔知點解諗起《水手服興機關槍》(最奇異係諗係郭富城那首…唔係藥師丸博子那套戲…)…上網睇一睇,原來來自老片《Guns'N Roses》,噢…

歌詞有點似千fa《私奔》(本人forever熱愛終極推介耶…)+《飛女正傳》,都是不做弱者等運到,寧願自己「豁出去 生死也都快慰」追逐自己命運,一副我死我事的倔強樣子,很有個性。MV歌者穿著婚紗在教堂back住一隊band在唱,如果加埋飛車劇情會更正…嘩…攪到好似拍戲咁…

04 地獄少女

呢首係《Morning娘》以外另一首本人飛佛。歌詞講個不修邊幅的女生,一副你理得我的樣子,不做家事,不化妝,沒儀態,總之坊間預期一個好女生會做的都不做,屋企凌亂到「舊雪櫃放電結他」、「尚有便當在戰場廚房」、「九百套新衫 炸毀衣櫃嗎」甚至「就快會領養隻烏鴉」…嚇人得恐怖,不過後面又補上一句「我私生活沒要人和議嗎 如不睇化無謂理他 喜愛到地獄嗎」﹗﹗﹗串貢貢得來又有道理喎,無傷害別人下做自己喜歡的事有咩唔妥?

聽呢首歌會諗起凌瀨遙上季日劇《螢之光》,乾物女又如何?乾得開心不就好了。不過世上就係好多人在乎外人眼光,為得別人認同而勉強自己。

05 忘記密碼

一首無咁嘈/rock的歌,聽intro會諗起Shine啲舊歌。講用數字聯系戀情,用數字作密碼記錄情,當情愛消逝時連密碼都忘記了,login不了download不了舊事索性唔理佢。數字和戀情,令我想起范曉萱的《數字戀愛》,那些數字傳愛…3155530…7788250…真係唔講都唔知係乜…
****************************************************
說實在,真係似張太咩?

延伸閱讀:
自找新歌上集:蕭賀碩
全碟歌詞
李卓庭BLOG
搶耳而有個性的女新人:李卓庭《Eunix 09.18》
李卓庭@維基

10 則留言:

  1. 我頭先響集成聲威閣見到新果張呀,好似5x...

    5th Dec 2007 16:50 PM

    回覆刪除
    回覆
    1. 58…
      之前啲風和日麗戰利品咪就係從灣仔掃番來…

      5th Dec 2007 23:09 PM

      刪除
  2. 個碟面...一睇就想問, 唔係鄭融黎既咩?
    :P
    好似幾得咁喎...去試聽下先~

    | 5th Dec 2007 22:49 PM

    回覆刪除
    回覆
    1. 李卓庭個樣喺mv入面仲似鄭融啊…
      啲歌詞真係幾得意,唔係普通大路野…聽得過的說﹗~

      5th Dec 2007 23:10 PM

      刪除
    2. 呢度要睇到MV, 勁難. 要等電視播? 要等到半夜三點呀! 仲要唔知有無得播喎...咪搞...

      頭先唔記得, "李卓庭"呢個名, 點睇都係男仔名黎既...女仔就用"婷"啦~ 或者個"卓"字用"婥"都好丫...(硬係要人地改名咁...)

      6th Dec 2007 05:13 AM

      刪除
    3. youtube?
      我好少睇無記,係某日睇完演唱會返屋企鬼咁夜咁啱睇到,通常都係網上睇的了…
      其實呢,我有兩個小學識既人叫李卓x,一個男仔一個女仔,所以我都覺卓庭呢個中性…蕭賀碩咪仲似男仔名?﹗

      6th Dec 2007 09:36 AM

      刪除
    4. 係咪佢出世時呀爸呀媽剛剛拿了碩士?

      6th Dec 2007 09:44 AM

      刪除
    5. 這…是一個gag嘛…orz

      6th Dec 2007 12:22 PM

      刪除
  3. 除左樣似Stephanie....
    我仲覺得
    佢把聲似陳慧琳
    ...某天電台播她的[Morning 娘]時有同事誤以為Kelly出新歌
    ...風格似謝安琪
    講由OL蛻變成歌手行列,首派台歌[撇低你]更加係心路歷程,似足當年出道的Kay

    9th Dec 2007 11:38 AM

    回覆刪除
    回覆
    1. kelly…呢個我又無諗過喎…你講起我又覺有少少似…
      謝安琪我第一首聽已經係《姿色份子》,都唔係最初那一水,唔太知佢出道經過…umum…
      可能二人都唔唱大路k歌所以感覺二人風格相似吧…

      9th Dec 2007 20:40 PM

      刪除

要講幾句嗎?﹗XD