[港劇]選擇的尊重@《雷霆第一關》

戀愛是個海 王喜 (《雷霆第一關》片尾曲 @喜新唱歌, 2001)
作詞：周耀輝　作曲：林泳頤　編曲：陳永毅

尋找的相信是你 但我怎麼相信自己

而你就算璀璨天氣 我卻尚未渡過黑暗時期
談過一些愛情 能破滅腐爛　

原來不會化 想輕　偏偏積壓 想漂　仍然沉下
戀愛是個海　衷心請你別送死 知否愛我毫無生機 

但你不要為我哭 請你讓我死　想跟你但對不起
誠心的親愛著你 但我這麼討厭自己 

而你就算握我手臂 我怕帶你到處顛沛流離
戀愛是個海　風波險惡別送死 請拋棄我逃回故地 

但你不要為我哭 請你讓我死　想釋放便要一起　忘記

----------------------------------------------------------------------------------------------------------

剛重溫了一轉《雷霆第一關》，一直覺得這套戲是王喜多年前《緝私群英》加強誇張版，第一次看完後沒甚好感，過目即忘。近期機緣巧合之下又看了一遍，奇怪感覺比第一次強烈很多。先招供，我係王喜劇迷~哈。

雖然大橋和角色塑造仍是無記流水作業出品，都係例牌的--紀律部隊人員工作和生活感情上的種種挑戰，故事老掉牙得很，直頭同《緝私群英》一鬼樣。不同的是，《緝私群英》很正面，高唱住正義不死，做完臥底就變番大好前途的海關關員來個大團圓結局；《雷霆第一關》調子卻是很沉重，同樣是做臥底，這次正義關員大鑽牛角尖，面對唔到自己所作所為和過去。

再聽埋首片尾曲，原來詞中世界對照男主腳最後幾集的心情﹗(其實我覺得幾好聽的說)。睇完真係令人好沉重，不停反覆思量：每個人都有佢嘅選擇權，旁人應該尊重；但當嗰個人做嘅選擇係錯，咁我地仲應唔應該尊重？係由得佢做令自己開心嘅事，定係維護我地覺得係正確嘅野？

人生最痛苦應該係想幫但係幫唔到， 劇中人就係不停面對嘅個情境。好難得居然有一套劇會令我不停思考…

相信導演比咗好大空間李修賢和王喜(忽然諗起改劇本的傳聞…看後段他們的對手戲…真係好演技，劇中他們仲要係惺惺相惜的)，二人開口埋口就係度講道理；李生的腳色和阿姐係一pair(但佢地正正經經談情戲…硬係唔知點)，次次佢一同阿姐或阿姐的父母/奶奶同場就不停喺度講人生大道理，仲要係出口成文嗰隻；也許係編劇想加深李生個腳色係文化人嘅形象，不過，冗長的對白真的很難頂。

而王先生，相信這腳色係最貼近佢本人嘅一次。打從《闔府統請》，無記無間斷offer他做乖仔角色(終極悶的乖仔腳色可算係《吾係差人》)，唔係做警察海關就係做消防次次都係紀律部隊，說實在，你唔拍到悶我都睇到嘔。也許這次突破太大(嘩，啲劇情講勻晒同性戀、毒品，再加食煙打針床上戲)，之後的《烈火雄心2》又打回原型做番好仔，唔同嘅只係這次開始時係無大志怕死消防佬。其實王先生在《追魂交易》(講網上犯罪，好似係呢個名)亦正亦邪做得不知幾精彩，可惜這戲無係電視台出過街。

可能我的taste太偏鋒，可是我真的不太好家陣電視台力捧的甚麼六子、甚麼黃沙。也許，我都係睇番舊劇把啦；縱然，幾年前的劇其實唔係太舊。

劇中大道理：

1. 人係出世之前活喺一個水中世界。人一出世就要面對好多困難…唯有到水中世界，人先可以搵番出世前嘅寧靜同詳和。

2. 唔好理佢選擇係啱定錯…佢要嘅只係尊重，只要尊重就已經好足夠﹗(附加王先生青筋暴現的大嗌"好足夠"，同場演員目瞪口呆真係相映成趣)

(再續，暫時係記得呢兩個)

其他王喜劇回顧：
[港劇]《霍元甲》...《緝私群英》 10/2/06
[港劇]《烈火雄心2》
[港劇]《烈火雄心》之１＋２＋３(一轉眼就去到09年了…)
[港劇]追電視好忙：自己人+王老虎+烈火3
[港劇]《烈火雄心3》~再見阿牛
熱煲系列5~：王喜篇
[港劇]黎視后最後的《珠光寶氣》…
[港劇]《囧探查過界》之何謂囧探