曲:江港生 / 克勤 詞:克勤 編:江港生
起來起來起來起來 今晚大家不想去街
起來起來起來起來 坐低又起身博命嗌
起來起來起來起來 睇波順便睇吓波鞋 起來起來起來起來
場場場面偉大腳腳腳法古怪 人人人浪最 High
懶理你是有錢或窮人 即使三更半夜無得瞓 即使三個眼袋仍甘心
還樂意在每晚發出這聲音 噓...噓...
睇波一家大細最興奮 過癮在各自變咗對頭人 哈...哈...
球迷來自遠近 法國靚女吸引 全情投入氣氛
(Rap): 朗拿度個光頭就好可愛 施丹都有個地中海
柏金就最怕搭飛機去比賽 卡路士嘅罰球就攞晒彩
碧咸同辣妹就真心相愛 華達拉馬個髮型就死都唔改
巴治奧唔入選就唔應該 等多四年咪要好耐
----------------------------------------------------
打到嚟打到嚟啦，一睇呢期電視地鐵雜誌關事唔關事嘅牌子都狂出足球theme嘅廣告就知，打到嚟啦﹗賽前吹吓水，話說世界盃冠軍會係南美歐洲一人一次，咁上次係巴西，咁今次咪係歐洲，唔知會係邊隊呢？
運動我鐘意睇多過做，哈﹗除了跳水和體操(只限女子，男子的太力量型)，至愛就是睇波。不過我不是狂熱球迷，無恆心追聯賽，世界盃這些大賽中的大賽就正合本人這種part time球迷的口胃(上個星期的AC對瓜菜…傷心死我了)。勁煲世界盃始於98年，之前的世盃只有睇決賽，因為細個家父家母唔俾太夜瞓，記憶中只有94年決賽一家人(好warm的一次)坐埋一齊睇住親愛的意大利失掉冠軍寶座(嗚嗚)。98年暑假成日流流長無野做，法國開波正值香港夜深，睇完瞓到第二日日上三杆，正﹗全部分組賽到十六強八強準決賽決賽直播重播全部都看個飽；完全唔理自己唔識足球，更加唔理自己唔識啲球員。有時間嘛，就不停睇經典入球、世盃歷史(李克勤98年這隻《球迷奇遇記》學到啲人名架﹗八年後的今日睇番真係人面全非)，不得不提還有甘小文的《至goal無敵》，令我至今還改唔到口仍然叫住"豬利亞"、"奧華馬桶"…；我那至今仍貧乏的足球知識(不過我很proud of自己識睇人有無越位﹗哈)就是從那時累積回來的。
02年，場地來到日韓兩國，雖然直播權去了有條線電視台，可幸當年我仍在學有個輕鬆暑假，家中沒有條線就出街看。為了睇波，我和我的同學仔走遍各個奇怪地點。首先，當年吾校唔知點解居然會播波，陪我睇分組賽除了大量平時斯文但睇波時粗口橫飛的同學仔師兄師姐，還有一大堆附近的叔叔伯伯，當真蔚為奇觀；十六強，去去吓camp閃咗去康樂室目擊我心愛的意大利隊被死人南韓踢出局(還造成我和某件友仔交惡﹗)；八強，喺學校(再係親愛吾校)度睇住西班牙命喪南韓，唉；到四強，今次係喺K房(﹗)，多謝德國係我生日之時打敗南韓做大禮。有一次喺奧海城出面大電視，真夠萬人空巷，坐係條街度幾粒鐘真係無咩幾何；還有一兩次喺不知名茶餐廳。決賽，終於係屋企，同親戚打住牌食住pizza咁睇巴西捧盃。成個02世盃，感覺很流浪漢，終日周街走搵地方睇波。話說回來，當年有條線搵黎明唱的主題曲到四年後的今日我還未講得出叫咩名，反而李克人的《Victory》印象深好多(不過都係鐘意《球迷奇遇記》多啲)﹗不過講好聽都唔及搵呢日韓兩地歌手合唱嘅《Let's Get Together Now》，有Chemistry、Sowelu(sorry，真係唔記得韓國代表是誰)，出來熱熱鬧鬧，幾有世界大同一齊手牽手睇波嘅感覺﹗
可能係讀History讀上腦，我對各大球隊的喜惡很多時來自堂上對各國的印象，專好歐洲球隊(本人除了中國史，至愛就是歐洲史，情意結)：英國是咱們香港人前老細，多多少少有感情分；德國有本人好欣賞嘅鐵血宰相卑斯麥，加分；意大利唔使講啦，加分；至於法國，總覺得係奸(偏見﹗)。至於最愛球隊，本人深愛一眾意國靚仔(係咪好typical女球迷心態呢？)看意粉隊(甘小文在至goal中的叫法)隱守突擊，然而守永遠比攻緊要，和怕死又怕悶的本人尤其相似﹗可恨頭號至愛巴治奧已退休了，幸好有睇98世盃，否則就再睇唔到佢著住國家隊波衫嘅英姿了；可惜，一眾意國靚仔和冠軍總是無緣。
今年波還未開，唔知意國眾靚仔今次可唔可以做番場好戲。anyway，我已留定大假六月尾七月頭…嘻嘻。不過而家未有波睇就睇住啲周邊product先；先兩日行街時見到converse鞋(本人至愛啊)出咗世盃特別版，但係無意大利呀﹗好唔開心﹗上網更只係搵到呢阿根廷和巴西兩款，嗚嗚。(17/2/12後按：睇番上面連結的converse舊文，小的可真是為了意粉隊買了對紅綠白三色的con架﹗哈哈哈哈)
同場加映，畢老師也寫過本關於世界盃的小書：畢華流談世界盃--------------------------------------------
開波：世界盃手記之一
沒有留言:
張貼留言
要講幾句嗎？﹗XD