2008/06/27

[日劇]友誼之光~《ラスト・フレンズ》

其實一直煲劇都沒特登避劇情,很多時(蓄意/無奈/忍不住)穿橋後再看,不過今次唔work了,乜橋都穿晒,完全沒驚喜,也看得不投入。

我懷疑,我可能是看這部看得最冷靜/無反應的一個。

(除了穿橋,可能看過更恐怖的《人間失格》,不知怎的看這劇經過精密計算的高潮位時,本人反應只是「啊」、「係呀﹗」…)

注意,有大量劇情﹗﹗﹗

不是說大團圓結局不可以,只是當用了差不多一半篇幅舖排各人問題所在時,第十一回最後三十分鐘草草交代完各人的結局,感覺十分不平衡,有點趕收工的感覺…實在有點浪費。個人覺得中段(第七、八集)作為結局篇過渡位,暴風雨結局前輕鬆一點無可厚非,只是好像拖拉了一點(瑠可性向被人懷疑,拉前輩扮男友,小倉想離婚又離唔成,美知留和小武的發展…),悶人到飛起…倒不如花多點時間舖結局吧…(這樣趕收工很港劇的感覺…)。

又可能是穿橋關係,很多高潮位都令本人覺得雷聲大雨點小,特別是第九集宗佑打傷小武、瑠可單人匹馬挑戰宗佑,美知留因為愛宗佑所以對他藕斷絲連又默默忍受對方暴力,但小武和瑠可沒必要吧?佢地識得叫美知留唔好理宗佑,有乜事要講出來大家商量,但二人受到DV男傷害卻「Goo」一聲吞咗佢,這樣又會解決到美知留被宗佑苦纏的問題嗎?而且,宗佑要脅瑠可要將她性向的事公告天下,瑠可表明自己無野好驚,既然無後顧之憂那為甚麼不把事情攤出來(如報警),宗佑好明顯是欺善怕惡;瑠可雖說男仔頭,但到底是女生一個,單挑已是極危險,仲要不停向對方說挑釁性的話,說實在,宗佑唔打佢真係唔姓及川…

Share house一共5個人,合力都打唔過一個宗佑?﹗攪到好似大魔王毀滅地球咁(又係唔報警既問題)日日擔驚受怕…,又是極唔合理…

劇情有很多令本人O咀的地方,但劇組實在很有心思。特別播主題曲《Prisoner of Love》的片頭,白底部份暗示了各人關係,黑底部份給眾人一個主題,很喜歡這個和劇情環環緊扣的片頭。現在看畢全劇再睇(仲有煲吓人家的文…),發現後段各主角跟著紅線走時,只有宗佑背向鏡頭走,其餘四人都是走向鏡頭,這是暗示他會死的嗎?還有美知留和宗佑同坐時,美知留的按著宗佑的手慢慢放開…我愛死這樣的首尾呼應呢…

很多時播主題曲都是hea hea的剪吓片,或叫主角走出來型型的擺pose算,要不就是片尾出end roll。《Last Friends》的這個令本人印象難忘﹗不得不提還有越聽越有味道的《Prisoner of Love》,本人之前沒聽宇多田光的新大碟,初聽這曲時已是看此劇,感覺光妹用很強的氣聲加強壓逼感,聽得人喘不過氣﹗(我誇張了嗎?)未看歌詞光睇歌名,就咁直譯「愛的犯人」已感覺此曲很配劇集主題內容,越聽越喜歡的說。現在每聽都會想起此劇片頭呢﹗

劇組道具都很細心,除了很多人也談過的水杯,還有第十一集美知留產下女兒時,病房的月曆是2009年的﹗對照我們的Window Media Player重組DNA,真不禁感概萬分… 

(這張圖我找了很久耶﹗)

其實我諗住套劇我最喜歡就是主題曲部份…

藍田 美知留--Love

美知留因為缺乏父母的愛,所以渴望從男友身上得到愛,偏偏遇到暴力DV男,這時遇到舊同學瑠可和她的室友,交上這樣一班朋友令她重新有力氣向前行。唔知點解次次長澤都係演第一女主角,不論演爽朗少女還是受保護弱者,就係無乜存在感,總係唔及人搶鏡(其實上年的《求婚》佢既表現都係…乏善可陳…) 。痛苦、悲傷、驚訝都是那個1號表情…不知何解,我諗起《亂世佳人》的恨而…

岸本 瑠可--Liberation

瑠可希望當男生卻生為女兒身,面對美知留不能/敢明言自己感情,只能默默守護她,Liberation就是指她想解放自己,做回最真的自己嗎?雖說身處日本 這樣一個對同性戀相對比較保守的國度,她的家人卻極度開明,爸爸知道女兒意向後雖然有點傷心,但還是落力支持她,我想這真是自己人最夢寐以求的出櫃結局呢。瑠可一直苦惱,不過看下去,有支持自己的家人和好友,又有心有力去支持朋友,她可能是整套劇入面最幸福的一個(就係太幸福,所以最後變不變性的問題放下了?還是SP會再交代?)

之前看《不要開玩笑》還覺得上野未從野田妹抽身出來,這回就是完全脫胎換骨,直頭認唔出係同一個人。還有她的表情反應,和女一號是天淵之別,演技之顯露呢。

水島 タケル--Agony

溫柔可人的小武,總是在一旁默默看著瑠可,出手去幫她守護美知留,他的agony就是小時疑似被姐姐性侵犯,令他長大後有性恐懼,總是不敢和女生行前一步,導致很多人以為他是同性戀。另一個苦惱,是他喜歡的瑠可另有喜歡的人…

基本上,阿小武個髮型係從poster的型格變咗後期的發脹髮菜,很恐怖。其實比之宗佑不停鑽牛角尖鑽到一條死路,瑠可有找醫生consult解結,小武就和美知留傾計談心,瑠可和小武的問題不算死結吧…只是非不能也,是不為也,搵帶回(當然,知易行難,回帶總比行動易的…)

瀧川 繪理--Solitude

嚴重搭枱的角色,也許因為她孤獨所以和借宿的小倉搭上?又或她找不到真愛所以求其搵個人頂住先?總之就是感受不到她有幾孤獨。同埋,好嘈,都係《交響》的氣質小提琴家好點呢…
(歧視呀,只寫這幾行?)

及川 宗佑--Contradiction

以無記劇standard,及川宗佑此等大奸狗應該死幾十次都死唔夠啦﹗(還令成千上萬的c9恨之入骨),實在本人覺得他蠻可憐,他和美知留一樣因為不愉快童年所以想藉組織新家庭得到溫暖,他一切注意力都在美知留身上,除了返工就是監視她,真係唔覺他有乜親朋戚友…。只是他的愛卻是佔有,美知留稍稍不如他願就拳打腳踢,說到底是他怕對方拋棄自己,重演當年母親走佬一幕,原意是求得真愛,只是方法極有問題。

麻生同學很多場口都無乜表情的,不過佢打人時拳拳到肉,那些乞人憎的一吓陰沉打人一吓悔疚痛哭真令人心痛,又很難怪軟弱又帶點母性的美知留會心軟…

其實我真係覺得麻生同學做得唔錯,有佢成個氣氛即刻緊湊咗好多(當然都歸功配樂),宗佑死了的第十一集…無咗恐怖野…即刻好似無咗重心…散咗…

******************************************
結局草草交代,但我頗喜歡最後美知留、瑠可、小武和bb一起在share house展開包含「家人、朋友、夫妻、戀人」的生活,又是呼應劇名呢﹗(雖然長澤的日式英文有點難受…)人生得知己如此,真係夫復何求…

本篇看畢,現下就看sp會攪乜啦,千萬不要係回憶大雜燴,會很驚。

寫畢此文的晚上看了SP,我真的太神了﹗果然回憶大雜燴耶﹗新加的劇情加起來我怕10分鐘上下而已。整個SP有70分鐘我卻用少於10分鐘看完,真搵笨,也沒有特別追看的價值,這個特別篇真係終極的雨點小…

官網 / 劇集資料
子大:《ラスト・フレンズ》(Last Friends) - 第九集至大結局

14 則留言:

  1. 達芬妮21/2/13 20:43


    看完sp... 以15分鐘的時間
    基本上,不,是絕大部份是回憶大雜燴。
    所以都是飛住睇....
    15分鐘過後,心裡不禁吼一句「冗談じゃない!」

    27th Jun 2008 19:51 PM

    回覆刪除
    回覆
    1. 睇完你這個留言真係心下一沉…
      我們可以來個鬥快睇完大賽,15分鐘一定夠用有突…太搵笨了…
      還是日本的觀眾喜歡睇這樣的回憶式特別篇,回味劇中各個情節呢?﹗

      28th Jun 2008 21:16 PM

      刪除

  2. 中間悶到飛起那幾集監製好似不同......
    我已由結局噓到SP,認真,浪費之前咁多料咁多炒作咁多用心

    27th Jun 2008 21:27 PM

    回覆刪除
    回覆
    1. 好多日劇都興唔用監製導演來拍,這又是NORM嗎?硬覺得風格突然一轉的話怪怪的…
      這劇的SP真的很敗筆…搶收視的濫製品呀…
      如果好似《一公升》、《ANEGO》咁和本篇隔一段時間才播SP,回憶都無可厚非,而家係接住本篇播喎,驚觀眾善忘如此要即刻回憶嗎?

      28th Jun 2008 21:19 PM

      刪除
  3. 同埋終於搵到人認同我在劇中段時講過,宗佑反方向走=離SH眾越遠,SH眾走活路佢走死路
    日劇係好鬼興玩埋D咁既hints XD

    27th Jun 2008 21:29 PM

    回覆刪除
    回覆
    1. 好多日劇都興唔用監製導演來拍,這又是NORM嗎?硬覺得風格突然一轉的話怪怪的…
      這劇的SP真的很敗筆…搶收視的濫製品呀…
      如果好似《一公升》、《ANEGO》咁和本篇隔一段時間才播SP,回憶都無可厚非,而家係接住本篇播喎,驚觀眾善忘如此要即刻回憶嗎?

      28th Jun 2008 21:19 PM

      刪除
  4. 友誼之光...呢個標題又幾襯Prisoner of Love喎.
    咁多個角色,我覺得宗佑果條線做得最好.
    如果係無記,呢D 真係死十次都唔夠...好彩呢套係日劇.

    27th Jun 2008 21:39 PM

    回覆刪除
    回覆
    1. 正確來說是混合了愛情和親情的友誼呢…
      其實我覺得宗佑係成套劇最可憐的一個,佢既死係成套劇既高潮囉,之後的一集啲人好似行行企企咁…唔知點…
      無記,咪張自力(創世紀)或甘量宏(天地豪情),做盡壞事後一定要不得好死…唔係觀眾會唔鐘意架﹗

      28th Jun 2008 21:23 PM

      刪除
  5. SP我只看了新劇情....但感覺總像呃集數....
    另外片頭瑠可用被單圍著自己跟美知留那裡,她的兩個頭被被單圍成心形,我不知道這是刻意的還是巧合,不過現在看來也很意思。
    last friend最喜歡還是片頭~~好有心思!!~~
    其實last friend ge中文譯法係咪應該變成"永遠的朋友"呢~

    29th Jun 2008 00:26 AM

    回覆刪除
    回覆
    1. 完全係呃集數和呃收視,唔想個話題咁快就完嘛…
      二人的頭我沒留意呀,你咁講又好似係…實在不得不欣賞劇組的用心,真係越睇越多發現呢…
      《永遠的朋友》都係架,佢地呢啲真係last forever的友誼呢…

      29th Jun 2008 20:12 PM

      刪除

  6. 你要汲取教訓, 一係要同步睇, 一係唔係八卦睇人評論. 你差唔多咩都知晒先黎睇. 緊係唔好睇啦.
    我同意你講, 宗佑一死, 就即刻變得死寂了部劇.
    我都覺得譯做最後的朋友好怪. 因為意思不是最後, 而是無論係點, 都係朋友的意思嘛.

    30th Jun 2008 11:15 AM

    回覆刪除
    回覆
    1. 平時我睇啲小眾野,只要避開人家的博文就ok架啦嘛,今次係生果報集集爆劇情,仲要題目度爆…都避唔到…嗚…
      死啦我buy buy地麻生同學演宗佑,會唔會俾人打?﹗哈哈…
      我諗個last係維持既意思多於最後既意思,美知留等人一齊返share house住落去,不就是將友誼延續下去嗎?﹗
      譯最後的朋友…可能係睇字面囉…

      30th Jun 2008 13:08 PM

      刪除
  7. 哇~睇完妳呢篇真係衝動想點番首有誰共嗚比妳致敬! 真係趺哂眼鏡悶到7彩的end加sp...那終極的雨點小真係睇到挑那媽... 宗佑真係利害啦!成套戲都比佢玩哂! 原以為佢會因為呢套野人氣大趺點知佢死得甘風光,唔怪得身為莊尼既佢夠膽死接呢個角色來做! 仲有淺野大媽擺明唔妥交響紅寶石啦! 有咩奶油佢嚴重搭住得甘交關!

    1st Jul 2008 03:22 AM

    回覆刪除
    回覆
    1. 我們要合唱一曲嗎這樣?哈哈…
      其實我都估唔到佢會有個咁平淡既大結局,尾2一集大奸人死咗,我仲諗緊會有乜高潮…點知係反高潮…就係乜高潮都無…
      也許我地應該唱番首陳奕迅的《反高潮》…
      j系俾當打偶像演個咁既dv角色都幾突破,同埋上野樹里都係,啲角色設定真係幾出人意表…
      交響既上野、瑛太,同埋錦戶亮今次真係突破啦,反之阿水川(?)角色所限很搭枱,最蝕都係長澤囉,明明第一女主角,我覺得佢既演出都勁搭枱…

      1st Jul 2008 23:02 PM

      刪除

要講幾句嗎?﹗XD