2013/05/18

[日劇]《ガリレオ》(神探伽利略2)

繼愛情劇三男兩女公式後,有推理劇公式了﹗天呀﹗係我衰…我將啲推理劇炒埋一碟度睇…套套都係一樣架﹗

好啦…我不恥笑泡劇有常見劇情了﹗

好啦,推理/刑警劇就是一定係有一老一少,個老既可能係忠可能係hea,但總之唔多熱血的,多數係男人。而個少既可能係男可能係女,設定多數係新人,一定同個老頂大叔唔啱,大叔想放棄時佢死追不放,於是查出真相。過程度一定有一個怪人幫手破案,有時呢個怪人會結合老頂大叔(如《Monsters》或《Legal High》,有時會借助外力,如呢套《伽利略》、《Ataru》或者《上鎖的房間》(呀﹗仲有我無睇晒既木村大神《Mr, Brain》呀﹗),呢五套劇…我都係今年睇…有啲頂唔順﹗咁攪法看來我除了可以去泡菜國寫愛情劇之外,仲可以去壽司國成為北川大嬸接班人寫死唔斷氣愛情劇(如果有在中做演員會更好…XD),或者寫吓呢啲查案劇…囧﹗

No offense,只係覺得好repeat啫…咁福山大叔我like的,吉高由里子我都like的(拜《相愛的約定》所賜…),我本身不太喜歡的柴咲コウ只客串第一集﹗(笑),而唔睇我都唔記得原來有北村一輝大叔…嘩﹗人腳我是ok的,只係個setting太熟口熟面啫…

好啦,咁樂趣就在於睇每集登場的嘉賓,第一集竟然係《仁醫》南方大夫﹗不過個case易估咗啲啫,微波我諗唔到不過我諗電力喎…同埋仲以為湯川噴野喺玻璃度係有啲野既添﹗第二集個妹妹好熟口面但講唔名,睇吓之後的集數有大島優子,雖然我有看《不能戀愛的理由》,但我唔認得佢個樣﹗囧﹗嘉賓好似第一集南方大夫之外(對我)都無乜吸引力喎…

呃,我想話第二集個玉咀(我作的名字…甚麼振り子,真係睇劇學日文了)之謎,原來係個妹妹本身就知案件的真相,佢無意識的搖動了玉咀引出死首…車…咁使乜勞師動眾解謎呀…

暫時我只看了兩集,感覺好似無上一輯案情咁複雜離奇,但都無《Monsters》咁夾硬既。但其實上輯發生過乜事呢?我只記得香取慎吾做兇手那集咋﹗睇完佢個陰森樣一時間接受唔到佢喺《沒有玫瑰的花店》做老好人…至於電影版《容疑犯X之獻身》仲離奇…我連個案件係乜都唔記得…只記得我買了本小說番嚟仲好鬼快揭完添…

我怒踩?﹗無呀﹗案情合理,劇情流暢不拖拉,湯川和岸谷多啲互寸吓有啲笑位就可以架啦,我要求唔高既…XD。

Click click吓官網發現原來呢套劇的第一輯、電影版同呢一轟都有精品賣,除了cute版湯川,仲有Hello Mimi版同埋帝都大學的精品添…死囉…幾精美﹗同埋…上次去日本我無啦啦行經明治大學呼吸山P的氣味(<--咦…人家畢業了n年啦喎),嚟緊係咪都應該去吓帝都大學搵吓湯川都授的身影或者搵吓松隆子(19/5/13後按:見博友留言後去維基了一吓…原來有的那家係帝國大學,而我成日以為松隆子係校友…原來佢讀亞細亞的說…)有無留低一條半條頭髮呢…(咁樣,去首爾時就唔應該去弘大應該去某人((仲?))讀的漢陽大學了…哈哈哈哈)

Last but not least,後生遙遙的斗真同學眼紋滿瀉的時候,不得不讚福山大叔保養得宜,連木村都跌WATT呀﹗看來只有北村一輝叔叔可以同佢爭一日之長短,可惜北村叔叔只係一件二打六…情況就如《Boss》的竹野內豐,都是令我很失望啦…囧
***********************************************
22/7/13後按:
完成的後感是…

  • 好多案都唔關物理事的…
  • 湯川先生次次諗到破案的關鍵時就有理無理都寫一堆方程式出嚟,好多都係破壞公/私物架喎,岸谷點處理呢?XDDDD…同埋…可唔可以有人話我知那些程式跟案件有甚麼關係呢?
  • 萬年助手好好笑,次次去代課都得係小貓三數隻上堂…
  • 最後一個單元《聖女之救贖》竟然兩集(SP我沒看),雖然個案件都係有少少流fei…但我對個原著故仔好有興趣,據說係《容疑犯X現身》的續集…想話,原著好睇好多架真係,放成劇集或電影少了好多支節,犯案者的動機都被簡化了…
  • 呃…我無後感啦…只能說…點解北村大叔咁少戲份既?﹗
另外的:讀書報告 #11《ガリレオ~真夏の方程式》+電影版

6 則留言:

  1. 暫時唯止覺得01和最新一集有啲失色!

    聽人講其實精彩的case之前都已經講晒,今季果啲就係睇腳本家的改篇功力,暫時都覺得ok,就係犯罪手法好明顯無甘物理化囉!

    睇你呢篇先知,原來真係有帝都大學?!我以為劇本自己作出來的,囧!

    其實都睇到福山有老到嘅,無7年前一出來甘妖精XD始終呢幾年紅翻都應該好忙。。。大神真係無法,明明無乜野做,剩係湊女滑浪都搞到甘殘,囧

    回覆刪除
    回覆
    1. re:鈴

      我只看了兩集咋,我覺得第二集似係心理多過物理,劇情上都係合理既,只是我覺得無第一輯啲case咁需要搵個物理專家嚟解釋囉…

      小聲說:原來真係有的那家是帝國大學…哈哈哈

      福山老咗但仲ok,大神嘛,滑浪又灑又有海水侵蝕,係好難keep架啦,酒井法子仲有而家的level算係咁了,大神兩公婆都殘到無朋友,好衰唔衰大神又賣樣仲要做偶像…係要keep吓副搵食架生的啦…

      刪除
  2. 剛看完泡菜常見劇情,竟然發現我和殭屍有個約會相同!

    1. 男一跟女一身份/智商/性格懸殊,而通常是由誤會開始,繼續變成情侶
    殭屍與天師,身份懸殊,誤會開始繼而變成情侶MATCH!

    2. 而男一一開始會完全唔aware女一,然後多次表示「唔當佢係女人」、「佢唔係我杯茶」之類的斷言,但之後慢慢愛上女一,就一定會講「我是不是瘋了」或「我在幹嗎?」
    天佑一開始想盡快搬離嘉嘉大廈遠離馬小玲王珍珍,其餘亦MATCH

    3. 當男一誤吻了女一,又咁啱會係女一的初吻
    通常個男的都係情場經驗相當豐富,而個女既咁啱係未拍過拖的…
    除左男的情場經驗豐富其他都MATCH!日本收初春時踢了小玲,亦是小玲的初吻+未拍過拖

    4. 沒有異性緣的女一(又通常都因為生計而唔得閒談情說愛),故事開始後會有男一…之後有男二…再之後會有三四五六七的傾慕者
    MATCH!馬家唔俾拍拖,第二輯出現中學同學矮仔傑追求

    5. 跟男一旗鼓相當的男二,性格通常跟男一相反,男一溫柔就男二古怪(vice versa)。其作用是先向女一表白,刺激男一行動。但女一總係心向男一,當女一被男一所傷時男二就成為女一的避難所,等男一回心轉意…
    陳啟泰MATCH!唯一不同只是男二愛上的是女二王珍珍,而女二王珍珍亦總係心向男一

    7. 如果有男三,通常佢係負責攪gag。可憐的男二和男三通常都係一個半個女二三四五六七都分唔到的。
    杜汶澤MATCH!男二陳啟泰&男三傻強半個女二三四五六七都分唔到MATCH!!最後仲死埋

    9. 送訂情信物後就會炒大鑊
    第二三輯的平安繩

    10. 英雄總會出來救美
    英雄救美或美救英雄也不少,不細說

    回覆刪除
    回覆
    1. re:WINSON

      嘩﹗你好詳細的list晒出嚟﹗

      《殭屍》我最後只看了第一和第三輯,佢都混合了幾多漫畫和卡通的成功元素,喺電視劇嚟講天馬行空又夠創意,所以先咁大noise吧…

      反倒是將呢啲元素擺番去日劇和韓劇就好膩,玩到謝了,套套都幾乎有呢啲橋,雖然是令人令景,但都好悶囉…

      刪除
  3. 「可惜北村叔叔只係一件二打六…」
    我又笑左! XDD

    回覆刪除
    回覆
    1. re:火女

      佢既出現係一個樂趣嘛…

      刪除

要講幾句嗎?﹗XD