2008/09/15

古巨基《Guitar Fever》

未聽歌先看了人家碟評(對這家唱片公司的出品抱觀望態度就是了…),人人都說古生回歸基本步,此碟可比本人心目古生最佳大碟《愛與夢飛行》云云…那末本人不可不挑這張《結他發燒》吧﹗(看到這樣的翻譯有人會嘔白泡嗎?﹗哈哈哈…)

先以歌論歌吧﹗

01.下次再見
很舒服﹗難怪人家都說這首令人想起《愛與夢飛行》,雖說物是人非了,但簡單結他伴奏,清亮而無多餘怪音的唱腔,不堆砌金句的歌詞,很舒服就是了。一聽已很喜歡…

02.眼睛不能沒眼淚
會是接力主打嗎?「眼睛不能沒眼淚」…想喊就喊…幾情深呀…又諗起歌者一副情深眼神望著女角叫她想喊就喊,唔好忍呀…呃…。唔似《愛與誠》、《天才與白痴》咁蓄意設定為「年度情歌金曲」(我可以說是真摯嗎?唔難頂就是了),少少傷感但又有點點勉勵,甚至…還有點點少男…。

其實我覺得這首有點像《結束我們抱著哭》的…

03.花不痛
歌詞有點《花灑》…都係暗啞底叫大家放鬆啲啦香港人的,唔知係咪睇到蔡健雅作曲關係,link上了Tanya啲輕柔結他風,忽然覺得很台灣海邊小屋風情,輕飄飄的,意境很美,又係勁舒服…又是很喜歡。

04.啦啦
我懷疑此碟的編排是從最慢最靜的一首打頭陣,排到最後後就是最嘈的band sound野,前3首都是靜靜的(最多都係輕快…),呢首就有點《西部之醉》(又話唔同舊歌比…),好像在跳camp fire咁,好得意。歌詞諗起林狗首《我地大家》,有乜呀?啦啦啦,唔開心咩?都係啦啦啦啦,有人說是方向歌之選,不過成首歌個感覺幾開心呀﹗中間「一有啦啦 也能夠啦啦啦 就憑啦啦啦 化掉啦啦啦」突然放慢,好似舊作《Take Me Higher》呢﹗(又比舊歌了…哈哈…)

05.你恨到
除了曲風加了band sound風外,歌詞的感覺和第2 cut基本上係一樣的(都係你唔要我啦那些)。呢首算係古生情深腔發揮最強的一首,不過無over到,甚至覺得壓制得太過,可以去勁啲囉…而家唱出來好像太軟弱了…

其實小的除了喜歡歌者唱清新民歌類,另外就是rock rock地一類(其實佢都嘈得起的),如《有心》、《顛覆》、《黑仔》一類﹗
***
這回歌少少得五首(有五首係音樂),實在靚唔靚聲…都係咁啦,可能我啲音響太普通,聽出嚟都係咁上下…(欠揍﹗)。但可喜的是五首歌都沒有令我不安,即係呢…無扮野的唱腔、為啱音而啱音的突兀歌詞(可惜我在敬hins的《夜宴》中見到…orz)、似曾相識的旋律…。一路覺得金記年代的古生歌曲越玩越走火,今似算係《我生》以外另一張較「正常」的吧?﹗(好像太harsh了?﹗哈,我係越聽越鐘意架﹗)

即係呢,concept玩不成現下從舊作取經,食老本之後仲可以點呢?(我又太harsh了嗎?)

from小百合:古巨基終於在《Guitar Fever》中病愈
from文謙:淡淡回歸--古巨基《Guitar Fever》
from小奧堅詞:古巨基 【Guitar Fever】 (全碟歌詞)
*********************************************
其實小的在一個唱了十多年的歌手新碟度搵番十年前的感覺,可能對佢係唔多公平既,又或,係歌者既悲哀呢?﹗物換星移,究竟小的係咪真係咁留戀十年前的歌者,還是懷念十年前自己過緊既生活呢?《愛與夢飛行》年代的自己呢?

即係呢,小的覺得當年的歌者係幾有吉士,為了唱歌推卻無記劇約,弄得被雪收場;《歡樂今宵》後大紅卻不開演唱會(當事人說覺得自己唔夠歌…喎),卒之一等等足十一年;歌者喜歡唱歌小的不會懷疑啦,之所以咁喜歡《愛與夢飛行》(呢隻係《歡樂今宵》之後出的廣東碟,中間隔了一隻國語的《忘了時間的鐘》),係喜見歌者沒只回帶《歡樂今宵》一類假音歌,呢類清清新新既有,同時都有其他風格的,穩守之餘又有突擊,聽完係覺得歌者有誠意去求變求進步求突破。Whereas近年的歌者俾我感覺係入咗comfort zone,可能是等了太耐才能回歸吧?總之一切要穩陣,《必殺技》紅咩?就自我複製《愛與誠》和《天才與白痴》,呢條水唔work就玩人生道理《愛得太遲》和《愛回家》,兼之掛住玩concept,歌曲和concept很夾硬,成件事係本末倒置咗,我知歌者好鐘意唱歌,但出品卻粗製得神奇…真係支持唔住,sorry。相比之下,當年的歌者歌曲未必大hit,不過熱誠和誠意是聽得出架囉…

很諷刺的是《星戰》歌詞有一句「然而問我 音樂才會 活出我 無奈 用數字才是競爭過 銅銀金 界定我」(回帶一句:個人認為這張碟是終極恐怖的一張碟﹗)受不住受不住。我還是繼續回味當年實而不華的古生好了…

(我又懷疑,我不喜歡的應該是拍糕…)

其他巨基:忽然懷舊之~那些年,陪我長大的古怪基
一刻永恆@古巨基《Moments》 27/8/07 (一刻懷念永恆永不變﹗至理名言啊﹗)
敗家實錄vol.1 古巨基 13/06/07
巨基.我生 27/8/06 (一洗之前頹風的全新大碟,當然比之《愛與夢飛行》年代仍差很遠)
買唱片 26/8/06
我的巨基年代 12/2/06
最終幻想 23/11/05 (國語炒雜錦,不過恐怖度絕不及上述的《星戰》)
Thank You My Dear 古巨基 (碟評《星戰》)  24/10/05

(10/9/13後按:不再加了,按下面巨基的tag吧﹗)

14 則留言:

  1. 達奇‧雞10/8/13 17:49


    看到您的文章, 我立刻去MOOV了一下 =P
    《下次再見》可能聽得太多了, 反而好喜歡《眼睛不能沒眼淚》, 感覺不錯啊~
    不過, 還是喜歡從前的大碟多一點~

    16th Sep 2008 05:20 AM

    回覆刪除
    回覆
    1. 看來覺得新不如舊的不止我一個啊…
      今次5首歌聽落都係舒服順耳的,無乜邊首特別想飛(這已是成就吧?﹗)我特別喜歡《花不痛》~哈…
      16th Sep 2008 09:37 AM

      刪除
  2. 鍾意一個人10年以上的話,係好多盲點的……不過又如何呢?難得有個自己覺得可以鍾意嘅喎,盲咪盲囉!

    16th Sep 2008 23:13 PM

    回覆刪除
    回覆
    1. 都係既,聽落覺得ok就聽,唔ok就唔聽…
      盲起上呢,唔好聽都要聽到覺好聽架嘛…不過呢個怪行不會apply在古生身上就是了…
      18th Sep 2008 09:47 AM

      刪除
  3. 《愛與夢飛行》...說真的,倒也沒想過要比較
    一個是自然的愜意,一個是刻意的淡雅
    出來的,其實早知道哪個才是「古巨基」吧...
    其實真的很懷念,不論是陳奕迅還是古巨基,甚至是鄭中基,梁漢文...

    17th Sep 2008 01:14 AM

    回覆刪除
    回覆
    1. 我想陳奕迅還好,古、梁、鄭3個就有點可惜,在某金牌經理人之下佢地風格180度大轉變,而家係紅,但總覺古靈精怪(特別係鄭中基﹗),歌又無以前咁好聽…
      我幾懷念長髮成個李麗珊咁款既鄭中基的說…
      18th Sep 2008 09:49 AM

      刪除
  4. 丹尼士文摘10/8/13 17:51

    多謝分享。

    20th Sep 2008 23:51 PM

    回覆刪除
    回覆
    1. 不用客氣。
      21st Sep 2008 19:16 PM

      刪除

  5. 剛剛一次過看你對古巨基的幾篇記述, 我比你慢一點才開始喜歡上他,第一張碟是歡樂今宵,也是我人生的第一張碟,哈哈,從此就無放棄過他,就算同學笑他髲線向後期.反而金牌年代的他卻另我有點卻步了,整個人的包裝都是要吸引妹妹仔的感覺,我年紀老了就喜歡懷舊?跟媽媽們始終都係喜歡samsam一樣?就係好想要他回歸以前的樣子,可能我也是不是真的不喜歡現在的古基,只係唔鐘意柏高?但是,沒有柏高,我怕連古基的聲音也不能再聽到了,想當年他的情深雨濛,差不多要把他在香港消滅,所以,還是要慶幸有柏高吧?只少我以肯定他的聲音會繼續在香港持續,在當中尋找昔日的感覺.哈哈,但係這樣做也不公平,唱的人跟聽的人也成長了,把從前的愛加上,現在sell埋樣咪仲抵,係咪? 歌,我相信古基會有堅持的,這張guiter fever,我覺得是有誠意的作品.

    29th Sep 2008 23:46 PM

    回覆刪除
    回覆

    1. 我人生買的第一張碟都係古生啊﹗雖然之前有第一餅帶係郭富城﹗哈哈
      其實當年佢喺吾校都幾有人氣,到98、99年就好沉了。但奇怪本人係一路追落去,其實那水的歌不比大熱的《歡樂今宵》差,也許是宣傳不夠?﹗佢既髮線…哈哈,咁我又唔係俾佢個樣吸引既…只係我欣賞佢對唱歌既熱誠,但當呢份真誠去到金牌年代變了質就讓我卻步啦。不是說那個永恆的情深眼神,只是我覺得佢好似唔係我以前欣賞的那個人,而家行出嚟係無時無刻「我好靚仔」,歌曲也感受不到以前那份熱誠,好像一切都為獎,市場受「做隻貓做隻狗」咩就一路整堆出來,真係好難頂。
      我認同你所說的,柏高將古生帶返香港樂壇,但也將佢完全變成另一個人,感覺完全linkup唔到以前既佢,這就是我失望的原因囉。
      雖然這張新碟感覺不錯,無前幾張咁「刻意」製造大熱(我很討厭這份刻意就是了),不過事過境遷,有啲野返唔到轉頭,只令人感到江郎才盡就是了…
      30th Sep 2008 12:20 PM

      刪除

  6. 我校當年的風氣是推崇johnny’s的花令仔的. 想當年我真係十分不入流,實在不明白為什麼同學們會為那些排骨少年的泳褲寫真而瘋狂,哈哈~而在是大倒退?我有點明白年青可口的少年可貴~哈哈哈.至於古生呢,的確他現在走出來的樣就係”我係靚仔”的款,當年的我真的無法想像,我無論跟朋友講幾多次我懷念佢當年唔係一個偶像的感覺都無人信,偏偏要說他一直都係靚仔...當年佢的boy next door 造型根本唔係走靚仔路線...(哈哈,我仲記得佢曾當選yes雜誌(<依家仲有無呢本雜誌?)的理想大哥哥no#1)
    BTW,我迷上古生之前都曾經覺得城城好型,但只限於這樣,第一個可稱為idol的人始終係古生.哈哈~你說最喜歡的碟是”愛與夢飛行”我也有同感,全碟的完成度很多,每一首歌的感覺都充滿誠意,在古基漂泊在內地做五阿哥的時候,呢隻碟就成為我的支柱了,我的追偶像熱無法得到慰藉...哈哈.另外其實茶黑臉面個張國語碟”喜歡”也不錯呀,”木訥(有李rain 在mv女)”和主打歌”喜歡”是我當年的k歌,古基好跳脫的sweetsweet聲唱喜歡,我到依家都係覺得獨人無二的. 可能國語歌的歌詞比較易控制,感覺好sweet的歌詞配上古生的聲線我很喜歡~哈哈~所以我一直都係佢國語碟的棒場客.
    那時候的歌係聽得到他有感情在內的,後來柏高年代,可能多了商業考慮,總係覺得差點要變成唱歌機克勤第二,令人難以投入呢.

    1st Oct 2008 02:41 AM

    回覆刪除
    回覆
    1. 唔…吾校當年不特別迷J家(當然也有,當年播《沒有家的女孩2》係有集體中堂本光一症的說…),各家各派中港台日美也有,小的當年主打係迷港星(兩位古生…),J家/堂本兄弟倒是後期先極度中招。諗番起又怪,高中年代開始煲日劇,係先中竹野內豐招先的,《長假》同劇的木村大神我係完全無反應…卡卡…
      雖然小的而家好中J家招吓,不過佢地啲華麗舞台風我係多年未太慣(我勁憎佢地FE衫露胸和踢腿舞姿的說…)
      吾校當年都幾多人鐘意古生唱歌,感覺就似大哥哥咁,又真係無乜人當佢偶像咁拜…咁佢當年係sell唱歌,風格清清新新的,在當年一堆「我很靚仔」的偶像派當中係幾特別,可惜轉去eei之後越整越頹。
      我覺得《愛與夢飛行》係古生清新年代一個總結,轉去eei之後佢開始求變,曲風多樣化咗好多,《有你一天》、《天氣會變》幾張碟都好唔錯的,不過可能偏離咗大家心目中的鄰家小男孩型像,市場都好似唔太受…嗚…
      《喜歡》那隻碟我好少聽…點解呢?﹗哈。國語碟我最喜歡《路邊攤》,張震嶽寫的《幸福號列車》古生唱得太有型了﹗耳目一新,另外《放下》我覺得係慘到無可再慘,但佢唱來又唔會覺得佢作狀…我諗古生而家唱番,好難有番當年既真摯…
      而家的歌我覺得商業計算太多,好似為獎而出歌,總覺得把聲係一樣,但個人已唔係當年我喜歡聽那個人囉…
      1st Oct 2008 23:54 PM

      刪除
  7. 漫遊天地 因偶然結識你
    現實允許一起走幾千百里 親疏也有限期
    別離滋味 只怕無法緊記
    日後你跟多少新相識一起 憑何妒忌
    好耐無睇你個blog...仲記得我問??

    23rd Mar 2009 17:16 PM

    回覆刪除
    回覆
    1. 梗係記得啦…
      睇番呢篇文真係時光飛逝啦,基哥哥新碟快出了…
      聽咗幾次《以你為榮》…感覺都ok…好鬼似係為演唱會結尾萬人大合唱而設的說…
      23rd Mar 2009 23:13 PM

      刪除

要講幾句嗎?﹗XD