2010/03/02

一把年紀學琴記(上)

一直有個古怪的念頭:覺得人生點都要學識一種半種樂器,不為甚麼,只覺得沒學上一點總覺得好像欠了些甚麼。前陣子這念頭又發作,思前想後,決定學琴去也。這,是一個親朋戚友聽起來莫明奇妙,自己也覺得匪夷所思的行為…
一路都係得個諗字,而這個「一路」是相當一路,講緊由中學到而家。小時候心底很想學,然而小的那個年代仲未使上幾百種課外活動(直到中四驚覺唔讀書第時要乞食前,我的都是玩樂終日,很快樂的說~),父母又要為口奔馳,見狀就不敢提了(但我弟卻走去學結他﹗買了個六百幾蚊的結他卻放著唔學﹗嗚﹗我做乜咁乖呀﹗不過我又沒興趣…要不就自己走去學不要浪費嘛),結果我去了學畫畫,咁呢個都係我興趣嚟既,只不過爹的國畫素描天份都沒傳丁點給我,嗚…(咁…畫得出啲懶cute既漫畫…都算係學到啲野掛?﹗)
Um,話說回頭,中學時學校規定一定要學一種樂器,但眼見家父家母在升中時使錢有如倒水,新書新鞋新校服新乜新物的,我又不敢提了(乖小孩﹗卡卡)。於是我學了最平的牧童笛﹗(其實是規定要買一人一支咁上堂的)中學5年既practical幾乎都係靠支笛救命,說來奇怪,唱K我又好地地,叫我當眾高歌music書入面既歌…嘩,我寧願肥佬囉。又話說回頭,無正式學過樂理嘛,5年來的Music堂都係我的夢魘,除了識數五線譜上space係FACE(高音譜咋喎),之後點樣數各調既do re me(不知何解上親堂唱親歌都要mark晒do re me先可以唱囉﹗),天呀﹗written就係咁十次有九次都係肥既…就算正規科目我點努力煲書,卻衰喺音樂PE手上而失掉一個全科合格,係咪人間悲劇丫(吾校都未免太有趣,將啲本來係for fun既科目變成肥佬既泉源﹗而且,中四五都仲係咁喎﹗攪到我張成績表勁樣衰)…

我懷疑,心底之所以咁想學樂器多多少少同呢個夢魘有關,就算事過境遷,潛意識都係想學咗佢將之KO,證明…當年既肥佬係非戰之罪﹗

「一路」路了很久,慢慢年紀一把了,想來想去,總覺得好像有點不好意思…小朋友玩意嘛,小的大人大姐參上一腳好像有點難為情喎﹗於是小的選了學外語,一學就x年…

直到某一天,司內有一位同事平時明明搭A路線歸家突然轉搭B路線,吹水之下才知她搭B線是到老師家學琴﹗學琴﹗係呀,她說這是圓小時的夢,而且,佢仲要係學得相當認真那種,學了一段日子就去考級,由於屋企無琴,於是臨近考試日子就多去老師家練習…佢,年紀比我的一把多上幾把…

聽著聽著,就想一把年紀已是事實,沒法把時間逆轉也是事實(或者去買SKIII或O喱可以吧),現在不做,年紀一把兩把三把的加上去,想做的事還是做不成…到頭來只落得一個講字。好了,就一鼓作氣去吧,試咗發現原來唔得都叫試過丫,死心都死得理直氣壯。最緊要係,個心唔會久不久就思思…。

下定決心就去搵料,話學啫,千頭萬緒不知從何開始,上網一睇原來好多人都係細個因為各種原因沒學成,大個咗搵錢自己使之後就圓番小時的夢,有的是自學,有的是跟老師學,各式其式。睇完又是一個思前想後,試了一輪自學(自學係我既興趣,哈哈,當年日文都係由一本萬里叢書開始)發現唔多掂,諗過去工聯會(又是我的興趣,平嘛﹗這是王道﹗),諗來諗去,卒之決定跟老師學。跟老師,又要諗去琴行定搵私人,本來諗住搵私人(甚至,諗過搵有教琴既朋友,不過彈琴時的笨樣…不好意思在朋友面前展露呢…),但又是一個千頭萬緒,去邊度搵?信得過嗎?質素點保證?賭博呢架喎,諗了一輪,算啦,去琴行啦…至於學來為何,考級甚麼的…唔諗啦,到時先算(以我考試怪魔的性格,如果老師話我可以既話,我大概都會考吧?﹗)((21/11/11後按:我又真係去了考喎﹗))

牙擦一吓,喺學野呢方面我係幾有運的,多年來學日文遇過的老師正常(甚至係好既)佔上99%(我竟然試過喺工聯會遇到中大校外的老師﹗﹗﹗),學琴啦喎真係賭一賭,又俾我搏到喎(嘻嘻嘻嘻…我hills了…),沒正式問過老師教過幾多成人學生(我地未熟到會傾計嘛),不過佢都幾有耐性,即是說我自己都覺得彈到不知所謂x1000000,老師點出有乜問題時個presentation係聽落好舒服,又覺得受用,你知啦,我呢啲新仔嘛,初學又多根基野悶到呢,彈極都不知所謂很discouraging,就容易放棄(像我的西粉事件…)。咁呢位老師都幾曉encourage人,同埋一針見血點出問題所在,咁我就會覺得:啊﹗只要解決到呢啲問題就會彈得好架啦﹗當然,彈琴呢啲野係好long-term既,非一時三刻可以完成,有人在旁指點指點,由彈得超級好鬼狂喪癲難聽變成無咁難聽,感覺係還是相當良好,positive reinforcement嘛,自然有動力繼續落去囉。

就這樣,笨笨的我就跟老師學到第三個月(最positive既reinforcement,老師竟然以為我讀緊大學…其實…我該開心還是囧呢)。同一時間到琴行上堂的,都是做得我仔仔女女的小朋友…哈。

想說的是,想做,就去做啦,不要只講不做,講…是把鬼的。當然,我唔係叫你殺人放火喎﹗(待續)

一把年紀之:

一把年紀學琴記(中)
一把年紀學琴記(下)

18 則留言:

  1. 佩服妳能付諸行動。我也認爲應該要學一種樂器。很多年前,買了一台電子琴,但玩了幾個月就沒玩了,因爲我發覺,原來我不喜歡重複做同一樣事情的!也因此,完全放棄學琴的念頭了:P

    2nd Mar 2010 17:50 PM

    回覆刪除
    回覆
    1. 學野係我既興趣嘛~
      一來係受同事既啟發,二來覺得都講咗咁多年,係做就做咗佢,遲多幾年又唔知乜野世界,有無時間和心力去做呢…襯而家有咪試咗先囉…
      都係架,一首歌係不停重覆練,有時彈極都唔好真係好鬼激氣…
      咦,咁你部琴咪浪費了囉?


      14th Mar 2010 23:35 PM

      刪除
  2. 加油呀, 我都係最近開始學琴呢...說不定老師都好懂得encourage學生, 我的老師也常常說彈得不錯呀, 挺有音樂感之類...不過呢, 我常常要出差, 不一定能保持一星期一堂, 進度會比較慢, 但沒所謂啦, 反正我又不趕著要考試甚麼的, 純粹享受學琴和彈琴的過程

    2nd Mar 2010 22:02 PM

    回覆刪除
    回覆
    1. 我有太多被老師一句半句說話而打沉咗既經驗啦,真係聞者傷心聽考流淚啊﹗
      常常出差就麻煩啲,要更多恆心去keep住練呢﹗加油啊﹗
      對對對,考試…而家我都係初學…係有排之後既事啦,我覺得應該努力打好個根基先,呢幾堂學既歌都好鬼難,返屋企彈咗個幾兩個鐘都練唔好…真係激死人…

      14th Mar 2010 23:38 PM

      刪除
  3. black lab20/4/12 10:12

    我咪又係一把年紀先去日本留學~!
    我d同學咪又係做得我啲仔女~!

    但係呢d唔重要,
    最緊要係有決心、有恆心。

    3rd Mar 2010 12:18 PM

    回覆刪除
    回覆
    1. 你去日本留學呢個project仲勁過我喎﹗
      我而家就係諗住:umum,買咗琴咁大投資,一家唔可以隨便放棄架﹗頂住呀﹗咁囉…

      15th Mar 2010 12:26 PM

      刪除
  4. 哈, 等緊你放D 自信之作上黎呀下!

    去到你(我就再上一代啦...知架啦唔駛提)呢個年紀先去學,好多都係咁想識少少音樂陶冶下性情,反而會更用心去學呢!

    7th Mar 2010 01:01 AM

    回覆刪除
    回覆
    1. 自信之作講唔上,我成日都係喺屋企彈得好地地,去到老師面前就亂晒龍…囧﹗
      其實都係,出咗嚟做野,時間少咗,金錢又係一個concern,真係會諗過度過,覺得自己真係想做先會去做…應該會有排玩掛呢個遊戲?﹗

      15th Mar 2010 12:30 PM

      刪除
  5. wawawa~~
    我都係好想學琴但細個屋企環境唔允許...
    到大個左依家剛出黎做野都係好想去學...
    不過...仲未有閒錢比我咁去揮霍...

    8th Mar 2010 21:17 PM

    回覆刪除
    回覆
    1. 儲吓先啦,平有平學,貴有貴學啫…
      終極平既話可以到琴行租琴室,二百幾蚊十個鐘,咁就有得練啦﹗

      22nd Mar 2010 22:36 PM

      刪除
  6. 加油!我都好想學!但仲未有$呢!

    8th Mar 2010 23:16 PM

    回覆刪除
    回覆
    1. 都係嗰句啦:平有平學架﹗我而家都係CHEAP學架咋…我都唔捨得買直身琴呀…哈哈…

      22nd Mar 2010 22:38 PM

      刪除
  7. 學琴的目  
    幼年沒有條件學鋼琴,但是一直很向往的;
    對古典音樂非常鍾愛,希望自己能夠演奏的,等等非常多。

    學習鋼琴是一個艱苦漫長的過程,因爲成年學生的理解能力很好,所以,很多曲目很快就識譜完成,很快上手彈奏,一彈下來就會忽略很多老師要求注意的問
    題,而且很容易快。練琴初期是不主張速度太快的,因爲那樣就使你失去了很多考慮手指動作,樂曲呼吸等等問題。然而,慢練,需要很大的耐心,其實,只要你踏
    踏實實的關注每一個動作,速度自然不會太快的
    本人有教學经驗.刻苦.肯負責任老師
    教過學生有兩個3年內考八級
    而且設租琴室練習
    歡迎初学.成人,兒童学習
    來我家私人上門教
    聯絡email:lieyliey2007@yahoo.com
    Piano.teacher.classicmusic@yahoo.com
    tel:97468364

    14th Jul 2010 22:26 PM

    回覆刪除
    回覆
    1. 賣廣告都有咁大段意見真有心,謝謝﹗~

      15th Jul 2010 13:58 PM

      刪除
  8. 好多人都等到出黎做野,經濟獨立啦,就想完個夢。學琴學幾堂都過癮。最緊要係買個琴返屋企,可以簡陋地彈一首歌就得啦。最緊要係冇壓力,返工已經夠辛苦啦

    3rd Jan 2011 21:18 PM

    回覆刪除
    回覆
    1. 小時父母供書教學已經好大負擔,也不敢要求太多,咪到而家自己可以負擔時再去做番以前想做既野…都ok丫…
      有琴喺屋企真係好重要,放工返屋企食飯攪呢攪路,卒之有閒情去練,如果無琴喺屋企好易就攡吓一日攡吓又一日,咁就永遠都唔使練的了…

      6th Jan 2011 12:23 PM

      刪除
  9. 你好: 我是路過的. 看到"一把年紀學琴"就跳進來了. 我真的很想學返琴. 可否請問你跟那一個老師學呢? 可以介紹嗎? 謝謝你! 請問我需要留聯絡資料嗎? 我過兩日會再來的.

    回覆刪除
    回覆
    1. 你好﹗

      因為出門所以遲覆了,其實我係喺屋企附近的小琴行度學,撞手神的…所以無乜得介紹啦,我本身都有同學做緊鋼琴老師,但唔想喺佢地面前露出我的笨笨相,所以我係特登搵個完全唔識的人來教我…哈

      刪除

要講幾句嗎?﹗XD