一把年紀學琴記(中)

正所謂工欲善其事，必先利其器，而行街上網搵野買正正是我最大嚐好~~~

話說我還在猶疑好唔好學(話晒都係個long-term commitment嘛…)既時候，某天行過住好啲見到左圖這個usb…咦，好有趣喎﹗二百幾蚊，貪得意買咗嚟玩，跟住琴書按吓按吓的，又真係彈到喎﹗但佢係平既，要用力按下去先會發音，玩一陣就手指狂痛…

諗番轉頭，如果真係想試吓又唔想買得太重本，應該買啲幾舊水既細路仔電子琴…

上圖那個usb玩得好唔舒服，但我又玩出癮來喎，於是我就身痕痕搬了個電子琴回家(真係搬架﹗因為店家無送貨…)。即係呢，呢類61鍵既電子琴通常係$1,000-2,000上吓，有一萬九千幾種分唇…不過我都唔識用﹗哈哈﹗琴不就是應該彈吓歌仔嗎？﹗我貪就腳去了柏斯買，之後再行通利，才發現Yamaha有些係可以配pedal﹗呀﹗$2,xxx的價錢但手感不錯(雖然手感為何物我還不太清楚，總之按下去唔係輕飄飄那種啦…)

事前做了點research見市面上仲有隻駁電腦既keyboard(據說係for人家作曲和做mixing用的…)，M-audio出品既，也是$2,000蚊上吓，但吓吓插住電腦又好似有點煩喎﹗而且作為病態網民的我都想戒吓網癮嘛﹗咁就求其搬了一部電子琴回家，上圖這部Casio既，除了無pedal，其實都ok既，店家哥哥說佢係密鍵，模仿番真琴既觸感喎…

於是這幾個月我都係學琴時彈鋼琴，屋企彈電子琴，練吓指法都仲ok既，但鍵重帶來手感上既問題，而且無重和輕音之分…所以我彈大細聲其實係頗頹的，再加之無pedal(這個我回了很多次帶…)…次次學琴時隻腳就不知如何是好…唉…

看forum很多人屋企都無(位放)琴，有些人suggest可以到琴行租琴，價錢其實頗相宜的，我又到樓下既琴行望吓，二百幾蚊有十個鐘玩，廿幾蚊一個鐘又唔貴喎，但個問題係…放工食埋飯都成八點幾九點，啲琴行都收啦，而且點都係屋企有部琴鐘意幾時彈就幾時彈既好…

本人又發揮我既fing錢本色了~這是我最新既玩具…

前陣子行琴行多過行街睇戲買衫，為既就係睇行情。其實一部鋼琴相宜起上嚟萬幾二萬都有交易，再分期既話都係幾百至一千一個月，咁又無咁重皮，加之睇forum很多人都說與其貪平買部二手，不如買部平啲既brand new琴，舊琴調音都有排調的說…umum…但…我屋企無位喎﹗而且我唔想擺出廳，可以的話梗係擺喺房，一來我可是鐘意幾時彈就幾時彈，二來又唔怕電視聲電腦聲琴聲撈埋喺個廳到，嘈爆﹗

要小巧既，小的目光就轉到數碼琴度，又是一場腦交戰，看行情大概是$5,000-10,000不等(豐儉由人呢﹗)，數碼琴雖然聲稱自己有模仿真琴發聲既功能，觸感又比較似鋼琴(不過還是輕了點…都叫好啲啦…)，但成萬蚊買個數碼既…真係不如買部真架喎…。小的目光就放到平霸之選~yamaha既P85度，看catalog說此琴配備Graded Hammer Standard，琴音可比真琴也﹗同埋說到尾yamaha係做開琴既，雖說數碼琴係電子野，不過好似質素有點保障吧？再看，yamaha一系列既數碼琴就只有它可以單丁買部琴而唔要腳架(連個單頭pedal)，盛惠$5,900…umum，我都差啲去咗俾錢的了…

某日行柏記去攪casio既px130，咦，個手感好似仲好喎﹗再望埋個價錢，平過上面講既P85仲可以連埋腳架和三腳pedal…其實那個單頭pedal…很有衣車腳踏feel的說…雞脾打人牙較軟，小的就go for部平啲既囉…

只能說，學野真係一個使錢既嗜好，好在有新年既利是幫補吓，同埋呢兩個月都keep住節衣縮食咁囉~

再續

一把年紀之：

一把年紀學琴記(上)
一把年紀學琴記(下)

一把年紀學琴記(四)

一把年紀學琴記(五)

一把年紀學琴記(六)~學琴之所為…

一把年紀學琴記(七)~租琴(房)記

************************************************

一開始諗住自學既我search search吓search咗博友積木人既舊文，我基本上都係睇住佢文中既資料再search落去搵啱自己既choice的說~

安慰劑 - 自學鋼琴（上）
安慰劑 - 自學鋼琴（下）