2011/12/15

突然懷舊之~那些年,陪我長大的古怪基

小朋友們,知唔知現在眼神凌厲的古sir曾經有綽號叫古怪基?

um,爬文時爬到這一篇,真係英雄(句子係咁用啫…我無話我係英雄呀﹗)所見略同,心酸一酸(諗起自己前陣子的某一篇),點解會咁架…呃。忍不住,賦文乙篇。

事情是這樣的,前陣子古生開show,友人問我去唔去…無興趣喎﹗這陣子古生在馬交開show,又有朋友問我去唔去…um,友人說「你唔鐘意佢啦…」…呃…是鐘意的,不過是我回憶內的那一個古怪基囉…唔想被眼前人破壞我的美好回憶,所以唔打算去…。啫係呢,偶像更替係好平常,郭城城古黑子我的熱愛都不及從前丫,但都無話吾不欲觀之咁誇張,看倌們說小的係咪唔可以唔感概先﹗

《藍天與白雲》和《你是我信心》都是唔開心時一聽就能加注正能量的歌啊~少年那個不是強作愁呢,總想有個人能明白自己,不過又總覺得長輩唔會明,友人又不能盡訴,聽歌時會不自覺對號入座…咦,呢個人啲歌啱feel喎﹗咪中招囉。

還記得第一隻碟《愛的解釋》沒有買(18/2/12後按:於於俾我買到啦﹗),第二隻《笑說想》一出就飛仆去cd舖買,聽到店家說斷貨要訂時幾傷心呀﹗點解呀﹗吓?真架﹗﹗﹗﹗(但當時又無諗過去第二度買喎…um,當年學校方圓十里只得一家cd店就是了)… 好

雖然我常說個人至愛《愛與夢飛行》,但其實《笑說想》也相當不錯,個人極愛這cut《晨曦》,自然不造作的聲線,沒有過份賣弄假音,聲線和小提琴聲都相當配的~當年的keyword是自然,而家搵唔番的了…

(oh,無原裝的cd版添)去到《第二最愛》個勢都ok的,不過據說古生唔想拍電視劇專心唱歌而被無記雪(當時佢拍的劇都好騎呢…《包青天》走去做報仇小生…呢啲野搵古黑子做就算啦…跟住又有套同樊少皇懶攪笑的,頹到只在6點播過就算)…小的當時可真是擔心會一沉不起…典知無啦啦又爆出《歡樂今宵》,假音王子之名就起了。不過,小的其實喜歡古生用真聲唱的…(有人知道有首《阿當.夏娃》和《我和你的未來》嗎?前者有點jazz feel,後者雖然係大路,但唔知點解一聽就迷上了)…。話說回來,《歡樂今宵》一碟小的最愛《can we try》。

好聽還好聽,不過而家睇番轉頭,好似都仲未逃得出青澀小男生的路線,係咪咁攪到越做越無呢?

 《天旋地戀》沒看過(另一部《熱血最強》也沒看過…不過首主題曲《最後勝利》勁好聽…),eei第一隻碟《Be my valentine》小的最熱愛一cut《影子先生》,古生作詞的…但之後都好似無乜出品了。之後的《天氣會變》、《new pattern》求變了,不再一味小男生情懷,不過據我當時身邊朋友的反應…佢地都一致被《new pattern》個封面嚇親,被《love don't hurt》個懶懷舊又有點攪鬼的曲風嚇傻…再睇埋當年越來越高的髮線…唉呀…點算呀…

經常在吾博出現的一首《幸運鈴聲》,可以和范曉萱的《數字戀愛》作為手提對時代貢獻的見證。2001年出現隻精選後古生就無咗影,後尾先知佢去了祖國拍瓊瑤姐姐的劇,紅咗…oh﹗我可是很神心地買咗ost和因為佢紅咗而出番的精選…嘩﹗娘到無朋友…

知說古生被Paco羅致兼有得出番碟真係好開心架﹗睇見金記將楊千FA推了上女金位喎﹗點都有啲期望既,不過老實講,我唔like隻隻碟都玩concept,打機漫畫又星戰,越整越大盒,算…啲歌開始為襯個歌名而夾硬作,都算,最慘係個腔來越浮誇…怎麼了?難道千禧年代就唔可以正正常常唱的嘛…

金記出品直到《星戰》呢隻被我評為終極恐怖的出品(恐怖到之前執屋時被我狠狠地掉了那個大而無當的紙盒),個人覺得最可聽是上面呢cut《monica》…先唔講有無以前啲歌既水準…起碼詞不為match title而夾硬嚟(因為懶係要salute to pop star嘛那隻碟…同hocc《艷光四射》撞concept的),我記得首歌是臨近聖誕時plug的,編曲也帶點節日的浪漫,好好聽~

05年因緣際會有機會到紅館看古生第一次紅館演唱會,雖然覺得佢啲造型有啲唔知想點,不過見到佢等咗咁耐終於有機會踏上紅館舞台真係好開心,尤記得黑色西裝look拎住mic stand在台上一路轉一路唱《羅馬假期》突然好似好聽咗。不過回家再翻看vcd時…呃…都是有點作狀…竟然看不下去?﹗(那個演唱會最大的得著應該係令側田從幕後跳到幕前吧﹗)

肯定好多人都同我一樣頂唔順《星戰》帶來的震撼(而我真係好討厭《愛與誠》的…就算啲歌開始加入老拍檔張佳添,始終洗唔走啲浮誇味…令我巧京京)…06年無啦啦《human》無啦啦走番《愛與夢飛行》的路線(個封面已經如出一徹﹗)…是令人期待既。只是…《愛得太遲》我不討厭(也不特別喜歡),只係唔鐘意佢地個strategy係當一首歌成功後就不停回帶,《愛與誠》之後plug(或做)的不就是誇張的苦情歌嘛…《愛得太遲》成功後咪就翻dup一首《愛回家》,只是,後兩首收歛了外露的情感,無咁刻意賣弄了咁解。之後…咪喺度fevers囉…(據說成個collection有4種樂器,不過因為古生過檔所以只出了兩個)

花灑》和《一刻永恆》可算是呢個時期個人比較喜歡的,少有不是被洗腦而入腦。咁講可能好誇張,但被《星戰》嚇親之後(對,真係嚇親),開始有信心危機了,就算後藝動/eei啲碟幾頹(連《情深深雨濛濛》我都一鼓作氣去買喎﹗),起碼會有幾首我覺得值得一聽再聽的,《星戰》是…得首《monica》囉…。之後的碟水準是回升了,不過就覺得係食老本回舊帶,感覺始終是打折扣了。

話說某次英記新碟推出,見到博友留言講開…說呢隻碟可以一聽的原因是「有番以前的感覺」…其實都好可悲,話晒唱咗咁多年…原來最感動人心的還是舊歌…呃。得承認啲舊歌由細聽到大,每首都有回憶,當然係加分…但…新歌又真係…聽得入耳嘛?究竟啲串燒歌仲要回幾多次帶呀?下次串燒粵曲好唔好?(唔係話回帶唔得,食老本也不是罪…但都要食得好好睇睇架大佬…)

讓我再cop一次《一刻永恆》的歌詞「這一世 即使見聞沿路一直變 一刻永恆 懷念永不厭 風景性情人物會改變 即使故意再做一遍 情懷事後便難再現 回憶可珍藏當冠冕」,實在太有意思了,人世間的事物不就是這樣吧?也就是說,眼冤就不要望,望就預咗會眼冤,所以我選擇唔望。以上~


熱煲小生巡禮之1:古巨基先生
好爆笑的《香港電視》內頁:忽然大隻男之狂貼剪報…

其他巨基:

一刻永恆@古巨基《Moments》 27/8/07 (一刻懷念永恆永不變﹗至理名言啊﹗)
敗家實錄vol.1 古巨基 13/06/07
巨基.我生 27/8/06 (一洗之前頹風的全新大碟,當然比之《愛與夢飛行》年代仍差很遠)
買唱片 26/8/06
我的巨基年代 12/2/06
最終幻想 23/11/05 (國語炒雜錦,不過恐怖度絕不及上述的《星戰》)
Thank You My Dear 古巨基 (碟評《星戰》)  24/10/05

8 則留言:

  1. 《歡樂今宵》 - can we try我都好鍾意.不過最喜歡係漩渦.

    愛與夢飛行個隻都係好鍾意.不過唔知點解無買呢.

    d國語碟你係咪要另開一篇.忘了時間的鐘都係賣飛佛. XD

    佢返黎開拉闊,我去睇真係好睇到暈.(不過佢個句經典金句而家睇返好似好計算過咁.)即使佢第一次開紅館,我都覺得好值得去!(哇,側田個acapella真係好好聽.之後... 無啦)

    佢d concept album,我好似支持到打機個隻.真係再落去個d,唔好話碟,連歌都有d聽唔落.

    真係好心酸架 :(

    回覆刪除
  2. 我有隻我對門匙說。

    回覆刪除
  3. 妳真的說到我心坎去呢!!!
    他開的演唱會,除了勁歌金曲那場外,其餘三場我都有看,愈看愈失望...雖說他每次都很努力地做好場show,但眼見他愈做好像愈迷失愈累,真的很心疼。
    大勢下,他要不斷求變,不斷尋找新方向,不斷外加許多不相襯的包裝,但其實,作為小粉絲的我,只是需要一個很純、很真的古巨基便夠。
    由他加入金牌開始,他的唱腔就定型了。聽一首可以,聽多幾首,感覺好膩.....或者,因為那些全都是k歌曲風吧......和妳一樣,新歌裏頭,最愛花灑,而愛得太遲已列入我永世不會翻聽的歌曲之一,原因是,播得太濫,我好驚。=_="

    回覆刪除
  4. lu:
    國語碟要寫﹗但呢水我好懶呢…
    《愛與夢飛行》我記得暑假出,成個暑假日聽夜聽聽到爛咁濟,我承認我最鐘意呢隻碟係有情意結既…那年係學業一個大關口,發生的事都特別有印象的…所以特別加分的說~
    佢返嚟開那個拉闊呢我隻碟唔知飛咗去邊…反而係某次在圖書館見到佢有個《叱吒萬人幫拉闊》,2000年的,那水佢都仲未變眼神,歌與歌之間淨係識得講「送比你地」…好鬼重覆…但啲歌佢係唱得好順暢好真摯的…完全唔係後來造作的感覺…
    我失格了﹗佢返嚟第一個紅館SHOW係友人有免費飛我先去咋﹗不過那次真係好值得睇,始終都係第一次,跟咗佢做咗咁耐歌迷見佢終於等到係好感動…

    雖然心酸,但回望番那些年都係值得懷念既…UMUM

    回覆刪除
  5. brownie:
    《我對門匙說》隻碟超好聽喎﹗開首和結尾的《日出》和《黃昏》(唔記得有無記錯名)我連汁都撈埋架﹗
    隻EP叫《心願》…好似…

    回覆刪除
  6. connie:
    我明白大勢下係唔會接受一個歌手淨唱歌,係要做好多SIDE TRACK野既,但一個歌手都應該明白自己強項係乜丫,就如李黑人咁…佢明明賣唱歌…走去留鬍鬚扮有型咪衰咗囉,就算同樣SELL實力,你叫佢好似容天后咁勁歌熱舞十分鐘都唔係人人受架…
    即係呢,我覺得PACO睇人確係有一手,不過佢好似係將古生其中殺食的一面搵咗出嚟後就發揚光大,快快手拎獎搵錢之後就算囉…
    又說,我成日覺得《愛與誠》那其係撞正陳醫生轉會,李黑人啲《演奏廳》又唔夠揮,(咁講係咪好衰?)…係咁啱真空咗,而唔係反映本身首歌既質素…

    回覆刪除
  7. 我迷古巨基的時限實在短得很, 就是熱血最強和"愛與夢飛行"那段日子, 所以誠意推介, 一定一定要睇番熱血最強.

    回覆刪除
    回覆
    1. 咦,就是佢最黃金的時代喎﹗(個人覺得)

      睇嚟我要行吓vcd舖搵番呢隻碟嚟睇了,又好奇怪咁多年都搵無話搵到喎﹗

      刪除

要講幾句嗎?﹗XD