做番齣好戲：千fa《All about Love演唱會》

誠如千fa所說，事前我確係無信心，一路都唔肯出手買飛(連一百蚊都唔想)，卒之星期五睇了版發現超乎想像的好，星期六忽發奇想想睇，星期日買飛，星期一去看了。

支持要慢慢儲番呢，信心可以一次過嚇走，拍一拍心口去馬買飛，好在，今次無入錯貨，終於可以挺起胸膛對人說：千fa唱得勁掂喎﹗(不要再逼我聽某天后的歌好了？ok﹗)

究竟本人係幾時迷上楊小姐呢？忘了。只記得第一次買她唱片是《私日記》，不特別喜歡主打歌《手信》，只因這張EP有《再見二丁目》(唔知乜野remix版) 又有vcd送只係七十幾蚊，既然唔夠筆直(那年代本人可以癲到一星期買三張碟的說…)買大碟，七十幾蚊的都照殺吧。之後的《1-100》理由一樣，不過送 的是更不切實際的Hello Mimi call機套，實在，本人當時己出手提了，何來call機？

貪小便宜，做就本人細聽楊小姐的歌。當年楊小姐剛過了初出道的得意少女年代，和夕爺開始有火花，又開始交上人山人海，文藝小品味漸出， 自命文學人的本人(我會考確係讀中國文學架喎﹗呵)細"lun"歌詞，越聽越有味，要不是這樣日lun夜lun，也不會發現《數你》後面有段hidden track吧？﹗嘻嘻。

真正著魔的是99年的《夏天的故事》和《冬天的故事》，尤其是《冬天》一碟，一氣呵成的冬天感 覺，可說是本人最熱愛的concept album，所以，當我發現是次演唱會opening是碟內第一cut《新世紀福音戰士》(食字之作，食「新世紀」，也有食「福音」，又有食「戰士」，又真係用了Eva音樂，但和該動畫無關係的說﹗)，嘩﹗拍版即刻睇 ﹗雖然，我最想睇的一cut是《私奔》，常覺得是硬朗版《少女的祈禱》…唔知有無機會睇到live呢？啊，另文再詳談呢隻碟﹗哼哼…

與歌者同期出道的，要靚有靚，要玉女有玉女，要唱得有唱得，常聽人說歌者普通，由人到歌通通平庸至極，有乜理由咁都做到天后？平庸有平庸的好，沒大上大落， 一切慢慢積回來。走過十年路，目睹的是有血有肉的成長。原來，就算沒突出天賦，靠努力肯花時間還是可以賺到點成績的。自命平庸的人，總會不自覺找對像對號入座，明了沒？(不否認，我是私心包容歌者缺點的，對其他歌手可不是一貫的mean爆…)

講番頭先場好戲。

跳舞從來唔係楊小姐強項，今次事先張揚找來Exile(是他們本人還是他們的排舞老師？)又到日本練舞，opening一段《新世紀福音戰士》、《烈女》和 《處處吻》唱得好，跳得也好，最緊要是條深紅色長裙好靚，一次過解決晒前幾次演唱會最令本人驚怕的三個問題，呀…原來千FA和祖兒…呀…係朱祖兒channel好夾﹗喜出望外的說。都係嗰句，我想聽《私奔》啊…不如諗諗佢丫…《烈女》個雀籠，不自覺諗起譚小環《自主》隻碟個封面，不過唔係笠頭，仲有靚靚玫瑰，唔驚唔驚。

之後的《小城大事》老實說不喜歡。我是sidecut怪嘛，同碟我勁愛《的士司機》的說，不過無啦。之後連續幾首華星年代產物：《有發生過》、《八步半》(這隻有點點印象…唔熟)、《因為所以》、《燭光夜》(唔識…)和《少女的祈禱》…真係回憶呀，華星不只是千FA一個值得回味既年代，更係自己無有識死既學生年代代名詞，華星一去，快樂日子亦一去不後返。 這幾首，除了《八步半》後尾高音走到離譜，其餘幾首超呼水準的好囉…加上那些眼球咀咀兔仔女仔，整個畫面勁童話，呀，童話曾經是一個時期千FA唱片的theme呢。之後的《稀客》反而好似唔啦家咗，新藝寶出品呢架喎？

一連幾首舊歌《抬起我的頭來》、《假如讓我說下去》、《野孩子》和《可人兒》才夾上一首新歌《化》，我是極喜歡這安排囉，身體力行告知新碟話事人聽：唔好啦掛﹗大家喜歡歌者唱乜歌，你get到沒有？

鏡頭一轉變了西班牙鬥牛和梁漢文唱《滾》，最後梁一把打落千FA度，音樂就立刻轉到西班牙風了的《手信》第一句「不需給我展覽那照片…」，兩首歌連在一起居然出奇的夾並戲劇性，是全晚本人印象最深一節。小插曲是梁楊二人唱唱吓《滾》在小升台上企唔穩，甩了幾句…真係打交打上癮嗎？之後是印象中很滄涼的《出埃及記》，咦，高音位又係落過苦功喎，千FA邊唱邊走向鋼琴，不其然想起前次演唱會的《慢熱…北海道夏》，那個live唱得頗恐怖，但歌實在不賴的說。然而本人最期待的是《風采依然》時和古天樂先生(佢就嚟生日了﹗)共舞，呢首野我係第一次覺得咁好聽咋﹗《愛人》是《1-100》很喜歡的一cut，《閃靈》 個mv好似係講死人的？

之後一大段music break再閃上一段《詭異》，滿心期待去聽時音樂一轉變了《不認不認還需認》囉，唉…無言。同行某大大話段舞好印度風，又真係喎？x浪薯片有無諗過繼多年前呂方後搵千fa做代言人呢？話實不喜歡這首歌。之後的《吵我》(只叫得出係京x念慈x廣告歌)、《熱血青年》跳的舞，算係勁定唔勁呢？都好過《22098全城效應》既。最驚喜係《三分鐘戀愛熱度》…聽到真係嗌了…第一首主打歌的說﹗最攪笑還是惡攪了黎老闆的《我的親愛》那句"Sayorana O"和《Happy 2000》的拜神舞姿，我惡毒的想…一定是惡攪﹗

安哥唱了《狼來了》，其實我鐘意《郎來了》多啲的說…哈哈；《姊妹》、《可惜我是水瓶座》、《楊千嬅》、《飛女正傳》曾經係K場必唱，又係一堆回憶。夾在中間有新歌一首《陌路》…咦，live了好似無咁悶人喎？

今晚雖然無陳奕迅，卻竟然有陳曉東先生(本人係唔特別欣賞吳彥祖先生的，佢上台獻花本人反應係零)，仲上台高歌一曲《水瓶座》？﹗哈。既然老孫都回歸得，陳生快啲出番隻碟吧﹗要出新歌，不如就叫《打開天窗》吧？﹗

看完滿心歡喜的離開，雖然，我的千FA十大沒太多首出現過…嗚…知道唔會出dvd，更覺呢二百二十蚊花得值~

**我懶mark song list，文中曲目參考Come back to love的
***風采依然…古天樂…嘩哈哈…我在回味中…嘻嘻…
****回憶無價，郭先生若然個show唱多幾首華星舊歌，一千蚊飛我都照撲呀，唔使吹晒話五年內最後一個騷咁誇的說…(12/3/13後按：車…咪卒之五年內都無整過音樂劇…又係開番演唱會…但係我又去睇喎﹗哈哈哈)

友人的文：喜出望外的楊千樺《all about love》演唱會
************************************************************
「我認﹗我係很喜歡聽千fa的」全集：
藍奕邦《好風光》 & 楊千fa 《火鳥》
親愛的千fa：原來我聽得不快樂…
一年兩季楊千fa
只談風月不談新歌@千fa《Meridian》  
 楊千嬅《Unlimited》
華星同學會
楊千嬅 x 林一峰《拉闊音樂會》