2013/05/15

歡樂工聯會

雖然每到選舉季節就會有十萬個人打嚟叫我投某黨,而小的總係鐘意對著幹投另一個的…ANY肥,但…實在不能否認工聯會的班是很奇異…奇異地多,奇異地平,有啲奇異地HEA,也有啲係奇異地物超所值的…

無既,返屋企見到有本夏天課程,揭了一輪又諗吓好唔好去報番一兩個啫…



其實點解我會識既呢?我懷疑是小時媽媽去買平啲既海浪公園飛,又或者去買(我收到會MIU咀的)美心西餅…出出入入得多,知道除了有平家品/電店外,仲有堂上的…

日文
我諗我第一個(自己)報的是日文班,YR.2定3時無聊聊走去報的。最初係日文初、中級,那本很頹的橙色小書,跟住課室總係逼爆而啲枱和枱之間係窄到不能,遲到的話都唔知點搵位坐…ANY肥,平呀嘛,照殺。

跟住我報過文法(初定進階已經唔記得)、能力試班(三級和二級,二級那個阿SIR教得很不錯的,當時無一級,三級那個阿SIR甚至係中大校外那個添﹗不過而家得N5-N3,N2都無﹗囧)、BJT班(但那個在馬頭圍道上,十萬個唔方便)。UM,都係嗰句,因為無考試所以我是上得頗HEA的,有時無心機唔上一兩個星期就會自動消失埋…於是日文都係走番去啲有試考正式啲既學校…我自制能力差嘛﹗

英文
也是大二或大三的時候吧…小的走去報了個商業英語會話…但去到先發現…是中學程度…呃。尤記得因為是在油麻地眾坊街上堂,於是成日走堂唔上去電影中心睇戲…XD

法文
估我唔到呢﹗其實我是報過法文的,因為酒名很難讀,於是小的想去研究一吓法文法音,意圖讀的時候唔好讀到錯晒,但我發現法文不能如西班牙文咁齋睇字母就知點讀,原來是要拼音的…好煩…於是上了兩三堂就無上了…(又一個半途而廢﹗哈哈哈)

西班牙文
西粉應該是玩得比較耐的一次,讀到延續班的說。本來在太空學院和商大校外都報過,不過好重皮(我的CEF已經玩完很久了)而且不喜歡老師的史大奧,去到工聯會梁姓老師感覺很不錯,每堂都係informative的說,而佢都盡量叫我地開口講多啲野,所以先可以喺無考試情況下小的都keep住讀了年幾吧﹗哈,不過呢我好衰,無得追星應用熱情很快就冷卻…

Photoshop 影像設計應用/Photoshop 廣告海報製作(?)
其實我唔記得exactly報了邊兩個,總之係報了兩個啦(笑),那時工作成日要玩相片店嘛,於是就跟友人去玩了,學到的或許達人會覺得小兒科啦,但救了我很多命和慳番很多時間呀﹗最受用的是…很快地退地和SELECT…哈哈哈哈哈﹗

書法
其實我本來係想學國畫架﹗不過見自己字都寫得唔好就先去學一學先吧,第一個COURSE個阿SIR係年青一點的,於是佢會有塊野掛喺白板上示範(新派呀﹗),而進階後那個叔叔係老一派的,係要我地行出去睇佢坐喺度寫的…UM。不過呢,我呢啲自由奔放架嘛鐘意,唔多鐘意臨字帖(<--藉口啦)…寫寫吓就無心機了…

攝影
其實我唔記得exactly個叫乜名了…XD…只記得喺新蒲崗遠到無朋友。同埋個阿SIR係專業攝友,對我地呢啲無聊聊拎機仔的又只會影紀錄性相片的人那個冷笑與唔笑之間的表情…XDDDD。不過喺呢個班度學懂了一些相機上唔同分唇的用途,對之後影相是有幫助既,雖然上堂之後特登去買的半自動LX3已經無幾可拎出嚟用了…
*************************************************
其實(又其實),開始學琴之前我有諗過去報過電子琴或初級鋼琴班的,不過諗起自己彈到一PAT野時仲要對住成班咁多人會很瘀皮就算數了。

之前學到大概一年的泡文暫時放下了,呢水又想PICKUP番,我都係有諗過去工聯會攪掂,不過無考試我一定HEA讀…都係唔好了…XDDDDD

於是…揭完本夏季課程後我是甚麼班都沒有報的﹗XDDDDD

6 則留言:

  1. 其實工聯會咁多班work唔work?我覺得唔work,都無真正報過。

    我有入過會,不過都過左期,其實為左玩佢d健身,貪平,不過果度d教練無咩好感,都唔會再報,要俾年費七十蚊,大佬,佢話晒有阿爺撐,仲要俾年費你白痴咩?要俾都永久會費啦,真係寧願去第二度俾多d錢,而且工聯會政治色彩太濃,叫佢揾鬼上去。

    有聽過咩班都有,又防身術,又詠春班,詠春班聽人講都唔係好work,開黎都係做宣傳,再進深都要去第二度學,佢開咁多班,我諗無幾個work

    by無敵

    回覆刪除
    回覆
    1. re:無敵

      咁平你就要預一分錢一分貨架啦,不過大部份我讀過的除了某些日文和法文班我覺得麻麻,英文的就for中學程度的之外,其他我都覺得佢好好…尤其是西班牙粉個老師簡直係教得超好個班係超值的,不過係我已經唔鐘意西班牙粉啫…
      年費既野如果你唔係成日報就唔好特別join啦,只係我keep住一年報幾個既話,每個9折兩個course就回番那70蚊的折扣,感覺開心啲…
      我會覺得工聯會是你想學一樣野之前,先試一試水既地方,出面學個語文course吓吓都千千聲架嘛,咁喺工聯會幾百蚊試吓,就算試完覺得原來自己唔鐘意都無咁傷啫…

      刪除
  2. PHOTOSHOP我教你都得

    by無敵

    回覆刪除
    回覆
    1. re:無敵

      哈哈,是嗎?
      其實我好頹的只係退吓地轉吓色咁架咋…

      刪除
  3. 驚見有好多班我都報過...日文、photoshop、書法、攝影
    真係幾抵學又多元化
    只係真係好易上到一半就唔再上...
    SKIP左一個星期下星期已經冇心去了(懶鬼)
    不過D老師質素其實唔差
    最近無無聊聊都有衝動又搵返D語文學下XD

    回覆刪除
    回覆
    1. RE:散漫生活

      我就係成日上到一半就唔上,有時真係忙或者出走了上唔到一兩個星期,好順勢就會閃埋人…
      平有平既衰,不過幾千蚊我都做得出覺得悶就唔想上既癲狂行為架…哈
      我鐘意KEEP住搵啲野學,覺得咁樣個人先會有新刺激咁囉…

      刪除

要講幾句嗎?﹗XD