2012/05/31

追星是…

追星是…
  • 追星是,見到有product出唔買會身痕…(買唔起去摸吓個真身都好…)((又或者睇相以慰相思,或者睇完相就發現其實無必要買(((通常原因是巧貴…唔捨得,如這個,但其實包括了三地的asia tour總共四隻碟,才六百幾蚊除番都係百幾蚊隻咋喎﹗)))之處…自我安慰…))
  • (16/07/12後按:這個四隻碟的10年tour dvd終於忍不住敗了,不過叫tour不如叫fm囉,真係表演的片段少之有少(一隻碟),其餘三隻都係唔同地方演出前後啲花絮同埋睇某人發癲(笑)…呃…)
  • 追星是,財散人安樂。但將戰利品都攤在床上(如這個這個)的時候那種壯觀是可補銀包乾硬化帶來的空虛既…(笑))
  • 追星是,每次都處於日版 vs 台版,cd only vs cd+dvd的人生交叉點。想聽之而後快但又唔想俾咁貴,想多首歌又唔想miss咗隻dvd…(某人出完碟…下個月到安室了﹗錢呀﹗我的錢呀﹗btw,佢二人今年都係出道20周年,咁啱﹗)
  • 追星是,明明覺得好貴,只要等吓就會有平版的東東,買到手還是覺得很慶幸(灣仔價平網上買50蚊﹗)
  • 追星是,見到雜誌彩頁影得靚會好想買嚟儲(屋企幾十萬本日雜卒之俾我cut晒安室/光一彩頁出嚟淨番就掉方式解決,無計,佔位多呀﹗),珍而重之的剪好放在folder內,但其實唔會點拎出嚟睇的說…(18/02/13後按:我還是因為內頁圖令而托人遠道替我從泡菜國買了本鬼咁厚的雜誌回來…)
  • 追星是,無時無刻拎住手機check微博睇bbs/相關blog update新聞,唔睇唔c服(明明我不在現場,但某人來北京時的相洗盡微博版…我好似都知說佢行程的了…笑)…而且仲會不停對住電話傻笑…
  • 追星是,一條龍睇/聽番晒中招對像新舊作(經典之作是:一個暑假買盡kinki kids的A-E album,而且全部是100蚊以下((有些是日版二手,新碟就係台灣版)),可一不可再)((不過single沒買齊,當年3吋難搵,復刻又無興趣買了…家陣主打都係儲番Album和Con DVD,話時話,J Tour和Family Con都未買番的說…)) 
  • 追星是,無論作品有幾爛都會完成佢…(雖然我常說《》難頂,但諗諗吓光一王子的《和弦,愛的盡頭》先係終極難頂啊﹗呢套我真係睇到想棄劇…)
  • 追星是,將所有歌在最短時間內聽到曉跟住唱(不過up唔出歌名…哈) 
  • 追星是,將所有戲/劇在最短時間內睇完又睇睇完又睇睇完又再睇…(經典之作是…95《神鵰》有一節我睇到背得晒啲對白出嚟兼可以寫埋走位…哈哈哈﹗真係讀書又唔見我咁叻…)
  • 追星是,一條龍舊作發現精妙之處但人家已在追新野,暗怪自己做乜唔早啲中招…(通常我都係有時差既…XD)
  • 追星是,一條龍舊作想買番時發現絕咗版…好唔開心﹗
  • 追星是,見到對像開演唱會會恨不得飛身去看,人一世物一世…(安室15年重踏dome台板開con呀﹗而且演唱會曲目重由歌迷投票添﹗攪到我想返屋企開隻《Concentration 20》出嚟回味添)
  • 追星是,被對像的品味影響了…(其實我比較喜歡間條/格仔多於豹紋囉…哈哈,同埋…雖然我唔認…但被琴miss篤爆咗…我對瘋瘋的突然欣賞是因為…呃…)
  • 追星是,當咗自己係宣傳部人員,不時向身邊(粉or non-粉)推介對像的出品(當年我成日逼同學聽kinki啲歌…哈哈哈,而家小的比較soft-sell架啦,都係fb貼youtube啫…)
  • 追星是,會做出很多莫名其妙的事…(如…這個這個
  • 追星是,年少時以為大個會減退熱情(無疑,買野是比較審慎,以前小的係夠膽死有幾多錢喺袋就買盡),但一把年紀反而追得更瘋… (我諗我開始明白當年熱愛黎老闆的姨姨輩心理了…)
  • 追星是,如果能夠和真人見個面/影個相/簽個名,會覺得三生有幸,家山有福,感謝祖宗十八代積下的福讓後輩能享…(還是很後悔中二時唔敢跟古黑子拎簽名…明明阿娘都叫我去架啦…嗚)
 因緣際會曾經拿到古眼神的簽名,但那個…唔記得放咗喺邊了(果然我已經唔喜歡佢了…)。反倒是圖中這個,幾廿歲人鼓起人生最大的勇氣跟簽名的人講「你可唔可以幫我簽個名」,佢動筆簽時…看倌們想像到小的內心有幾雞冬呀?﹗(如果佢唔簽…我諗我會唱衰佢…哈哈哈)

雖然,我最熱愛佢既時候…講緊小學,是n咁多年前的事了…但得到手的一刻還是很…雞冬囉﹗

就是說,我這個人很consistent。

20/01/14後按:這是最新的代表作

36 則留言:

  1. 原全明你講咩! 我都係kinki kids飯 (不過我是剛), 上當年同一隻single 2個唔同封面都照買! 依家都係成屋日文雜誌, 仲要有膠袋單獨入住, 唔捨得掉!
    無啦啦又愛上韓星, 學緊日文又想學埋韓文... 冇錢去韓國, 但癲到出機票去台灣睇concert! 日日係discuss fans版度吹水, 等人翻譯韓文twitter/fb!! 晚晚都上youtube, 翻睇又翻睇d綜藝同music show!

    回覆刪除
    回覆
    1. kinki粉?﹗握手﹗(其實在唱歌嚟講剛的歌聲比好聽啲,早期光一成日走音邊緣,LIVE好恐怖…)…買碟我好孤寒…(XD)…好似除了光一04年個SOLO CON買過日本版(6百幾蚊﹗)之外我無乜買過日本版…album就算係買日版都係普通唔會買初回…,相集雖然靚啲,但係我好少揭,啲歌rip晒落mp3又唔會再聽隻碟既,都係得個擺字,買番嚟的意義就係儲齊個collection而已…日雜都好耐無買啦…幾十蚊本積少成多,有一水我係wink、duet、幾本j+人實上封面的雜誌期期買,好癲…哈…

      你也迷緊韓星?﹗哈﹗我好衰,唔鐘意聽/睇啲唔知佢做乜既野,所以當年先走去學日文…而家不幸中了韓星招,歷史就在重演了…唔敢講韓文會學得幾耐,不過至少讀得到啲字,方便買野認名嘛…哈哈哈﹗

      刪除
  2. 追星是一個無底洞呀~~~!!!

    回覆刪除
    回覆
    1. 最新呢個無底洞中足5個月﹗

      刪除
  3. LoveGeunSukForever1/6/12 01:12

    追星是一個無底洞呀~~~! X1 ^_^

    絕版舊作可以在這裡找到,但是比較貴和只有日文字幕....
    http://www.yesasia.com/global/the-happy-life-%E5%BC%B5%E6%A0%B9%E9%8C%AB%E4%B8%BB%E6%BC%94%E9%9B%BB%E5%BD%B1-%E9%9B%BB%E5%BD%B1%E5%8E%9F%E8%81%B2%E5%A4%A7%E7%A2%9F-%E6%97%A5%E6%9C%AC%E7%89%88/1025588520-0-0-0-zh_TW/info.html

    你最熱愛佢既時候是小學,我是在中學呢...真是時日如飛,今天在我心裡是充滿褪不褪的記憶..哈哈哈.

    你有看過佢跟俊俊的合照嗎?我看到的時候也很雞冬..兩個不同年代追過的星站在一起.佢一點也沒有輸掉呢!!! 哈哈哈

    回覆刪除
    回覆
    1. 哈,謝謝你從微博來吾博留言啊~

      《快樂人生》日版都有search到呀,日文字幕都ok…不過4百幾蚊…加多百幾二百就可以買asia tour隻dvd boxset喎﹗(對不起我是孤寒的…哈哈)…嗚…search嚟search去看來某人的舊作都無港版碟出過,得《梨泰院》有咋喎…(好在買咗﹗)

      嘩﹗《深愛著你》﹗哈哈哈﹗我超喜歡這首歌啊﹗"佢"呢,其實係某次佢喺我司樓下拍戲休息時我行過就冒死搵佢簽名,仲要身上無紙只有幾張要做的文件,隨手拎了一張俾佢簽,跟住返到office就同同事講呢張我唔俾得你…交影印得唔得﹗哈哈哈…

      我沒見過佢同俊俊的合照喎﹗等我search吓先…俊俊會唔會高過佢好多呢?(sorry,高度真係佢死症)…不過以4字頭的佬來講,佢真係keep得超好呀…

      刪除
  4. 追星是,其實好痛苦,無結果,無限地獄,不過好似我呢d電車男,好難識女仔,難得可以見到自己鐘意既女星,都好想見下佢。

    雖然而家無追星,不過都心思思

    by無敵

    回覆刪除
    回覆
    1. 咁大鑊?我追星還追星,現實交朋結友係另一回事,可以當面見吓明星真人梗係好…不過都係得個諗字啫…

      刪除
  5. 尋日我買左少女時代日本演唱會dvd,都好白痴,上網有得睇都買,心情唔好總想買啲野,買左返黎又好不外如事,不過少女時代十月弓真係正,求期比個我做老婆都制 by無敵

    回覆刪除
    回覆
    1. 唔係呀,就如我買咗某人隻cd一樣,網上四圍都可以下載,但拎住實物係唔一樣既呢…

      刪除
  6. 最近有諗d白痴野,其實明星有咩作用?
    又唔係保衛地球,又唔係保衛銀河系,佢地有咩用?仲可以賺咁多錢。
    其實我諗到既作用,都係諗到d咸濕野,不過我唔講 by 無敵

    回覆刪除
    回覆
    1. 鹹濕野﹗哈哈哈…

      其實作用呢個問題我都有思考過,而家煲劇追星對我來說係現實的逃離,投入去劇入面既世界可以relax吓咁(所以我唔prefer睇悲情片囉)…咁睇戲迷明星時幻想吓呢幻想吓路咁,唔係邊得嚟夢工場呢個名…

      刪除
  7. 我建議整d機器人出黎做伴侶

    咁想佢幾靚都得,又可以好似手機咁隨時換……(真係做電車男做到我瘋左)

    做電車男真係好慘……

    回覆刪除
    回覆
    1. 你有無睇小出惠介同綾瀨遙套《我的機械人女友》?
      exactly就係你講的這個suggestion喎…

      刪除
  8. 又唔記得打名,上面係我講

    by無敵

    回覆刪除
    回覆
    1. 看來blogger是要有gmail 先可以SAVE資料咁…

      刪除
  9. 無睇過,不過都估到套戲大概講咩,因為差唔多既電影都聽過,真係天下電影一大抄。

    不過我話用機器人代替伴侶,都得個講字,講咩都無用。

    BY無敵

    回覆刪除
    回覆
    1. 得閒幻想吓咁啫,啲戲都係咁諗出嚟…

      刪除
  10. 我以前都有儲彩頁架, 但屋企真係太無位, 而家係將彩頁全部scan入電腦就算lu~

    我同你應該差不多年紀(我估既 XD), 但我都係仲追緊星, 近這幾個星期無啦啦有個新偶像 @@, 仲要係不嬲唔聽開的日本band @@ 而家好頭痕, 見佢地一隻演唱會dvd成五百幾蚊,box set成千蚊,真係唔知點算=='

    ps...大大有冇介紹邊度買日本歌手dvd平.......我去信和睇過下, 好似一d都唔平呢....

    回覆刪除
    回覆
    1. 我都好想SCAN,但我真係太懶,以前儲古天樂儲咗幾本clear folder,發晒黃…搵日真係要攪攪佢…

      哈哈,其實從我迷偶像的路線圖都推算到我幾多歲架啦(一把,就嚟可以拎長者卡和生果金…)…咦,日本band?迷日星真係好需要錢,yen貴之餘,啲product又懶精美,初回之餘仲要特典版和普通版,人生交叉點嚟架﹗(諗起當年有個friend勁迷步姐,見佢一星期出一隻single佢買到扯頭髮…XD)…

      其實…要平…是…等…台灣版﹗(被打)…DVD我唔太捨得買初回,其實我好少睇的,通常都係買完返嚟即刻睇一轉,跟住就擺埋一邊的了…。如果係買我一係去集成(灣仔),家CD店啲價錢都幾相宜(加之於我好少過海…我是島民啦),同埋而家我好懶成日儲埋一堆先買,有啲過咗氣的可以過隔離188啲二手店睇吓有無人放,好運起上嚟可以平幾十蚊架~

      刪除
    2. 日元真係太高企, 仲要有太多版本, 我隊偶像最近出返哂以前演唱會的box set...box set就係爭個少少唔知乜野的幕後花緒同場刊..就爭成倍價錢喇==''

      我唔知我個隊會唔會有台灣版==', 因為我見台灣版多數好多都係嵐,winds個d~ 我個隊老野黎架~~唔知仲有冇台灣巿場呢~

      哈哈,我細個都係鐘意郭富城,所以我估我們差不多呢 :p

      刪除
    3. 老唔老得過我隊kinki kids先(咦…是我的嗎?)…好多暗星都有出台灣版架喎,你check吓yesasia博客來那些有無?好多奇怪中文版架可能有…

      台灣市場臥虎藏龍度係我地想像之外既我成日覺得…

      哈哈哈哈﹗細聲的說:我拎城城簽名時太開心同佢講:我小學已經鐘意你…佢長吓了一聲囉…

      刪除
    4. 提起郭富城, 忍唔住講兩句 (搞到好似chat room 咁添 @@)

      話說我第一次睇郭富城演唱會, 同學們都走出去握手,而我自己就覺得同偶像握手冇乜大不了既o者, 本來冇諗住去握,但人做我又跟住做啦, 點知握完後好鬼開心==''

      仲有2009年個次,我今次就真係冇去握手,但近距離見到佢個靚仔樣,我個心都開心左2下^^

      刪除
    5. 不要緊…隨時歡迎大家來CHAT呀~

      其實咁多年以來我只看了07年演唱會,仲要係人家比我的飛(呀…果然我唔係真心粉了…哈),都幾前的貴飛來的…咁握手位我唔理阿媽自己衝咗去握手…又真係握到…超開心…好記得握手位時唱既係《絕對美麗》…我至鬼憎的「法國美國與英國」…啲歌詞爛到呢…

      但其實我最鐘意係佢杜拉格斯頭個年代,由台灣回流香港到《鐵幕誘惑》那幾年,嗰時佢都仲未得大眾認同佢係天王,到佢真正大紅時…我已經轉咗去支持白面古天樂了…XD

      刪除
  11. 講起追星真係忍唔住潛左咁耐水做CD ROM都要浮一浮面
    近日追開上鎖的房間
    一個唔小心就中左大野智招再踩埋落嵐個tum度
    近呢一個月已經差唔多做晒你上面提個D唔理智既事 (係爭在仲未捨得比錢買返以前D碟...但我已經想儲錢飛日本...)
    發現人雖然有返咁上下年紀但心中個團火真係唔一定會熄滅(orz)
    而且當我唔只飯一個團的時候真係會覺得自己忙到分身乏術架! (咩結論!?= =)

    回覆刪除
    回覆
    1. 哈哈哈,我鐘意你話心中團火唔一定會熄﹗我覺得而家大個咗自己搵錢,有少少想補番細個唔夠零用錢所以放肆地俾自己去買追星的物品…好危險呀咁…

      你中嵐的路線就如我想年唔覺意睇到《沒有天使的街角》而中光一招再唔覺意中埋kinki kids招,當年仲係學生無錢去旅行啦,所以就買番晒啲cd和影碟補數咁…

      分身乏術我都明呀,好在張根碩套劇剛播完,而家無記又播陳展鵬,好在唔係疊住出,唔係我都唔知睇得邊個﹗哈哈哈﹗

      刪除
  12. 自己搵到錢真係好難忍手,百幾蚊隻CD,幾十蚊本雜誌,成日同自己講食餐飯都冇左啦,結果不自覺冇左好多餐飯...XD不過我未過到買日版個關,實在太貴

    查實我當年都迷過一下子剛,一條龍睇晒佢既劇,好神心咁用D零用黎租VCD,但就無留意過kiniki,但近黎睇返一兩集新堂本兄弟,發覺佢地2個真係好有趣,又好睇XDD (其實J家既質素真係唔錯,只係近年就...)

    BTW我為左睇佢地又重拾返丟低左好耐既日文,所以話追星真係會令人好好學!

    回覆刪除
    回覆
    1. 我明,我明,我都明呀﹗我竟然因為封面張相而走去買《女性自身》…我從來都無買過呢本雜誌喎﹗哈哈哈…

      日版single我有買過,通常係心急等唔切,百鬆啲蚊倒,都可以既(不過得兩三隻歌囉),cd或tour dvd就要諗過,平極都要二百幾三百,積少成多,諗落都係一條數…

      kinki二人係一凹一凸,互相補位,幾奇妙的,不過呢幾年我無心機追《堂本兄弟》了,又唔買雜誌,只係等佢地出碟,加之於佢二人又唔拍劇,覺得佢地好摺…(於是我就分心去追其他星囉…)…

      當年我就係想聽/睇得明佢地講乜而學日文的,so far聽歌勉強明啦,睇劇仲未得…好沮喪…仲走去開多條泡菜文的戰線…我好變態﹗哈哈哈﹗

      刪除
    2. 其實到而家我都理解唔到日版single,可能比香港一碟10隻歌縱壞左,不過偶爾都會買,但有時一碟2隻歌仲有一隻唔好聽既時候都真係會灰左XDD

      同感佢地好摺..一直以為佢2個搵夠收左山,後黎先發現原來仲有繼續出單曲同做綜藝...(就好似瀧澤冇再拍劇之後以為佢收左山,點知原來佢轉戰舞台...)

      泡菜國暫時未吸引到我,比當年套誠俊哥嚇到我(雖然我知而家D韓劇已經唔太係咁,但心入面仍然KEEP住拒絕韓劇XD) 而且我覺得泡菜文好似講得仲快過日文,有時睇泡菜D綜藝我竟然追唔切字幕,太厲害了!!

      刪除
    3. 日本single的銷量都麻麻,所以而家走向賣大包路線,一係送dvd,一係整多幾隻remix咁囉…

      光一咪年年countdown完就去shock,於是年年年中之後先出歌…有成大半年唔知佢做緊乜…不過舞台劇對j+人嚟講都係一個重要項目,如果覺得佢地ok真係會放心俾佢地做…可憐我呢啲海外粉就完全唔知佢地做緊乜囉…

      我係因為某韓星先開始接觸泡菜國既野,咁啲劇有婆媽野都有唔婆既,反正呢幾年啲日劇好乏味咪開吓其他野睇,而其實呢個韓星又成日去日本賺yen(剛出了日文碟),攪到我覺得自己好似迷緊日星咁…(感覺良好啲)哈…

      刪除
  13. 因為新年期間看了原來是美男,被張生迷倒了,網遊找到這裏來,同感明星不過是帶一個夢給觀眾去短暫逃離現實的世界,只是夢而已,所以我很少真金白銀去支持喜愛的明星啦,最多是花一點時間找一點訪問和相關報導來看看了解他多一點吧!

    #張生作為一個演員,我十分欣賞,他可以輕易駕馭不同角色,但只是從原來是美男開始,就過於耍帥,或許年輕或許出道十多年才一嚐當紅的滋味,所以極力維持其花美男形象保持人氣?
    #張生作為一個歌手或表演者,恕我接受不了他過於妖艷的形像和嘈哄哄的電子音樂,看到這樣的他我會打冷陣,聽到他這樣的歌我會覺得很煩。
    #看張生在某些訪問散發出的淡定和自信,和他浮誇的表面不大相襯,哈哈,看來他也沒有想像中的輕浮,不過我有點受不了他某程度上的過份自戀和太看重人氣的得失,他說過人氣如泡沫,當有一天失去了不知怎算,愈看得重得愈易失去呀!
    #張生的主要戰場在日本和內地,反而在韓國的人氣麻麻,怪不得旅行時到樂天免稅店拿到的免費紀念品都印有他的肖像,原來是供大部份的遊客作紀念。
    #張生的日文十分流利,可以把翻譯冷在一旁,至於中文就需加倍加倍加倍加倍加倍努力!其實不懂也沒關係啦,反正曾到內地拍戲的韓星都不懂中文,期待他會出演內地的劇集,片酬高之餘,他在內地那麼紅,收視應不會太差吧!
    #初看愛情雨的大綱就有點熟悉的感覺,後來看了維基就恍然大悟,原來是参考了多年前的愛情電影──假如愛有天意,這套電影我不大欣賞。張生接拍這部戲應該是因為班底吧,尹鍚湖導演始終是韓流始祖的領軍人物,他的四季代表作中的藍色生死戀和冬日戀歌我都可以勉強看完,其實冬日戀歌的劇本不差,否則日本師奶也不會看到如痴如醉,只是這個編劇太會拖戲,簡單的劇情都可以拖好幾集,拖戲可以說是這個編劇的特色,我不敢再領教愛情雨了。

    回覆刪除
    回覆
    1. re:五月

      嘩﹗你好認真的說﹗謝謝你的留言啊﹗好詳細﹗

      《原來是美男》真係好夢幻的,首先我真覺得有乜理由睇唔出高美男係女仔呀﹗當年我睇《金枝玉葉》已經有呢個疑問,經理人幫佢隱瞞性別嗎?咁入醫院就穿煲架啦喎﹗不過《美男》可能係因為哥哥參加比賽在先,只係爭佢簽合約,所以叫妹妹去畫隻龜就可以了…

      其實我都比較欣賞演員身份的張某人,睇番佢以前啲劇,可塑性係好大,鏟頭演rock友(《快樂人生》)後又可以做陰沉王子(《洪吉童》),據說佢當年為了演《貝多芬病毒》而推了韓版的《花樣男子》,但據說《貝多芬》男二的感情線和對男人的師徒情,角色唔多討好令佢流失好好多粉絲,反倒是另一套偶像劇《原來是美男》令佢彈出了…好似你咁講,可能佢覺得人氣得來不易,於是之後接了《瑪麗外宿中》,路線都係偶像劇feel,角色又係歌手…只是呢套和《愛情雨》收視都唔好…或者係咁,佢寧願做歌手多過拍劇了…

      我覺得佢成名路有啲似里安納度,一路都搵唔同角色嚟演,但偏偏令佢大紅的係一套商業/偶像劇,紅咗令佢可以選自己鐘意既野,不過張某人無好似leo哥咁繼續演番啲奇型怪狀戲,反而走去做歌手了…嗚。佢既日文碟路線我ok,韓文的team h啲yoyoyo我就唔識欣賞了…

      我聽博友講過,佢喺韓國唔太有人氣係大眾覺得佢囂張,而且佢日本有人氣,令人覺得佢已經唔屬於韓國。加之於佢係童星出身,大家睇咗佢十幾廿年其實已經無乜新鮮感,迷佢既可能都係呢幾年佢大紅先留意佢的,但為數唔多,支持唔到佢啲劇既收視…

      我估,拍劇咁辛苦收視又唔好,佢索性去唱歌開concert,起碼俾得錢入場既都係真心熱愛佢既…,又可以現兜兜收錢(仲可以出好多精品添﹗),佢都過咗廿中,離30歲仲有幾年,呢幾年可能要趁服兵役前賺盡,可能要等服完兵役先可以見番演員張了…

      妖艷look應該係佢真心鐘意的郁呀,睇訪問佢話佢細個受visual rock影響,所以佢鐘意呢個曲風,我諗佢啲眼線郁都多多少少受影響吧﹗

      我本身唔鐘意《生死戀》啲路線既韓劇,《愛情雨》我追得好辛苦,以為過咗70年代個懶係生離死別愛情故事後,現代版轉番型look應該會好啲啦,點知仲拖拉仲難受…我真係寧願睇十萬次《瑪麗外宿中》啦﹗(上年我係先睇呢套而中張生招的…

      刪除
    2. 我沒有看過《瑪麗外宿中》,網上簡直是一致劣評,我不會為一個喜歡的演員而看一套爛片,但是曾有博友說過,張生在短時間再接相同性質是對自己的演技有信心,有能力把這兩個角色演來判若兩人,在那位博友眼中姜無缺完全沒有黃泰京的影子,不知你認不認同?所以我猜張生接這戲的目的是在挑戰自己吧,而且剛巧女主角是文根英,兩人都是童星出身,或許張生想和她合作已久呢。

      韓國人學日文較我們有優勢,他們的語言簡真來自同一語系,我們可能要比他們花上十部的努力才有他們的成績呀。話說回來,張生應該都有一點語言天份吧,能全面掌握一種語言絕非易事。

      刪除
    3. re:五月

      因為我是偶然在j2看到《瑪麗》的廣告,唔覺意看了一點就中張生招,之後先睇番張生其他舊作,所以我是在唔知劣評之下看的,雖然劇情中後段是頗不合理兼且眼火爆,但我係幾鐘意張生和文根英呢個組合,而且中招嘛…於是我係翻睇又翻睇的…

      咁無論性格、造型無缺和泰京都好唔同既,共同點係大家都係組合的leader和男一…個女一點都係唔理男二會鐘意男一囉…。其實睇故事大綱是ok的,不過韓劇好多時都係一路拍一路出劇本,所以無辦法啦,拍落先發現中招已經太遲了…而據說,個結局係張生有份改的說…

      都係呀,我學過日文之後去學韓文,的確係相當的相似於是我喺文法方面係幾輕鬆。

      張生的語言天份真係幾勁,佢喺《梨泰院殺人事件》全英文演出,友人說口音有點奇怪但我覺得ok呀,日文佢應該係拍《鬼來電》前後學的(話為第時進軍日本準備喎,不過呢套戲入面佢係啞的只做手語不用講日文…),而家學到可以唔用翻譯上節目所以我堅覺得佢勁﹗

      據說佢而家學緊中文,新碟仲有首中文歌《feel the beat》添…不過無字幕唔知佢唱乜…囧﹗

      刪除
  14. 有空會繼續留意他的消息,也會常來你這裏,你的網誌內容很豐富呀。

    我追星只會追蹤他的消息罷了,其餘的就交給你們這些忠實粉絲好了,其實我看別人去追星看得很開心,而我就真沒有這份熱情了,努力呀!

    回覆刪除
    回覆
    1. re:五月

      哈哈,雖然我成日發文都會講到佢,但佢老哥繼續喺度team h yoyoyo都喺度挑戰緊我容忍限度架﹗

      呀,講番你上一個留言,好surprise佢日文可以咁勁,勁到連翻譯都唔使就可以上日本電視台節目,這令我都決心要學好日文…我成日就咁聽都聽唔清,要睇歌詞紙先得呢﹗

      其實我唔算好熱情追星,都係睇吓新聞追吓劇聽吓歌就算,最多都係有鐘意的歌手嚟香港就買飛睇演唱會,其餘的都不會特別追的啦~

      刪除

要講幾句嗎?﹗XD