(請你)重播

首播劇和重播劇播既都係嗰啲，首播時中咗招追得入迷，劇播完熱情就慢慢冷卻。但一重播呢…其實都係播嗰啲野之嘛，但真係好神奇，又會有種魔力吸引你去追…

前幾年夜晚熱播《創世紀》，和而家的《律政新人王》，我弟都追得如癡如醉耶﹗

以前無得網上/買碟睇(出番正版vcd可說是cctvb一大德政﹗)，要錄又總不能成套錄晒(雖然我做過…成套古版《神鵰》都錄晒…哈哈…)，有時係睇睇吓先追得入神…咁前面那些咪miss咗囉﹗得不到的葡萄是酸的，睇唔翻的劇集也是特別好睇的。95年睇完首播的古版《神鵰》，本人可是十分唔夠喉，仲試過寫信去《香港電視》度問幾時有得重播﹗卒之等咗5年，2000年上下卒之喺6點半新聞之前重播﹗那種失而復得的喜悅真係好難形容。當年媽媽係絕對唔擔心小的放學周街hea，6點前一定準時歸家…要錄劇呀﹗(重點是要飛廣告，這是預錄不能達到的效果…哈哈哈…)

umum，其實《神鵰》有重播過，又出咗cctvb版VCD，得到就唔馨香(XDDDD)，我心底最想睇番既係開首的《緝私群英》…96年播的﹗13年啦…(吼﹗)同埋我覺得首主題曲好好聽，怎麼Uncle George的唱片都沒收錄這首歌？難道要我拎住個mp3對住個芒錄歌嗎？

重播劇的喜悅一是上面所講失而復得的喜悅，二是久仰大名終於可以見一個面。從小熟讀《香港電視》的本人睇睇埋埋好多家傳戶曉的劇集和人名，卻沒怎樣看過。到煲電視表的時候發現重播喎﹗嘩，好有中六合彩feel…。早上六點檔(睇過《五虎將》？定係《戲班小子》呢？《香江花月夜》都有播過架好似…)、中午前十一點檔(梁朝偉版《俠客行》…好喜歡首主題曲)、《回到未嫁時》)、下午兩點幾檔(《今生無悔》﹗﹗﹗、《京華春夢》、梁家仁版《天龍八部》、黃日華版《射鵰英雄傳》)、六點半新聞前(《戲說慈禧》…雖然嚴格來說這部不是甚麼經典…、《梅花三弄》)、凌晨十二點幾(《人在邊緣》--這是第一部讓我覺得黎天王好有型…哈、《獵鷹》--這部也是不得了…好睇﹗我懷疑這是我鐘意睇臥底片的源頭…)((3/2/12後按：終於都重播了呢套﹗))

記得翻播《人在邊緣》時正值考試季節，又天寒地凍，拎住本書包住張被的縮吓縮吓咁睇電視，好有風味的說…不過…試過幾晚太累喺個廳度瞓著咗。同埋唔知醒…哈哈哈…

雖說本人是電視精，不過80年代時睇過啲咩印象好模糊，記得/中招/喪追的，都係90年代睇重播的說。(不要說我年紀大啊…哈哈哈)不過出來社會做事沒那麼閒，加上近年就係有VCD，見到好睇的劇翻播都沒動力晚晚追。前陣子翻做的《酒店風雲》…我再次和首播時一樣追到巴士高黃由隱閉青年成為年青才俊後就沒看了…

睇番《律政新人王》，umum，點講呢，林lone個樣真係sharp醒好多喎(而家)，胡囧囧就當年sharp醒好多，佢當年有種而家已經不復再的不拘小節和清爽，最緊要係佢無做律師之餘化過登台咁勁的smoky eye(係呀，我又踩緊《烈火3》的高小姐了…)…即係呢(當我感概時就會出動的語句…)，佢初初出道幾年我覺得佢演技係above average，但近呢幾年係far below average…點講呢？﹗umum…唔識講呀。

煲劇睇碟係方便，但風味始終不如每日一集那種望穿秋水和牽腸掛肚(我講得太誇張吧？)。我個人比較貪心，如果重播開《神鵰》的話…可唔可以重播埋個製作特輯《神鵰俠侶再戰江湖》？﹗當年錄咗餅帶俾部機食咗…咁多年都睇唔番…好唔開心呀﹗(當年無記都算係咁囉，又出特刊又剪個製作特輯出嚟…)

************************************************************
題一個外話，點解個題目會叫《(請你)重播》…因為itunes剛好loop到以下呢首歌：

杜德偉的《不要重播》，聽下去會很傷心的情歌啊﹗(佢做主持的《點解咁好笑》會唔會有機會重播呢？)