[日劇]笑中有淚的《歌姬》

唔通係長瀨智也和制作人磯山晶唔夾時辰八字？打從遠古的《池袋西口公園》到《虎與龍》到現在的《歌姬》都係不賴架喎，但就硬係叫好唔叫座；新作《歌姬》少了舊作《池》和《虎》的古靈精怪，結果反而更慘淡…

(下文盡量唔爆劇情，但越落會爆得越多，小心﹗)

光看文案說甚麼熱血男兒失憶前後的戀愛故事，失驚無神又插上一個歌姬(初時以為關步姐事…)，而且故事設定於昭和三十年，成件事我只聯想到一個「悶」字，要不是長瀨智也和磯山晶，99.999999999999999999%我不會看。

不過唔睇，係走寶的說。

話說此劇改編自舞台劇，所以故事其實十分簡單，每集就是土佐清水市各人生活誌；鎮上有純樸良民，亦有惡死黑社會，不過惡死人埋藏著善良的心眼，即是說都係忠的，忠既奸既總是守望相助，十足小鎮風情。場景不是收留四萬十太郎(長瀨智也)的岸田家經營的擸戶座電影院，就是騎呢女子鯖子開的民宿，一係就去艷女瑪麗開的酒吧飲酒吹水；劇中人個個性格鮮明(甚至是誇張騎呢…)，鮮到係造型已十分搶鏡，又多怪言怪行(甚至係幾誇張)，成件事好舞台劇感覺，不知劇集前身係舞台劇的話，真係以為編劇攪騎呢爛gag…

此劇suppose應該是一部愛情劇，不過男女主角的戀愛(甚至三角)線一路未正式浮上水，頭幾集舖的都是太郎失憶後在土佐清水的生活，實在幾考煲劇者的耐性…我想此劇不叫座的原因就是頭幾集唔知佢做乜，去中村拎新戲膠卷、自慢大會等，劇中人就係不停跑來跑去，無時無刻daily natural high，實在，做乜？

妙在頭幾集唔知佢做乜的劇情舖了很多伏線，一路睇落去就發現很多奇妙的前後呼應，很多看似無聊的gag都是極有心思的安排，當男女主角戀情、失憶等主線浮上水，細心啲睇，甚至會發現結局早就藏在初段的伏線裡，「原來係咁」之聲此起彼落(喺我心度…哈哈)。

講咗咁耐都應該講吓我睇此劇的主要原因：長瀨智也先生，呵呵。說實在太郎這角色失憶前是溫文書生，失憶後是大情大性，同時仲有個現代既無用男角色，真係幾有挑戰性的。當中又以失憶後戲份最多，咁阿智也哥成日大呼大叫，唔知點解我會不停諗起《巨星夫婿2003》(這套特嘈﹗)、《My Boss My Hero》的真喜男和《虎與龍》的小虎，啲表情真係好鬼似，熟口熟面的(鐘意的話可以加埋《池袋西口公園》和《半個醫生》)…尤其是那些瞪大眼依起棚牙大笑的表情，十足真喜男昭和版…

多得佢呢啲表情引吓我笑我先忍得過頭幾集入中段戲肉--太郎的過去，到佢恢復記憶(失得就一定會有恢復既劇情架啦？)，太郎硬著心腸做決定時，那些熱淚盈眶又強忍淚水的表情感染力有十個強…睇到本人都忍唔住熱淚盈眶埋一份…

唔知點解次次睇親長瀨君(我在扮熟…哈哈)的劇佢都係做啲大情大性熱血份子(簡稱嘈)，前兩套劇又玩喜劇，今回初初都以為佢玩第三次攪笑，誰不知是悲喜交集，演技真不賴啊﹗諗諗吓，睇佢做啲文靜角色，真係要數番去x年前的《白流線》了…

女主角相武紗季不知何解我對佢個樣真係無乜印象，就算睇(過吓)《華麗的一族》都係無…睇完呢套其實印象都講唔上深(我掛住睇長瀨…)，不過佢呢個純樸小女孩幾可愛…雖然…我最想知既…都係…佢同長瀨係咪真的…umum…

結論呢，雖然頭幾集有點不明所以，但故事很感人，演員演出有水準，佈景道具又十分用心，實在是部值得一看的劇啊。文章以笑中有淚為題，淚是灑給昭和年代那part，笑就係現代那part，這套劇劇不可以貌相，真係要用心睇到尾的說。

現下未看《SP》和《伽利略》，暫時07出品的劇集，滿足度以《歌姬》最高囉~
**********************************************
爆劇情了…

很喜歡此劇舖的伏線，舖得自然而不突兀，當故事推進下去才發現原來之前已有這樣一個提示啊﹗實在是太強了…我邊看小鈴如何將太郎行為和他記憶恢復度聯在一起就邊替她緊張…

記憶錯亂伏線：

• 從來無表演過唱歌的他在自慢大會忽然拎結他唱英文歌
• 識更正鯖子"good bye"為"good luck"
• 提起小孩出生要由祖父名的家規

每當太郎出現些不明所以的行為，都不禁為小鈴擔心…

劇中人和歌姬的關係：

• 歌姬即係太郎(本名及川勇一)女兒櫻，她之所以想做歌手是因為她自小以為父親死了，一心想將歌聲獻給天國的父親…
• 一開始小泉櫻舉行引退記者會，提到覺得再唱下去已沒意義，原因就是父親太郎死了
• 第二集自慢大會的芥川被太郎打完一身後就沒再出場，後來才知他被太郎的說話感動了，到東京努力找機會，幾經辛苦終於正式出道做歌手，後來更成為德高望重的大師，而且教太郎女兒小櫻唱歌﹗
• 劇初來到鯖子旅館打工的大學生常跟住太郎，慢慢對電影產生興趣，硬轉埋個占士甸造型，就被太郎叫作「占姆士」，又被太郎鼓勵佢努力向電影制作人之路出發…後來占姆士果然做了出色劇作家，藝名是「占姆士太郎」…
• 小泉旭(太郎孫子，櫻的兒子)知道祖父的事跡後深受感動，決定努力振作在電影公司工作，而佢更搵來上面兩位大師幫佢手…套戲就係講「歌姬」啦…

小鈴最後感情情歸何處其實係無正式交代，但2007年劇情提到擸戶座戲院主人姓松中，小鈴和誰在一起就呼之欲出了﹗而她的孫女叫「瑠璃子」，又戴著太郎送的珍珠頸鍊，小鈴心底最掛著的是誰又是十分呼之欲出，愛死這個畫公仔唔畫出腸的結尾。而兩人的孫子：旭和瑠璃子，分別是太郎最愛的兩個日活演員的名字，他在劇中不只一次提過他日有孩子要改這兩個名，真係十個前後呼應啊…那末，上兩代不能走在一起的憾事就由現代的孫子去達成，一個出奇不意的happy ending，所以說，我是看到笑中有淚的囉~
*************************************************
今期熱煲：長瀨智也~
歌姬@維基
劇集資料